Ilihimavit tapkua tamaia nutaqqat inulramiit pilaarutiqaqtut, ilaujuq ILVIT! 
Nutaraq pilaarutinginnik hunavaluit tamaita inuulrammiujut piqaqtukhaq, piinarilaqihimajukhaq nakuujumik imaq imiqtakhaanik nakuutqiamiklu niqinik, hunavalungnikluuniit pittaaqtaminik, iliharumajut piluni maliktakhangit uqauhiminik. Piinarilaqihimaluni hapkuat hunavaluit ikajuqtait nutaqqat, inuulrammiit, ilangillu nakuutqiamik pigiamingni inuuhinirmini, ikajuqtait angiklijuumiriamingni piliuriami pittaaqtumik munarijumiklu inungnik ikajuqtait inmingnik, ilamingnik, nunagijaminiklu.
Tamaita inuulrammiujut piqaqtut hapkuat pilaarutinginnik humaangittuq kinaujaakhaanik, humi nunalik, hulijut angajuqqaangit, kitunik uqauhiqaqtuq, humut angaadjuliaqtuq, angutaugumi arnaugumiluuniit, huna pitquhinga, timimitigut aaniaqarumi, maninnagumi maniitkumiluuniit. Kitut nutaraq ihuittumik pijakhaungittuq humaangittuq huuq, uqaqtaungmat Ilanga 2 uumannga United Nations Katimajiit Pilaarutainut Nutaqqat.
Piittuq inmikkut pilaarutinga akhuurutaulluaqhimangittuq aadlanit ilaanilu atauhiq pilaarutinga pingitkumi, atuqtaunginnaqtuq qaffiujut aadlat pingitkumik.
Ilihimavit tapkua inulramiit inuit pilaarutiqaqtut, ilaujut pilaarutit ilihimalugit pilaarutitit?
Nutaqqat inulramiillu piqaqtut amigaitunik pilaarutinik.
- Pilaarutiqaqtutit aanniarnaitunik nirijakhanik, halumajumik imarmik, aanuraanik uquuqutikharnik.
- Ilvit pilaarutiqaqtutit tuhaajaulutit uvalu inirnirit havaklutik hunanik nakuutqianikkut ilingnun.
- Pilaarutiqaqtutit ilaulutik tamainun ihumaliurutinun havaktaujut ilingnun.
- Pilaarutiqaqtutit qajangnailrumiilutit. Kinapliqaak aaniqtakhaungitaatit iqaijarnikkut, ihumakkut, huaktuqlutiluuniin irhinaqhaarnikkut aanirnaqtumiklu qanuriliurutikkut.
- Pilaarutiqaqtutit inuulutit qajangnaitumi iglungni ilangni tapkua piqpagijaatit.
- Pilaarutiqaqtutit ikajuqtaulutit humi ihariagigungni.
Titirarniaqigit tamaita 42ngujut pilaarutit tapkua inulramiit inuit piqaqtainik? Titiraqhimajunun, naqilugu hamna takujaarni una United Nations Katimaqqjuarutaanun Pilaarutainun Nutaqqat.
Inulramiit inuit munarijaujut
Munarijauvit? Tiguaqtauhimavit? Najugaqaqqit ilangnik talvuuna kavamatkut ihuaqhaqtaagut/angirutikkut?
Ahiniitkuvin ilailrumi, piqaqtutillu akhuungnaqtunik pilaarutinik:
- Pilaarutiqaqtutit najuqlugit angajuqaarni (s), kihimi nakuungitpat ilingnun. Pilaarutiqaqtutit najuqlugit ilatit tapkua piqagijaatit munariblutillu.
- Ahiniitkuvik angajuqaangilrumi, pilaarutiqaqtutit atautimukhimaluhi aadjikutaani najugaani, qajangnaitpat taimailiuriami.
- Pilaarutiqaqtutit tunihilutit ihumagijarnik uvalu inirnirup naalaklutik uvalu akhuurnikkut ihumagilugit.
- Pilaarutiqaqtutit munarijaunirmun munaridjutinunlu tiguaqtauhimaguvin munarijauguvinluuniin.
- Munarijauguvin uvaluuniin aalat qauriniitigut ahini, pilaarutiqaqtutit pidjutigilugit inuunirmun ihuaqhaidjutinik ihivriuqtauhimaaqlutik ihuarnikhainun ilingnun.
Inulramiit inuit ilaujut maligaliqinirmun
Hunamik ihuinaaqhimavit uvlauuniin ihuinaaqnahuginirmun? Ajuqhautiqaliqqit maligaliqinikkut? Tadja hamaniitpit Isumaqsunnigittukkuvik Inulramiit Itiqtauviani?
Taimaangugaluaq ihuinaaqhimagaluaqtilutit uvaluuniin ihuinaaqhimaguvin, pilaarutiqaqtutit.
- Pilaarutiqaqtutit maligaliqinikkut ikajuqtaulutit uvalu ihuarnikkut pidjutaujunun maligaliqinirmun auladjutainun tapkua pittiarutiqaqtut iingnun.
- Pilaarutiqaqtutit avaliingaarumaguvin.
- Pilaarutiqaqtutit tunihilutit ihumagijarnik uvalu inirnirup naalaklutik uvalu akhuurnikkut ihumagilugit.
- Pilaarutiqaqtutit qajangnailrumiilutit. Kinapliqaak aaniqtakhaungitaatit iqaijarnikkut, ihumakkut, huaktuqlutiluuniin irhinaqhaarnikkut aanirnaqtumiklu qanuriliurutikkut.
Ilihimavit tapkua nutaqqanun kivgaqtiujut ihuaqtut ilingnun?
Itquumajuq, havaktugut ilingnun! Havaarijaqqut pihimalugit inirnirit ukualu kavamat havaklugit hunat nakuutqiat nutaqqanun inulramirnunlu. Piumajugut pihimalugit pilaarutitit ikajuqtaujut ihariagijatillu pidjutaujut.
Humi havaqatigigupkit atauhiq nutaqqat kivgaqtia, imailiuniaqtut:
- Naalangniaqtaatit uvalu turaangalutik hunat akhuungnaqtut ilingnun
- Apirilutit hunat piumajatit ihariagijatillu
- Uqautilutit qanuliuqtaaqtut ilingnun
- Kiulugit apirhuutitit ilingnun kangiqhinaqtumik
- Ikajuqlutit uqariarni aalanun hunanik ihariagijaqaqtutit
- Ilauqatigilugit katimadjutini
- Hivajaffaaqlutik ilingnun
- Katimaqatigilutit humi mihigijarni qanurinaaqnailrumi
- Ikajuqlutit pijaangini kiudjutit apirhuutingnun
- Naunaijaqlugu hunat hiamitiqtailinirmun naunaijautaa
- Naunaijaqlugit hunat kangiqhijaarni
Havaaqqut pihimalutit piqaqtutit taimainik ihariagijarnik pilaarutiqaqtutillu hapkununga.