ᑲᑎᒪᖃᑕᐅᔪᑦ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓᓐᓂ ᑲᑎᒪᓕᓚᐅᙱᓐᓂᖏᓐᓂᒃ ᑲᑎᒪᔨᕋᓛᖏᑦ ᖃᐅᔨᓴᖃᑦᑕᖅᑐᑦ ᒐᕙᒪᒃᑯᑦ ᐊᐅᓚᓂᕆᔭᖏᓐᓂᒃ ᑮᓇᐅᔭᓕᕆᔾᔪᑎᖏᓐᓂᒡᓗ


ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐱᒋᐊᕈᑎᑦ ᐅᖃᐅᓯᒃᓴᖏᑦ
ᔫᓂ 21-22, 2021  

ᖁᔭᓐᓇᒦᒃ, ᑲᑎᒪᑎᑦᑎᔩ ᐅᓪᓗᒃᑯᓪᓗ. ᐅᓪᓗᒥ ᑕᕝᕙᓃᖃᑎᒋᔭᒃᑲ ᓕᓐ ᒫᑦ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒃᑯᑦ ᑐᑭᒧᐊᒃᑎᑦᑎᔨᖓ, ᐊᒻᒪ ᑕᐃᕕᑦ ᖁᐊᕋᖅ, ