ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᑦ ᓂᐅᕐᕈᓚᐅᖅᑐᑦ ᐊᕐᕕᐊᓄᑦ


ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᑦ ᓂᐅᕐᕈᓚᐅᖅᑐᑦ ᐊᕐᕕᐊᓄᑦ

ᐱᓇᓱᐊᕈᓯᖓᓂ ᔮᓐᓄᐊᕆ 15ᒥᑦ 19ᒧᑦ, 2017, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐃᖅᑲᓇᐃᔭᖅᑎᖁᑎᖏᑦ ᓕᓐ ᒫᑦ, ᑕᐃᕕᑎ ᖁᐊᕋᖅ ᐊᒻᒪ ᑲᐃᑎ ᑎᑦᕼᐋᒻ ᐊᕐᕕᐊᓂ ᑐᙳᓱᒃᑎᑕᐅᓚᐅᖅᑐᑦ. ᓕᓐ, ᑕᐃᕕᑦ ᐊᒻᒪ ᑲᐃᑎ ᓄᓇᓕᒻᒥ ᐱᔨᑦᓯᕋᖅᑎᓂᒃ ᑲᑎᖃᑎᖃᓚᐅᖅᑐᑦ, ᐃᓚᒋᓪᓗᓂᒋᑦ ᐋᓐᓂᐊᖅᑐᓕᕆᔨᐅᔪᑦ, ᐃᓕᓴᐃᔩᑦ, ᕼᐋᒻᒪᓚᒃᑯᑦ ᐃᖅᑲᓇᐃᔭᖅᑎᖏᑦ ᐊᒻᒪᓗ ᐸᓖᓯᒃᑯᑦ.

ᐱᐅᓂᖅᐹᕆᔭᐅᓚᐅᖅᑐᖅ ᐊᕐᕕᐊᓂ ᐅᖃᓪᓚᒃᑎᓪᓗᒋᑦ ᑲᑎᖃᑎᖃᖅᑎᓪᓗᒋᓗ ᐃᓕᓐᓂᐊᖅᑎᐅᔪᓂᑦ ᐱᖓᓱᓂᑦ ᐃᓕᓐᓂᐊᕐᕕᓐᓂ; ᓕᕙᐃ ᐊᖕᒪᒃ ᓄᑲᖅᑎᐅᔪᓄᑦ ᐃᓕᓐᓂᐊᕐᕕᐅᔪᖅ, ᕿᑎᖅᖠᖅ ᐊᑯᓐᓂᖅᓱᖅᑐᓄᑦ ᐃᓕᓐᓂᐊᕐᕕᐅᔪᖅ ᐊᒻᒪᓗ ᔮᓐ ᐊᕐᓈᓗᕐᔪᐊᖅ ᐃᓕᓐᓂᐊᕐᕕᐊᓗᖕᒥ. ᐃᓕᓐᓂᐊᖅᑏᑦ ᐊᓕᐊᓇᐃᒍᓱᓚᐅᖅᑐᑦ ᐱᓕᕆᑦᑎᐊᖅᑐᑎᓗ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᑎᑎᕋᕐᕕᖓᑕ ᐱᓕᕆᐊᒃᓴᕆᕙᒃᑕᖏᓐᓂᒃ, ᐊᐱᖅᓱᕈᓘᔭᖅᑐᑎ ᐅᖃᐅᓯᖃᖅᑐᑎᓗ ᖃᐅᔨᒪᓂᕆᔭᖏᓐᓂᒃ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ.

ᐱᐅᔪᒻᒪᕆᐅᓚᐅᕐᒥᔪᖅ ᐊᕐᕕᐊᓃᑎᓪᓗᒋᑦ ᒪᒃᑯᒃᑐᒃᑯᕕᖕᒦᓚᐅᖅᑐᑦ ᐅᓐᓄᒃᑯᑦ ᐊᒻᒪ ᐅᓐᓄᓴᒃᑯᑦ ᑯᐊᐸᖓᓃᓚᐅᖅᑐᑦ, ᖃᐅᔨᕚᓪᓕᖅᑐᑎ ᓄᓇᓕᖕᒥᐅᑕᐅᔪᓂᒃ ᐊᒻᒪ ᑐᓴᖅᑎᑕᐅᕙᓪᓕᐊᓪᓗᑎᒃ ᒪᒃᑯᒃᑐᓂ ᓄᑕᖅᑲᓂᓪᓗ ᐊᕐᕕᐊᓂ. ᓕᓐ, ᑕᐃᕕᑦ ᐊᒻᒪ ᑲᐃᑎ ᐊᒃᓱᐊᓗᒃ ᐊᓕᐊᓇᐃᒍᓱᓚᐅᖅᑐᑦ ᐊᕐᕕᐊᓂ ᐊᓕᐊᓇᐃᒍᓱᑦᑎᐊᖅᑐᑎᓗ ᑭᖑᓪᓕᕐᒥ ᓂᐅᕐᕈᓐᓂᕆᓛᖅᑕᖏᓐᓂᒃ!