ᓄᕕᐱᕆ 5, 2021
ᓱᒻᒪᑦ ᓄᑕᖅᑲᐃᑦ ᐱᔪᓐᓇᐅᑎᖏᑦ ᐊᑑᑎᖃᖅᐸᑦ?
ᐃᒪᐃᒃᑲᓗᐊᖅᑎᓪᓗᒍ ᓄᑕᖅᑲᐃᑦ ᒪᒃᑯᑦᑐᐃᓪᓗ ᓇᒻᒥᓂᖅᓱᒻᒪᑕ, ᐊᑦᑐᖅᑕᐅᓴᕋᐃᒻᒪᑕ ᑕᑎᖃᖅᓱᑎᓪᓗ ᐃᓐᓇᕐᓂᑦ. ᓄᑕᖅᑲᐃᑦ ᒪᒃᑯᑦᑐᐃᓪᓗ ᓯᕗᓂᑦᓴᕆᒐᑦᑎᒍ ᐊᒻᒪᓗ ᐅᕙᒍᑦ, ᐃᓐᓇᐅᓪᓗᑕ, ᑲᒪᒋᔭᖃᕆᐊᖃᕋᑦᑕ ᐊᑐᐃᓐᓇᕈᖅᑎᕆᓂᕐᒧᑦ ᓯᕗᓂᑦᓴᖏᓐᓄᑦ. ᑲᒪᒋᔭᖃᕆᐊᖃᕋᑦᑕ ᓇᓗᓇᐃᖅᓯᓂᕐᒧᑦ ᑲᔪᓯᓂᖃᑦᓯᐊᖁᔨᓂᕐᒧᑦ ᐃᒻᒥᒃᑰᕈᓐᓇᕐᓂᕐᒧᓪᓗ. ᑲᒪᒋᔭᖃᕆᐊᖃᕐᒥᔪᒍᑦ ᐊᖓᔪᖄᕆᔭᐅᔪᓪᓗᑕ ᐸᖅᑭᔨᐅᓪᓗᑕᓘᓐᓃᑦ ᓇᓗᓇᐃᖅᓯᓂᕐᒧᑦ ᐊᑐᓂ ᓄᑕᖅᑲᐅᑉ ᐃᓅᓯᖃᕐᓂᖓᓄᑦ ᐱᔪᓐᓇᕐᓂᓕᒫᖏᓐᓂ, ᐃᓱᒪᒃᑯᑦ, ᑎᒥᒃᑯᑦ, ᐃᑉᐱᒋᔭᖃᕐᓂᕐᒧᑦ. ᐊᕙᑎᒥ ᓇᔪᖅᑕᖓᓂ ᐊᖏᔪᒥᒃ ᐱᓕᕆᐊᑦᓴᖃᕐᒪᑦ ᑭᓇᐅᔪᒪᓂᖏᓐᓂᒃ ᓱᓇᑎᐅᔪᒪᓂᖏᓐᓄᓪᓘᓐᓃᑦ ᐊᖏᔪᖅᓯᕈᖅᐸᑕ.
ᒐᕙᒪᒃᑯᑦ ᐊᖏᔪᒥ ᑲᒪᒋᔭᖃᕆᐊᖃᕐᒥᔪᑦ ᓇᓗᓇᐃᖅᓯᓂᕐᒧᑦ ᐃᓘᓐᓇᑎᒃ ᓄᑕᖅᑲᐃᑦ ᒪᒃᑯᑦᑐᐃᓪᓗ ᐊᔾᔨᒌᒥ ᐱᔪᓐᓇᕐᓂᕐᒧᑦ ᓱᓇᓕᒫᓂ ᐱᔭᕆᐊᓕᖏᓐᓂᒃ ᐃᓅᓯᖃᑦᓯᐊᕐᓂᕐᒧᑦ, ᓲᕐᓗ ᐋᓐᓂᐊᖅᑐᓕᕆᓂᕐᒧᑦ, ᐃᓕᓐᓂᐊᕐᓂᕐᒧᑦ, ᐃᓕᖅᑯᓯᕐᒧᑦ, ᐊᑦᑕᕐᓇᖏᑦᑐᒥ, ᓴᓗᒪᔪᒥᓪᓗ ᐃᒥᕋᑦᓴᖃᕐᓂᕐᒧᑦ, ᓂᕿᓂᒃ, ᐊᑦᑕᕐᓇᖏᑦᑐᒥ ᐊᖏᕐᕋᒥ, ᓱᓕᒃᑲᓐᓂᕐᓗ.
ᒪᒥᐊᓇᖅᑑᒐᓗᒐᓗᐊᖅ, ᓄᓇᕗᒻᒥ ᐃᓘᓐᓇᑎᒃ ᓄᑕᖅᑲᐃᑦ ᒪᒃᑯᑦᑐᐃᓪᓗ ᐊᔾᔨᒌᒥ ᐱᔪᓐᓇᓂᖃᖏᒻᒪᑕ ᓱᓇᑐᐃᓐᓇᕐᓂᑦ ᑎᑎᕋᖅᓯᒪᔪᓂ ᖁᓛᓂ, ᑕᐃᒪᐃᒻᒪᑦ ᓄᑕᖅᑲᐃᑦ ᐱᔪᓐᓇᐅᑎᖏᑦ ᐊᑑᑎᖃᖅᐳᑦ. ᓄᓇᕐᔪᐊᕐᒥᑦ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ ᐃᑲᔪᖅᑐᑦ ᐃᓕᑕᖅᓯᓂᕐᒧᑦ ᓄᑕᖅᑲᐃᑦ ᒪᒃᑯᑦᑐᐃᓪᓗ ᐃᓄᐃᑦ ᖃᓄᐃᖏᑦᓯᐊᕆᐊᖃᕐᒪᑕ ᐊᑦᑕᓇᖏᑦᑐᒥᓪᓗ ᐊᑭᖃᖅᑎᒋᒐᓗᐊᖅᐸᑦ.
________________________________________________________________________________________________________________________________________________________
ᐅᑐᐱᕆ 20, 2021
ᓂᕈᐊᕈᓐᓇᖅᑐᑦ ᐅᑭᐅᖏᑦ ᐊᑦᑎᒃᓯᒋᐊᖅᑕᐅᓪᓗᐊᖅᐸᑦ 16-ᒧᑦ?
ᐊᐃᖓᐃ ᓄᓇᕗᒻᒥᐅᑦ,
ᔭᓐᓄᐊᓕ 2021-ᒥ, ᖁᕝᕙᓯᓐᓂᓖᑦ 11-ᒥ ᐃᓕᓐᓂᐊᖅᑏᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᒻᒥ, ᐃᖃᓗᓐᓂ, ᐱᓕᕆᖃᑎᒌᓚᐅᕐᒪᑕ ᐱᓕᕆᐊᑦᓴᕐᒥ ᐅᖃᐅᓯᖃᕐᓂᕐᒧᑦ ᐃᓱᒪᒋᔭᖏᓐᓂᒃ ᓱᒻᒪ ᓂᕈᐊᕈᓐᓇᕐᓂᕐᒧᑦ ᐊᕐᕌᒍᖏᑦ ᑲᓇᑕᒥ ᒐᕙᒪᑐᖃᒃᑯᑦ ᓂᕈᐊᕐᓇᐅᑎᓪᓗᒍ ᐊᑉᐸᑦᓯᒋᐊᑦᑕᐅᒋᐊᓕᒃ 18-ᒥ 16-ᒧᓄ ᐊᕐᕌᒍᖏᑦ. ᑖᓐᓇ ᐱᓕᕆᐊᒃᓴᒥᑦ ᐃᑲᔪᖅᓱᐃᔪᒥᒃ ᐱᖁᔭᑦᓴᖅ S−209, ᐱᖁᔭᖅ ᐋᖅᑭᒋᐊᕐᓗᒍ ᑲᓇᑕᒥ ᓂᕈᐊᕐᓂᕐᓄᑦ ᐱᖁᔭᖅ ᐊᒻᒪ ᐊᑐᕆᐊᓕᑦ ᓱᖏᐅᑎᓗᓂ ᑲᓇᑕᒥ ᓂᕈᐊᕐᓂᕐᒧᑦ ᐱᖁᔭᕐᒥ ᐱᔾᔪᑎᓄᑦ ᒪᓕᒐᐅᑉ ᒥᒃᓵᓄᑦ ᓂᕈᐊᕐᓂᖅ (ᐱᖁᔭᑦᓴᖅ S−209). ᐃᓚᖓ ᐃᓕᓐᓂᐊᖅᑎᐅᑉ ᐃᓚᒋᔭᐅᓚᐅᖅᑐᖅ ᐱᓕᕆᐊᒧᑦ, ᐱᓂᐊᓚᐱ ᐋᒻᔅᑐᕌᖕ, ᐅᖃᖅᑐᖅ, “ᓱᓕᔪᖅᓴᕐᓂᖃᓪᓚᕆᖅᑐᒍᑦ ᐃᓄᐃᑦ ᐊᕐᕌᒍᖃᑎᕗᑦ ᐱᕕᖃᕆᐊᖃᕐᓂᖏᓐᓄᑦ ᐃᓚᒋᔭᐅᓂᕐᒧᑦ ᓂᕈᐊᕋᑦᓴᐅᔪᓄᑦ ᐃᖏᕐᕋᓂᖏᓐᓂᒃ.”
ᑭᒡᒐᖅᑐᐃᔨᐅᑦᓱᖓ ᐅᐱᕐᖔᒃᑯᑦ ᐃᓕᓐᓂᐊᖅᑎᐅᓪᓗᖓ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂᑦ (RCYO), ᐊᐱᕆᔭᐅᓯᒪᒐᒪ ᕿᒥᕐᕈᖁᔭᐅᕐᓱᖓ ᐃᓱᒪᒋᔭᖃᕐᓂᕐᒧᓪᓗ ᑖᑦᓱᒪᖓ ᐱᔾᔪᑕᐅᔪᒥᑦ. ᓱᓇᓂ ᐃᓕᓐᓂᐊᕈᑎᒋᓯᒪᔭᓐᓂᑦ ᓇᓗᓇᐃᔭᖅᓯᒪᔪᖅ ᐊᑖᓂ.
ᓂᕈᐊᕈᓐᓇᖅᑐᑦ ᐊᕌᒍᖏᑦ ᑲᓇᑕᒥ ᐋᖅᑭᑕᐅᒋᐊᙵᖅᓯᒪᔪᖅ 21-ᓂ ᐊᕐᕌᒍᓕᓐᓄᑦ ᐱᔾᔪᑎᒋᑦᓱᒍ ᓱᓕᔪᕆᔭᐅᓯᒪᒻᒪᑦ ᐊᕐᕌᒍᖃᓕᖅᑎᓪᓗᒍ ᐃᓄᒃ “ᐃᓱᒪᒋᔭᐅᒋᐊᖓᓂᑦ ᐱᕈᖅᓯᒪᔪᖅ ᐃᓚᒋᔭᐅᔪᓐᓇᕐᓂᕐᒧᑦ ᓂᕆᐊᕋᑦᓴᐅᔪᓄᑦ ᐃᖏᕐᕋᓂᖏᓐᓂᒃ ᓂᕈᐊᕈᓐᓇᕐᓂᕐᒧᓪᓗ ᓂᕈᐊᕐᓇᐅᑎᓪᓗᒍ”. ᓯᕗᓪᓕᕐᒥ ᐊᐃᑉᐸᖓᓂᓗ ᓄᓇᕐᔪᐊᕐᒥ ᐅᓇᑕᖅᑐᖃᖅᑎᓪᓗᒍ, ᐅᓇᓖᑦ ᐊᑐᐃᓐᓇᐅᑎᑦᓯᕕᐅᖃᑦᑕᖅᓯᒪᔪᓂᑦ ᐱᔪᓐᓇᐅᑎᖃᕐᓂᕐᒧᑦ ᓂᕈᐊᕐᓂᕐᒧᑦ, ᐊᕐᕌᒍᖏᑦ ᐃᓱᒪᒋᓇᒋᑦ, 1970-ᖑᓕᖅᑎᓪᓗᒍ, ᓂᕈᐊᕈᓐᓇᕐᓂᕐᒧᑦ ᐊᕐᕌᒍᖏᑦ ᐊᑉᐸᕆᐊᖅᑕᐅᓯᒪᔪᑦ 21-ᒥ 18-ᒧᓄ ᐊᕐᕌᒍᓕᓐᓄᑦ.
ᐅᓪᓗᒥ, ᐊᕐᕌᒍᖃᕐᓂᕐᒧᑦ ᐅᓄᕐᓂᖅᓴᓄᑦ, ᐊᕐᕌᒍᖓ ᒪᒃᑯᑦᑐᒧ ᐃᓱᒪᒋᔭᐅᔪᖅ ᐃᓐᓇᖅ ᒪᓕᒐᖅᑎᒍᑦ, ᐊᔾᔨᒌᖏᑦᑐᖅ 18 ᐊᒻᒪᓗ 19-ᓂ ᐊᕐᕌᒍᓖᑦ ᑲᓇᑕᓕᒫᕐᒥ. ᓄᓇᕗᒻᒥ, ᐊᕐᕌᒍᖃᕐᓂᕐᒧᑦ ᐅᓄᕐᓂᖅᓴᓄᑦ 19-ᓂ, ᑭᓯᐊᓂ ᐃᓄᒃ 18-ᓂ ᐊᕐᕌᒍᓕᒃ ᓂᕈᐊᕈᓐᓇᖅᑐᖅ ᑕᒪᒃᑮᓐᓂᒃ ᓄᓇᕗᒻᒥ ᒐᕙᒪᑐᖃᒃᑯᓐᓂᓪᓗ ᓂᕈᐊᕐᓂᕐᒧᑦ. ᐊᕐᕌᒍᖃᓕᖅᑐᑦ 16-ᓂ, ᐃᓄᒃ ᐊᑎᓕᐅᖅᑕᐅᖃᑕᐅᓯᒪᔪᖅ ᓄᓇᕗᒻᒥ ᐊᖏᕈᑎᒧᑦ ᓂᕈᐊᕈᓐᓇᖅᑐᖅ ᓄᓇᕗᑦ ᑐᙵᕕᒃᑯᓐᓄᑦ. (ᓄᓇᕗᑦ ᑐᙵᕕᒃᑯᑦ) ᓂᕈᐊᕐᓃᑦ. ᐊᒻᒪᓗᑦᑕᐅᖅ 16-ᓂ ᐊᕐᕌᒍᓖᑦ, ᐃᓄᒃ ᐱᔪᓐᓇᕐᓂᖃᖅᑐᖅ ᐊᖁᑦᑐᖅᓯᐅᑎᑖᕐᓂᕐᒧᑦ, ᐃᖅᑲᓇᐃᔮᕐᒧᑦ, ᐊᑭᓕᖅᑐᐃᓂᕐᒧᓪᓗ ᑖᒃᓰᔭᕈᑎᓂᑦ.
ᑲᓇᑕᒥᐅᑕᐅᓗᓂ, ᑲᒪᒋᔭᖃᕆᐊᖃᕋᑦᑕ, ᑐᑭᖓ ᑲᒪᒋᔭᕆᒋᐊᓕᕗᑦ, ᓂᕈᐊᕐᓂᕐᒧᑦ ᒐᕙᒪᑐᖃᒃᑯᑦ ᓂᕈᐊᕐᓂᖃᖅᑎᓪᓗᒋᑦ ᐊᑦᑐᖅᑕᐅᓯᒪᖃᑦᑕᕋᑦᑕ ᐃᓱᒪᓕᐅᕆᔭᐅᔪᓄᑦ ᒐᕙᒪᒃᑯᓐᓄᑦ. ᐃᓚᖓ ᑲᒪᒋᔭᑦᓴᕆᒋᐊᖃᒻᒪᕆᑦᑕᕗᑦ ᐱᓕᒻᒪᑦᓴᖃᑦᑕᕐᓂᕐᒧᑦ ᐱᔪᓐᓇᕐᓂᖃᕐᓂᕐᒧᑦ ᓂᕈᐊᕐᓂᕐᒧᑦ ᑐᓴᐅᒪᑦᓯᐊᕐᓂᕐᒧᑦ ᓂᕈᐊᕆᔭᖃᕐᓂᕐᒧᑦ ᐃᓕᓐᓂᐊᖅᓯᒪᓂᕐᒧᓪᓗ ᓂᕈᐊᕐᓂᕐᒧᑦ. ᑕᐃᒪᐃᓐᓂᐊᕐᓗᓂ, ᓂᕈᐊᓚᐅᙱᓪᓗᑎᑦ, ᓂᕈᐊᖅᑎ ᖃᐅᔨᓇᓱᐊᕆᐊᓕᒃ ᐊᑐᓂ ᓂᕈᐊᕋᑦᓴᒥ ᐃᓱᒪᓕᐅᕐᓂᕐᒧᓪᓗ ᐃᑉᐱᓐᓂᐊᒋᔭᖓᓂᑦ ᑭᒡᒐᖅᑐᐃᑦᓯᐊᕋᔭᕐᓂᖓᓄᑦ ᐱᔾᔪᑕᐅᔪᐃᓪᓗ ᐱᒻᒪᕆᐅᒋᔭᖏᑦ ᐃᓱᒪᓕᐊᕆᔭᖃᕋᐃᑉᐸᑕ ᑭᒡᒐᖅᑐᐃᑦᓱᑎᒃ ᒐᕙᒪᒃᑯᓐᓂᑦ.
