ᓄᓇᓕᐅᔪᓂᑦ


ᐃᒃᐱᐊᕐᔪᒃ: ᒪᐃ 20-24, 2024
06/10/2024
ᔭᐃᓐ ᐊᒻᒪ ᓄᕝᕕᔭ ᐳᓛᕆᐊᕈᓐᓇᓚᐅᖅᐴᒃ ᑲᔾᔮᕐᓇᖅᑐᒻᒪᕆᐊᓗᖕᒧᑦ ᐃᒃᐱᐊᕐᔪᖕᒧᑦ ᒪᐃ 20-ᒥ 24-ᒧᑦ, 2024. ᑐᙵᓱᑦᑎᑕᐅᑦᑎᐊᓚᐅᖅᐳᑦ ᓄᓇᓕᒻᒥᐅᓕᒫᓄᑦ. ᐱᕕᖃᒃᑲᓐᓂᕈᒪᓚᐅᖅᑐᑦ ᐃᒃᐱᐊᕐᔪᖕᒥ ᑕᑯᔪᒪᓪᓗᑎᒃ ᑭᒃᑯᓕᒫᓂᒃ. ᖁᔭᓕᔪᒪᔪᑦ ᑕᒪᐃᓐᓂᒃ ᑐᙵᓇᕐᓂᖏᓐᓄᑦ ᐃᑲᔪᕈᒪᑦᑎᐊᕐᓂᖏᓐᓄᓪᓗ. ᓇᐃᒃᑲᓗᐊᖅᖢᓂ, ᐳᓛᕆᐊᕐᓂᕆᓚᐅᖅᑕᖏᑦ ᐆᒻᒪᑎᒥᓃᖏᓐᓇᕐᒪᑕ. ᖁᔭᓐᓇᒦᒃ ᐃᓅᔭᖅ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑏᑦ ᑲᑎᒪᖃᑎᖃᕈᓐᓇᓚᐅᕐᒪᑕ ᐅᕙᑦᑎᓐᓂᒃ ᖁᕕᐊᓱᒃᖢᑎᒡᓗ ᐳᓛᕆᐊᕈᓐᓇᕐᓂᑦᑎᓐᓄᑦ, ᖁᔭᓐᓇᒦᒃ ᐱᔨᑦᑎᕋᖅᑎᒋᔭᐅᕙᒃᑐᓄᑦ ᓄᓇᓕᖕᒥᐅᓄᓪᓗ ᐅᕙᑦᑎᓐᓂᒃ ᐅᖃᖃᑎᖃᕈᓐᓇᓚᐅᕐᓂᖏᓐᓄᑦ, ᑭᖑᓪᓕᖅᐹᖑᙱᖦᖢᓂᓗ, ᖁᔭᓐᓇᒦᒃ ᑕᖅᑯᑦ ᑐᔪᕐᒥᕕᒃ ᐃᖅᑲᓇᐃᔭᖅᑎᖏᑦ ᐅᕙᑦᑎᓐᓂᒃ ᑲᒪᒋᔭᖃᑦᑎᐊᕐᓂᖏᓐᓄᑦ. ᔭᐃᓐ ᐊᒻᒪ ᓄᕝᕕᔭ ᐅᑎᓛᕈᒪᔫᒃ ᐃᒃᐱᐊᕐᔪᖕᒧᑦ ᖃᑯᒍᒃᑲᓐᓂᖅ.
