Nancy, tamainni ihivriuqtikput unalu Odile, atannguyaqqut tuhaupmapkaitjutini, qangannuaq utiqtut takuyaqturnikkut inulramminik hulinikkullu havaktinik nunallaani Igluligaarjukmi Kangiqlinirmilu. Hamma Nancy-m uqautait aquinirmikni:
“Kivallirmun aullaarniq alianaqpiaqtuq ilitturipkaqtitaatigullu quvianaqpiaqtunik inungnun. Igluligaarjukmiitilluta uqaqatigivaktavut havaktiit ilihaqtullu uvani Victor Sammurtok Iliharvikmi. Uqaqatigivaktaqqaullu ihumagittiariyauyuq inirnighaq tuniyaatigut nakuuyunik ilitturipkaitjutinik nutaratigut inulrammiitigullu Igluligaarjukmi. Pulaatipkaqtauyugullu uumunga Naja Isabelle Home uqaqatigivakhugillu kaffiuyuq aallat hulinikkut havaktiit. Muqpakpaktunga ulapqivikmi unnukmat unalu Odile katimaqatigivaktait arnaruhiit uuktuuqtipkarhugu kihitinikkut ayuirhimaniit! Quvianaqpiaqtuq aquiniq.
Kaffinin kinguvaqtittinikkut hilarlungnirnin, utiqtugut Kangiqliniqmun. Tahamaniitilluta, pulaaqpaktavut kaffiuyuq hulinikkut havaktiit piyumapluta uqautainnik nutaqqanun pilaarutinik, tunivaktugullu ilitturipkaitjutikhanik havakviptigut hulivaktaptiknilu. Northern store-miitpaktugullu talvani takuvaktugut ikittunik nutaqqanik angayuqqaanginniklu. Aquiniqqut Kangiqliniqmi naittuugaluaq kihimi quvianaqtuq takuyaami ilihimaqpiarumanirmi hulivaktaptikni ikayurnikkut nutaqqanik inulrammiinniklu.”