ᓄᕕᐱᕆ 20 ᑲᓇᑕᒥ ᓄᑕᕋᐅᑉ ᐃᓪᓗᕆᕙᐅᒃ − ᑖᓐᓇ ᐅᓪᓗᖅ ᑲᓇᑕᒥ ᖁᕕᐊᓲᑕᐅᔪᖅ ᐊᑎᓕᐅᖅᑎᐅᖃᑕᐅᓚᐅᖅᓯᒪᓂᕐᒧᑦ ᒪᕐᕈᖕᓂᒃ ᐱᓂᐊᕐᓂᕋᕈᑎᓂᒃ ᓄᑕᖅᑲᐃᑦ−ᐱᔪᓐᓇᐅᑎᖏᓐᓂᒃ: ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᖕᓂᕆᔭᖏᑦ ᓄᑕᕋᐅᑉ (1959) ᐊᒻᒪᓗ ᐊᖏᖃᑎᒌᒍᑎᖏᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᓪᓗᒋᑦ (1989).
ᑲᓇᑕ ᓄᓇᓕᒡᔪᐊᖑᓪᓗᓂ ᐊᑎᓕᐅᖃᑕᐅᓯᒪᓂᕐᒧᑦ ᑐᑭᖃᖅᑐᕐᓕ ᒐᕙᒪᐅᔪᐃᑦ ᑐᓴᕐᓂᕋᕐᓗᑎᒃ ᐊᖏᕐᓂᖏᑦ, ᐃᒃᐱᒍᓱᖕᓂᖏᓐᓂᒃ ᐊᒻᒪᓗ ᐃᑲᔪᖅᓯᕐᓂᖏᓐᓂᒃ ᓄᑕᖅᑲᐃᑦ ᐱᔪᓐᓇᐅᑎᖏᓐᓂᒃ ᐃᓅᓯᖏᓐᓂᒃ ᖃᓄᐃᑦᑐᒃᑰᕋᓗᐊᖅᐸᑕ, ᐅᕕᓂᖓᒍᑦ, ᐊᕐᓇᖅ/ᐊᖑᑕᐅᒐᓗᐊᖅᐸᑕ, ᓇᓕᐊᖕᓂᒃ ᐊᐃᑉᐸᖃᖃᑦᑕᕋᓗᐊᖅᐸᑕ, ᐊᔪᙱᓐᓂᖃᕋᓗᐊᖅᐸᑕ ᖃᓄᑐᐃᓐᓇᕐᓘᓃᑦ ᐊᓯᐊᓂᒃ.
ᑕᒪᐃᓐᓂᑦᑎᐊᖅ ᓄᑕᖅᑲᐃᑦ ᑲᓇᑕᒥᐅᑦ ᐱᔪᓐᓇᐅᑎᖃᖅᑐᑦ ᐊᓐᓇᒃᑐᕐᓂᕐᒥᒃ; ᐱᔪᓐᓇᐅᑎᖃᖅᖢᑎᒃ ᐱᕈᖅᓴᑎᓪᓗᒋᑦ ᐱᔪᓐᓇᕐᓂᓕᒫᒥᓂᒃ ᓯᕗᒧᐊᒍᑎᒃᓴᓄᑦ; ᓴᐳᑎᔭᐅᓯᒪᓗᑎᒃ ᐋᓐᓂᖅᑎᑕᐅᑦᑕᐃᓕᒪᓗᑎᒃ, ᐃᒃᓯᓐᓇᑰᙱᓪᓗᑎᒃ ᐊᒻᒪ ᑎᒥᖏᑦᑎᒍᑦ ᐱᓂᕐᓘᑕᐅᔭᕆᐊᖃᙱᖦᖢᑎᒃ; ᖃᑕᙳᑎᖏᓐᓂᓗ ᐃᓚᒋᔭᐅᖃᑕᐅᑦᑎᐊᖅᐸᒡᓗᑎᒃ, ᐃᓕᖅᑯᓯᓕᕆᓂᕐᒥᒃ, ᐊᒻᒪ ᐃᓅᖃᑎᖃᖃᑕᐅᕙᓘᑎᒃ ᑭᒃᑯᑐᐃᓐᓇᕐᓂᒃ.
