ᓄᑖᖅ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᒃᑯᐊᖅᑕᖅ


ᐱᕙᓪᓕᐊᔪᑦ ᓴᖅᑭᑕᑦ
ᓴᖅᑭᑕᐅᑲᐅᑎᒋᔭᕆᐊᓕᒃ
 
ᐅᑐᐱᕆ 10, 2019
 
ᓄᑖᖅ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᒃᑯᐊᖅᑕᖅ
 
ᐃᖃᓗᐃᑦ, ᓄᓇᕗᑦ − ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᑐᙵᓱᖁᔨᕗᑦ ᔭᐃᓐ ᐲᑦᔅᒥᒃ ᓄᑖᕐᒥ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ (ᑭᒡᒐᖅᑐᐃᓂᖅ). ᐲᑦᔅ ᑎᒃᑯᐊᖅᑕᐅᓚᐅᖅᑐᖅ ᑭᒡᒐᖅᑐᖅᑎᐅᓂᕐᒧᑦ ᑕᒪᑐᒪᓂ ᐊᐅᔭᕐᒥ ᓄᓇᕗᑦ ᑭᒡᒐᖅᑐᒃᑎᖓᓄᑦ ᐊᑐᓕᖁᔭᐅᓯᒪᔪᒧᑦ ᑖᒃᑯᓇᖓᑦ ᒪᓕᒐᓕᐅᕐᕕᖕᒥ ᓄᓇᕗᒻᒥ, ᐊᕐᕌᒍᓄᑦ ᑕᓪᓕᒪᓄᑦ ᐃᓱᓕᕝᕕᖃᖅᑐᒥ ᐃᖅᑲᓇᐃᔭᓚᐅᑲᖕᓂᐊᕐᓂᖓᓄᑦ.
 
"ᐃᓕᓴᕆᐅᒪᔭᒃᑲ ᐱᓕᕆᐊᒃᓴᑦ ᐱᒻᒪᕆᐅᓂᖏᑦ ᑭᒡᒐᖅᑐᖅᑎᐅᓪᓗᓂ," ᐅᖃᖅᑐᖅ ᐲᑦᔅ. "ᐊᓕᐊᓇᐃᒍᓱᒃᑐᖓ ᑐᓴᖅᑕᐅᔭᕆᐊᖃᖅᑐᓂ ᑐᓴᖅᑎᑦᑎᖃᑦᑕᕆᐊᒃᓴᖅ ᒪᒃᑯᒃᑐᓄᑦ ᓄᓇᕗᒻᒥ ᐱᓕᕆᔪᒪᓂᕆᔭᖏᑦ ᓯᕗᓪᓕᖅᐸᐅᔾᔭᐅᒐᓗᐊᕐᒪᖔᑦ, ᐃᒻᒥᑰᕐᓗᑎᒃ ᐊᒻᒪ ᑭᒃᑯᑐᐃᓐᓇᒨᖓᓗᑎᒃ."
 