ᐊᖁᑦᑐᖅᓯᐅᑎᑖᕐᓂᕐᒧᑦ, ᐃᓄᑦ ᖄᖏᖅᓯᒋᐊᓕᒃ ᑕᒪᒃᑮᓐᓂᒃ ᑎᑎᕋᖅᓯᒪᔪᒥ ᖃᐅᔨᓴᖅᑕᐅᒍᑎᖓᓂᓪᓗ, ᐊᒻᒪ ᒪᓕᒋᐊᖃᕐᓂᕐᒧᑦ ᐃᖏᕐᕋᔾᔪᑎᓄᑦ ᒪᓕᒐᕐᓂᑦ ᖃᖓᓕᒫᖅ. ᐃᖅᑲᓇᐃᔮᖃᖏᓐᓇᕐᓂᕐᒧᑦ, ᐃᓄᒃ ᐃᓘᓐᓇᖏᓐᓂᒃ ᑲᒪᒋᔭᖃᕆᐊᓕᒃ ᐃᖅᑲᓇᐃᔮᖃᕐᓂᕐᒧᑦ ᐊᑭᓕᖅᑐᐃᓂᕐᒧᓪᓗ ᑖᒃᓰᔭᕈᑎᓂᑦ. ᓲᕐᓗ, ᐃᓄᒃ ᐊᕐᕌᒍᓕᒃ 16-ᓂ ᖃᐅᔨᓇᓱᐊᕈᓐᓇᕐᓂᓕᒃ ᓂᕈᐊᕋᑦᓴᐅᔪᓂᑦ ᐃᓱᒪᒋᔭᖏᓐᓂᓪᓗ ᐃᑉᐱᓐᓂᐊᓂᕆᔭᖏᓐᓂᒃ ᐱᐅᓂᖅᐹᒃᑯᑦ ᓂᕈᐊᕆᔭᖃᕐᓂᕐᒧᑦ.
ᐃᓱᒪᒋᔭᒃᑯᑦ, ᓱᓕᔪᖅᓴᖅᑐᖓ ᓂᕈᐊᕈᓐᓇᕐᓂᕐᒧᑦ ᐊᕌᒍᓕᐅᑉ ᐊᑉᐸᓯᒋᐊᖅᑕᐅᒋᐊᖃᕐᓂᖓᓄᑦ ᐅᑯᐊ ᐱᔾᔪᑎᒋᑦᓱᒋᑦ:
- ᐃᑲᔪᖅᑐᐃᓂᕐᒧᑦ ᒪᒃᑯᑦᑐᓂᑦ ᖃᐅᔨᒪᔭᖃᕐᓂᕐᒧᑦ ᒪᓕᒐᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ ᐃᑲᔪᖅᑐᖅᑕᐅᒍᑕᐅᔪᓐᓇᕈᑎᖏᓐᓄᑦ ᐱᓇᔪᖃᑕᐅᖃᑦᑕᕐᓂᕐᒧᑦ ᓄᓇᓕᖏᓐᓂᒃ, ᓄᓇᕗᒻᒥ ᑲᓇᑕᐅᓪᓗ ᓯᓚᑖᓂ. ᑖᓐᓇ ᐃᑲᔪᕐᓂᖃᕋᔭᖅᑐᖅ ᓯᕗᓂᑦᓴᑎᓐᓄᑦ.
- ᖃᑦᓯᐅᓂᖏᑦ ᓂᕈᐊᖅᑎᐅᔪᑦ ᐅᓗᖅᓯᕈᓐᓇᖅᑐᖅ, ᐃᑲᔪᖅᑐᐃᓂᕐᒧᑦ ᑖᒃᑯᓇᖓ ᓂᕈᐊᖅᑕᐅᓯᒪᔪᓂᑦ ᑭᒡᒐᖅᑐᐃᓂᕐᒧᑦ ᐊᒥᓱᑲᓐᓂᕐᓂᑦ ᓄᓇᕗᒻᒥᐅᓂᑦ ᑲᓇᑕᒥᐅᑕᓂᓪᓗ.
- ᐃᓱᒪᒋᔭᐅᔪᑦ ᐃᓱᒪᒋᔭᖏᓪᓗ ᒪᒃᑯᑦᑐᐃᑦ ᐊᑑᑎᖃᓪᓚᕆᑦᑐᐃᑦ. ᐱᔪᓐᓇᐅᑎᖃᖅᑐᑦ ᐅᖃᕈᓐᓇᕐᓂᕐᒧᑦ ᓯᕗᓂᑦᓴᖏᓐᓄᑦ ᐃᓱᒪᓕᐊᕆᔭᐅᔪᓄᓪᓗ ᑭᒡᒐᖅᑐᖅᑕᐅᑦᓱᑎᒃ.
ᒫᓐᓇᐅᔪᖅ ᐱᓕᕆᔾᔪᑕᐅᔪᑦ ᓴᖅᑭᔮᖅᑎᑦᓯᓂᖅᓴᐅᔾᔪᑏᑦ ᐅᔾᔨᕈᓱᑦᑎᑦᓯᓂᕐᒧᓪᓗ ᓄᓇᕐᔪᐊᕐᒥ ᐱᔾᔪᑕᐅᔪᑦ, ᒪᒃᑯᑦᑑᓗᓂ ᐅᓪᓗᒥ ᐊᔾᔨᒋᖏᑦᑕᖓ ᒪᒃᑯᑦᑑᓗᓂ ᑕᐃᑦᓱᒪᓂᓂᐊᓗᒃ, ᓂᕈᐊᕈᓐᓇᕐᓂᕐᒧᑦ ᐊᕐᕌᒍᖓ ᓇᓗᓇᐃᖅᑕᐅᓯᒪᑎᓪᓗᒍ. ᒪᐃᔭ ᑐᐊᑕᓐ, ᐃᓄᒃᓱᒃ ᐃᓕᓐᓂᐊᕐᕕᐊᓗᒃᒥ ᐃᓕᓐᓂᐊᖅᑎ ᐃᓚᒋᔭᐅᔪᖅ ᐱᓕᕆᐊᒧᑦ ᐅᖃᖅᑐᖅ, “ᓂᕈᐊᕈᓐᓇᖅᓯᑎᑦᓯᓂᖅ ᒪᒃᑯᑦᑐᓂᑦ 16-ᓂ ᐊᕐᕌᒍᓕᓐᓂᑦ ᐅᖓᑖᓄᓪᓗ ᐃᓚᒋᔭᐅᒋᐊᖃᕐᓂᖏᓐᓄᑦ ᓄᑖᙳᑎᑦᓯᓂᕐᒧᑦ ᒐᕙᒪᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᒥᑦ.” 16-ᓂ ᐊᕐᕌᒍᓕᒃ ᓂᕈᐊᕈᓐᓇᖅᐸᑦ ᐃᓚᖏᓐᓂᑦ ᓂᕈᐊᕐᓂᐅᔪᓄᑦ; ᐊᖁᒍᓐᓇᖅᓱᑎᓪᓗ ᓄᓇᒃᑰᕈᑎᒥᑦ; ᐃᖅᑲᓇᐃᔮᖃᕐᓂᕐᒧᑦ; ᐊᑭᓕᖅᑐᐃᓂᕐᒧᑦ ᑖᒃᓰᔭᕈᑎᓂᑦ; ᐊᒻᒪᓗ ᐃᓚᖏᓐᓂ ᖃᓄᐃᓐᓂᐅᔪᓂᑦ, ᐃᓱᒪᓕᐊᕆᔭᖃᕐᓂᕐᒧᑦ ᓇᒻᒥᓂᖅ ᑭᒡᒐᖅᑐᐃᓗᑎᒃ, ᐱᔪᓐᓇᕐᓂᖃᕆᐊᖃᕐᒥᔪᑦ ᓂᕈᐊᕈᓐᓇᓂᕐᒧᑦ ᓂᕈᐊᖅᕕᐅᔪᓕᒫᓄᑦ.
ᑎᑎᕋᖅᓯᒪᓂᓕᒃ 12 ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᖕᓂᕆᔭᖏᑦ ᓄᑕᕋᐅᑉ ᐅᖃᖅᑐᖅ ᒪᒃᑯᑦᑐᐃᑦ ᐱᔪᓐᓇᐅᑎᖃᖅᑐᑦ ᐃᓱᒪᒋᔭᒥᓂᒃ ᐅᖃᐅᓯᖃᕐᓂᕐᒧᑦ ᐃᓐᓇᐃᓪᓗ ᐃᓱᒪᒋᔭᖃᕐᓂᕐᒧᑦ ᐃᓱᒪᒋᔭᒋᔭᖏᓐᓂᑦ ᐃᓱᒪᓕᐅᓕᕋᐃᑉᐸᑕ ᑭᒡᒐᖅᑐᐃᓗᑎᒃ, ᑕᐃᒪᐃᒻᒪᑦ ᑭᒡᒐᖅᑐᐃᔨᖓᑕ ᐊᓪᓚᕝᕕᖓᓄ ᓄᑕᖅᑲᑦ ᒪᒃᑯᑦᑐᓪᓗ ᐅᕙᖓᓗ ᐃᑲᔪᖅᑐᐃᔪᒍᑦ ᐱᖁᔭᑦᓴᓯ S-209-ᒥ ᐊᑉᐸᕆᐊᕆᓂᕐᒧᓪᓗ ᓂᕈᐊᕈᓐᓇᕐᓂᕐᒧᑦ ᐊᕐᕌᒍᖏᓐᓂᒃ 16-ᒧ.
ᐅᕙᙶᖅᑐᖅ,
ᑲᐅᑕᖅ ᖃᑉᓗᑦᓯᐊᖅ
ᑭᒡᒐᖅᑐᐃᔪᖅ ᐊᐅᔭᒃᑯᑦ ᐃᓕᓐᓂᐊᖅᑎ
________________________________________________________________________________________________________________________________________________________
ᐊᒐᓯ 11, 2021
ᐅᐱᕐᖔᖅᕋ ᑭᒡᒐᖅᑐᐃᔨᒃᑯᓐᓄᑦ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂᑦ
ᐊᑕᐅᑦᑎᒧᑦ ᑭᒡᒐᖅᑐᐃᓂᖅ
ᓯᕗᓪᓕᕐᒥ ᐱᓇᓱᐊᕈᓯᕐᓄᑦ ᓯᑕᒪᓂᒃ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓃᑦᓱᖓ ᐱᓕᕆᖃᑎᖃᖅᓱᖓ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ (IA) ᐱᓕᕆᖃᑎᒌᓂᑦ. ᕿᒥᕐᕈᓚᐅᖅᑕᒃᑲ ᐃᑲᔪᖅᓱᖓᓗ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂ ᐱᓕᕆᖃᑎᒌᓂᑦ ᐱᓕᕆᐊᖑᔪᓂ ᑎᑎᖅᑲᐅᑎᓂᒃ ᐅᕙᓐᓂ ᐃᑲᔪᖃᑦᑕᖅᑐᖅ ᑐᑭᓯᐅᒪᑦᓯᐊᕐᓂᖅᓴᐅᓂᕐᒧᑦ ᓱᓇᐅᒻᒪᖔ ᑭᒡᒐᖅᑐᐃᔨ ᖃᓄᕐᓗ ᐱᓕᕆᐊᖃᑎᖃᖃᑦᑕᕐᒪᖔᑕ ᓄᑕᖅᑲᓄᕐᓗ ᒪᒃᑯᑦᑐᓂᓪᓗ ᓄᓇᕗᒻᒥ.
ᐱᓕᕆᐊᓄᑦ ᑭᒡᒐᖅᑐᐃᓂᖅ
ᐱᓕᕆᖃᑎᖃᓚᐅᖅᓯᒪᕗᖓ ᐋᖅᑭᐅᒪᑎᑦᑎᓇᓱᐊᖅᑎᓂᒃ ᑭᒡᒐᖅᑐᐃᔨᓂᒃ ᐱᓇᓱᐊᕈᓯᕐᓄ ᓯᑕᒪᓄᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂᑦ. ᐃᑲᔪᖅᑕᐅᑦᓱᑕ ᐋᖅᑭᐅᒪᑎᑦᓯᓇᓱᐊᖅᑎᓄᑦ ᐱᓕᕆᖃᑎᒌᓂᒃ ᕿᒥᕐᕈᒍᓐᓇᓚᐅᖅᑐᖓ ᐋᖅᑭᐅᒪᑎᑦᓯᓇᓱᐊᕐᓂᕐᒧᑦ ᑐᓴᕋᑦᓴᓂᒃ ᑲᑎᖅᓱᐃᕝᕕᒃ ᖃᕆᓴᐅᔭᑎᒍᑦ ᑐᑭᓯᐅᒪᑦᓯᐊᕐᓂᖅᓴᐅᓂᕐᒧᓪᓗ ᓱᓇᐅᒻᒪᖔᑕ ᐋᖅᑭᐅᒪᑎᑦᓯᓇᓱᕐᓂᕐᒧᑦ ᐱᔾᔪᑕᐅᒪᖔᑕ ᓄᓇᕗᒻᒥ, ᖃᓄᕐᓗ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓ ᐱᓕᕆᐊᖃᖃᑦᑕᕐᒪᖔᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᑦ; ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᒪᓕᒐᓕᕆᔨᒃᑯᑦ, ᐃᓕᓐᓂᐊᕐᓂᓕᕆᔨᒃᑯᑦ, ᐊᒻᒪᓗ ᐃᓄᓕᕆᔨᒃᑯᑦ, ᐱᔨᑦᓯᕋᐅᑎᖏᓐᓂᑦ ᐱᐅᓂᖅᓴᐅᑎᑦᓯᓂᕐᒧᑦ. ᐱᓕᕆᐊᓄᑦ ᑭᒡᒐᖅᑐᐃᔨᓄ ᐱᓕᕆᖃᑎᒌᑦ ᐅᖃᐅᓯᖃᓚᐅᕐᒥᔪᑦ ᐃᓚᖏᓐᓂᒃ ᖃᐅᔨᓴᕐᓂᕐᒧᑦ ᐃᑲᔪᕈᑕᐅᔪᓐᓇᖅᑐᓄᑦ ᐅᕙᓐᓄᑦ. ᑕᒪᓐᓇ ᐃᑲᔪᖅᓯᓂᖃᓚᐅᖅᑐᖅ ᐊᐱᕆᔭᐅᓚᐅᕋᒪ ᖃᐅᔨᓇᓱᐊᖁᔭᐅᑦᓱᖓ ᐃᓱᒪᒋᔭᖃᕐᓂᕐᒧᓪᓗ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓ ᐃᑲᔪᖅᑐᐃᒋᐊᖃᕐᓂᖓᓄᑦ ᐱᖁᔭᑦᓴᒥ S-209-ᒥ, ᐱᖁᔭᖅ ᐋᖅᑭᒋᐊᕆᓂᕐᒧᑦ ᑲᓇᑕᒥ ᓂᕈᐊᕐᓂᕐᓄᑦ ᐱᖁᔭᐃᑦ ᐊᒻᒪᓗ ᐊᑐᕆᐊᓖᑦ ᓱᖏᐅᑎᓂᕐᒧᑦ ᑲᓇᑕᒥ ᓂᕈᐊᕐᓂᕐᒧᑦ ᐱᖁᔭᕐᒥ ᐱᔾᔪᑎᓄᑦ ᒪᓕᒐᐅᑉ ᒥᒃᓵᓄᑦ ᓂᕈᐊᕐᓂᕐᒧᑦ (ᐱᖁᔭᖅ S-209), ᐊᑉᐸᕆᐊᕆᓂᕐᒧᑦ ᓂᕈᐊᕐᓂᕐᓄᑦ ᐊᕐᕌᒍᖏᓐᓂᒃ 18-ᒥ 16-ᒧ ᒐᕙᒪᑐᖃᒃᑯᑦ ᓂᕈᐊᕐᓇᕐᓂᕐᒧᑦ.
ᑕᒪᓐᓇ ᐊᑐᖅᑎᓪᓗᒍ, ᑭᒡᒐᖅᑐᐃᔨ ᓴᖅᑭᓚᐅᖅᑐᖅ ᑲᑎᒪᔨᕋᓛᓄᑦ ᖃᐅᔨᓴᖃᑦᑕᖅᓯᒪᔭᖏᓐᓂᒃ ᒐᕙᒪᒃᑯᑦ ᐊᐅᓚᓂᕆᔭᖏᓐᓄᑦ ᒐᕙᒪᒃᑯᑦ ᑮᓇᐅᔭᓕᕆᔾᔪᑎᖏᓪᓗ (ᑲᑎᒪᔨᕋᓛᑦ) ᓂᓪᓗᕈᑎᖃᓚᐅᖅᑐᖅ ᓱᓕᔪᒥ ᖃᓄᐃᓕᐅᖅᐸᓪᓕᐊᓂᖏᓐᓄᑦ ᐊᑦᑐᖅᑕᐅᓴᕋᐃᑦᑐᖁᑎᑦᑎᓐᓄᑦ ᓄᑕᖅᑲᐃᑦ ᒪᒃᑯᑦᑐᐃᓪᓗ ᓄᓇᕗᒻᒥ. ᑲᑎᒪᔨᕋᓛᑦ ᖃᓄᐃᓐᓂᐅᔪᒥ ᑭᒡᒐᖅᑐᐃᔨ ᐅᖃᖃᑎᖃᖅᑎᓪᓗᒍ ᐱᓕᕆᐊᑦᓴᖏᓐᓂᒃ ᓇᓂᔭᐅᔪᓂᓪᓗ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂᑦ ᖃᐃᖁᔭᐅᓯᒪᔪᓪᓗ ᓯᑕᒪᓂ ᓄᑕᖅᑲᓄᑦ- ᒪᒃᑯᑦᑐᓄᓪᓗ-ᐱᔨᑦᓯᕋᖅᑎᓂᑦ ᐱᓕᕆᕝᕕᐅᔪᓂᑦ ᐊᒻᒪᓗ ᐊᐅᓚᑦᑎᔩᑦ ᐱᔨᑦᑎᕋᖅᑏᓪᓗ ᑲᑎᒪᔨᖏᓐᓂᑦ. ᑖᒃᑯᓇᖓᑦ ᐅᖃᖃᑎᖃᕐᓂᕐᒧᑦ ᕿᒥᕐᕈᕙᑦᑐᑦ ᓇᓗᓇᐃᕈᑎᑦᓴᓂᑦ ᐊᑐᐃᓐᓇᐅᑎᑕᐅᔪᓄᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ ᐊᕐᕌᒍᓕᒫᖅᓯᐅᑎᒥ ᐅᓂᒃᑳᖅ ᐱᓕᕆᐊᑦᓴᕆᔭᐅᔭᕆᐊᓕᓐᓂᑦ ᐱᓕᕆᕝᕕᐅᔪᓄᑦ ᐃᑲᔪᖅᑐᐃᑦᓯᐊᕐᓂᖅᓴᐅᓂᕐᒧᑦ ᓄᑕᖅᑲᑎᓐᓂᑦ ᒪᒃᑯᑦᑐᓂᓪᓗ ᓄᓇᕗᒻᒥ.
ᑐᓴᐅᒪᑎᑦᑎᖃᑦᑕᕐᓂᖅ ᑭᒃᑯᑐᐃᓐᓇᕐᓂᓪᓗ ᐅᔾᔨᕈᓱᓂᖏᓐᓂᒃ
ᐃᖅᑲᓇᐃᔭᓕᖅᑐᖓ ᑐᓴᐅᒪᑎᑦᓯᔩᑦ ᑭᒃᑯᑐᐃᓐᓇᕐᓂᓪᓗ ᐅᔾᔨᕈᓱᓂᖏᓐᓂᒃ (ᑐᓴᐅᒪᖃᑦᑕᐅᑎᓂᖅ) ᐱᓕᕆᐊᖅᒥ ᐱᒋᐊᓚᐅᕋᒪᓂ ᐅᐱᕐᖔᖅᒥ ᐃᓕᓐᓂᐊᖅᑎᐅᑦᓱᖓ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ. ᐃᑲᔪᖅᑕᐅᑦᓱᖓ ᐊᐅᓚᑦᓯᔨᒧᑦ, ᑎᑎᕋᓚᐅᖅᑕᒃᑲ ᐃᓘᓐᓇᑎᒃ ᓴᖅᑭᔮᖅᑎᑕᐅᔪᑦ ᑕᑯᔭᑎᑦ ᑕᕝᕙᓂ ᒪᑉᐱᖅᑐᒐᕐᒥ, ᑎᑎᕋᓚᐅᖅᑐᖓ ᑎᑎᖅᑲᕐᒥ ᑭᒡᒐᖅᑐᖅᓱᒋᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ ᐱᖁᔭᑦᓴᐅᕐ S-209 ᒥᑦᓵᓄᑦ, ᐃᓕᓚᐅᖅᑐᖓ ᖃᓄᖅ ᐊᑐᐃᓐᓇᕈᖅᑎᕆᓂᕐᒧᑦ ᑎᑎᕋᖅᓯᒪᔪᓂᑦ ᑐᑭᓕᐅᖅᑕᐅᓂᐊᖅᑎᓪᓗᒋᑦ, ᐃᓚᒋᔭᐅᑦᓱᖓᓗ ᐊᐱᖅᓱᑕᐅᓂᕐᒧᑦ ᐅᑯᓄᖓ ᑭᒡᒐᖅᑐᐃᔨᖓᓂ ᐊᒻᒪᓗ ᓄᓇᖃᖅᑳᖅᑐᓄᑦ ᑕᓚᕖᓴᓕᕆᔨᒃᑯᑦ (APTN).
ᐱᓕᕆᖃᑎᖃᖅᓱᓂ ᑐᓴᐅᒪᑎᑦᓯᔨᓂᑦ, ᐱᔪᓐᓇᖅᓯᓚᐅᖅᑐᖓ ᓄᑖᓂ ᑎᑎᕋᕈᓐᓇᕐᓂᕐᒧᑦ ᖃᐅᔨᓴᕐᓂᕐᒧᓪᓗ ᐊᔪᙱᑕᖃᕐᓂᕐᒧᑦ ᐊᑐᕐᓂᖃᓪᓚᕆᓐᓂᐊᖅᑐᖅ ᐊᒥᓱᓄ ᐊᕐᕌᒍᓄᑦ ᐃᓕᓐᓂᐊᖅᑎᓪᓗᖓ ᐃᖅᑲᓇᐃᔮᕆᓛᖅᑕᓐᓂᓪᓗ.
ᑭᒡᒐᖅᑐᖅᑎ ᓄᑕᖅᑲᓂᒃ ᒪᒃᑯᑦᑐᓂᓪᓗ
ᐃᖅᑲᓇᐃᔭᖃᑎᒋᓚᐅᖅᓱᒋᑦ ᐱᓕᕆᐊᑦᓴᓕᒫᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ, ᑭᖑᓪᓕᐹᖅᓂ ᐱᓇᓱᐊᕈᓯᓐᓂᑦ ᐅᐱᕐᖔᒃᑯᑦ ᐃᓕᓐᓂᐊᖅᑎᐅᑎᓪᓗᖓ ᐃᖅᑲᓇᐃᔭᖃᑎᖃᖅᓱᖓ ᑭᒡᒐᖅᑐᐃᔨᖓᓂ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ, ᔭᐄᓐ ᐸᐃᑦᔅᒥ. ᑕᒪᓐᓇ ᐊᑐᖅᑎᓪᓗᒍ, ᑐᓂᓯᓚᐅᖅᑐᖓ ᑎᑎᖅᑲᕐᓂᑦ ᐱᖁᔭᑦᓴᑦ S-209 ᒥᑦᓵᓄᑦ ᑭᒡᒐᖅᑐᐃᔨᒧᑦ ᕿᒥᕐᕈᓂᐊᖅᑕᖓᓂᑦ. ᐃᓱᒪᒋᔭᖃᓚᐅᖅᑐᖅ ᐱᑦᓯᐊᖅᓯᒋᐊᙵᓐᓂᑦ ᐊᒻᒪᓗ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓ ᓴᖅᑭᑎᑦᓯᓛᓕᖅᑐᑦ ᒫᓐᓇᒫᖅ ᑐᑭᓕᐅᖅᑕᐅᒻᒪᑦ. ᔭᐃᓐ ᐊᐱᕆᓚᐅᕐᕕᔪᖅ ᐅᕙᓐᓂ ᐊᑐᐃᓐᓇᐅᑎᑦᓯᖁᔨᑦᓱᓂ ᐃᓱᒪᒋᔭᒃᑲᓂ ᑎᑎᖅᑲᕐᒥ ᐃᑲᔪᖅᑐᐃᓂᕐᒧᑦ ᑭᒡᒐᖅᑐᐃᔨᒥ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ ᐱᓕᕆᐊᕆᔭᖓᓂᑦ. ᑕᐃᒪᐃᓚᖓᓗᓂ, ᕿᒥᕐᕈᒋᐊᖃᓚᐅᖅᑐᖓ ᐊᒥᓱᑲᓪᓚᓂᒃ ᑎᑎᕋᖅᑕᐅᓯᒪᔪᓂᑦ ᐱᓕᕆᐊᖑᑐᐃᓐᓇᕆᐊᓕᓐᓄᑦ, ᑎᑎᕋᖅᓱᖓᓗ ᐊᐱᖅᑯᑎᑦᓴᑲᓂᑦ ᔭᐃᓐᓗ ᕿᒥᕐᕈᖃᑎᒋᑦᓱᒍ.
ᐊᒻᒪᓗᑦᑕᐅᖅ, ᐱᓇᓱᐊᕈᓯᕐᓄᑦ ᐊᒥᓱᓄᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓃᑦᑎᓪᓗᖓ, ᑎᓕᐅᖅᑕᐅᓚᐅᖅᑐᖓ ᐱᕕᖃᖅᑎᑕᐅᑦᓱᖓᓗ ᐃᖅᑲᓇᐃᔭᕐᓇᐅᑎᓪᓗᒍ ᓄᓇᖃᖅᑳᖅᓯᒪᔪᓄᑦ ᑲᓇᑕᒥ ᐃᓕᓐᓂᐊᕐᓂᕐᒧᑦ ᐊᑐᐃᓐᓇᐅᑎᑕᐅᔪᒃᑯᑦ ᓯᓚᑦᑐᖅᓴᕐᕕᔾᔪᐊᖅᒥ ᐅᐃᓪᐴᑕᒥ. ᑖᓐᓇ ᐃᓕᓐᓂᐊᕐᓂᖅ ᐱᔾᔪᑎᖃᖅᑐᓂᑦ ᓲᕐᓗ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᓕᒫᒥ, ᒥᖅᑯᓕᓐᓂ ᑕᐅᖅᓰᓂᖅ, ᓄᓇᑖᕐᓂᕐᒧᑦ, ᐊᖏᕈᑎᓂᑦ, ᐅᓪᓗᒥᐅᔪᓄᑦ ᓄᓇᖃᖅᑳᖅᓯᒪᔪᑦ ᐃᓅᓯᖏᑦ, ᐊᓯᖏᓪᓗ ᓄᓇᖃᖅᑳᖅᓯᒪᔪᓂ-ᐊᑦᑐᐊᓂᖃᖅᑐᓂᑦ ᐱᔾᔪᑕᐅᔪᓂᑦ. ᑖᑦᓱᒪᖓ ᐃᓕᓐᓂᐊᖅᓯᒪᖏᒃᑯᕕᑦ, ᐃᓕᓐᓂᐊᖁᕙᒋᑦ.
ᐃᓄᓕᕆᔨᕐᓂᕐᒧᑦ ᐃᓕᓐᓂᐊᖅᑎᐅᑎᓪᓗᖓ ᓗᕆᐊᓐᑎᐊᓐ ᓯᓚᑦᑐᖅᓴᕐᕕᔾᔪᐊᖅᒥ, ᐃᓕᓐᓂᐊᖅᓱᖓ ᐱᓕᕆᐊᑦᓴᓄᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ ᐃᑲᔫᑎᖃᓪᓚᕆᑦᑐᑦ ᓯᕗᓂᑦᓴᕐᓄᑦ, ᑕᒪᒃᑮᓐᓂᒃ ᓇᒻᒥᓂᖅ ᐱᓕᕆᔨᒻᒪᕆᐅᓂᕐᒧᓪᓗ. ᐃᖅᑲᓇᐃᔭᖃᑎᖃᕐᓂᖅ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂ ᐅᔾᔨᕈᓱᓕᓪᓚᕆᑦᓯᒪᔪᖓ ᓄᑕᖅᑲᐃᑦ ᐱᔪᓐᓇᐅᑎᖏᓐᓂᑦ ᖃᓄᐃᑦᑑᒻᒪᖔᓗ ᐱᓕᕆᐊᖃᕐᓂᕐᒧᑦ ᐊᒻᒪᓗ ᓄᑕᖅᑲᓄᑦ ᒪᒃᑯᑦᑐᓄᓪᓗ ᓄᓇᕗᒻᒥ. ᑭᒡᒐᖅᑐᐃᔨ, ᔭᐄᓐ ᐸᐃᑦᔅ, ᐃᖅᑲᓇᐃᔭᖃᑦᑕᖅᓯᒪᔪᖅ ᓄᑕᖅᑲᐃᑦ ᐃᓄᓕᕆᔨᒃᑯᑎᒍᑦ ᑲᒪᒋᔭᐅᔪᓄᑦ ᐃᓄᓕᕆᔨᐅᑦᓱᓂ 29-ᓄ ᐊᕐᕌᒍᓄᑦ ᑭᒡᒐᖅᑐᐃᔨᕈᓚᐅᖅᑎᓐᓇᒍ. ᐃᔾᔪᐊᕈᒥᓇᑦᓯᐊᖅᑐᖅ ᐅᕙᓐᓄᑦ ᑐᕌᒐᕆᔭᓐᓄᑦ ᐃᖅᑲᓇᐃᔭᕐᓂᕐᒧᑦ ᓄᑕᖅᑲᐃᑦ ᐃᓄᓕᕆᔨᒃᑯᑎᒍᑦ ᑲᒪᒋᔭᐅᔪᓄᑦ ᐃᓄᓕᕆᔨᐅᓗᖓ ᓂᐱᐅᓪᓗᖓᓗ ᐊᑦᑐᖅᑕᐅᓴᕋᐃᑦᑐᓄᑦ ᓄᑕᖅᑲᓄᑦ ᒪᒃᑯᑦᑐᓄᓪᓗ ᓄᓇᕗᒻᒥ.
________________________________________________________________________________________________________________________________________________________
ᐊᒐᓯ 11, 2021
ᐃᓕᑦᑎᓯᒪᕗᖓ ᑐᓴᐅᒪᑎᑦᑎᖃᑦᑕᕐᓂᖅ ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᐅᔾᔨᕈᓱᓕᖅᑎᑕᐅᓂᖏᑦ
ᐃᖅᑲᓇᐃᔭᖅᓯᒪᓕᖅᑐᖓ ᑐᓴᐅᒪᔪᓕᕆᓂᖅ ᐃᓄᖕᓗᓪᓗ ᐅᔾᔨᕈᓱᒃᑎᑦᑎᓂᕐᓂ ᐱᓕᕆᐊᒃᓴᖅ (ᑐᓴᐅᒪᔪᓕᕆᔨᒃᑯᑦ) ᐃᖅᑲᓇᐃᔭᕆᐅᕐᖓᓕᓚᐅᖅᑎᓪᓗᖓ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᖓ ᐃᖅᑲᓇᐃᔭᓚᐅᑲᖕᓂᕐᒥᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ.
