Nipinga inulramiit inungnin: Titiraqhimayuq 2021mi auyami ilihaqtunin


Qiqaijarluarvia 24, 2021

Qanuritpa inulrammiunirmik, Nunavunmi, aanniarutaudjutaani COVID-19 qalagjuarnirmik

Amigaittut nunallaat Nunavunmi avalingaaqtukhaujut imaalu ihumaluutigivaktaqqut aanniarut COVID-19 qalagjuarnirmun.

Inulrammiupluni Nunavunmi aanniarutautitlugu inmigut ajuqhautiqaqtuq imaatgut tuningunaqpiaktuq, umilrunaqtuq, imaalu pulaalimaittuta ilannaptingnut ilaptingnutlu.

Hapkuat ajuqhautaugaluaqtitlugit, qanuriliuqtaaqtutit munarilugit timikkut ihumakkutlu inuuhirittiarutikharnik. Tunijauhimagapta piniqpiaktumik nunaptingnik Nunavunmit, uvamnik tuninguiqtirivaktunga nunamut pihuujakhunga, pihukhunga, aullaaqhunga maniqqamut, iqalukhiuqhungalu, imaalu aullaujakhunga hulilukaakhungalu! Aallaniklu hulilukaanginariaqaqtutit iliharlutit igaujarnirmik, miqhuujarnirmik, anguniarnirmik, aallaniklu amigaittunik!

Itqaumavaglutit ilingnik munaittiaqpoaglutit imaalu uqarvigilugit ilatit/ilannatit uqarvikhailiuruvit.

________________________________________________________________________________________________________________________________________________________

Qiqaijarluarvia 17, 2021

Akhurnaqtuq inulramiit Nunavunmiutat ilihimayukhat pidjutigiyaingit nutarauplutik inulramiutauplutiklu. Malrunguyut pidjutikhangit, Nunaqyuaptingni Inum Pidjutigiyaingit unalu Nutaqqat Pidjutigiyaingit.

Nunaqyuaptingni Inum Pidjutigiyaingit aulayuq taimainun inungnun humiliqaak biibiinuatlu iningnikhanun qitkumagaluaqtilunik, ukiungilu, qanuritmangaangitlu, inuuhiriyaingitlu, pitquhingitlu, upigiyaingitlu nunaqyuaptingni! Inum pidjutigiyaingit tunihimaaqtun atuqtakharnik aadjikiiktumik pittiarnikkutlu tamainun nunaqyuaptingniituni.

Nutaqqat pidjutigiyaingit aadjikiiktun inum pidjutigiyaingit kihimi aulayut tapkuninga nutaqqanun inulramirnunlu ukiuqaqtunik 19mun. Nutaqqat pidjutigiyaingit akhurutigiyauyut nutaqqat inulrammiitlu ayungnautiqaqtaagamik ikayuutiqainagiaqagamik iningninin qayangnairutikhainik munagidjutikharniklu ubluq tamaat inuuhiani! Qaffiuyut pidjutikhangit ilauyut talvani United Nations Katimavikharni Pidjutigiyaingit Nutaqqat munagidjutikharniklu inungnik kukiktunik aihinunlu nuuplugit, munagidjutikharnik talvanga nulliqinikkut ihuinaaqtunik, piyaangat ilihairutikharnik, hulilukaagianganik ayungnaitumik uqagiaqaqtunik, piyaangatlu imarmik niqikharniklu. Tamaita nutaqqat inulrammiitlu Nunavunmi pidjutiqaqtun.

________________________________________________________________________________________________________________________________________________________