ᑰᒑᕐᔪᒃ ᐊᒻᒪ ᑕᓗᕐᔪᐊᖅ: ᒪᐃ 20-25, 2023
06/05/2023
ᓄᑉᐱᔭ ᐊᒻᒪ ᐅᓕᕕᐊ ᑰᒑᕐᔪᓕᐊᓚᐅᖅᐳᑦ ᑕᓗᕐᔪᐊᒧᓪᓗ ᐃᓕᓐᓂᐊᖅᑎᓂᒃ ᑲᑎᖃᑎᖃᕆᐊᖅᑐᖅᖢᑎᒃ, ᓄᓇᓕᖕᒥᐅᓂᒃ ᐊᒻᒪ ᓇᖕᒥᓂᖃᖃᑕᐅᔪᓂᒃ. ᖁᕕᐊᓇᓚᐅᖅᑐᖅ ᖁᙱᐊᖅᖢᓂ ᓵᓚᒃᓴᐅᓯᐊᓂᒃ ᑰᒑᕐᔪᖕᒥᑦ ᐃᖃᓗᓕᐅᑎᓚᐅᖅᑎᓪᓗᒋᑦ, ᖁᕕᐊᓱᓚᐅᖅᑐᑦ! ᑕᒪᕐᒥᒃ ᓄᓇᓖᑦ ᑐᙵᓱᒃᑎᑕᐅᑦᑎᐊᓚᐅᖅᐳᑦ ᑕᒪᕐᒥᑦᑎᐊᕐᓗ ᑐᙵᓇᓚᐅᖅᖢᑎᒃ ᐳᓛᕆᐊᖅᓯᒪᑎᓪᓗᑕ − ᖁᔭᓐᓇᒦᒃ ᑐᙵᓱᒃᑎᑦᑎᓚᐅᕋᔅᓯ. ᓄᓇᓕᑦᑎᐊᕙᒻᒪᕆᒃ ᑰᒑᕐᔪᒃ ᐊᒻᒪ ᑕᓗᕐᔪᐊᖅ.
ᑭᒻᒥᕈᑦ: ᒪᐃ 3 - 5, 2023
05/03/2023
ᒪᕆᐊᒪ ᐊᒻᒪ ᑲᐃᑎ ᑭᒻᒥᕈᓕᐊᓚᐅᖅᐴᒃ ᒪᐃᐅᑉ ᐱᒋᐊᕐᓂᖓᓂ. ᓯᓚᑦᑎᐊᕙᐅᓚᐅᖅᑐᖅ, ᓄᓇᓕᖕᒥᐅᓪᓗ ᑐᙵᓇᑦᑎᐊᓚᐅᖅᑐᑦ. ᐅᔾᔨᕐᓇᓗᐊᓚᐅᖅᑐᑦ ᐊᐅᓪᓚᖅᓯᒪᑎᓪᓗᒋᑦ ᐃᓚᖃᓚᐅᖅᐳᑦ ᓄᑕᖅᑲᓂᒃ ᐅᖃᖃᑎᖃᖅᖢᑎᒃ ᓯᓚᒥ ᐱᙳᐊᕐᕕᖕᒥ, ᑲᔾᔮᕐᓇᖅᑐᒃᑰᖅᖢᑎᒃ, ᓄᓇᓕᖕᓂ ᕿᒥᕐᕈᑎᑕᐅᓪᓗᑎᒃ ᐊᒻᒪ ᐃᖃᐃᓕᓴᕆᐊᖅᑐᖅᖢᑎᒃ. ᖁᔭᓐᓇᒦᖑᔪᓯ ᑕᒪᔅᓯᑦᑎᐊᖅ ᐅᕙᑦᑎᓐᓂᒃ ᑲᑎᖃᑎᖃᕈᓐᓇᓚᐅᖅᑐᓄᑦ ᐳᓛᕆᐊᓚᐅᕐᓂᑦᑎᓐᓂᓗ ᖁᕕᐊᓇᖅᑐᒻᒪᕆᐅᓪᓗᓂ!