ᑐᓴᐅᒪᔪᓕᕆᔨᒃᑯᑦ ᐱᓕᕆᐊᒃᓴᖏᓐᓂ ᐱᓕᕆᓲᖅ ᐱᖁᓪᓗᒍ ᓄᑕᖅᑲᑦ ᐱᔪᓐᓇᐅᑎᖏᑦ ᖃᐅᔨᒪᔭᐅᓗᑎᒃ ᓄᓇᕗᒻᒥ. ᐃᓕᑦᑎᓪᓗᑎᒃ ᐱᔾᔪᑎᓂᒃ ᐊᒃᑐᐃᔪᓂᒃ ᒪᒃᑯᒃᑐᓂᑦ ᖃᑕᙳᑎᖏᓐᓂᒃᓗ ᐋᖅᑭᒃᓯᓂᒃᑯᑦ ᐱᕕᒃᓴᓂᒃ ᓈᓚᖕᓂᖏᑎᒍᑦ. ᑖᒃᑯᐊ ᐱᕕᒃᓴᑦ ᐃᑲᔪᖅᑐᑦ ᒪᒃᑯᒃᑐᓂᒃ ᐅᖃᕈᓐᓇᕐᓗᑎᒃ ᐊᑲᐅᙱᓕᐅᕈᑎᖃᓕᕌᖓᑕ ᓄᓇᕗᒻᒥ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂ.
ᑐᓴᐅᒪᔪᓕᕆᔨᒃᑯᑦ ᐱᓕᕆᐊᒃᓴᖏᑦ ᐱᑎᑦᑎᒋᓪᓗᑎᒃ ᓇᓗᓇᐃᔭᐅᑎᓂᒃ ᓄᓇᕗᒻᒥᐅᓄᑦ ᖃᓄᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ ᐱᓕᕆᖃᑎᖃᕈᓐᓇᕐᒪᖔᑕ ᒪᒃᑯᒃᑐᓂᒃ ᓴᐳᒻᒥᓗᒋᑦ ᐱᔪᓐᓇᐅᑎᖏᑦ. ᐃᓚᖓᓂ ᐊᑐᒐᒃᓴᓂᑦ ᐱᓕᕆᓯᒪᔪᖓ ᑕᐃᒪᐃᓕᐅᕐᓗᒍ ᑖᓐᓇ ᐋᖅᑭᒃᓯᓂᒃᑯᑦ ᓴᖅᑭᔮᒃᑎᑕᒃᓴᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᑕ ᐃᑭᐊᖅᑭᕕᖓᓄᑦ. ᐅᖃᐅᓯᐅᔪᑦ ᑎᑎᕋᓚᐅᖅᑕᒃᑲ ᓄᑕᖅᑲᑦ ᐱᔪᓐᓇᐅᑎᖏᑦ, ᐃᖅᑲᓇᐃᔭᕐᓂᖅ ᐊᐅᔭᒃᑯᑦ ᐃᓕᓐᓂᐊᖅᑎᐅᓗᓂ ᐃᖅᑲᓇᐃᔭᕐᓂᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ, ᖃᓄᐃᓕᖓᓐᓇᕐᒪᖔᑦ ᒪᒃᑯᒃᓗᓂ ᓄᓇᕗᒻᒥ ᓄᕙᒃᔪᐊᕐᓇᖅ−19−ᑕᖃᖅᑎᓪᓗᒍ, ᖃᓄᐃᒻᒪᓪᓗ ᑎᓕᐅᕆᓂᓐᓂ ᐃᓄᐃᑦ ᐊᑐᕐᓗᑎᒃ ᐊᐅᐸᔮᖅᑐᓂᒃ ᑲᓇᑕᐅᑉ ᐅᓪᓗᖓᓂ.
ᑕᐃᒪᙵᑦ ᐱᒋᐊᓚᐅᖅᑎᓪᓗᒍ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᖓ ᐃᖅᑲᓇᐃᔭᕐᓂᕐᒥ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ, ᖃᐅᔨᓴᖅᓯᒪᔭᕋ ᓂᕈᐊᕈᓐᓇᕐᓂᕐᒧᑦ ᐅᑭᐅᕆᔭᐅᔭᕆᐊᓕᒃ ᑲᓇᑕᒥᐅᓄᑦ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᓂ, ᐱᔾᔪᑎ ᓴᖅᑭᑕᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᑕ ᐅᔾᔨᕆᔭᖓ ᖁᑦᑎᖕᓂᓕᖕᓄᑦ 11 ᐃᓕᓐᓂᐊᖅᑎᑦ ᐃᓄᒃᓱᒃ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖕᒥ ᐃᖃᓗᖕᓂ. ᐃᓕᓐᓂᐊᖅᑏᑦ ᐱᓕᕆᐊᖃᕐᖢᑎᒃ ᐱᓕᕆᐊᒃᓴᒥᑦ ᐃᑲᔪᖅᓱᐃᔪᒥᒃ ᐱᖁᔭᒃᓴᖅ S−209, ᐱᖁᔭᖅ ᐋᖅᑭᒋᐊᕐᓗᒍ ᑲᓇᑕᒥ ᓂᕈᐊᕐᓂᕐᓄᑦ ᐱᖁᔭᖅ ᐊᒻᒪ ᐊᑐᕆᐊᓕᑦ ᓱᖏᐅᑎᓗᓂ ᑲᓇᑕᒥ ᓂᕈᐊᕐᓂᕐᒧᑦ ᐱᖁᔭᕐᒥ ᐱᔾᔪᑎᓄᑦ ᒪᓕᒐᐅᑉ ᒥᒃᓵᓄᑦ ᓂᕈᐊᕐᓂᖅ. ᑐᓴᐅᒪᔪᓕᕆᔨᒃᑯᓐᓃᑎᓪᓗᖓ, ᑎᑎᕋᓕᐅᓚᐅᖅᑐᖓ ᖃᐅᔨᓴᖅᑕᓐᓂᒃ ᑕᑯᑎᓪᓗᒋᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑖᔅᓱᒧᖓ ᐱᔾᔪᑎᒧᑦ.
ᐃᖅᑲᓇᐃᔭᖃᑎᖃᕐᓂᖅ ᑐᓴᐅᒪᔪᓕᕆᔨᒃᑯᓐᓂ ᐊᕗᖓᕐᔪᐊᖑᔪᖅ; ᓴᓂᕐᕙᒋᐊᖅᑕᐅᔪᓐᓇᖅᑐᒍᑦ ᐊᓯᖏᓐᓂ ᐱᓕᕆᐊᖃᖁᔭᐅᓗᑕ ᐊᔾᔨᒋᙱᑕᖏᓐᓂ ᐊᕙᑎᓕᖕᓂ ᑎᑎᕋᕐᕕᖕᒥ. ᑐᑭᓕᐅᕆᓗᒍ, ᑐᓴᐅᒪᔪᓕᕆᔨᒃᑯᓐᓃᑲᓗᐊᖅᑎᓪᓗᖓ, ᓴᓂᕐᕙᒃᑕᐅᓚᐅᖅᑐᖓ ᐃᖅᑲᓇᐃᔭᖃᑎᖃᖁᔭᐅᓪᓗᖓ ᐃᓄᖕᒧᑦ ᐅᖃᐅᔾᔨᒋᐊᖅᑎᒃᑯᓐᓂ ᐱᓕᕆᖃᑎᒌᒃᑐᓃᑦᑐᒥᒃ ᐱᓕᕆᐊᖃᕐᓗᖓ ᐃᓯᖅᐸᓪᓕᐊᔪᓂᒃ, ᑕᐃᒪᓐᓇ ᐱᓕᕆᐊᖃᖅᐳᖓ ᑕᒪᑐᒪᓂ ᐱᓇᓱᐊᕈᓯᕐᒥ.
ᐱᓕᕆᖃᑎᖃᕐᓂᖅ ᑐᓴᐅᒪᔪᓕᕆᔨᒃᑯᑦ ᐱᓕᕆᖃᑎᒌᖏᓐᓂ ᕿᒥᕐᕈᓇᓚᐅᖅᑐᖅ ᖁᔭᓕᔾᔪᑎᒋᓪᓗᒍᓗ ᐃᑲᔪᖅᑕᐅᕝᕕᒋᔭᓕᒫᒃᑲ ᐊᐅᓚᑦᑎᔨᒥᒃ, ᑭᒻ ᕚᔅᑐᕐ.
________________________________________________________________________________________________________________________________________________________
ᔪᓚᐃ 20, 2021
ᑭᓱᓂᒃ ᐃᓕᑦᑎᓯᒪᕗᖓ ᐊᑐᖅᑕᐅᕙᒃᑐᓄᑦ ᑭᒡᒐᖅᑐᐃᓂᕐᒥᒃ
ᐱᓕᕆᖃᑎᖃᓚᐅᖅᓯᒪᕗᖓ ᐋᖅᑭᐅᒪᑎᑦᑎᓇᓱᐊᖅᑎᓂᒃ ᑭᒡᒐᖅᑐᐃᔨᓂᒃ ᐱᓇᓱᐊᕈᓯᑦ ᑎᓴᒪᓄᑦ ᑭᒡᒐᖅᑐᖅᑎᐅᑎᓪᓗᖓ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᒡᓚᕝᕕᖕᒥᑦ,
ᐃᒪᓐᓇᓕ ᐃᓕᑦᑎᓚᐅᖅᐳᖓ:
ᑭᓲᖕᒪᑦ ᐋᖅᑭᐅᒪᑎᑦᑎᓇᓱᐊᕐᓂᕐᒧᑦ ᐱᔾᔪᑕᐅᔪᑦ?
ᐱᔾᔪᑕᐅᔪᖅ ᐃᓱᒪᒋᔭᐅᓂᐊᖅᐳᖅ ᐋᖅᑭᐅᒪᔾᔪᑕᐅᖕᒪᖔᑦ ᐃᒪᐃᑦᑑᒃᐸᑦ:
- ᐱᔾᔪᑕᐅᔪᖅ ᐊᒃᑐᐃᔾᔪᑕᐅᒃᐸᑦ ᖃᔅᓯᑲᓪᓛᓗᖕᓄᑦ ᓄᑕᖅᑲᓄᑦ ᐊᒻᒪ/ᐅᕝᕙᓘᓐᓃᑦ ᒪᒃᑯᒃᑐᓄᑦ
- ᐱᔾᔪᑕᐅᔪᖅ ᐃᓚᓕᐅᔾᔨᕗᖅ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ/ᐱᔨᑦᑎᕋᐅᑎᖏᓐᓂᒃ
- ᖃᓄᑐᐃᓐᓇᖅ ᒪᓕᒐᓕᐊᖑᔪᒪᔪᑦ, ᐊᑐᐊᒐᑦ, ᒪᓕᒐᐃᑦ ᐊᑐᐊᒐᖏᑦ, ᐅᕝᕙᓘᓐᓃᑦ ᐱᓕᕆᐊᒃᓴᑦ ᓄᓇᕗᑦ ᒐᕙᒪᒃᑯᓐᓂ ᐋᖅᑭᒋᐊᖅᑕᐅᒋᐊᖃᑐᐊᖅᐸᑕ ᓈᒻᒪᙱᓪᓕᐅᕈᑕᐅᔪᓄᑦ ᐋᖅᑭᒍᑕᐅᓗᑎᒃ
ᑭᓲᖕᒪᑦ ᐋᖅᑭᐅᒪᑎᑦᑎᓇᓱᐊᖅᑎᓂᒃ ᑭᒡᒐᖅᑐᖅᑎ?
ᐋᖅᑭᐅᒪᑎᑦᑎᓇᓱᐊᖅᑎᓂᒃ ᑭᒡᒐᖅᑐᖅᑎ ᐱᓕᕆᐊᖑᓂᐊᖅᐳᖅ ᐃᒪᐃᑉᐸᑦ ᐊᑕᐅᓯᕐᒥᒃ ᐅᖓᑖᓂᒡᓘᓐᓃᑦ ᒪᒃᑯᒃᑐᑦ ᑖᔅᓱᒥᖓᔅᓴᐃᓐᓇᖅ ᓈᒻᒪᙱᓪᓕᐅᕈᑎᖃᖅᐸᑕ ᓄᓇᕗᑦ ᒐᕙᒪᒃᑯᑦ ᐱᔨᑦᑎᕋᐅᑎᓄᑦ. ᐋᖅᑭᐅᒪᑎᑦᑎᓇᓱᐊᖅᑎᑦ ᐱᓕᕆᔩᑦ ᐱᓕᕆᖃᑎᖃᕐᓂᐊᖅᐳᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᖃᓄᖅᑑᕌᓪᓚᒃᐸᒡᓗᑎᒃ ᐱᔾᔪᑕᐅᔪᓂᒃ ᐃᓄᖕᓂᒃ ᕿᒥᕐᕈᕙᒡᓗᒋᑦ ᓈᒻᒪᙱᓪᓕᐅᕈᑕᐅᔪᑦ ᐃᑲᔪᖅᐸᒡᓗᒍᓗ ᑭᒡᒐᖅᑐᖅᑎ ᐱᖁᔨᕗᖔᓕᐅᖅᑎᓪᓗᒍ ᐊᒃᑐᐊᓂᓕᖕᓂᒃ ᐱᓕᕆᕝᕕᖕᓄᑦ.
ᐆᒃᑑᑎᒋᓗᒍ: ᖃᔅᓯᑲᓪᓚᑦ ᓄᑕᖅᑲᑦ ᒪᒃᑯᒃᑐᓪᓗ ᐊᔪᕐᓇᖅᑐᖅᓯᐅᖃᑦᑕᖅᑐᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐃᑲᔪᖅᑐᐃᔾᔪᓯᕐᓂᒃ, ᐋᖅᑭᐅᒪᑎᑦᑎᓇᓱᐊᖅᑎᑦ ᐱᓕᕆᔩᑦ ᕿᒥᕐᕈᓚᐅᖅᐳᑦ, ᑐᓴᐅᒪᑎᑕᐅᓪᓗᑎᒡᓗ ᒪᒃᑯᒃᑐᓄᑦ ᐋᖅᑭᒃᓯᒪᓕᕈᑎᓚᐅᖅᑐᓄᑦ ᑭᒡᒐᖅᑐᖅᑎᑦ 15−ᓂᒃ ᐱᖁᔨᕗᖔᓕᐅᖅᖢᑎᒃ ᖃᔅᓯᑲᓪᓚᖕᓄᑦ ᐱᓕᕆᕝᕕᖕᓄᑦ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐱᔨᑦᑎᕋᐅᑎᓂᒃ ᒪᒃᑯᒃᑐᓕᒫᓄᑦ. ᑕᕐᕋᖓᓐᓂᒃ ᐅᕙᙵᑦ ᑕᑯᔪᓐᓇᖅᐳᓯ: https://rcynu.ca/sites/rcynu.ca/files/RCYO_MHReview_EN.pdf
ᖃᓄᐃᓕᐅᓚᐅᕐᒪᖔᑕ ᐋᖅᑭᐅᒪᑎᑦᑎᓇᓱᐊᖅᑎᑦ ᐱᓕᕆᔨᐅᖃᑎᒌᑦ
ᖃᓄᕈᓘᔮᓗᒃ ᐃᓕᑦᑎᓚᐅᕋᓗᐊᖅᑐᖓ ᐱᓕᕆᖃᑕᐅᑎᓪᓗᖓ ᐋᖅᑭᐅᒪᑎᑦᑎᓇᓱᐊᖅᑎᓂᒃ ᐱᓕᕆᔨᓂᒃ
- ᐊᑐᐊᒐᑦ ᐊᒻᒪ ᒪᓕᒋᐊᓕᑦ ᐅᖃᓕᒫᒐᕐᓄᑦ ᐱᓕᒻᒪᒃᓴᕈᑎᒃᓴᑦ
ᓇᓃᖦᖢᖓ ᖃᐅᔨᑎᑕᐅᓐᓂᕐᒪᖔᑦ ᐋᖅᑭᐅᒪᑎᑦᑎᓇᓱᐊᖅᑎᑦ ᐱᓕᕆᔨᑦ ᖃᓄᐃᓕᐅᖅᑎᐅᓂᖏᓐᓂᒃ
- ᐋᖅᑭᐅᒪᑎᑦᑎᓇᓱᐊᖅᑎᑦ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᑦ
ᐋᖅᑭᐅᒪᑎᑦᑎᓇᓱᐊᖅᑎᑦ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᑦ, ᐱᖓᓱᓂᒃ ᓇᕿᑦᑕᕆᐊᓕᒃᑕᖃᕐᒪᑦ; ᑐᓐᓂᖅᑯᑕᐅᔪᑦ, ᐊᑭᕋᖅᑑᑕᐅᔪᑦ, ᐊᒻᒪ ᐊᑐᓕᖁᔭᐅᔪᑦ.
