ᔮᓄᐊᕆ 15−ᒥᑦ 19-ᒧᑦ, 2017−ᒥ, ᓈᓐᓯ ᐱᐅᓪᓚᕆᓐ, ᖃᕆᓴᐅᔭᑎᒎᖓᔪᓂᒃ ᖃᐅᔨᓴᖅᑎᒻᒪᕆᐅᖃᑕᐅᔪᖅ ᓴᓂᑭᓗᐊᕐᒧᑦ ᐳᓛᕆᐊᓚᐅᖅᐳᖅ. ᓂᐅᕐᕈᓯᒪᑎᓪᓗᒍ, ᓈᓐᓯ ᓄᐃᔭᒃ ᓄᑲᖅᖡᑦ ᐃᓕᓐᓂᐊᕐᕕᐅᑉ ᐃᓕᓐᓂᐊᖅᑎᖏᓐᓂᒃ ᐊᒻᒪ ᐃᖅᑲᓇᐃᔭᖅᑎᖏᓐᓂᒃ ᐱᓕᕆᖃᑎᖃᕈᓐᓇᖅᓯᓚᐅᖅᐳᖅ. ᑲᑎᖃᑎᖃᓚᐅᕆᓪᓗᓂ ᓄᓇᕗᒻᒥ ᓯᕗᓂᒃᓴᒥ ᐃᓕᓴᐃᔨᒃᓴᑦ ᐃᓚᖏᓐᓂᒃ; ᐃᓕᓐᓂᐊᖅᑏᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᒻᒥ ᐃᓕᓴᐃᔨᒃᓴᑦ ᐃᓕᓐᓂᐊᕈᑎᖏᓐᓄᑦ ᐊᒻᒪᓗᑦᑕᐅᖅ ᐊᓯᖏᓐᓂᒃ ᓄᓇᕗᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑕᐅᔪᓂᒃ. ᐹᑦᓵᓕ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑏᑦ ᐃᓕᓐᓂᐊᕈᑎᒥᖕᓂ ᖃᐅᔨᓴᖅᑕᐅᒐᓗᐊᖅᑎᓪᓗᒋᑦ, ᓈᓐᓯᐅᑉ ᑲᑎᙵᖃᑎᒋᔪᓐᓇᓚᐅᖅᐸᖏᑦ ᐱᒻᒪᕆᐅᔪᓂᒡᓗ ᐅᖃᖃᑎᒋᔪᓐᓇᖅᓯᓪᓗᓂᒋᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐊᒻᒪ ᑎᑎᕋᕐᕕᒃᐳᑦ ᐱᔾᔪᑎᒋᓪᓗᒋᑦ. ᓈᓐᓯ ᑲᑎᖃᑎᖃᓚᐅᕆᕗᖅ ᐸᐃᕆᕝᕕᐅᑉ ᐃᖅᑲᓇᐃᔭᖅᑎᖏᓐᓂᒃ, ᒐᕙᒪᒃᑯᓐᓂ ᐱᔨᑦᑎᕋᖅᑎᓂᒃ, ᕼᐋᒪᓚᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐅᖃᓚᐅᖅᖢᓂᓗ ᑐᑭᓯᕚᓪᓕᕕᒡᔪᐊᓚᐅᕐᓂᖓᓂᒃ ᑲᑎᒪᖃᑎᖃᖅᖢᓂ ᐃᓐᓇᐃᑦ ᐃᓚᖓᓐᓂᒃ ᓄᓇᓕᖕᓂ.