ᐸᐃᑦᔅ ᐃᓚᐅᓕᖅᑐᖅ ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᖅᑎᐅᓂᕐᒥᒃ ᐃᑲᔪᖅᓱᐃᖃᑦᑕᖅᓯᒪᓂᑰᓪᓗᓂ ᐱᓕᕆᔪᒪᓂᕆᔭᖏᓐᓂᒃ ᒪᒃᑯᒃᑐᑦ ᖃᑕᙳᑎᖏᓪᓗ. ᐱᓯᒫᓂᒃᖢᓂ ᖁᕝᕙᓯᖕᓂᖅᓴᒥ ᐃᓕᓐᓂᐊᕐᓂᕐᒧᑦ ᐃᓄᓕᕆᔨᐅᓂᕐᒧᑦ Ryerson ᓯᓚᑦᑐᖅᓴᕐᕕᒡᔪᐊᕐᒥ, ᐃᖅᑲᓇᐃᔮᖅᑖᓕᓚᐅᖅᑐᖅ ᐃᓄᓕᕆᔨᒃᑯᓐᓄᑦ ᐃᓄᓕᕆᔨᐅᓂᕐᒥᒃ ᓄᑕᖅᑲᓂᒃ ᑲᒪᔨᐅᓂᕐᒧᑦ. ᐲᑦᔅ ᓅᓕᓚᐅᖅᑐᖅ ᔫᑳᓐᒧᑦ, ᖁᑦᑎᖕᓂᖅᓴᓂ ᐃᖅᑲᓇᐃᔮᖃᖃᑦᑕᓚᐅᖅᑐᖅ ᒪᒃᑯᒃᑐᓂ ᖃᑕᙳᑎᖏᓐᓂᒡᓗ ᐃᑲᔪᖅᑐᐃᓂᕐᒥᒃ, ᐅᑎᓚᐅᙱᑎᓪᓗᒍ ᐋᓐᑎᐅᕆᐅᒧᑦ. ᐲᑦᔅ ᐱᓕᒻᒪᒃᓴᕐᓂᖃᑦᑎᐊᖅᓯᒪᔪᖅ ᐱᓕᕆᖃᑦᑕᖅᓯᒪᓂᑰᑦᑎᐊᖅᖢᓂᓗ ᓄᑕᖅᑲᓂᒃ ᒥᐊᓂᕆᔭᖃᕐᓂᕐᒥᒃ, ᐃᓄᓕᕆᔨᒃᑯᓐᓂᑦ, ᒪᒃᑯᒃᑐᑦ ᒪᓕᒐᓕᕆᓂᕐᒥᒃ, ᐊᒃᓱᕈᓐᓇᖅᑐᓂ ᐅᖃᐅᔾᔨᒋᐊᕐᓂᕐᒥᒃ, ᓄᓇᓕᖕᓂ ᑲᑎᒪᑎᑦᑎᒃᑲᓐᓂᖃᑦᑕᓕᕐᓂᕐᒥᒃ, ᐊᒻᒪ ᖃᓄᐃᓂᕆᔭᐅᕐᔪᐊᖅᓯᒪᔪᓂ ᖃᐅᔨᓴᕐᓂᕐᒥᒃ.
 
ᐃᓚᐅᕝᕕᒋᑎᒍᑦ: ᑐᓴᒐᒃᓴᓕᕆᔩᑦ ᑐᙵᓱᒃᑎᑕᐅᔪᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓂᒃ ᑲᑎᖃᑎᒋᔪᒪᓪᓗᓂᒋᑦ ᐅᖃᖃᑎᖃᕐᓗᑎᒡᓗ ᐲᑦᔅᒥᒃ ᐊᓯᖏᓐᓂᒡᓗ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓂᒃ ᐱᖓᔪᐊᑦ, ᐅᑐᐱᕆ 10, 2019−ᒥ 1-ᒥᑦ 1:45-ᒧᑦ ᐅᓐᓄᒃᓴᒃᑯᑦ. ᒪᑐᐃᖅᐸᓪᓕᐊᑎᓪᓗᒍ ᐅᖃᐅᓯᒃᓴᑦ ᐅᖃᐅᓯᐅᓂᐊᖅᑐᖅ ᐲᑦᔅᒧᑦ 1-ᒧᐊᖅᐸᑦ ᐅᓐᓄᒃᓴᒃᑯᑦ ᐊᐱᖅᑯᑎᒃᓴᓄᑦ ᑭᐅᔾᔪᑎᓄᓪᓗ ᐱᓕᕆᐊᖃᕐᓂᐊᕆᓪᓗᓂ.
 
ᑐᑭᓯᒋᐊᒃᑲᓂᕈᒪᒍᕕᑦ:
ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᔪᓕᕆᓂᖕᓄᑦ ᑭᒃᑯᓕᒫᓄᓪᓗ ᐅᔾᔨᖅᓱᐃᑎᑦᑎᓂᖕᒧᑦ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ
867-975-5091 I kfoster@rcynu.ca

 
-30-