ᑐᓐᓂᖅᑯᑕᐅᔪᑦ: ᑐᓐᓂᖅᑯᑕᐅᔪᓕᒫᑦ ᐋᖅᑭᐅᒪᑎᑦᑎᓇᓱᐊᖅᑎᓄᑦ ᐱᓕᕆᔨᓂᒃ ᐱᔭᐅᓲᑦ ᐃᓕᔭᐅᓲᖑᕗᑦ ᓇᕿᑦᑕᕆᐊᓕᖕᒧᑦ. ᐱᓕᕆᔩᑦ ᐅᑯᓂᖓ ᑐᓂᔭᐅᓲᖑᕗᑦ; ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᖅᑎᒃᑯᑦ ᐃᓄᑑᓪᓗᑎᒃ ᑭᒡᒐᖅᑐᖅᑎᑦ, ᓄᑕᖅᑲᓄᑦ ᐊᒻᒪ/ᐅᕝᕙᓘᓐᓃᑦ ᒪᒃᑯᒃᑐᓄᑦ, ᐃᓄᓕᒫᓄᑦ, ᐃᓱᒫᓘᑎᑦ ᓴᖅᑭᑦᑐᑦ ᒪᓕᒐᓕᐅᕐᕕᖕᒥ, ᒐᕙᒪᒃᑯᑦ ᐱᓕᕆᕝᕕᖏᓐᓂᒃ, ᐊᒻᒪ ᑐᓴᐅᒪᔪᓕᕆᔨᒃᑯᓐᓂ.
ᐋᖅᑭᐅᒪᑎᑕᐅᓇᓱᐊᖅᑐᑦ: ᑕᒪᕐᒥᒃ ᐋᖅᑭᐅᒪᑎᑕᐅᓇᓱᐊᖅᑐᑦ ᐱᔾᔪᑕᐅᔪᑦ ᑕᕝᕙᓂ ᓇᕿᑦᑕᕆᐊᓕᖕᒦᑦᑐᑦ. ᐋᖅᑭᐅᒪᑎᑦᑎᓇᓱᐊᖅᑐᓂᒃ ᐱᓕᕆᔩᑦ ᐊᑐᓲᖑᕗᑦ ᑖᔅᓱᒥᖓ ᓇᕿᑦᑕᕆᐊᓕᖕᒥᒃ ᖃᐅᔨᒪᓇᓲᑎᒋᓪᓗᒍ ᑕᒪᐃᓐᓄᑦ ᐋᖅᑭᐅᒪᑎᑕᐅᔪᓄᑦ. ᐊᑦᑕᑕᖅᑎᑦᑎᓲᖑᒋᓪᓗᑎᒡᓗ ᑕᒪᐃᓐᓂᒃ ᑐᓐᓂᖅᑯᑕᐅᔪᓂᒃ ᐊᒃᑐᐊᓂᓕᖕᓄᑦ ᐋᖅᑭᐅᒪᑎᑕᐅᓇᓱᐊᖅᑐᓄᑦ.
ᐊᑐᓕᖁᔭᐅᔪᑦ: ᐊᑐᓕᖁᔭᐅᔪᓕᒫᑦ ᑭᒡᒐᖅᑐᖅᑎᒧᑦ ᐋᖅᑭᒃᑕᐅᔪᑦ ᑕᕝᕙᓂ ᓇᕿᑦᑕᕆᐊᓕᖕᒦᑦᑐᑦ. ᑖᒃᑯᓇᓂ ᓇᕿᑦᑕᕆᐊᓕᖕᓂᒃ, ᖃᐅᔨᒋᐊᖅᑕᐅᓲᖑᕗᑦ ᐱᓕᕆᕝᕖᑦ ᐊᖏᕐᒪᖔᑕ ᐋᒃᑳᕐᒪᖔᑕᓘᓐᓃᑦ ᐊᑐᓕᖁᔭᓄᑦ, ᐱᓕᕆᕝᕖᑦ ᐱᓕᕆᒃᐸᑕ ᐊᑐᓕᖁᔭᓄᑦ ᓈᒻᒪᒃᓯᓕᕐᓗᒋᑦ ᑕᐃᒪᐃᖁᔨᒃᐸᑕ ᐋᒃᑲᓘᓐᓃᑦ, ᐱᓕᕆᕝᕖᓪᓗ ᑭᐅᒃᐸᑕ ᑐᑭᓯᒋᐊᕈᑎᓄᑦ ᑐᒃᓯᕋᐅᑕᐅᓯᒪᔪᑦ ᐃᓱᓕᕝᕕᖏᑦ ᑎᑭᓚᐅᙱᓐᓂᖏᓐᓂᒃ. ᐃᕐᖐᓐᓈᖅᑕᐅᒃᑰᖅᑐᓕᒫᑦ ᐊᒻᒪ ᑎᑎᖅᑲᓕᒫᑦ ᐅᑎᖅᑕᕋᐅᔭᖅᑐᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒑᖅᑐᖅᑎᒃᑯᑦ ᑎᑎᕋᕐᕕᖓᓐᓄᑦ ᐊᒻᒪ ᐱᓕᕆᕝᕖᑦ ᑕᕝᕙᓃᖃᑕᐅᔪᑦ ᓇᕿᑦᑕᕆᐊᓕᖕᓂᒃ.
- ᒪᓕᒃᑕᐅᒋᐊᓖᑦ ᐱᓕᕆᕝᕕᖕᓄᑦ
ᒪᓕᒃᑕᐅᒋᐊᓖᑦ ᐃᓚᖏᓐᓄᑦ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ ᐋᖅᑭᒃᑕᐅᓯᒪᓕᖅᑐᑦ ᐃᑲᔫᑕᐅᓪᓗᑎᒃ ᒐᕙᒪᒃᑯᓐᓄᑦ ᑐᑭᓯᐊᓕᕐᓗᒋᑦ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᑐᓐᓄᓪᓗ ᑎᑎᕋᕐᕕᖓᑦᑕ ᐱᓕᕆᐊᒃᓴᖏᑦ, ᖃᐅᔨᒪᓗᒋᓪᓗ ᐅᔾᔨᕈᓱᒃᑲᓗᐊᕐᒪᖔᑕ ᐱᓕᕆᐊᒃᓴᖏᓐᓂᒃ ᒪᓕᒡᓗᒍ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᕐᒥ.
ᒪᓕᒃᑕᐅᒋᐊᓖᑦ ᑎᓴᒪᐅᓕᖅᑲᖓᔪᑦ;
- ᒪᓕᒐᓕᕆᔨᒃᑯᓐᓂ ᐱᔪᓐᓇᖅᑎᑕᐅᔪᑦ: ᓇᓗᓇᐃᖅᓯᕗᑦ ᑭᒡᒐᖅᑐᖅᑎᑦ ᓄᑕᖅᑲᓂᒃ ᒪᒃᑯᒃᑐᓂᒡᓗ ᑎᑎᕋᕐᕕᖓᑦᑕ ᐱᔪᓐᓇᐅᑎᖏᓐᓂᒃ ᐊᒻᒪ ᐱᓕᕆᐊᒃᓴᖏᓐᓂᒃ
- ᑐᒃᓯᒋᐊᒐᒃᓴᓄᑦ ᐱᔪᓐᓇᐅᑎᖃᕐᓂᖅ ᐊᒻᒪ ᐱᓕᕆᐊᒃᓴᑦ ᐊᑐᐃᓐᓇᕈᖅᑎᓪᓗᒋᑦ ᑐᑭᓯᒋᐊᒐᒃᓴᑦ: ᓇᓗᓇᐃᖅᓯᕗᖅ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖕᒥ ᐱᔪᓐᓇᐅᑎᖏᓐᓂᒃ ᖃᓄᑐᐃᓐᓇᑦᑎᐊᖅ ᑐᑭᓯᒋᐊᒐᒃᓴᕆᔪᓐᓇᖅᑕᖏᓐᓂᒃ ᑎᑎᕋᕐᕕᖕᒥᙶᖅᑐᓂᒃ ᐱᔭᐅᒋᐊᓕᖕᓂᒃ ᐊᔾᔨᒌᙱᑦᑐᓂᒃ ᑐᑭᓯᒋᐊᒐᒃᓴᓄᑦ ᑐᒃᓯᕋᐅᑎᓄᑦ
- ᑭᒡᒐᖅᑐᐃᓂᖅ: ᑐᑭᓯᓇᖅᓯᑎᓯᒪᕗᑦ ᖃᓄᖅ ᑭᒡᒐᖅᑐᖅᑎ ᐃᖅᑲᓇᐃᔭᖅᑎᖏᓪᓗ ᑭᒡᒐᖅᑐᐃᓂᐊᕐᒪᖔᑕ ᒪᒃᑯᒃᑐᓂᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ, ᐊᒻᒪ ᐊᔾᔨᒌᙱᑦᑐᑦ ᑲᒪᒋᔭᒃᓴᕆᔭᐅᔪᑦ ᑕᒪᐃᓐᓄᑦ
- ᐱᒋᐊᖅᑎᑦᑎᓂᕐᒧᑦ ᑲᑎᒪᔾᔪᑎᓄᑦ, ᐱᕙᓪᓕᐊᑎᑦᑎᓂᕐᒧᑦ ᐊᒻᒪ ᐋᖅᑭᐅᒪᑎᑦᑎᓂᕐᒧᓪᓗ ᐱᓕᕆᖃᑎᒌᒍᓯᕐᓂᒃ: ᓇᓗᓇᐃᖅᓯᕗᑦ ᐊᖏᖃᑎᒌᒍᑕᐅᔪᓂᒃ ᐱᓕᖃᑎᒌᖁᔨᔪᓂᒃ ᐱᔾᔪᑕᐅᔪᓄᑦ ᐊᒃᑐᐃᔾᔪᑕᐅᓲᓂᒃ ᒪᒃᑐᒃᓄᑦ.
- ᐱᒋᐊᖅᑎᑦᑎᔪᑦ ᑲᑎᒪᔾᔪᑎᕕᓃᑦ ᑎᓴᒪᓄᑦ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ
ᐋᖅᑭᐅᒪᑎᑦᑎᓇᓱᐊᖅᑐᓂᒃ ᐱᓕᕆᔩᑦ ᐃᑲᔪᖅᑐᐃᖃᑦᑕᖅᐳᑦ ᑭᒡᒐᖅᑐᖅᑎᒃᑯᑦ ᑲᑎᒪᓂᖏᑦ ᑎᓴᒪᓂᒃ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᑕᖅᑭᑦ ᐊᕐᕕᓂᓕᑦ (6) ᐊᓂᒍᑕᒫᑦ: ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᒪᓕᒐᓕᕆᔨᒃᑯᑦ, ᐃᓄᓕᕆᔨᒃᑯᑦ, ᐊᒻᒪ ᐃᓕᓐᓂᐊᕐᓂᓕᕆᔨᒃᑯᑦ. ᐱᒋᐊᖅᑎᑦᑎᔪᑦ ᑲᑎᒪᓃᑦ ᐱᕕᖃᕈᑕᐅᕗᑦ ᑕᒪᐃᓐᓄᑦ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖕᒥ ᐊᒻᒪ ᐱᓕᕆᕝᕕᖕᓂ ᐱᓕᕆᖃᑎᒌᖁᓪᓗᒋᑦ ᐅᖃᐅᓯᖃᕐᓗᑎᒃ ᐱᔾᔪᑕᐅᔪᓂᒃ, ᐱᕙᓪᓕᐊᑎᑕᖏᓐᓂᒃ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑭᒡᒐᖅᑐᖅᑎᑦ ᐊᑐᓕᖁᔭᖏᓐᓂᒃ, ᓄᑖᓂᒡᓗ ᐱᓕᕆᐊᒃᓴᖏᓐᓂᒃ.
________________________________________________________________________________________________________________________________________________________
ᔪᓚᐃ 1, 2021
ᖃᓄᐃᒻᒪᑦ ᐊᑐᖅᑕᑦ ᒥᖑᐊᖅᑕᐅᑎᓪᓗᒍ ᑲᓇᑕᐅᑉ ᐅᓪᓗᖓᓂ
ᑲᓇᑕᒥ ᐱᐅᓯᕆᔭᐅᔅᓲᔭᖅᑐᖅ ᓄᓇᖅᑲᑎᒋᙱᑕᒥᒃ ᐊᐅᓚᑕᐅᓂᖅ ᐊᑯᓂᕐᔪᐊᒻᒪᕆᐊᓗᒃ ᐊᒃᑐᐃᔾᔪᑕᐅᓯᒪᖕᒪᑦ ᓄᓇᖃᖅᑳᖅᓯᒪᔪᓄᑦ. ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐃᓚᖏᑦ ᐱᔭᐅᑐᐃᓐᓇᖅᐸᒃᖢᑎᒃ ᐃᓚᖏᑦ ᑎᒍᐊᖅᑕᐅᕙᒃᖢᑎᒃ ᒪᕐᕉᓪᓗᑎᒃ ᐱᓕᕆᔾᔪᓯᐅᓚᐅᖅᓯᒪᖕᒪᑕ ᓄᓇᖃᖅᑳᖅᓯᒪᔪᑦ ᓄᑕᖅᑲᑦ ᐱᔭᐅᑐᐃᓐᓇᖅᐸᒃᖢᑎᒃ ᐃᓚᖏᓐᓃᑦᑑᒐᓗᐊᑦ "ᖃᓪᓗᓈᙳᖅᓴᔭᐅᓪᓗᑎᒡᓗ"[1].
ᑐᕌᒐᕆᔭᐅᔪᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᒃ ᐃᒪᐃᓕᐅᕈᒪᓚᐅᖅᓯᒪᖕᒪᑕ "ᐱᓕᕆᐊᖑᐃᓐᓇᕐᓗᑎᒃ ᐊᑕᐅᓯᕐᒥᒡᓘᓐᓃᑦ ᐃᖅᑭᓕᒃᑕᖃᕈᓐᓃᕐᓗᓂ ᑲᓇᑕᒥ ᐃᔅᓴᒃᑕᐅᓯᒪᙱᑦᑐᒥᒃ ᒐᕙᒪᓕᕆᔨᒃᑯᓐᓂ, ᐊᒻᒪ ᐃᖅᑭᓕᖕᓂᒃ ᐊᐱᖅᑯᑎᑕᖃᙱᓪᓗᓂ, ᐊᒻᒪ ᐃᖅᑭᓕᖕᓂ ᐱᓕᕆᕝᕕᒃᑕᖃᙱᓪᓗᓂ"[2].
150,000−ᐸᓗᐃᑦ ᓄᓇᖃᖅᑳᖅᓯᒪᔪᑦ ᓄᑕᖅᑲᑦ, ᐅᑭᐅᓖᑦ 7−ᓂᒃ 16-ᒧᑦ ᐊᔭᐅᖅᑐᖅᑕᐅᕙᓚᐅᖅᓯᒪᖕᒪᑕ ᐃᓕᓐᓂᐊᕆᐊᖅᑎᑕᐅᕙᒃᖢᑎᒃ 1870-ᖏᓐᓂᒃ 1990s−ᓄᑦ ᑎᑭᖦᖢᒍ[3]. ᐅᑯᐊ ᓄᑕᖅᑲᑦ ᐃᓕᖅᑯᓯᕐᒥᓂᒃ ᐅᖃᐅᓯᕐᒥᓂᒡᓗ ᐃᓕᓐᓂᐊᖅᑎᑕᐅᓚᐅᙱᑦᑎᐊᖅᑐᑦ, ᑐᕌᒐᖃᖅᑎᑕᐅᓪᓗᑎᒡᓗ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂᒃ ᐊᓯᐅᔨᑎᑕᐅᓇᓱᓪᓚᕆᒃᖢᑎᒃ ᑲᓇᑕᓕᒫᒥ.
ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᑯᓂᕐᔪᐊᒻᒪᕆᐊᓗᒃ ᐊᒃᑐᐃᔾᔪᑕᐅᖃᑦᑕᖅᓯᒪᔪᑦ ᑎᒥᒃᑯᑦ, ᐃᓱᒪᒃᑯᑦ, ᐊᒻᒪ ᐃᒃᐱᒋᔭᒃᑯᑦ ᐃᓅᑦᑎᐊᕈᓯᑦ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᕋᔪᖕᓂᖅᓴᒻᒪᕆᐊᓘᓪᓗᑎᒃ ᓇᒡᒍᐊᕐᓗᒃᐸᒃᖢᑎᒃ, ᐳᕝᕕᕆᕙᒃᖢᑎᒃ, ᖀᖅᓱᖃᑦᑕᖅᖢᑎᒃ, ᓯᐊᒻᒪᔭᑦᑐᒥᒃ ᐋᓐᓂᐊᖃᖅᐸᒃᖢᑎᒃ, ᓂᑲᓪᓗᖓᕙᒃᖢᑎᒃ, ᐊᒻᒪ ᖁᐊᖅᓵᕐᓯᒪᓂᑰᓗᐊᖅᐸᒃᖢᑎᒃ, ᐅᑯᐊ ᖃᔅᓰᓐᓇᐅᓪᓗᑎᒃ ᑕᐃᔭᐅᔪᑦ[4].