ᐱᓇᓱᐊᕈᓯᖓᓂ ᔮᓐᓄᐊᕆ 15ᒥᑦ 19ᒧᑦ, 2017, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐃᖅᑲᓇᐃᔭᖅᑎᖁᑎᖏᑦ ᓕᓐ ᒫᑦ, ᑕᐃᕕᑎ ᖁᐊᕋᖅ ᐊᒻᒪ ᑲᐃᑎ ᑎᑦᕼᐋᒻ ᐊᕐᕕᐊᓂ ᑐᙳᓱᒃᑎᑕᐅᓚᐅᖅᑐᑦ. ᓕᓐ, ᑕᐃᕕᑦ ᐊᒻᒪ ᑲᐃᑎ ᓄᓇᓕᒻᒥ ᐱᔨᑦᓯᕋᖅᑎᓂᒃ ᑲᑎᖃᑎᖃᓚᐅᖅᑐᑦ, ᐃᓚᒋᓪᓗᓂᒋᑦ ᐋᓐᓂᐊᖅᑐᓕᕆᔨᐅᔪᑦ, ᐃᓕᓴᐃᔩᑦ, ᕼᐋᒻᒪᓚᒃᑯᑦ ᐃᖅᑲᓇᐃᔭᖅᑎᖏᑦ ᐊᒻᒪᓗ ᐸᓖᓯᒃᑯᑦ.
ᐱᐅᓂᖅᐹᕆᔭᐅᓚᐅᖅᑐᖅ ᐊᕐᕕᐊᓂ ᐅᖃᓪᓚᒃᑎᓪᓗᒋᑦ ᑲᑎᖃᑎᖃᖅᑎᓪᓗᒋᓗ ᐃᓕᓐᓂᐊᖅᑎᐅᔪᓂᑦ ᐱᖓᓱᓂᑦ ᐃᓕᓐᓂᐊᕐᕕᓐᓂ; ᓕᕙᐃ ᐊᖕᒪᒃ ᓄᑲᖅᑎᐅᔪᓄᑦ ᐃᓕᓐᓂᐊᕐᕕᐅᔪᖅ, ᕿᑎᖅᖠᖅ ᐊᑯᓐᓂᖅᓱᖅᑐᓄᑦ ᐃᓕᓐᓂᐊᕐᕕᐅᔪᖅ ᐊᒻᒪᓗ ᔮᓐ ᐊᕐᓈᓗᕐᔪᐊᖅ ᐃᓕᓐᓂᐊᕐᕕᐊᓗᖕᒥ. ᐃᓕᓐᓂᐊᖅᑏᑦ ᐊᓕᐊᓇᐃᒍᓱᓚᐅᖅᑐᑦ ᐱᓕᕆᑦᑎᐊᖅᑐᑎᓗ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᑎᑎᕋᕐᕕᖓᑕ ᐱᓕᕆᐊᒃᓴᕆᕙᒃᑕᖏᓐᓂᒃ, ᐊᐱᖅᓱᕈᓘᔭᖅᑐᑎ ᐅᖃᐅᓯᖃᖅᑐᑎᓗ ᖃᐅᔨᒪᓂᕆᔭᖏᓐᓂᒃ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ.
ᔭᓐᓄᐊᓕ 2017, ᒪᒃᑯᑦᑐᓄᑦ ᓄᑕᖅᑲᕐᓄᓪᓗ ᑭᒡᒐᖅᑐᐃᔩᑦ ᐃᖅᑲᓇᐃᔭᖅᑎᖏᑦ ᓕᓐ ᒫᑦ, ᑲᐃᑎ ᑎᑦᕼᐋᒻ, ᓈᓐᓯ ᐱᕋᓗᕆᓐ, ᑕᐃᕕᑎ ᖁᐊᕋᖅᓗ ᐳᓛᕆᐊᓚᐅᖅᑐᑦ ᐊᓪᓚᕝᕕᖓᓂᑦ ᓄᑕᖅᑲᕐᓄᑦ ᒪᒃᑯᑦᑐᓄᓪᓗ ᑭᒡᒐᖅᑐᐃᕕᖓᓂᑦ ᐃᐊᑦᒪᑕᓐ, ᐃᐅᕘᑕᒥᑦ.