ᑭᒡᒐᖅᑐᐃᔨᐅᔪᖅᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓ ᐃᖃᓗᖕᓃᑦᑐᖅ, ᐱᓕᕆᐊᖃᖅᐸᒃᑐᑦ ᐅᑭᐅᑭᑦᑐᓂᒃ ᓄᓇᕗᒻᒥᐅᓂᒃ ᐱᔨᑦᑎᕋᖅᖢᑎᒃ ᖃᑕᙳᑎᖏᓐᓂᓗ ᓲᖃᐃᒻᒪ ᒐᕙᒪᒃᑯᑦ ᓄᓇᕗᒻᒥ ᐊᖏᕈᑎᒋᓯᒪᔭᒥᓄᑦ ᐱᓕᕆᔭᕆᐊᖃᕐᒪᑕ ᐅᑭᐅᑭᑦᑐᐃᑦ ᐱᔪᓐᓇᐅᑎᖏᑦ ᐱᓪᓗᒋᑦ.
“ᓄᓇᕗᑦ ᓯᕗᓂᒃᓴᖓ ᑎᒍᒥᐊᖅᑕᐅᖕᒪᑦ ᕿᑐᕐᖓᑦᑎᓐᓄᑦ,” ᐅᖃᓚᐅᖅᑐᖅ ᔭᐃᓐ ᐸᐃᑦᔅ, ᓄᓇᕗᒻᒥ ᑭᒡᒐᖅᑐᐃᔨᐅᔪᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ, “ᒫᓐᓇᐅᔪᖅ ᑕᕝᕙ ᐱᓕᕆᔾᔪᑎᔭᕆᐊᖃᖅᐸᕗᑦ, ᐃᓐᓇᐅᓪᓗᑕ ᐅᕙᒍᑦ, ᐃᓱᒪᓕᐅᖅᑎᐅᕙᒃᖢᑕᓗ, ᖃᓄᓕᒫᖅ ᐊᒃᓱᕉᑎᒋᓗᑎᒍᑦ ᐱᔾᔪᑎᔭᕆᐊᖃᖅᑕᕗᑦ ᐃᑲᔪᕐᓗᒋᓪᓗ ᐱᔪᓐᓇᐅᑎᖃᕐᒪᑕ ᐃᓅᓯᕆᒃᑑᓂᕐᒥᒃ ᐱᕈᖅᓴᔪᓐᓇᕐᓗᑎᒃ”.
ᖃᔅᓯᑲᓪᓚᐃᑦ ᐊᑐᖅᑕᐅᕙᒃᑐᑦ ᑭᒡᒐᖅᑐᐃᓕᕌᖓᒥᒃ ᐅᑭᐅᑭᑦᑐᓂᒃ, ᐃᓚᖃᕐᒥᔪᑦᑕᐅᖅ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐊᖏᖃᑎᒌᒍᑎᖏᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᓪᓗᒋᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᑐᙵᕕᒋᔭᐅᕙᖕᒥᔪᑦ. ᐸᐃᑦᔅ ᐅᖃᓚᐅᕐᒥᔪᖅ, ᐃᓄᐃᑦ ᖃᐅᔨᒪᔭᑐᖃᖏᑕ ᑐᙵᕕᒋᔭᖏᒡᒎᖅ ᐊᔾᔨᖃᒐᓚᑦᑎᐊᖅᑐᐃᑦ ᓄᓇᖅᔪᐊᒥ ᑲᑐᔾᔨᖃᑎᒌᒃᑯᑦ ᐅᒃᐱᕆᔭᖏᓐᓂᒃ ᐱᓗᐊᖅᑐᒥ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᖕᓂᕆᔭᖏᑦ ᓄᑕᕋᐅᑉ.