ᐃᓚᖏᑦ ᐱᔭᐅᑐᐃᓐᓇᖅᐸᒃᖢᑎᒃ ᐃᓚᖏᓪᓗ ᑎᒍᐊᖅᑕᐅᕙᒃᖢᑎᒃ ᑕᐃᔅᓱᒪᓂ ᑕᐃᒪᐅᓕᖅᑎᓪᓗᒋᑦ ᐃᑲᔫᑕᐅᓪᓗᓂ ᐊᑐᖅᑕᐅᓚᐅᖅᓯᒪᖕᒥᔪᖅ ᐱᓇᔪᒃᑕᐅᕐᔪᐊᖅᑎᓪᓗᒋᑦ ᓄᓇᖃᖅᑳᖅᓯᒪᔪᑦ ᓄᑕᖅᑲᑦ ᐃᓅᓯᕆᙱᑕᖏᓐᓂᒃ ᐃᓅᓯᖅᑖᖅᑎᑕᐅᓇᓱᒃᑎᓪᓗᒋᑦ "ᖃᓪᓗᓈᙳᖅᓴᔭᐅᑎᓪᓗᒋᑦ"[5]. ᑕᐃᔅᓱᒪᓂᐅᑎᓪᓗᒍ, ᑲᓇᑕᒥ ᒐᕙᒪᒃᑯᑦ ᓇᓗᓇᐃᒃᑯᑦᑎᖅᓯᓚᐅᖅᓯᒪᖕᒪᑕ ᓄᓇᖃᖅᑳᖅᓯᒪᔪᑦ ᐊᖓᔪᖅᑳᕆᔭᐅᔪᑦ "ᐊᖓᔪᖅᑳᒃᓴᐅᙱᓐᓂᖏᓐᓂᒃ" ᕿᑐᕐᖓᒥᓂᒃ ᑲᒪᔪᓐᓇᙱᒋᔭᐅᓪᓗᑎᒃ ᐃᒡᓗᖏᓐᓃᑦᑑᒐᓗᐊᑦ ᐊᖅᓵᖅᑕᐅᓪᓗᑎᒃ, ᐊᖓᔪᖅᑳᓪᓚᑦᑖᕆᔭᐅᔪᑦ ᐃᓚᒋᔭᐅᔪᓪᓗ ᑐᓴᖅᑎᑕᐅᙱᑦᑎᐊᖅᖢᑎᒃ, ᓄᓇᖃᖅᑳᖅᓯᒪᙱᑦᑐᓂᒃ ᐃᓚᒌᓄᑦ ᐃᓂᑖᖅᑎᑕᐅᕙᒃᖢᑎᒃ[6].
ᐃᓚᒌᑦ ᐊᖅᓵᖅᑕᐅᓪᓗᑎᒃ ᐃᓕᖅᑯᓯᕐᒥᓂᒡᓗ ᐃᓕᓴᖅᑕᐅᙱᖦᖢᑎᒃ ᐊᕕᔾᔪᑕᐅᖃᑦᑕᓚᐅᖅᐳᖅ ᐃᓱᒫᓗᒍᑕᐅᓪᓗᓂ ᐊᒻᒪ ᐃᓕᖅᑯᓯᕆᙱᑕᒥᒃ ᐃᓕᖅᑯᓯᖃᖃᑕᐅᓯᑳᓪᓚᒃᖢᓂ ᓄᓇᖃᖅᑳᖅᓯᒪᔪᑦ ᓄᑕᖅᑲᓄᑦ ᐃᓚᒌᓄᓪᓗ, ᐊᒻᒪᓗ ᐃᒃᐱᒋᔭᒃᑯᑦ, ᐃᓱᒪᒃᑯᑦ, ᐊᒻᒪ ᑕᕐᓂᒃᑯᑦ ᐋᓐᓂᖅᑕᐅᑦᑎᐊᖅᖢᑎᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ[7]. ᐱᓇᔪᒃᑐᖃᓚᐅᙱᑦᑎᐊᖅᑐᖅ ᓄᑕᖅᑲᑦ ᓄᓇᒥᓄᑦ ᐅᕙᑦᑎᒥᓄᑦ ᐅᑎᖅᑎᑕᐅᒋᐊᖃᕐᒪᖔᑕ[8].
ᑕᐃᔅᓱᒪᓂ ᐃᓚᖏᑦ ᐱᔭᐅᑐᐃᓐᓇᖅᐸᒃᑎᓪᓗᒋᑦ, ᐃᓚᖏᓪᓗ ᑎᒍᐊᖅᑕᐅᑐᐃᓐᓇᖅᐸᒃᑎᓪᓗᒋᑦ, ᑲᓇᑕᒥ ᒐᕙᒪᒃᑯᑦ ᑮᓇᐅᔭᖃᖅᑎᑦᑎᓚᐅᖅᓯᒪᕗᑦ ᓄᓇᖃᖅᑳᖅᓯᒪᔪᑦ ᐃᓄᖕᓂᒃ[9] ᖃᔅᓯᑲᓪᓛᓗᐃᓪᓗ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᔪᖅᓴᖅᑐᐊᓘᓕᓚᐅᖅᓯᒪᕗᑦ.
ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪ ᑕᐃᔅᓱᒪᓂ ᐃᓚᖏᑦ ᐱᔭᐅᑐᐃᓐᓇᖅᐸᒃᑎᓪᓗᒋᑦ ᐊᒻᒪ ᐃᓚᖏᑦ ᑎᒍᐊᖅᑕᐅᑐᐃᓐᓇᖅᐸᒃᑎᓪᓗᒋᑦ ᐃᒪᐃᓕᕈᑕᐅᓚᐅᖅᐳᖅ ᐊᕐᕌᒍᖃᑎᒌᙱᑦᑐᑦ ᐊᒃᓱᕈᕐᓇᖅᑐᒃᑰᖅᑎᑕᐅᓪᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑲᓇᑕᓕᒫᒥ. ᖃᔅᓯᑲᓪᓚᖕᓂᒃ ᐃᓚᒌᓂᒃ, ᐱᕐᔪᐊᕌᓘᓲᖑᖕᒪᑦ ᐊᖓᔪᖅᑳᕆᔭᐅᔪᑦ ᐊᒻᒪᓗ/ᐅᕝᕙᓘᓐᓃᑦ ᐃᑦᑐᕆᔭᐅᔪᑦ/ᓂᖏᐅᕆᔭᐅᔪᑦ ᖃᐅᔨᖃᑦᑕᖅᓯᒪᔭᖏᑦ ᐊᒻᒪ ᖃᐅᔨᒪᔭᖏᑦ ᑭᖑᕚᖏᓐᓄᑦ, ᕿᑐᕐᖓᖏᓐᓄᑦ. ᑕᒪᒃᑯᐊ ᐱᔾᔪᑎᒋᓪᓗᒋᑦ, ᐊᖓᔪᖅᑳᕆᔭᐅᔪᑦ ᐊᒻᒪ/ᐅᕝᕙᓘᓐᓃᑦ ᐃᑦᑐᕆᔭᐅᔪᑦ/ᓂᖏᐅᕆᔭᐅᔪᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᑦ ᐊᒃᓱᕈᕈᑎᒋᕙᓚᐅᖅᓯᒪᔭᖏᑦ ᐋᓐᓂᐊᕈᑎᖏᑦ ᕿᑐᕐᖓᒥᖕᓄᑦ ᐱᓂᕐᓗᒍᑎᒋᕙᒃᖢᓂᒋᑦ. ᑕᒪᒃᑯᐊ ᖃᐅᔨᒪᔭᐅᔪᑦ ᐊᕐᕌᒍᖃᑎᒌᙱᑦᑐᓄᑦ ᐊᒃᓱᕈᓐᓇᕐᓂᖏᓐᓂᒃ. ᐊᒃᑐᐃᔾᔪᑕᐅᓲᑦ ᐊᕐᕌᒍᖃᑎᒌᙱᑦᑐᓄᑦ ᐊᒃᓱᕈᕈᑕᐅᖃᑦᑕᖅᓯᒪᔪᑦ ᐊᒥᓱᒻᒪᕆᐊᓗᐃᑦ ᐃᒻᒥᓃᖃᑦᑕᖅᓯᒪᕗᑦ, ᑎᒥᒃᑯᑦ ᐊᒻᒪ ᐃᓱᒪᒃᑯᑦ ᐋᓐᓂᐊᕈᑎᓄᑦ, ᐊᓯᖏᓐᓄᓪᓗ ᐋᓐᓂᐊᕈᑎᓄᑦ[10].
ᐅᑯᐊ ᑭᖑᓂᖔᑦᑎᓐᓂ ᐱᓕᕆᐊᖑᖃᑦᑕᓚᖅᓯᒪᔫᒐᓗᐊᑦ, ᑭᓯᐊᓂ ᓱᓕ ᒫᓐᓇ ᐊᒃᓱᕈᕐᓇᕐᓂᕆᔭᐅᓚᐅᖅᑐᖅ ᐊᒃᑑᑎᓯᒪᖕᒪᑕ. ᐅᑯᐊ ᐱᐅᙱᑦᑐᓕᓂᐊᓘᕙᓚᐅᖅᑐᑦ ᐋᖅᑭᒋᐊᖅᑕᐅᔪᓐᓇᐃᓪᓕᖕᒪᑕ. ᑭᓯᐊᓂ, ᑲᓇᑕᒥ ᒐᕙᒪᒃᑯᑦ ᓯᕗᒻᒧᐊᖏᓐᓇᕆᐊᖃᕐᒪᑕ ᐋᖅᑭᖃᑎᒌᒡᓗᑎᒃ, ᓴᖅᑭᑦᑎᓂᒃᑯᑦ ᖃᓄᐃᙱᑦᑎᐊᖅᑐᓂᒃ ᐱᓕᕆᖃᑎᒌᒍᓯᕐᓂᒃ ᓄᓇᖃᖅᑳᖅᓯᒪᔪᑦ ᐃᓄᖕᓂᒃ, ᐃᓕᑕᕆᐅᒪᓗᒋᓪᓗ ᓈᒻᒪᙱᓐᓂᐅᔪᑦ ᓇᓕᒧᒌᙱᓐᓂᐅᔪᓪᓗ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ ᖃᐅᔨᔭᐅᖃᑦᑕᓚᐅᖅᓯᒪᔪᑦ ᐊᒻᒪ ᒫᓐᓇ ᓱᓕ ᖃᐅᔨᔭᐅᕈᓘᔭᖅᐸᒃᑐᑦ. ᖃᐅᔨᒪᔭᐅᓗᓂ ᐃᒪᖅ ᓴᓗᒪᓗᓂ ᐃᒥᒐᒃᓴᐅᓂᖓ, ᓈᒻᒪᒡᓗᑎᑦ ᐃᒡᓗᖃᐅᓯᑦ, ᐃᓚᐅᕝᕕᒋᔭᒃᓴᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐱᔨᑦᑎᕋᐅᑎᑦ, ᒪᒥᓴᕐᕖᑦ, ᓈᒻᒪᒃᑐᑦ ᐃᓕᓐᓂᐊᖅᑕᐅᔪᒃᓴᑦ, ᐊᑭᓕᒐᕐᓂᖅᑐᓪᓗ ᓂᕆᔭᒃᓴᑦ ᐱᐅᓯᕆᔭᐅᔪᓐᓇᖅᑐᓗᒃᑖᖑᕗᑦ ᐃᓅᓯᕆᔭᐅᔪᓄᑦ ᐱᐅᓯᕚᓪᓕᕈᑕᐅᔪᓐᓇᖅᖢᑎᒃ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ. ᓄᓇᖃᖅᑳᖅᓯᒪᔪᑦ ᓄᑕᖅᑲᑦ, ᒪᒃᑯᒃᑐᑦ, ᐃᓐᓇᐃᑦ, ᐃᓚᒌᑦ, ᐊᒻᒪ ᓄᓇᖅᑲᑎᒌᑦ ᖁᕕᐊᓱᒋᐊᖃᕐᒪᑕ, ᖃᓄᐃᙱᑦᑎᐊᕐᓗᑎᒃ ᐃᓅᖃᑕᐅᔭᕆᐊᖃᕐᒪᑕ. ᐃᓄᓕᒫᑦᑎᐊᓄᑦ ᐱᔪᓐᓇᐅᑎᒋᔭᐅᔪᑦ, ᐃᓚᓕᐅᔾᔭᐅᓪᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ, ᓴᐳᔾᔭᐅᓯᒪᒋᐊᖃᕐᒪᑕ ᐃᒃᐱᒋᔭᐅᑦᑎᐊᕆᐊᖃᕐᒪᑕᓗ ᖃᓄᓗᒃᑖᖅ ᐊᑭᖃᕋᓗᐊᖅᐸᑕ.
ᑲᓇᑕᒥᐅᑦ ᓵᑕᐅᔪᓐᓇᕐᓂᕐᒥᓂᒃ ᐱᓕᕆᐊᖃᓚᐅᓐᖏᓐᓂᖏᓐᓂ, ᑎᓕᐅᖅᐸᒃᑲ ᐊᑐᖁᓪᓗᒋᑦ ᐊᐅᐸᔮᖅᑐᒥᑦ ᐊᑐᖁᓪᓗᒋᑦ ᑲᓇᑕᐅᑉ ᐅᓪᓗᖓᓂ, ᔪᓚᐃ 1-ᒥ ᐊᕐᕌᒍᑕᒫᑦ, ᐃᒃᐱᒋᑦᑎᐊᕐᓗᒋᑦ ᐊᓯᐅᔨᔭᐅᔪᑦ ᓄᓇᖃᖅᑳᖅᓯᒪᔪᑦ ᐃᓄᖏᑦ ᑲᓇᑕᒥ.