ᐱᔾᔪᑎᖓ ᐳᓛᕆᐊᕐᓂᐅᑉ ᐃᑲᔪᖅᑕᐅᓂᐊᖅᑎᓪᓗᑕ ᓴᓇᓂᕐᒥᑦ ᐊᑐᖅᑕᐅᖃᑦᑕᖅᑐᓂᑦ ᖃᐅᔨᓴᕐᓂᕐᒧᓪᓗ ᖃᐅᔨᒪᓂᖃᕐᓂᕐᒥᑦ ᑐᓐᖓᕕᐅᓗᓂ ᖃᐅᔨᓴᖅᑕᐅᑦᓯᐊᕐᓗᑎᓪᓗ. ᐱᕙᓪᓕᐊᑎᑦᓯᓂᕐᒥᑦ ᐱᓕᕆᐊᕆᖃᑦᑕᖅᑕᑎᓐᓂᑦ ᓯᕗᓪᓕᐅᔾᔨᒋᐊᖃᕐᑕᕗᑦ ᒪᒃᑯᑦᑐᓄᑦ ᓄᑕᖅᑲᕐᓄᓪᓗ ᑭᒡᒐᖅᑐᐃᔩᑦ ᐊᓪᓚᕝᕕᖓᓂᑦ ᖃᐃᔪᓄᑦ ᐊᕐᕌᒍᓐᓄᑦ.
ᐱᒋᐊᙵᕐᓂᖓᓂᑦ ᐆᑦᑑᕝᕙ ᐅᑉ 2016. ᐅᑯᐊᑕᒡᒐ ᓄᑕᖅᑲᕐᓄᑦ ᒪᒃᑯᑦᑐᓄᓪᓗ ᑭᒡᒐᖅᑐᐃᔨ ᖃᐅᔨᒪᔨᑕᐅᑉ, ᑰᓪᐱ ᐅ’ᑖᓐᓂᐅᓪ, ᐅᖃᐅᓯᑦᓴᖏᑦ ᐊᐅᓪᓚᖅᓯᒪᓂᕆᓚᐅᖅᑕᖓᓄᑦ.
ᓛᕆᐊᖅᓯᒪᑎᓪᓗᖓ, ᐊᒥᓲᓚᐅᖅᑐᑦ ᓇᓗᓇᐃᖅᓯᔾᔪᑏᑦ, ᑭᓯᐊᓂ ᑲᑎᓐᓂᕐᒥᑦ ᓄᑕᖅᑲᓂᑦ ᒪᒃᑯᑦᑐᓂᓪᓗ ᓴᓪᓕᖅᒥᑦ ᓯᕗᓪᓕᐅᔾᔨᓯᒪᓚᐅᖅᑕᒃᑲ. ᐊᒥᓲᓚᐅᖅᑐᑦ ᑕᑯᔪᒥᓇᖅᑐᑦ ᐅᖃᖃᑎᒌᓐᓂᕗᑦ ᒪᒃᑯᑦᑐᐃᑦ ᐅᕙᖓᓗ ᐱᔾᔪᑎᒋᑦᓱᒍ ᐅᓂᒃᑳᕐᓂᕆᓚᐅᖅᑕᕋᓄᑦ ᓄᓇᓕᓐᓂᑦ ᐃᓕᓐᓂᐊᕐᕕᒻᒥᑦ ᓄᑕᖅᑲᕐᐃᑦ ᐱᔪᓐᓇᐅᑎᖏᓐᓂᑦ. ᓄᓇᓖᑦ ᑐᙵᓇᖅᑐᒪᕆᐅᓚᐅᖅᑐᑦ, ᐊᑐᓂᓪᓗ ᐃᓄᐃᑦ ᑲᑎᑕᒃᑲ ᐱᖃᓐᓂᖅᑐᐹᓘᓚᐅᖅᑐᑦ ᐅᖃᓪᓚᐅᑎᖃᑦᓯᐊᖅᓱᑎᓪᓗ. ᖁᕕᐊᓇᓚᐅᖅᑐᖅ ᐱᓕᕆᖃᑎᖃᕐᓂᕐᒥᑦ ᐊᒥᓱᓂᑦ ᐊᔾᔨᒌᖏᑦᑐᓂᑦ ᐃᓄᓐᓂᑦ ᓄᓇᓕᓐᓂᑦ. ᖁᔭᓐᓇᒦᕈᒪᕙᒃᑲ ᑭᒃᑯᑐᐃᓐᓇᑦᓯᐊᑦ ᐱᕕᖃᓚᐅᖅᑐᓂᑦ ᐃᑦᓯᕙᖃᑎᖃᕐᓂᕐᒥᑦ ᐅᖃᖃᑎᖃᕐᓂᕐᒥᓪᓗ ᐅᕙᓐᓂᑦ ᓴᓪᓕᖅᒦᑎᓪᓗᖓ.”
