Quviahuutigiyauyuq Kanatami Nutarap Ubluariyaa - Ikayuutigiplugu pilaagutaita tamaita inuulrammiinnut Nunavunmiutauyut

Nuvaippa 20 Kanatami Nutarap Ubluagiyaa — talvani ubluanggani quviahuutigiyaqqut Kanatap sainiutaatigut aqhuugutigiplugit malruuq nutarap-pilaagutaita titiqqaita: Hilaryuami United Nations Uqariingninga Pilaagutainnut Nutarap (1959) Hilaryuami United Nations Katimadjutaata Pilaagutainnut Nutarap (1989). 

Kanatap sainiutinggit hapkua titiqqat kangiqhidjutaa kavamatkut ilitariyait an’ngiqhugit, pittiagiplugit ikayuqlugitlu pilaagutaita nutaqqanut humaanggigiplugitlu qanurittuyaaqhaita, inuuhia, an’ngut/arnaq, piqatigiiqaqtut an’ngut an’ngunmik arnat arnamikluunniit, ayuittutik qanuqli qanuqluunniit. 

Tamaita nutaqqat Kanatami pilaagutiqaqtut annaqhimadjutikkut; pilaagutiqaqhutik inuuhirittiariamingnik pivaqhutik; pilaagutiqaqtut aanniqtailinirmun, hugiyaun’ngitpata atuinnaqhugit qinugiplugit; pilaagutaitlu ilauyaamingnik ilamingni, pitquhikkut inungmiunirmunlu. 

Kivraqtuqtinga Nutaqqanut Inuulrammiinutlu Havagviani (RCYO) Iqalungni, havakpaktuq pitdjutigiplugit tamaita inuulrammiit Nunavunmiutat ilaitlu imaa piyaami Nunavut Kavamatkut ikayuutiqhainnut nutaqqap pilaagutaita. 

Hivuani Nunavut unaguiqhiqatigidjavait nutaqqavut”, uqaqtuq Jane Bates, Kivraqtuqtuq Nutaqqanut Inuulramiinutlu Nunavunmi, “huuqli huuq, hadja, uvagut, inirniupluta ihumaliuqtiuplutalu, havakpiaqtuqhauyugut ikayuqlugit pilaagutaita nutaqqat piumagumiklu pilutik inuuhirittiarviqhainnik”. 

Ilanggit hapkuat hivuliqtigidjutigiyauyut havaatigut taapkuat RCYO, ilaliutiplutiklu Nunakyuarmi United Nations Katimadjutaata Pilaagutikkut Nutarap Inuit nuatqatigiittiarniatigut.  Uqagiyaatigut Bates, Inuit nuatqatigiitiarniatigut aadjikkiiqtut amigaittuni Nunakyuarmi United Nations Katimadjutaani Pilaagutainnut Nutarap. 

“Havaaqhavut imaa piyaaqhaitigut Nunavut Kavamanga havakpiaqtut ikayuutiqhainnik inuulrammiit nunaptingni an’ngiqliyaamingnik pivalliadjutigilugitlu pittaalaqiyaamingnik inmik inmi ikayuriamingnik, ilainnutlu nunallaanunutlu”, uqaqtuq Bates.  “Tamapta ilaudjutiqaqtuguk”, ilaudjutigiyaun’ngmat Inuit nuatqatigiittiarniatigut talvanga Piliriqatigiinniq, havaqatigiingnik atauhirmun; Pijitsirniqlu, kivraqtuqhutik piviqhaqaqtittiplugitlu ilagiiqtunut nunallaamunlu. 

Hivuniqhaa Nunavut

Kanatami Nutarap Ublua puiguqtailiyauyuq uvaptingnut iniriiqhimayuq Nunavunmi ikayurnitigut nutaqqat pilaagutainnik ilitaqhimannaktuqlu havaaqhariaqaqtuq huli. 

“Hamnauyuq Kanata”, uqaqtuq Bates.  “Uvagut apiqhuqtuqhaun’ngittuguk huuq ihariagiyaungginnaktainnik nutaqqat ilaitlu ikayuqtaudjutigiyaun’ngittut”.

Pittalaqiyaulutik ihuaqtunik kappiahungnaittumiklu aimmaviinni; niuviktaangginnaktuniklu ayurnaittumik, nirittiaguminaktunik niqinik; halumayuqhatlu imait; aanniqtailinirmun qanuqli pimmarlurnirmin; nutarap- inuulramiplu-kitulluani ihumailiqidjutinut ikayuutiqhainik, ikittut ihumagiyauyut amigaittuni ihumagiyauyuqhanik kavamatkut hivulliutigiyaqhainnik, uqagiyaatigut Bates.

Uqaqunahuaqhugit inuulrammiit

“Nutaqqat nipiqaqtut tuhaqtauyuqhaqlu”, uqaqtuq Bates, aadjikkkuutigiplugu Nunakyuami United Nations Katimadjutaani Pilaagutainnut Nutarap inuit nuatqatigiittiarnitigut taaffumami Aajiiqatigiinniq, ihumaliurnirmun uqautigiyauyumun an’ngiqatigiittiarnirmunlu.

“Tuhaagaluaqhugit inuulrammiup ihumagiyainnik taimaatun inmi ihumaliuqtaaqtuqhat ilaun’nginnariaqaqhutiklu ihumagiyauyumut nutarap an’ngayuqqaan’ngit munaqtin’ngitluunniit”, uqaqtuq Bates.  “Kihimi, qanuq havaktauvakpaa ikayuutigiyuq ihumaliuqtauyumun ihumagiplugit nutarap ihumagiyaannik”. 

Ilauqunahuaqhugitlu inuulrammiit ilaulutik ihumaliurnirmun inuuhiatimingmitigut ikayuqlugulu Pilimmaksarniq, pivallianikkut ayuirhautiqhainnik qu’ngiaqhugit, maliquplugit, uuktuqhimmaangnikkut aqhuuqlutiklu. 

Ubluq tamaat, talvalluangmilu Kanatami Nutarap Ubluangganni, tahapkua RCYO puiguqtailiyaatigut tamapta pilaagutiqaqtuguk, nutaqqatlu, munariyaqaqhutalu aqhuuqluta kavamanut taapkuninga ikayuutiqhainnik pilaagutinut. 

Ilvit, inuulramiikluunniit ilihimayarnik, mihigumik pilaagutaita ikayuqtaun’ngittut kavamani kivraqtuiyuni ilihaunmiluunniit, ilvit uqaqvigiinnariaqaqtatit RCYO. Tamaita unniqtauyut ahinut hiamitiqtaulimaittut atiitlu taiguqtaulimaittunilu.  Hivayaqlugu 867-975-5090 Iqalungni uvaniluunniit 1-855-449-8118 quyaginnak Kanatami, titiraqvigilugitluunniit hivayautinnuatigut uvani 1-855-449-8118, qaritauyaqvigilugitluunniit uvani contact@rcynu.ca. Maliklugit uvani Facebook hamani.