[1] Wilk, P., Maltby, A., & Cooke, M. (2017). ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪ ᐊᒃᑐᐃᔾᔪᑕᐅᔪᑦ ᓄᓇᖃᖅᑳᖅᓯᒪᔪᑦ ᖃᓄᐃᙱᑦᑎᐊᕈᓯᖏᓐᓄᑦ ᐃᓅᑦᑎᐊᕈᓯᖏᓐᓄᓪᓗ ᑲᓇᑕᒥ ᐊᔪᕐᓇᙱᑐᐃᓐᓇᕆᐊᓕᑦ ᕿᒥᕐᕈᔭᐅᓂᖏᑦ. Public Health Reviews, 38(1), 8–8. https://doi.org/10.1186/s40985-017-0055-6
[2] Sinclair, R. (2019). ᓄᓇᖃᖅᑳᖅᓯᒪᔪᑦ ᐃᓄᓕᕆᔨᓄᑦ ᐃᓕᓐᓂᐊᖅᑎᑦᑎᔾᔪᑎᑦ ᑲᓇᑕᒥ: ᖃᓪᓗᓈᙳᖅᓴᔭᐅᔪᑦ 7−ᒋᓕᖅᑕᖓᓂ ᐅᑭᐅᖃᖃᑎᒌᙱᑦᑐᑦ ᐃᖏᕐᕋᑎᒋᓕᖅᑐᖅ. ᓄᓇᖃᖅᑳᖅᓯᒪᔪᑦ ᕿᑐᕐᖓᖏᑦ ᐃᓚᒌᖕᓂᖏᓪᓗ ᕿᒥᕐᕈᔭᐅᓂᖏᑦ, 14(1), 9-21. ᐱᔭᐅᓂᑯᑦ ᐅᕙᙵᑦ https://fpcfr.com/index.php/FPCFR/article/view/369
[3] Wilk, P., Maltby, A., & Cooke, M. (2017). ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪ ᐊᒃᑐᐃᔾᔪᑕᐅᔪᑦ ᓄᓇᖃᖅᑳᖅᓯᒪᔪᑦ ᖃᓄᐃᙱᑦᑎᐊᕈᓯᖏᓐᓄᑦ ᐃᓅᑦᑎᐊᕈᓯᖏᓐᓄᓪᓗ ᑲᓇᑕᒥ ᐊᔪᕐᓇᙱᑐᐃᓐᓇᕆᐊᓕᑦ ᕿᒥᕐᕈᔭᐅᓂᖏᑦ. Public Health Reviews, 38(1), 8–8. https://doi.org/10.1186/s40985-017-0055-6
[4] Wilk, P., Maltby, A., & Cooke, M. (2017). ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪ ᐊᒃᑐᐃᔾᔪᑕᐅᔪᑦ ᓄᓇᖃᖅᑳᖅᓯᒪᔪᑦ ᖃᓄᐃᙱᑦᑎᐊᕈᓯᖏᓐᓄᑦ ᐃᓅᑦᑎᐊᕈᓯᖏᓐᓄᓪᓗ ᑲᓇᑕᒥ ᐊᔪᕐᓇᙱᑐᐃᓐᓇᕆᐊᓕᑦ ᕿᒥᕐᕈᔭᐅᓂᖏᑦ. Public Health Reviews, 38(1), 8–8. https://doi.org/10.1186/s40985-017-0055-6
[5] Alston-O’Connor, E. (2019). ᐃᓚᖏᑦ ᐱᔭᐅᒥᐊᖅᑐᑦ, ᐃᓚᖏᑦ ᑎᒍᐊᖅᑕᐅᑎᓪᓗᒋᑦ ᑕᐃᔅᓱᒪᓂ (The Sixties Scoop). ᐱᕐᔪᐊᒻᒪᕆᐊᓗᐃᑦ ᐃᓄᓕᕆᔾᔪᓰᑦ, 11(1). ᐱᔭᐅᓂᑯᑦ ᐅᕙᙵᑦ https://doi.org/10.22329/csw.v11i1.5816
[6] Alston-O’Connor, E. (2019). ᐃᓚᖏᑦ ᐱᔭᐅᒥᐊᖅᑐᑦ, ᐃᓚᖏᑦ ᑎᒍᐊᖅᑕᐅᑎᓪᓗᒋᑦ ᑕᐃᔅᓱᒪᓂ (The Sixties Scoop). ᐱᕐᔪᐊᒻᒪᕆᐊᓗᐃᑦ ᐃᓄᓕᕆᔾᔪᓰᑦ, 11(1). ᐱᔭᐅᓂᑯᑦ ᐅᕙᙵᑦ https://doi.org/10.22329/csw.v11i1.5816
[7] Alston-O’Connor, E. (2019). ᐃᓚᖏᑦ ᐱᔭᐅᒥᐊᖅᑐᑦ, ᐃᓚᖏᑦ ᑎᒍᐊᖅᑕᐅᒥᐊᖅᑐᑦ ᑕᐃᔅᓱᒪᓂ (The Sixties Scoop). ᐱᕐᔪᐊᒻᒪᕆᐊᓗᐃᑦ ᐃᓄᓕᕆᔾᔪᓰᑦ, 11(1). ᐱᔭᐅᓂᑯᑦ ᐅᕙᙵᑦ https://doi.org/10.22329/csw.v11i1.5816
[8] Sinclair, R. (2019). ᓄᓇᖃᖅᑳᖅᓯᒪᔪᑦ ᐃᓄᓕᕆᔨᓄᑦ ᐃᓕᓐᓂᐊᖅᑎᑦᑎᔾᔪᑎᑦ ᑲᓇᑕᒥ: ᖃᓪᓗᓈᙳᖅᓴᔭᐅᔪᑦ 7−ᒋᓕᖅᑕᖓᓂ ᐅᑭᐅᖃᖃᑎᒌᙱᑦᑐᑦ ᐃᖏᕐᕋᑎᒋᓕᖅᑐᖅ. ᓄᓇᖃᖅᑳᖅᓯᒪᔪᑦ ᕿᑐᕐᖓᖏᑦ ᐃᓚᒌᖕᓂᖏᓪᓗ ᕿᒥᕐᕈᔭᐅᓂᖏᑦ, 14(1), 9-21. ᐱᔭᐅᓂᑯᑦ ᐅᕙᙵᑦ https://fpcfr.com/index.php/FPCFR/article/view/369
[9] Alston-O’Connor, E. (2019). ᐃᓚᖏᑦ ᐱᔭᐅᒥᐊᖅᑐᑦ, ᐃᓚᖏᑦ ᑎᒍᐊᖅᑕᐅᒥᐊᖅᑐᑦ ᑕᐃᔅᓱᒪᓂ (The Sixties Scoop). ᐱᕐᔪᐊᒻᒪᕆᐊᓗᐃᑦ ᐃᓄᓕᕆᔾᔪᓰᑦ, 11(1). ᐱᔭᐅᓂᑯᑦ ᐅᕙᙵᑦ https://doi.org/10.22329/csw.v11i1.5816
[10] Sinclair, R. (2019). ᓄᓇᖃᖅᑳᖅᓯᒪᔪᑦ ᐃᓄᓕᕆᔨᓄᑦ ᐃᓕᓐᓂᐊᖅᑎᑦᑎᔾᔪᑎᑦ ᑲᓇᑕᒥ: ᖃᓪᓗᓈᙳᖅᓴᔭᐅᔪᑦ 7−ᒋᓕᖅᑕᖓᓂ ᐅᑭᐅᖃᖃᑎᒌᙱᑦᑐᑦ ᐃᖏᕐᕋᑎᒋᓕᖅᑐᖅ. ᓄᓇᖃᖅᑳᖅᓯᒪᔪᑦ ᕿᑐᕐᖓᖏᑦ ᐃᓚᒌᖕᓂᖏᓪᓗ ᕿᒥᕐᕈᔭᐅᓂᖏᑦ, 14(1), 9-21. ᐱᔭᐅᓂᑯᑦ ᐅᕙᙵᑦ https://fpcfr.com/index.php/FPCFR/article/view/369
________________________________________________________________________________________________________________________________________________________
ᔫᓂ 11, 2021
ᐃᓕᑦᑎᓯᒪᕗᖓ ᐃᓄᑑᓪᓗᓂ ᑭᒡᒐᖅᑐᖅᑎᐅᓂᕐᒥᒃ
ᓯᕗᓪᓕᕐᒥ ᐱᓇᓱᐊᕈᓯᕐᓄᑦ ᓯᑕᒪᓂᒃ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓃᑦᓱᖓ ᐱᓕᕆᖃᑎᖃᖅᓱᖓ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ (IA) ᐱᓕᕆᖃᑎᒌᓂᑦ.
ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ ᐱᓕᕆᖃᑎᒌᑦ ᐱᓕᕆᖃᑎᖃᖃᑦᑕᖅᑐᑦ ᓄᑕᖅᑲᓂᒃ, ᒪᒃᑯᑦᑐᓂᒃ, ᐃᓚᒌᖏᓐᓂᓪᓗ ᓇᓗᓇᐃᖅᓯᓂᕐᒧᑦ ᓄᑕᖅᑲᐃᑦ ᒪᒃᑯᑦᑐᐃᓪᓗ ᐱᔪᓐᓇᐅᑎᖏᑦ ᒪᓕᑦᑕᐅᒐᓗᐊᕐᒪᖔᑕ ᐃᓗᐊᓂ ᒐᕙᒪᒃᑯᑦ ᓄᓇᕗᒻᒥ ᐱᔨᑦᓯᕋᕐᕕᐅᔪᓂᑦ. ᐱᔪᓐᓇᐅᑎᖏᑦ ᒪᓕᑦᑕᐅᖏᑐᐊᖅᐸᑕ, ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓕᑦ ᐱᓕᕆᖃᑎᒌᑦ ᐱᓕᕆᖃᑎᖃᕐᓂᐊᖅᑐᑦ ᒐᕙᒪᒃᑯᓐᓂᑦ ᓄᓇᕗᒻᒥ ᐱᔨᑦᓯᕋᖅᑎᑦᓯᔨᖓᓂᑦ ᐋᖅᑭᑦᓯᓂᕐᒧᑦ ᐊᑲᐅᙱᓪᓕᐅᕈᑎᒥᑦ. ᓄᑕᖅᑲᐃᑦ, ᒪᒃᑯᑦᑐᐃᑦ, ᐃᓚᒌᓪᓘᓐᓃᑦ ᐃᓱᒫᓘᑎᖃᖅᐸᑕ ᒐᕙᒪᒃᑯᑦ ᐱᔨᑦᓯᕋᕐᓂᖏᓐᓄᑦ, ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ ᐱᓕᕆᖃᑎᒌᑦ ᑐᓂᓯᓂᐊᖅᑐᑦ ᑐᓴᐅᒪᔾᔪᑎᓂᒃ ᐃᑲᔫᑎᑦᓴᓂᓪᓗ, ᐃᑲᔪᕐᓗᒋᑦ ᐅᖃᓪᓚᒍᓐᓇᕐᓂᕐᒧᑦ ᐃᒻᒥᓂᒃ, ᑲᑎᒪᔪᓕᐊᖃᑎᒋᖃᑦᑕᕐᓗᒋᑦ, ᐃᑲᔪᕐᓗᒋᓪᓘᓐᓃᑦ ᖃᓄᓕᒫᖅ ᐱᔪᓐᓇᕐᓂᑎᒍᑦ.
ᑕᐃᑲᓃᑦᑎᓪᓗᖓ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ ᐱᓕᕆᖃᑎᒌᓂᒃ, ᕿᒥᕐᕈᓚᐅᖅᑐᖓ ᒪᑐᒪᓕᖅᑐᓂᑦ ᐱᓕᕆᐊᖑᓯᒪᔪᓂᑦ ᐃᓕᓐᓂᐊᕐᓱᖓ ᖃᓄᖅ ᑭᒡᒐᖅᑐᐃᔩᑦ ᐱᓕᕆᐊᖃᖃᑦᑕᕐᓂᖏᓐᓄᑦ ᐋᖅᑭᑦᓱᐃᓂᕐᒧᑦ ᐊᑲᐅᙱᓪᓕᐅᕈᑎᓂᑦ.
ᕿᒥᕐᕈᓂᕐᒧᑦ ᐱᓕᕆᐊᖑᔪᓂᑦ, ᓯᕗᓪᓕᕐᒥ ᐃᓕᓐᓂᐊᕆᐊᖃᓚᐅᖅᑐᖓ ᖃᓄᖅ ᐊᑐᕈᓐᓇᓂᕐᒧᑦ ᐱᓂᐊᓚᐱᒥ. ᐱᓂᐊᓚᐱ ᐊᑐᖅᑕᐅᖃᑦᑕᖅᑐᖅ ᑐᓴᖅᑕᐅᔭᕆᐊᖃᙱᑦᑐᓕᒫᑦ ᑐᓴᐅᒪᔾᔪᑏᑦ ᐱᓕᕆᐊᖑᓯᒪᔪᑦ ᑐᖅᑯᖅᑕᐅᓯᒪᔪᑦ ᖃᕆᑕᐅᔭᒃᑯᑦ. ᐃᑲᔪᖅᑐᖅᑕᐅᑦᓯᐊᖅᓱᓂ ᕿᓄᐃᓵᕐᓂᖏᓐᓄᓪᓗ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ ᐱᓕᕆᖃᑎᒌᑦ, ᐃᓕᓐᓂᐊᕈᓐᓇᓚᐅᖅᑐᖓ ᐊᑐᕈᓐᓇᕐᓂᕐᒧᑦ ᑖᑦᓱᒪᖓᑦ ᐱᓕᕆᐊᕐᒥ ᓱᑲᑦᑐᒥᒃ.
ᐊᓪᓚᕝᕕᒃ ᓄᑖᓂᒃ ᐱᒐᐃᒻᒪᑕ ᑕᑯᔭᑦᓴᙳᖅᑎᑕᐅᕙᑦᑐᓂᑦ, ᐱᕕᖃᓚᐅᖅᑐᖓ ᐱᔭᑦᓴᑖᖅᑎᑦᓯᓂᕐᒧᑦ ᐱᓕᕆᐊᑦᓴᓂᑦ ᑭᒡᒐᖅᑐᐃᔨᓄᑦ ᐊᑐᖅᓱᖓ ᐱᓂᐊᓚᐱᒥ. ᕿᒥᕐᕈᖃᑦᑕᓚᐅᕐᒥᔪᖓ ᐱᓕᕆᐊᖑᔪᓄᑦ ᑎᑎᕋᖅᑕᐅᓯᒪᔪᓂᑦ ᑐᑭᓯᐅᒪᓂᕐᒧᑦ ᓱᓇᐃᑦ ᑐᓴᐅᒪᔾᔪᑏᑦᓴᐃᑦ ᐱᒻᒪᕆᐅᒻᒪᖔᑕ ᐱᖃᓯᐅᑎᔭᕆᐊᖃᖅᑐᑦ. ᐱᓕᕆᐊᑦᓴᐅᔪᑦ ᐱᔭᕇᖅᒪᑕ, ᐃᓕᓐᓂᐊᖅᑎᑕᐅᓚᐅᖅᑐᖓ ᖃᓄᖅ ᒪᑐᓯᔭᕆᐊᑦᓴᖅ ᑐᖅᑯᕐᕕᐅᓯᒪᔪᖅ.
ᐱᓕᕆᖃᑎᒋᑦᓱᒋᑦ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ ᐱᓕᕆᖃᑎᒌᑦ ᐃᑲᔫᑎᖃᓪᓚᕆᓚᐅᖅᑐᖅ ᑕᒪᑦᓱᒪᖓᑦ ᐃᖅᑲᓇᐃᔮᖃᕈᒪᒐᒪ ᐱᔭᕇᕈᒪ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᕇᕈᒪ. ᐱᓇᓱᐊᕈᓰᑦ ᓯᑕᒪᑦ ᕿᓚᒥᐅᓚᐅᕋᓗᐊᖅᑎᓪᓗᒋᑦ ᐃᒻᒥᑰᖅᑐᓂᒃ ᑭᒡᒐᖅᑐᐃᔨᓂᑦ ᐱᓕᕆᖃᑎᒌᒃᑯᓐᓃᓚᐅᖅᑎᓪᓗᖓ, ᐃᓕᑦᑐᐸᓘᓚᐅᖅᑐᖓ.
________________________________________________________________________________________________________________________________________________________
ᔫᓂ 1, 2021
ᐃᓘᓐᓇᖏᓐᓂᑦ ᑲᒪᒋᔭᖃᕋᓱᐊᕐᓂᖅ ᐱᕕᖃᕐᓂᕐᒧᓪᓗ ᐅᕙᓐᓄᑦ
ᑲᒪᒋᔭᖃᕐᓂᖅ ᑕᒪᒃᑮᓐᓂᒃ ᐃᖅᑲᓇᐃᔮᒥ ᓇᒻᒥᓂᕐᓗ ᓯᕗᓕᐅᔾᔨᓂᕐᒧᑦ ᐊᑦᓱᕈᓐᓇᖏᓐᓇᖅᑐᖅ, ᑭᓯᐊᓂ ᐱᔭᕆᐊᑐᓂᖅᓴᐅᖃᑦᑕᓕᖅᑐᖅᑕᐅᖅ. ᐃᖅᑲᓇᐃᔮᖅ ᐱᕕᑦᓴᑎᓐᓂ ᐊᑐᕆᐊᖃᒻᒪᕆᒻᒪᑦ ᐊᐅᓚᔪᓐᓇᐅᑎᑦᑎᓐᓂᓪᓗ, ᐱᒻᒪᕆᐅᕗᖅ ᐱᕕᑦᓴᕐᓂᕐᒧᑦ ᐃᓕᓐᓂᑦ ᑲᒪᒋᔭᖃᑦᓯᐊᕐᓂᕐᒧᖅᑕᐅᖅ. ᑕᐃᒪᖓᓂᑦ, ᐋᖅᑭᑦᓱᐃᓂᕐᒧᑦ ᐱᕕᑦᓴᖃᕐᕕᒋᔭᕐᓂᑦ ᐊᑐᑦᓯᐊᕐᓂᕐᒧᑦ ᐊᑦᓱᕈᓐᓇᓗᐊᕈᓐᓃᑎᑦᓯᔪᓐᓇᖅᑐᖅ, ᐃᒪᐃᓕᐅᖃᑦᑕᖅᑐᖓᓕ:
- ᐸᐃᑉᐹᖅᒥ ᐊᑕᐅᓯᕐᒥ, ᑎᑎᕋᖃᑦᑕᖅᑐᖓ ᐱᓇᓱᐊᕈᓯᕐᒥ ᐱᔭᑦᓴᕆᔭᕆᐊᓕᓐᓂᑦ ᑭᒡᒐᖅᑐᐃᔨᐅᑎᓪᓗᖓ ᐅᐱᕐᖔᒃᑯᑦ ᐃᓕᓐᓂᐊᖅᑎᐅᓂᕐᒧᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓᓂᑦ. ᐅᖃᕐᓗᑎᑦ “ᐱᓕᕆᐊᕆᔭᕆᐊᓕᒃᑲ ᑎᑎᕋᖅᓯᒪᔪᑦ”.