ᐃᒡᓗᓕᒑᕐᔪᒃ: ᐄᐳᕆ18-20, 2023
04/20/2023
ᒪᕆᐊᒪ ᐊᒻᒪ ᐅᓕᕕᐊ ᐳᓛᕆᐊᕈᓐᓇᑦᑎᐊᓚᐅᖅᐳᑦ ᐃᒡᓗᓕᒑᕐᔪᖕᒧᑦ ᑲᑎᒪᖃᑎᖃᖅᖢᑎᒃ ᓄᓇᓕᖕᓂᙶᖅᑐᓂᒃ, ᐱᔨᑦᑎᕋᖅᑎᓂᒃ, ᓄᑕᖅᑲᓂᒃ ᒪᒃᑯᒃᑐᓂᒡᓗ. ᐃᒡᓗᓕᒑᕐᔪᖕᒧᑦ ᓂᐅᕐᕈᔭᕆᐅᓚᐅᖅᐳᑦ ᐊᒻᒪ ᑕᕝᕙᐅᕗᑏᕈᓐᓇᑦᑎᐊᙱᖦᖢᑎᒃ! ᐃᓚᖓ ᐅᔾᔨᕐᓇᓛᖑᓚᐅᖅᑐᖅ ᑲᑎᒪᖃᑎᒋᔭᐅᓪᓗᑎᒃ ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑏᓪᓗ ᐊᒻᒪᓗ ᑎᓴᒪᐃᖅᖢᑎᒃ ᐃᒻᒥᒥᒃ ᑭᒡᒐᖅᑐᕐᓂᕐᒧᑦ ᐃᓕᓐᓂᐊᖅᑎᑦᑎᓪᓗᑎᒃ. ᐃᓕᓐᓂᐊᖅᑏᑦ ᐃᓚᐅᓚᐅᖅᐳᑦ ᖃᐅᔨᔪᒪᓪᓗᑎᒡᓗ ᐱᓕᕆᔪᖃᖅᑎᓪᓗᒍ, ᕿᒪᐃᓪᓗᑎᒡᓗ ᑐᓴᖅᑕᐅᔪᒃᓴᓂᒃ ᑎᑎᕋᕐᕕᑦᑕ ᒥᒃᓵᓄᑦ ᐃᓚᖏᓪᓗ ᑎᑎᕋᕐᕕᒃᐳᑦ ᑭᐳᒃᑎᖦᖢᑎᒃ. ᖁᔭᓕᕙᕗᑦ ᓄᓇᓕᖕᒥᐅᑦ ᑐᙵᓇᑦᑎᐊᕐᓂᖏᓐᓄᑦ ᓂᕆᐅᒃᐳᒍᓪᓗ ᐅᑎᓛᕆᐊᒃᓴᖅ ᖃᖓᑐᐃᓐᓇᖅ!
ᖃᐅᓱᐃᑦᑐᖅ: ᒫᑦᓯ 21 - 27, 2023
04/03/2023
ᒪᕐᕉᒃ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓᑕ ᐃᖅᑲᓇᐃᔭᖅᑎᖏᑦ ᐊᐅᓪᓚᓵᓚᐅᖅᑐᑦ ᖃᐅᓱᐃᑦᑐᒧᑦ. ᖁᔭᓐᓇᒦᖅᐸᕗᑦ ᓄᑕᖅᑲᓕᒫᑦ, ᒪᒃᑯᒃᑐᑦ, ᓄᓇᓕᖕᒥᐅᓪᓗ ᑐᙵᓱᒃᑎᑦᑎᓚᐅᖅᑐᑦ. ᐊᓕᐊᓇᐃᒍᓱᑦᑎᐊᓚᐅᖅᑐᑦ ᖃᐅᔨᒪᓕᕆᐊᒃᓴᖅ ᑭᒃᑯᓕᒫᓂᑦ ᐊᓕᐊᓇᐃᒍᓱᑦᑎᐊᓚᐅᖅᖢᑎᒡᓗ ᓯᐊᕐᕆᔮᖕᓂᓕᕆᔪᓂᑦ ᓯᐊᕐᕆᔮᕐᕕᖕᒥᑦ!
