ᐱᓕᕆᐊᒃᓴᑦᑕ ᐃᓚᖓ ᓄᓇᕗᒻᒥᐅᓂᑦ ᐅᔾᔨᖅᓱᓕᖅᐹᓪᓕᖅᑎᑦᑎᓇᓱᒃᖢᑕ ᓄᑕᖃᑦ ᐱᔪᓐᓇᐅᑎᖏᓐᓂᑦ ᑐᓴᐅᒪᑎᑦᑎᓗᑕᓗ ᖃᓄᖅ ᑎᑎᕋᕐᕕᒃᐳᑦ ᐊᐅᓚᓲᖑᖕᒪᖔᑦ ᐱᓕᕆᕝᕕᐅᑉ ᒪᓕᒐᖏᑦ, ᐊᑐᐊᒐᖏᑦ, ᐱᐅᓯᖏᑦ, ᐱᓕᕆᐊᒃᓴᑦ, ᐱᔨᑦᑎᕋᐅᑎᓪᓗ ᐱᔭᕆᐊᓕᖏᓐᓂᑦ ᐃᑲᔪᖅᑐᖅᑕᐅᓗᑎᒡᓗ ᐱᔪᓐᓇᐅᑎᒋᔭᑦ ᒪᒃᑯᒃᑐᓄᑦ, ᐃᓚᖏᓐᓄᑦ, ᐊᑐᓲ ᑖᒃᑯᓂᖓ.
ᑐᓴᐅᒪᑎᑦᑎᖃᑦᑕᕐᓂᖅ ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᐅᔾᔨᕈᓱᓕᖅᑎᑕᐅᓂᖏᑦ ᐊᒥᓱᐃᓕᖓᕗᑦ, ᐅᖃᓪᓚᒋᐊᖅᑐᕐᓂᒃᑯᑦ ᑐᓴᕆᐊᖅᑎᑦᑎᓂᒃᑯᓪᓗ, ᓄᓇᓕᖕᓂᑦ ᐃᓚᐅᑎᑦᑎᓂᒃᑯᑦ, ᖃᓄᐃᓕᐅᖅᑐᓄᐊᖃᑦᑕᕐᓂᒃᑯᑦ, ᓵᓚᒃᓴᕋᓱᖕᓂᒃᑯᑦ, ᓴᖅᑭᑦᑎᓂᒃᑯᑦ ᑐᓴᐅᒪᑎᑦᑎᓂᒃᑯᓪᓗ ᐱᕚᓪᓕᕈᑎᒃᓴᓂᒡᓗ, ᐱᓯᒪᓪᓗᑎᒍᓪᓗ ᑎᑎᕋᕕᑦᑕ ᐃᑭᐊᖅᑭᕕᐊ. ᑖᒃᑯᐊ ᐱᒋᐊᖅᓯᒪᔭᕗᑦ ᑐᕌᒐᖃᖅᑐᑦ ᐊᑕᐅᓯᕐᒥᑦ ᐃᓚᒌᒍᓐᓇᑦᑎᐊᕐᓂᕐᓂᑦ ᐱᓕᕆᖃᑎᒋᑦᑎᐊᖅᖢᒋᑦ ᐊᒥᓱᑦ ᐱᖃᖃᑕᐅᔪᑦ ᐃᓚᐅᓪᓗᑎᒃ ᓄᑕᖅᑲᑦ, ᒪᒃᑯᒃᑐᑦ, ᐃᓚᒌᑦ, ᓄᓇᓕᖕᒥᐅᑦ, ᐱᓕᕆᕝᕕᐅᔪᑦ, ᒪᓕᒐᓕᐅᕐᕕᒃ, ᑐᓴᒐᒃᓴᓕᕆᔨᓪᓗ.
ᐊᕐᕌᒍᑕᒫᑦ ᐅᐸᓗᖓᐃᔭᐃᕙᒃᐳᒍᑦ ᐸᖕᓇᐃᓇᓱᒃᖢᑕ ᑭᒃᑯᑐᐃᓇᕐᓂᑦ ᐅᔾᔨᖅᓱᓕᖅᐹᓪᓕᕐᑎᑦᑎᓂᖕᓄᑦ ᐱᒋᐊᕐᓯᒪᓕᕐᖢᑕ ᕿᓃᓐᓇᐅᔭᕐᖢᑕ ᓄᑖᓂ ᐱᕕᒃᓴᓂᑦ ᐃᓚᐅᖁᓪᓗᒋᑦ ᓄᓇᕗᒻᒥᐅᑦ, ᐱᔾᔪᑎᒃᓴᑦᑕ ᐱᔪᓐᓇᖅᑎᒃᑳᖓᑎᒍᑦ.
ᐃᓚᖓᑦ ᐱᓕᕆᐊᕆᓯᒪᒻᒪᕆᒃᑕᕗᑦ ᑭᒃᑯᑐᐃᓇᕐᓂᑦ ᐅᔾᔨᖅᓱᓕᖅᑎᑦᑎᕚᓪᓕᕐᓂᕐᒧᑦ ᓄᓇᓕᑦᑕ ᐃᓚᐅᓂᖏᓐᓂᑦ ᐱᓕᕆᐊᓂᑦ. ᑎᑎᕋᕐᕕᒃᐳᑦ ᐃᖃᓗᖕᓃᒻᒪᑦ ᐱᓕᕆᕙᒃᖢᑕᓗ ᑭᒡᒐᖅᑐᐃᓪᓗᑕ ᓄᓇᕗᒻᒥᐅᓕᒫᓂᑦ, 12−ᓄᑦ ᓄᓇᕗᒻᒥᑦ ᓄᓇᓕᖕᓄᐊᕈᒪᕗᒍᑦ ᐊᕐᕌᒍᑕᒫᑦ, ᑕᐃᒪᓕ ᓄᓇᓕᖕᓄᐊᖅᐸᖕᓂᐊᕐᓗᑕ ᐊᑕᐅᓯᐊᖅ ᐊᕐᕌᒎᒃ ᒪᕐᕉᐃᕌᓂᒃᑳᖓᑦ. ᓄᓇᓕᖕᓄᐊᕌᖓᑦᑕ, ᑐᓴᐅᒪᔭᒃᓴᓄᑦ ᓵᖃᖃᑦᑕᖅᐳᒍᑦ ᐃᓄᒃᑯᕕᖕᓂᑦ, ᐅᖃᐅᓯᖃᖅᐸᒃᖢᑕ ᐱᓕᕆᐊᑦᑎᓐᓂᑦ ᓄᓇᓖᑦ ᓈᓚᐅᑎᖃᕐᕕᐊᒍᑦ, ᐃᓕᓐᓂᐊᕐᑎᑦᑎᕙᒃᖢᑕ ᐱᔨᑦᑎᕋᖅᑎᓂᑦ ᐊᓯᖏᓐᓂᒡᓗ ᓄᓇᓕᖕᒥᐅᑕᓂᑦ, ᑲᑎᙵᑎᑦᑎᕙᒃᖢᑕᓗ ᓂᐱᖅᑯᖅᑐᒋᐊᕆᑦ: ᓇᒻᒥᓂᖅ ᑭᒡᒐᖅᑐᐃᓂᕐᒧᑦ ᐃᓕᓐᓂᐊᒐᒃᓴᖅ ᐃᓕᓐᓂᐊᕐᕕᖕᓂᑦ, ᐃᓚᐅᕙᒃᖢᑎᒃᓗ ᓄᓇᓕᖕᓂᑦ ᖃᓄᐃᓕᐅᕐᑐᖃᖅᑎᓪᓗᒍ ᐊᔪᕐᓇᙱᒃᑳᖓᑦ. ᐊᒻᒪᓗᑦᑕᐅᖅ, ᐱᕕᒃᓴᓕᐅᐸᒃᐳᒍ ᓈᓚᖕᓂᐊᕐᓗᑕ ᓄᓇᕗᒻᒥᐅᓂ ᐊᑲᐅᙱᓕᐅᕈᑎᓂᑦ ᐊᒃᑐᐃᔪᑦ ᐃᓄᖕᓂᑦ ᓄᓇᓕᓕᒫᓂᑦ.