“ᐱᔭᒃᓴᕆᒐᑦᑎᒍᓪᓕ ᓄᓇᕗᑦ ᒐᕙᒪᒃᑯᖏᑦ ᐱᔪᓐᓇᕐᓂᓕᒫᒥᓂᒃ ᐊᒃᓱᕉᑎᖃᕆᐊᖃᕐᓂᖏᓐᓂᒃ ᐅᑭᐅᑭᑦᑐᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᑲᔪᖅᓯᖅᑕᐅᖃᑦᑕᕆᐊᖃᕐᓂᖏᓐᓂᒃ ᑕᒫᓂ ᓄᓇᕗᒻᒥ ᐱᕈᕈᓐᓇᕐᓂᐊᕐᒪᑕ ᐱᓕᕆᔪᓐᓇᑦᑎᐊᕐᓗᑎᒃ ᐃᒻᒥᓂᒃ ᒪᑭᑕᔪᓐᓇᕐᓗᑎᒃ, ᖃᑕᙳᑎᒥᓂᒃ ᐃᑲᔪᕈᓐᓇᕐᓗᑎᒃ ᐊᒻᒪ ᓄᓇᒋᔭᒥᓂᒃ ᐃᑲᔪᖃᑕᐅᔪᓐᓇᓛᕐᒪᑕ,” ᐸᐃᑦᔅ ᐅᖃᓚᐅᖅᑐᖅ. “ᑕᒪᑦᑕᑦᑎᐊᖅ ᐃᓚᐅᖃᑕᐅᔪᒍᑦ,” ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐊᒃᑐᐊᓂᖃᖅᑑᓪᓗᓂ ᓲᕐᓗ ᐱᓕᕆᖃᑎᒌᖕᓂᖅ, ᐊᑕᐅᓯᕐᒧᑦ ᑐᕌᖅᑐᒥᒃ ᑲᑐᔾᔨᖃᑎᖃᕐᓂᖅ; ᐊᒻᒪᑦᑕᐅᖅ ᐱᔨᑦᑎᕐᓂᖅ, ᖃᑕᙳᑎᓄᑦ ᓄᓇᓕᖕᒥᐅᖑᖃᑕᐅᔪᓄᓪᓗ ᐃᑲᔪᖅᓯᖃᑦᑕᕐᓂᖅ.
ᓄᓇᕗᑦ ᓯᕗᓂᒃᓴᖓ
ᑲᓇᑕᒥ ᓄᑕᕋᐅᑉ ᐅᓪᓗᖓ ᐅᕙᑦᑎᓐᓂᒃ ᐃᖅᑲᐃᑎᑦᑎᕗᖅ ᐱᕚᓪᓕᕈᑎᒃᓴᓂᒃ ᓴᖅᑭᓯᒪᔪᖃᓕᕐᓂᖓᓂᒃ ᓄᓇᕗᒻᒥ ᐃᑲᔫᑎᒋᔭᐅᔪᒃᓴᓂᒃ ᐅᑭᐅᑭᑦᑐᐃᑦ ᐱᔪᓐᓇᐅᑎᖏᓐᓂᒃ ᑭᓯᐊᓂᑦᑕᐅᖅ ᐃᓕᓴᖅᓯᓯᒪᒋᕗᒍᑦ ᓱᓕ ᐱᓕᕆᐊᒃᓴᖃᐅᕐᓂᑦᑎᓐᓂ ᓴᖅᑭᑦᑕᕆᐊᓕᖕᓂᒃ.
“ᑲᓇᑕᒦᑦᑐᒍᑦ,” ᐸᐃᑦᔅ ᐅᖃᓚᐅᖅᑐᖅ. “ᐊᐱᖅᓱᖃᑦᑕᓪᓗᐊᙱᑦᑎᐊᕋᓗᐊᕋᑦᑕ ᖃᓄᐃᒻᒪᑦ ᕿᑐᕐᖓᑦᑕ ᖃᑕᙳᑎᖏᓪᓗ ᐱᔭᕆᐊᓕᖏᓐᓂᒃ ᐱᔪᓐᓇᖃᑦᑕᙱᒻᒪᖔᑕ.”
ᐃᒡᓗᖃᕈᓐᓇᕐᓂᖅ ᓈᒻᒪᒃᑐᓂᒃ ᐊᑦᑕᕐᓇᙱᑦᑐᒦᕝᕕᒃᓴᓂᒃ; ᐊᑭᑐᓗᐊᙱᑦᑐᓂᒃ ᓂᕿᑦᑎᐊᕙᖕᓂᒃ; ᐃᒪᑦᑎᐊᕙᖕᒥᒃ ᓂᐅᖅᑲᒐᒃᓴᐅᔪᒥᒃ; ᓴᐳᑎᔭᐅᓂᕐᒥᒃ ᖃᓄᑐᐃᓐᓈᓗᒃ ᐱᓂᕐᓗᒍᑕᐅᕙᒃᑐᓂᒃ; ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᓱᒪᓕᕆᔨᖃᑦᑎᐊᕐᓂᖅ ᐱᔨᑦᑎᕈᓐᓇᖅᑐᓂᒃ, ᑖᒃᑯᐊ ᑕᕝᕙ ᐃᓚᐃᓐᓇᑯᓗᒋᕙᐃᑦ ᒐᕙᒪᒃᑯᓐᓄᑦ ᐱᓕᕆᐊᖑᔭᕆᐊᓖᑦ ᓯᕗᓪᓕᐅᑎᑕᐅᓗᑎᒃ, ᐸᐃᑦᔅ ᑐᑭᓯᐅᒪᔭᖓᒍᓪᓕ.