ᓄᕕᑉᐱᕆ 24, 2016−ᒥᑦ, ᓄᓇᕗᒻᒥᑦ ᑭᒡᒐᖅᑐᐃᔨᑦ ᓱᕈᓯᕐᓄᑦ ᒪᒃᑯᒃᑐᓄᓪᓗ ᒪᓕᒐᓕᐅᕐᕕᖕᒦᖑᐊᖅᑎᓪᓗᒋᑦ ᐱᖃᑕᐅᓚᐅᖅᐳᖅ. ᑲᑎᒪᓂᐅᓚᐅᖅᐳᖅ, ᑭᒡᒐᖅᑐᐃᔨᑦ ᐅᖃᓪᓚᖃᑎᖃᖅᑎᓪᓗᒋᑦ ᒪᒃᑯᒃᑐᑦ ᒥᓂᔅᑕᓄᑦ ᑭᒡᒐᖅᑐᐃᔨᓂᑦ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᐊᓂ ᐊᒻᒪ ᑭᐅᖃᑦᑕᖅᖢᑎᑦ ᐊᐱᖅᑯᑎᓂᑦ ᐊᔾᔨᒌᖏᑦᑐᓂᒡᓗ ᐊᑲᐅᖏᓕᐅᕈᑎᓂ.
“ᑖᓐᓇ ᑲᑎᒪᓂᐅᓚᐅᖅᑐᖅ ᐊᑑᑦᑎᐊᓚᐅᖅᐳᖅ ᑲᑎᑦᑎᔪᓐᓇᓚᐅᕐᒪᑦ ᒪᒃᑯᒃᑐᓂᑦ ᓇᒥᑐᐃᓐᓇᖅ ᓄᓇᕗᒻᒥᑦ ᐊᒻᒪ ᑎᑎᕋᕐᕕᕗᑦ ᐊᓕᓇᐃᒍᓱᓚᐅᖅᐳᖅ ᐱᖃᑕᐅᔪᓐᓇᐅᓚᐅᕐᒪᑕ,” ᑭᒡᒐᖅᑐᐃᔨ ᓯᐅᕆ ᒪᒃᓃᔪ-ᒧᓚᒃ ᐅᖃᓚᐅᖅᐳᖅ. “ᐅᐱᒍᓱᓚᐅᖅᐳᒍ ᐊᑲᐅᓕᐅᕈᑎᓂᑦ ᒪᒃᑯᒃᑐᑦ ᐅᖃᕈᓐᓇᓚᐅᕐᒪᑕ ᐊᐱᖅᓱᕈᓐᓇᕐᓂᕆᓚᐅᖅᑕᒥᖕᓂᒃ.”