- ᐊᓯᐊᓂ ᐸᐃᑉᐹᖅᒥ, ᑎᑎᕋᖃᑦᑕᖅᑐᖓ ᓇᒻᒥᓂᖅ ᐱᔭᑦᓴᕆᔭᕆᐊᓕᓐᓂᒃ ᖃᓄᐃᓕᐅᕐᓂᕆᒍᒪᔭᒃᑲᓪᓗ ᐅᕙᓐᓄᑦ ᐱᓇᓱᐊᕐᕈᓯᕐᒥᒃ. ᑖᒃᑯᐊ “ᐅᕙᓐᓄᑦ ᑎᑎᕋᖅᓯᒪᔭᒃᑲ”.
- ᑕᑯᓐᓇᕐᓗᒋᑦ “ᓱᓕᕆᐊᑦᓴᒃᑲ ᑎᑎᕋᖅᓯᒪᔪᑦ” ᐱᕕᑦᓴᖃᖅᑎᑦᓯᖃᑦᑕᖅᑐᖓ ᐱᓇᓱᐊᕈᓯᕐᒥ ᐊᖏᓂᖅᓴᐅᔪᓄᑦ ᐱᔭᑦᓴᕐᓄᑦ, ᐱᕕᑦᓴᖃᕐᕕᒋᔭᕆᐊᖃᖅᑐᐃᓪᓗ ᓯᕗᓪᓕᐅᔾᔨᑦᓱᒋᑦ.
- ᑕᐅᑐᓯᑦᑕᖃᕋ “ᐅᕙᓐᓄᑦ ᑎᑎᕋᖅᓯᒪᔭᒃᑲ” ᓱᓇᓂᓗ ᐱᕕᑦᓴᖃᕐᓂᕐᓄᑦ ᐃᓚᓯᒍᓐᓇᕐᓂᕐᓄᑦ ᐅᓪᓗᕆᓂᐊᖅᑕᓐᓂᑦ. ᑭᓯᐊᓂ, ᓱᓇᑭᐊᖅ ᐅᕙᓐᓄᑦ ᐱᒻᒪᕆᐅᑉᐸᑦ, ᐊᖏᖅᓯᒪᓂᖃᖅᓯᒪᒧᑦ ᑭᓇᒧᒃᑭᐊᖅ, ᐅᕙᓐᓄᓪᓘᓐᓃᑦ ᐊᖏᖅᓯᒪᓂᖃᕆᐊᖃᕈᒪ, ᐋᖅᑭᑦᓯᖃᑦᑕᖅᑐᖓ ᐱᔭᑦᓴᕐᓂᑦ ᑕᐃᒫᑦᓴᐃᓐᓇᖅ “ᐱᓕᕆᐊᕆᔭᕆᐊᓕᒃᑲ ᑎᑎᕋᖅᓯᒪᔪᓂᑦ”.
- ᑕᐃᒪ, ᐱᒋᐊᕈᑎᖃᖃᑦᑕᖅᑐᖓ ᖃᐅᑕᒫᑦ ᒪᓕᑦᓱᒋᑦ ᑲᑎᖅᓱᖅᓯᒪᔪᓂ ᑎᑎᕋᖅᓯᒪᔭᒃᑲᓂᑦ ᑖᑦᓱᒧᖓ ᐅᓪᓗᕐᒧᑦ.
ᐊᒥᓱᓂᑦ ᐱᔭᑦᓴᖃᑐᐊᕈᕕᑦ ᐊᑕᐅᓯᕐᒧ ᐅᓪᓗᒧᑦ ᐱᔭᑦᓴᖃᓗᐊᖅᑐᕆᒍᕕᓪᓗ, ᐱᕙᒌᖃᑦᑕᖅᑐᖓ ᐃᖅᑯᒪᑦᓴᐅᑎᒋᓂᕐᒧᑦ ᑐᖔᓂᑦ ᐃᖅᑯᒪᕕᒋᖃᑦᑕᖅᑕᒪ ᐱᕕᑦᓴᖃᕐᓂᖅᓴᐅᓂᐊᕋᒪ.
ᐊᒻᒪᓗᑦᑕᐅᖅ, ᐱᓴᑦᓴᕋ ᐅᓪᓗᓄᑦ ᐊᒥᓱᓄᑦ ᐱᓴᑦᓴᕆᑦᓱᒍ (ᐊᒥᓱᓄᓪᓘᓐᓃᑦ ᐱᓇᓱᐊᕈᓯᕐᓄᑦ, ᒪᓕᓪᓗᒍ ᖃᓄᑎᒋ ᐊᖏᓂᖓᓄᑦ ᒥᑭᓂᖓᓄᓪᓘᓐᓃᑦ ᐱᔭᑦᓴᖅ) ᐃᓱᓕᕝᕕᑦᓴᖓᑕ ᓯᕗᓂᖓᓂ ᑐᓂᑦᓴᐅᑎᒋᖃᑦᑕᖏᑦᑕᒃᑲ ᐅᓪᓗᖓᓂ ᐃᓱᓕᕝᕕᑦᓴᖓᓂ ᑭᓯᐊᓂ ᐱᔾᔪᑎᒋᑦᓱᒍ ᐱᕕᑦᓴᖃᖅᑎᑦᓯᖃᑦᑕᕐᒪᑦ ᐅᕙᓐᓂᑦ ᐅᖃᓕᒫᓗᓂ-ᑕᒻᒪᖅᓯᒪᔪᖅᓯᐅᕐᓂᕐᒧᑦ ᑐᓂᓯᓚᐅᖏᓂᕐᓂᑦ.
ᐱᕙᒌᔭᐅᑎᖃᕐᓂᖅ ᐱᓇᓱᐊᕈᓯᕐᒧᑦ, ᐱᕕᖃᖅᑎᑦᓯᖃᑦᑕᖅᑐᖅ ᐅᕙᓐᓂᑦ ᐱᔭᕇᖅᓯᓂᕐᒧᑦ ᖃᐅᑕᒫᑦ ᐱᔭᑦᓴᕐᓂᑦ ᑭᖑᕙᖏᓪᓗᑎᒃ ᐱᕕᑦᓴᖃᕐᓂᕐᒧᓪᓗ ᑲᒪᒋᔭᖃᑦᓯᐊᕐᓂᕐᒧᑦ ᐅᕙᓐᓂᑦ.
ᖃᓄᐃᑐᐃᓐᓇᖅ ᐊᒥᓱᓂᒃ ᐱᔭᑦᓴᕐᓂᑦ ᐱᕙᒌᔭᐅᑎᖃᕈᓐᓇᖅᑐᑎᑦ; ᐃᓱᒪᓕᐅᖃᑦᑕᕋᕕᑦ ᓱᓇᐃᑦ ᐱᐅᓂᖅᐹᒃᑯᑦ ᐊᑐᕈᓐᓇᕐᒪᖔᖅᐱᒋᑦ!
________________________________________________________________________________________________________________________________________________________
ᒪᐃ 24, 2021
ᖃᓄᐃᑦᑑᕙ ᒪᒃᑯᑦᑑᒋᐊᑦᓴᖅ, ᓄᓇᕗᒻᒥ, ᓄᕙᕐᔪᐊᕐᓇᖅ-19-ᑕᖃᖅᑎᓪᓗᒍ
ᐊᒥᓱᑦ ᓄᓇᓕᐅᔪᑦ ᓄᓇᕗᒻᒥ ᐅᐸᒃᑕᐅᑦᑕᐃᓕᒪᔪᒦᑉᐳᑦ ᐃᑉᐱᒋᔭᖃᓕᕋᔪᖃᑦᑕᖅᑐᒍᓪᓗ ᐊᑦᓱᕈᓐᓂᕐᒧᑦ ᓄᕙᕐᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒧᑦ.
ᒪᒃᑯᑦᑑᑦᓱᓂ ᓄᓇᕗᒻᒥ ᐊᒥᓱᓄᑦ ᖃᓂᒻᒪᓐᓇᖅᑕᖃᖅᑎᓪᓗᒍ ᐊᑦᓱᕈᓐᓇᖅᑐᖅ ᓲᕐᓗ ᐃᕿᐊᙳᖅ, ᓯᕘᕋᓂᖅ, ᐳᓛᕆᐊᕈᓐᓇᕈᓂᓗ ᐱᖃᑎᓂᒃ ᐃᓚᒌᓂᓪᓗ.
ᐊᔪᕐᓇᖅᑐᖅᓯᐅᕈᑕᐅᖃᑦᑕᓚᐅᕋᓗᐊᖅᑎᓪᓗᒍ, ᖃᓄᐃᓕᐅᖃᑦᑕᕈᓐᓇᖅᑐᑎᑦ ᐊᐅᓚᑦᓯᓂᕐᒧᑦ ᑎᒥᒃᑯᑦ ᐃᓱᒪᒃᑯᓪᓗ ᖃᓄᐃᖏᑦᑎᐊᕐᓂᕐᒧᑦ. ᐊᖏᔪᒥᒃ ᓄᓇᑦᓯᐊᕚᓗᖃᕋᑦᑕ ᓄᓇᕗᒻᒥ, ᐱᔭᑦᓴᖃᖅᑎᖃᑦᑕᖅᑐᖓᓕ ᐱᓱᕋᔮᑦᓱᖓ, ᐱᓱᑦᓱᖓ, ᐊᐅᓪᓛᖅᓱᖓ, ᐃᖃᓕᐊᕐᓂᖅ, ᖁᙱᐊᖃᑦᑕᕐᓂᕐᒧᓪᓗ!
ᖃᓄᐃᓕᐅᑲᓐᓂᕈᓐᓇᖅᑐᑎᑦ ᐱᔭᑦᓴᖃᐃᓐᓇᕐᓂᕐᒧᑦ ᓲᕐᓗ ᐃᓕᓐᓂᐊᕐᓂᕐᒧᑦ ᓂᕿᓕᐅᕐᓂᕐᒥᒃ, ᒥᖅᓱᓂᕐᒥᒃ, ᐊᓯᕙᕐᓂᕐᒥᒃ, ᐊᓯᑲᓐᓂᖏᓐᓂᓪᓗ! ᐃᖅᑲᐅᒪᐃᓐᓇᕆᑦ ᐃᓕᓐᓂᑦ ᑲᒪᑦᓯᐊᕐᓂᕐᒥᒃ ᐃᑲᔪᖅᑕᐅᔪᒪᓗᑎᓪᓗ ᐃᓚᓐᓄᑦ/ᐱᖃᑎᓐᓄᑦ ᐅᖃᖃᑎᖃᕈᒪᒍᕕᑦ.
________________________________________________________________________________________________________________________________________________________
ᒪᐃ 17, 2021
ᖃᐅᔨᒪᕕᑦ ᐱᔪᓐᓇᐅᑎᑎᑦ ᒪᒃᑯᒃᑑᓪᓗᑎᒃ ᓄᓇᕗᒻᒥᐅᖑᓂᖏᓐᓂᒃ? ᑕᐃᒪᐃᑦᑕᕆᐊᖃᕋᕕᑦ.
ᐱᒻᒪᕆᓪᓚᕆᐅᕗᖅ ᒪᒃᑯᑦᑐᓄᑦ ᓄᓇᕗᒻᒥᐅᓂᑦ ᖃᐅᔨᒪᔭᕆᐊᖃᕐᓂᖏᓐᓄᑦ ᐱᔪᓐᓇᐅᑎᖏᓐᓂᑦ ᓄᑕᖅᑲᐅᓗᑎᒃ ᒪᒃᑯᑦᑑᓗᑎᓪᓗ. ᒪᕐᕉᒃ ᖃᓄᐃᑑᓂᖏᒃ ᐱᔪᓐᓇᐅᑏᒃ, ᑕᒪᐃᓐᓄᑦ ᐃᓄᐃᑦ ᐱᔪᓐᓇᐅᑎᖏᑦ ᓄᑕᖅᑲᓄᓪᓗ ᐱᔪᓐᓇᐅᑎᖏᑦ.
ᑕᒪᐃᓐᓄᑦ ᐃᓄᐃᑦ ᐱᔪᓐᓇᐅᑎᖏᑦ ᐊᑐᖅᑕᐅᔪᓐᓇᖅᑐᖅ ᑭᒃᑯᓕᒫᓄᑦ, ᓇᒥᓕᒫᖅ ᐱᐊᕋᕐᓄᑦ ᐃᓅᓕᕋᑖᓄᑦ ᐃᓄᑐᖃᕐᓄᑦ ᐃᓱᒪᒋᖏᓪᓗᒍ ᓇᑭᙶᕋᓗᐊᖅᐸᑦ, ᐊᕐᕌᒍᖓ, ᐊᕐᓇᐅᒐᓗᐊᖅᐸᑦ/ᐊᖑᑕᐅᑕᐅᒐᓗᐊᖅᐸᑦ, ᑭᓇᐅᓂᕐᒧᓪᓘᓐᓃᖅ, ᓄᓕᐊᕐᓂᒃᑯᑦ ᖃᓅᕙᒻᒪᖔᖅᐱᑦ, ᐃᓕᖅᑯᓯᖃᖃᑎᒌᖏᑦᑐᑦ, ᐅᑉᐱᕐᓂᖏᑦ, ᓇᓂᕐᒥᐅᑕᐅᒐᓗᐊᖅᐸᑕ. ᐃᓄᐃᑦ ᐱᔪᓐᓇᐅᑎᖏᑦ ᐱᕕᖃᖅᑎᑦᓯᓂᐊᖅᑐᖅ ᐃᓕᓐᓂᑦ ᐊᔾᔨᒌᑎᑕᐅᓂᕐᒧᑦ ᐃᑉᐱᒋᔭᐅᑦᓯᐊᕐᓂᕐᒧᓪᓗ ᓄᓇᕐᔪᐊᓕᒫᒥᑦ.
ᓄᑕᖅᑲᐃᑦ ᐱᔪᓐᓇᐅᑎᖏᑦ ᐊᔾᔨᐸᓗᖏᑦ ᐃᓄᐃᑦ ᐱᔪᓐᓇᐅᑎᖏᑦᑕ ᑭᓯᐊᓂ ᐃᓕᖓᓂᖃᖅᑐᖅ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᑖᓂ ᐊᕐᕌᒍᓕᓐᓄᑦ 19-ᓂ. ᓄᑕᖅᑲᐃᑦ ᐱᔪᓐᓇᐅᑎᖏᑦ ᐊᔾᔨᐅᖏᑦᑐᑦ ᐱᔾᔪᑎᒋᑦᓱᒍ ᓄᑕᖅᑲᐃᑦ ᒪᒃᑯᑦᑐᐃᓪᓗ ᐱᔭᕆᐊᑭᑦᑑᒻᒪᑕ ᑕᑎᖃᖅᓱᑎᓪᓗ ᐃᓐᓇᕐᓂᑦ ᐊᑦᑕᕐᓇᖅᑐᒦᑦᑕᐃᓕᒪᓂᕐᒧᑦ ᓴᐳᔾᔨᔭᐅᓂᕐᒧᓪᓗ ᖃᐅᑕᒫᑦ ᐃᓅᓯᖏᓐᓂᑦ! ᖃᑦᓯᒐᓚᐃᑦ ᐱᔪᓐᓇᐅᑏᑦ ᐃᓚᒋᔭᐅᑦᓱᑎᒃ ᐊᖏᖃᑎᒌᒍᑎᖏᑦ ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ, ᓴᐳᔾᔨᓂᕐᒧᑦ ᓄᓕᐊᕐᓂᕐᒨᖓᔪᒥᒃ ᐱᓂᕐᓗᐃᓂᕐᒧᑦ, ᐱᔪᓐᓇᕐᓂᕐᒧᑦ ᐃᓕᓐᓂᐊᕐᓂᕐᒧᑦ, ᐃᓱᒪᖅᓱᕐᓗᓂ ᐅᖃᓪᓚᒍᓐᓇᕐᓂᕐᒧᑦ, ᐱᔪᓐᓇᕐᓂᕐᒧᓪᓗ ᐃᒥᕐᒥᑦ ᓂᕿᓂᓪᓗ. ᐃᓘᓐᓇᑎᒃ ᓄᑕᖅᑲᐃᑦ ᒪᒃᑯᑦᑐᐃᓪᓗ ᓄᓇᕗᒻᒥ ᐱᔪᓐᓇᐅᑎᖃᖅᑐᑦ.
________________________________________________________________________________________________________________________________________________________