ᒥᑦᑎᒪᑕᓕᒃ: ᐅᑐᐱᕆ17-21, 2022
11/18/2022

ᐅᓕᕕᐊ ᐊᒻᒪ ᓄᕕᔭ ᑲᑎᖃᑎᖃᓚᐅᖅᑐᑦ ᓄᑕᖃᓂ ᐊᒻᒪ ᒪᒃᑯᒃᑐᓂ, ᓄᓇᓕᖕᓂᖔᖅᑐᓂ, ᐊᒻᒪᓗ ᐱᔨᑦᑎᕋᖅᑎᑦ ᑲᔾᔮᓐᓇᖅᑐᒦᓚᐅᖅᑎᓪᓗᒋᑦ ᒥᑦᑎᒪᑕᓕᖕᒥᑦ. ᓄᓇᓕᐊ ᑐᙵᓇᓪᓚᕆᓚᐅᖅᑐᖅ ᐊᒻᒪᓗ ᑭᒡᒐᖅᑐᐃᔨ ᓄᑕᖃᓄᑦ ᒪᒃᑯᒃᑐᓄᓪᓗ ᖁᔭᓕᓐᓇᓚᐅᖅᐳᖅ ᑐᙵᓱᒃᑎᑕᐅᑎᓪᓗᒋᑦ ᑕᐅᕙᓃᑎᓪᓗᒋᑦ. ᐃᓚᖏᑦ ᓇᓗᓇᐃᖅᑕᐅᓂᖏᑦ ᐳᓚᕋᓚᐅᖅᑐᑦ ᐃᓅᓯᑦᑎᐊᕆᒃᑐᓕᕆᕝᕕᐊ ᐊᒻᒪ ᐊᕐᓇᓄᑦ ᐊᖏᕐᕋᖃᖏᑦᑐᒃᑯᕕᒃ, ᑲᑎᒪᖃᑎᒋᓪᓗᒋᑦ ᐱᓕᕆᖃᑎᖃᕈᒪᑦᑎᐊᖅᑐᓂ ᐊᒻᒪᓗ ᑲᒪᑦᑎᐊᖅᑐᓂ ᓄᓇᓕᖕᓂᑦ ᐱᔨᑦᑎᕋᖅᑎᒃᑯᓐᓂᑦ, ᐊᒻᒪᓗ ᐅᖃᓪᓚᒋᐊᖅᑐᖢᑕ ᕼᐋᒻᒪᓚᒃᑯᓐᓄᑦ.  ᓇᓗᓇᐃᖅᑕᐅᓯᒪᖃᑕᐅᔪᖅ ᐳᓚᕋᖅᑎᓪᓗᑕ ᐃᓕᓐᓂᐊᕐᕕᐊᓗᖕᒥᑦ ᐃᓕᓐᓂᐊᖅᑏᑦ ᐃᓕᓴᐃᔩᓪᓗ ᑲᑎᖃᑎᒋᓚᐅᕋᑦᑎᒍᑦ ᐅᖃᓪᓚᒋᐊᖅᑐᖅᑎᓪᓗᑕ Raise Your Voice−ᒥᑦ: ᓇᖕᒥᓂᖅ ᑭᒡᒐᖅᑐᐃᔪᓐᓇᕐᓂᕐᒥᒃ ᐃᓕᓐᓂᐊᖅᓯᓐᓈᑦ ᑲᑎᒪᓂᖅ.  ᖁᔭᓐᓇᒦ ᑭᐅᔪᓐᓇᑦᑎᐊᓚᐅᕋᕕᑦ ᐊᒻᒪᓗ ᐃᓚᐅᖃᑕᐅᑦᑎᐊᓚᐅᕋᕕᑦ ᐃᓕᓐᓂᐊᓯᓐᓈ ᑲᑎᒪᑎᓪᓗᑕ.