ᑳᔫᒃ ᖃᑉᓛᓕᒃ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᕙᖕᓂᕐᒧᑦ ᐱᓕᕆᔨᓪᓚᕆᒃ, ᖃᖓᑦᑎᐊᓵᖅ ᑲᖏᖅᖠᓂᕐᒥᐅᓄᙵᐅᓚᐅᖅᑐᖅ ᑕᐃᑯᙵᐅᖃᑎᖃᑦᖢᓂ ᐆᒥᖓ, ᓯᐅᕋᓐ ᕆᐊᓲᕐ, ᑐᑭᒧᐊᖅᑎᑦᑎᔨᒋᔭᕗᑦ ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᐃᕙᖕᓂᕐᒧᑦ ᐱᔨᑦᑎᕋᕐᓂᕆᕙᒃᑕᑦᑎᓐᓂᒃ. ᐃᒪᓐᓇ ᑳᔫᒃ ᐅᖃᓚᐅᖅᑐᖅ ᐳᓛᕆᐊᕐᓂᕆᓚᐅᖅᑕᒥᓄᑦ:
“ᑕᒪᓐᓇ ᓇᒧᙵᐅᓂᕆᔭᐅᔪᖅ ᓇᐅᔮᓕᐊᕐᓂᐅᓂᐊᓚᐅᕋᓗᐊᖅᐳᖅ, ᑭᓯᐊᓂ ᑕᐃᒪᐃᓚᐅᙱᓚᖅ ᓯᓚ ᐱᔾᔪᑎᒋᓪᓗᒍ ᓯᓚᐅᓪᓗ ᓴᙱᓂᕆᔭᖓᓄᑦ. ᑕᐃᑯᙵᐅᙱᖔᖅᖢᓄᒃ, ᓯᐅᕋᓐᓗ ᑲᖏᖅᖠᓂᕐᒦᓕᓚᐅᖅᐳᒍᒃ. ᑕᒪᓐᓇ ᑕᐃᑯᙵᐅᓂᕆᔭᕗᒃ ᐅᕙᓐᓄᑦ ᐃᖅᑲᐃᓐᓇᖃᑦᑕᓚᐅᖅᐳᖅ ᓲᖃᐃᒻᒪ ᐃᓅᓯᓕᒫᑲᓴᖕᓂ ᑕᐃᑲᓂᕐᒥᐅᑕᐅᓚᐅᖅᓯᒪᔪᖓ!
ᐃᓄᐃᑦ ᐱᓕᕆᕝᕕᑦᑎᓐᓄᐊᖅᑐᑦ ᑐᙵᓱᒃᑎᑦᑎᐊᓲᕗᑦ ᑎᑎᕋᕐᕕᑦᑎᓐᓂ. ᖃᐃᓚᐅᙱᓐᓂᔅᓯᓐᓂ ᐅᖃᓗᒃᐸᒌᖃᑦᑕᕐᓂᐊᖅᐳᓯ ᐃᓂᒃᓴᓕᐅᕐᓗᓯ.
ᖃᒧᑏᒃ ᐃᒡᓗᕐᔪᐊᖅ ᐱᖓᔪᖓ ᓇᑎᐊ
ᑎᑎᖅᑲᒃᑯᕕᐊ 488 ᐃᖃᓗᐃᑦ,
ᓄᓇᕗᑦ X0A 0H0
ᐃᒃᐱᒍᓱᑐᐊᕈᕕᑦ ᑐᐊᕕᕐᓇᖅᑐᒃᑯᑦ ᑕᑯᔭᐅᔭᕆᐊᖃᕋᓱᒋᓗᑎᑦ ᓄᑕᖅᑲᒥᒡᓘᓐᓃᑦ, ᐅᖃᓘᑎᑦ ᓈᓴᐅᑎᖏᑦ ᑎᑎᕋᖅᓯᒪᔪᑦ ᓇᓕᐊᖕᓄᑐᐃᓐᓇᖅ ᐅᖃᓗᒡᕕᒋᖃᑦᑕᖁᔪᑦ ᐃᕐᖐᓐᓇᖅ.