ᒪᒃᑯᒃᑐᓂᒃ ᓂᓪᓕᖃᑦᑕᖁᔨᓪᓗᓂ ᐃᑲᔪᖅᓯᐃᓂᖅ
“ᓄᑕᖅᑲᐃᑦ ᓂᐱᖃᕋᓗᐊᕐᒪᑕ ᑐᓴᖅᑕᐅᔭᕆᐊᓕᖕᒥᒃ,” ᐸᐃᑦᔅ ᐅᖃᖅᖢᓂ, ᑕᒪᓐᓇᓗ ᐃᓄᐃᑦ ᖃᐅᔨᒪᔭᑐᖃᖏᑕ ᑐᙵᕕᒋᔭᖏᒡᒎᖅ ᐊᔾᔨᖃᒐᓚᑦᑎᐊᖅᑐᐃᑦ ᓄᓇᖅᔪᐊᒥ ᑲᑐᔾᔨᖃᑎᒌᒃᑯᑦ ᐅᒃᐱᕆᔭᖏᓐᓂᒃ ᐱᓗᐊᖅᑐᒥ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᖕᓂᕆᔭᖏᑦ ᓄᑕᕋᐅᑉ ᐊᒻᒪᓗ ᐋᔩᖃᑎᒌᖕᓂᖅ, ᐃᓱᒪᓕᐅᖅᐸᓪᓕᐊᓂᐅᓲᖅ ᐅᖃᖃᑎᒌᖕᓂᒃᑯᑦ ᐊᒻᒪ ᐊᑕᐅᓯᕐᒧᑦ ᑐᕌᕐᓂᒃᑯᑦ.
“ᑐᓴᑐᐃᓐᓇᕐᓗᓂ ᒪᒃᑯᒃᑑᑉ ᐃᓱᒪᒋᑐᓐᓇᖅᑕᑯᓗᐊᓂᒃ ᓲᕐᓗᓕ ᐃᓱᒪᓕᐅᖅᑎᓪᓗᒎᙱᑦᑎᐊᖅᑐᖅ ᐊᒻᒪ ᐊᖓᔪᖅᑳᖏᑕ ᐃᓱᒪᒋᔭᖏᓐᓂᒃ ᓱᕙᓕᑭᐊᕐᓂᐅᙱᑦᑎᐊᖅᑐᖅ,” ᐸᐃᑦᔅ ᐅᖃᖅᖢᓂ. “ᑭᓯᐊᓂᓕ ᐃᑲᔪᖅᓯᕈᑎᐅᖕᒪᑦᑕᐅᖅ ᓄᑕᖅᑲᒧᑦ ᐊᒻᒪᓗ ᑭᓱ ᑕᐃᓐᓇ ᐃᓱᒪᓕᐅᕈᑕᐅᔪᖅ ᓄᑕᕋᐅᑉ ᐱᔭᕆᐊᓕᖏᓐᓂᒃ ᓈᓚᖕᓂᐅᖕᒥᖕᒪᑦ.”
ᐃᓱᒪᓕᐊᖑᔭᕆᐊᓕᖕᓄᑦ ᓂᓪᓕᕐᕕᖃᖃᑕᐅᔪᓐᓇᖅᑎᓪᓗᒋᑦ ᒪᒃᑯᒃᑐᐃᑦ ᐅᑭᐅᑭᓗᐊᖅᑐᓪᓘᓃᑦ ᐃᓅᓯᖏᑦᑕ ᒥᒃᓵᓄᑦ ᐃᑲᔪᖅᓯᕆᕗᖅᑕᐅᖅ ᐱᓕᒻᒪᒃᓴᕐᓂᕐᒥᒃ, ᐊᔪᕈᓐᓃᖅᐸᓪᓕᐊᓂᖅ ᑕᐅᑐᖃᑦᑕᕐᓂᒃᑯᑦ, ᑲᔪᖏᖅᓴᖅᑕᐅᓂᒃᑯᑦ, ᐱᓕᒻᒪᒃᓴᕐᓂᒃᑯᑦ ᐊᒻᒪ ᖃᐅᔨᕙᓪᓕᐊᓂᒃᑯᑦ.