ᐃᖃᓗᒃᑑᑦᑎᐊᖅ: ᓯᑎᐱᕆ 23-29, 2022
10/14/2022
ᒪᕆᐊᒪ ᐊᒻᒪ ᑲᐃᑎ ᐱᓕᕆᑦᑎᐊᖅᑐᒻᒪᕆᐅᓚᐅᖅᐳᑦ, ᐊᒻᒪ ᐱᓕᕆᔪᒻᒪᕆᐅᓪᓗᑎᒃ, ᐃᖃᓗᑦᑑᑦᑎᐊᕐᒧᑦ ᐳᓛᕆᐊᖅᑐᑎᒃ. ᐃᓚᖏᑦ ᐅᔾᔨᕐᓇᓛᖑᓚᐅᖅᑐᑦ ᐱᙳᐊᖃᑕᐅᓪᓗᑎᒃ ᐲᑦᓴᖃᖅᖢᑎᒡᓗ ᐊᕐᓇᐃᑦ ᑲᑎᙵᓪᓗᑎᒃ ᐃᓐᓇᐃᑦ ᐃᒡᓗᖁᑎᖓᓂ ᑕᑯᓪᓗᑎᒡᓗ ᑐᙵᓇᖅᑐᓂᒃ ᑮᓇᖏᓐᓂᒃ ᐊᑐᖅᑐᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᑉ ᐊᓪᓚᕝᕕᐊᑕ ᓇᓴᖏᓐᓂᒃ ᓄᓇᓕᖕᓂ. ᖁᔭᓐᓇᒦᒃ ᐃᖃᓗᒃᑑᑦᑎᐊᕐᒥᐅᑦ ᑐᙵᓱᒃᑎᑕᐅᑦᑎᐊᕋᑦᑕ!
ᑲᖏᖅᑐᒑᐱᒃ: ᓯᑎᐱᕆ 27 – ᐅᑐᐱᕆ 1, 2021
11/03/2021

ᑲᖏᖅᑑᒑᐱᒻᒦᑎᓪᓗᒋᒃ, ᓄᕝᕕᔭᓗ ᓈᓐᓯᓗ ᐊᒥᓱᒻᒪᕆᓐᓂᑦ ᓄᑕᖅᑲᓂᓪᓗ ᒪᒃᑯᑦᑐᓂᓪᓗ ᑲᑎᓯᒍᓐᓇᓚᐅᖅᑑᒃ! ᐊᒥᓱᓂᒃ ᐅᖃᐅᓯᖃᕈᓐᓇᖅᑑᒃ ᖃᓄᐃᓕᐅᕈᑕᐅᓚᐅᖅᑐᓂᒃ ᑭᓯᐊᓂ ᐅᖃᐅᓯᕆᔪᒪᔭᕗᑦ ᖁᔭᓕᕕᒋᓗᒋᑦ ᑖᒃᑯᐊ ᐃᖅᑲᓇᐃᔭᖅᑎᖏᓐᓂᑦ ᐊᒻᒪᓗ ᒪᒃᑯᒃᑐᓂᑦ ᐃᓕᓴᖅᓯᕕᒻᒥᑦ ᐃᓚᒋᔭᐅᖃᑦᑕᖅᑐᑦ ᐊᒻᒪᓗ ᐃᓕᓴᐃᔩᑦ ᐊᖓᔪᖅᑳᖓᑕ ᑐᖏᓕᖓ, ᐃᓕᓴᐃᔩᑦ ᐊᒻᒪᓗ ᐃᓕᓐᓂᐊᖅᑏᑦ ᖁᓗᐊᖅ ᐃᓕᓐᓂᐊᕐᕕᖓᓐᓂᒃ ᑐᙵᓇᑦᑎᐊᓚᐅᕐᓂᖏᓐᓄᑦ. ᑕᑯᔪᒥᓇᑦᑎᐊᓚᐅᖅᑐᖅ ᕿᒥᕐᕈᑎᑕᐅᑎᓪᓗᑕ ᐱᖅᑯᓯᓕᕆᕝᕕᒃ ᐃᓄᐃᑦ ᐃᓕᖅᑯᓯᖓᓐᓂᒃ ᐃᓕᓐᓂᐊᕐᕕᒃ ᐊᒻᒪᓗ ᓂᕆᑎᑕᐅᓪᓗᑕ ᓂᕿᓪᓚᑦᑖᓂᑦ ᒪᒪᖅᑐᒻᒪᕆᐊᓗᓐᓂᑦ. ᐱᖃᑕᐅᔪᓐᓇᓚᐅᖅᑐᒍᑦ ᑲᓇᑕᓕᒫᒥᑦ ᐅᓪᓗᖓᓂ ᑲᓇᑕᓕᒫᒥᑦ ᐅᓪᓗᕆᔭᐅᕗᖅ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓗ ᓄᓇᓕᓐᓂᑦ ᓂᕆᑎᑦᑎᓂᖃᖅᑎᓪᓗᒋᑦ ᐊᒻᒪᓗ ᐊᒥᓱᓂᑦ ᑕᑯᔪᓐᓇᓚᐅᖅᑐᒍᑦ ᒪᒃᑯᒃᑐᓂᑦ ᐊᑐᖅᑎᓪᓗᒋᑦ ᑕᓕᐊᕐᓂᑦ, ᓇᓴᕐᓂᑦ, ᐊᒻᒪᓗ ᑐᓐᓂᙳᐊᓂᑦ ᐱᓇᓱᐊᕈᓯᕆᓚᐅᖅᑕᖓᓐᓂᒃ.