ᖃᐅᑕᒫᑦᑎᐊᖅ, ᐱᓗᐊᖅᑐᒥ ᑲᓇᑕᒥ ᓄᑕᕋᐅᑉ ᐅᓪᓗᕆᑎᓪᓗᓂᐅᒃ, ᑭᒡᒐᖅᑐᐃᕝᕕᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᖅᑲᐃᑎᑕᐅᕙᒃᐳᒍᑦ ᑭᒃᑯᓕᒫᑦᑎᐊᑦ ᐱᔪᓐᓇᐅᑎᖃᕐᓂᖏᓐᓂᒃ, ᓄᑕᖅᑲᐃᑦ ᐃᓚᐅᖃᑕᐅᓪᓗᑎᒃ, ᐅᕙᒍᓪᓗ ᑕᐃᒪ ᐱᓕᕆᐊᒃᓴᖃᖅᐳᒍᑦ ᒐᕙᒪᒋᔭᕗᑦ ᐊᔭᐅᖅᑐᕆᐊᖃᖅᖢᒋᑦ ᐃᓕᓴᖅᓯᓯᒪᓂᐊᕐᒪᑕ ᐱᔪᓐᓇᐅᑎᖃᐅᕐᓂᖏᓐᓂᒃ.
ᐃᕝᕕᑦ, ᒪᒃᑯᒃᑐᕐᓘᓃᑦ ᖃᐅᔨᒪᔭᐃᑦ ᑭᓇᑭᐊᖅ, ᐱᔪᓐᓇᐅᑎᒋᔭᓯ ᐃᒃᐱᒋᔭᐅᙱᓗᐊᕆᒍᔅᓯᐅᒃ ᐃᑲᔪᖅᓯᖅᑕᐅᙱᓗᐊᕐᓂᕈᔅᓯᓘᓃᑦ ᒐᕙᒪᒃᑯᑦ ᐱᔨᑦᑎᕈᑎᖏᓐᓄᑦ ᐱᓕᕆᐊᕆᕙᒃᑕᖏᓐᓄᓪᓗ, ᐊᑏ ᑐᓴᖅᑎᓐᓂᐊᖅᐸᓯ ᑭᒡᒐᖅᑐᐃᕝᕕᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ. ᐅᖃᖃᑎᒌᖕᓂᐅᔪᑦ ᒫᙵᕈᓗᒥᐊᖅ ᑐᓴᖅᑕᐅᔾᔮᙱᑦᑐᑦ ᓲᕐᓗ ᑲᙳᓇᖅᑑᑎᑕᐅᓗᑎᒃ ᐊᒻᒪᑦᑕᐅᖅ ᑭᓇ ᐅᖄᓚᔪᖅ ᑭᓇᐅᓂᕐᒥᓂᒃ ᐅᖃᙱᑦᑐᓐᓇᓲᖑᖕᒥᔪᑦ. ᐅᖄᓚᔪᓐᓇᖅᐳᑎᑦ 867-975-5090 ᐃᖃᓗᖕᓂ ᐅᕝᕙᓘᓃᑦ ᓇᒥᑐᐃᓐᓇᑦᑎᐊᖅ ᑲᓇᑕᒥ 1-855-449-8118, ᐅᖄᓚᐅᑎᕋᓛᒃᑯᑦ ᑎᑎᕋᕈᓐᓇᕆᕗᑎᑦ ᐅᕝᕙᓘᓃᑦ ᐃᕐᖐᓈᖅᑕᐅᑎᒃᑯᑦ ᐅᕗᖓ contact@rcynu.ca. ᐱᖃᓐᓇᕇᑦ ᑐᓴᐅᑎᖓᒍᑦᑕᐅᖅ ᒪᓕᖃᑦᑕᕈᓐᓇᕆᕗᑎᑦ Facebook ᑕᕝᕗᖓ.