 

ᓴᓪᓖᑦ: ᕕᕝᕗᐊᕆ 10 – 13, 2020
02/28/2020

ᑎᐋᓇ ᓴᓪᓕᕐᒨᖏᖓᑦ ᐊᔾᔨᒌᓐᖏᑦᑐᓂᑦ ᐱᔨᑦᑎᕋᖅᑎᓄᑦ ᐳᓚᕋᖅᑐᓂ ᐊᒻᒪᓗ ᓴᒃᑯ ᐃᓕᓐᓂᐊᕐᕕᖓᓐᓄᑦ. ᐃᓕᓐᓂᐊᖅᑏᑦ ᖁᕕᖓᓱᓚᐅᖅᑐᑦ ᐅᓂᒃᑳᕆᐊᖅᑐᖅᑐᓂ ᓂᓕᖃᓚᐅᕆᑦ: ᓇᒻᒥᓂᖅ ᓂᓪᓕᐊᓂᕐᒧᑦ ᑲᑎᒪᓂᐅᔪᖅ ᐊᒻᒪᓗ ᓯᓚ ᓂᓪᓚᓱᑦᑐᖅ ᐅᓂᒃᑳᕆᓪᓗᓂᐅᒃ. ᖁᔭᓐᓇᒦᒃ ᑐᓐᖓᓱᑦᑎᑕᐅᑦᑎᐊᓚᐅᕐᓂᖓᓐᓄᑦ!

ᖃᒪᓂᑦᑐᐊᖅ: ᕕᕝᕗᐊᕆ 3 - 7, 2020
02/28/2020

ᖁᕕᐊᓇᓚᐅᖅᑐᖅ ᑲᒪᓂᑦᑎᐊᕐᒥ ᑕᐃᔭᒧᑦ. ᖃᒪᓂᖅᑐᐊᒦᓐᓂᖓᓐᓂ ᐅᓂᒃᑳᕆᐊᖅᑐᖅᑐᓂ ᓂᓕᖃᓚᐅᕆᑦ: ᓇᒻᒥᓂᖅ ᓂᓪᓕᐊᓂᕐᒧᑦ ᑲᑎᒪᓂᐅᔪᖅ ᐅᓂᒃᑳᕈᓇᓚᐅᖅᑐᖅ ᐊᒻᒪᓗ ᓯᓚ ᓂᓪᓚᓱᑦᑐᖅ ᐅᓂᒃᑲᕆᓪᓗᓂᐅᒃ. ᖁᔭᓐᓇᒦᒃ ᐃᓕᓐᓂᐊᕐᑦ ᓄᓇᓖᓪᓗ ᑐᓐᖓᓱᑦᑎᑦᑎᓚᐅᕐᓂᖏᓐᓄᑦ. ᑎᐋᓇ ᖁᕕᐊᒋᓂᖅᐹᕆᓚᐅᖅᑕᖓ ᐅᑭᐅᖅᑕᖅᑐᒥᐅᑕᕐᓂᑦ ᑲᑎᓯᒍᓐᓇᓚᐅᕐᖓᑦ.

Pages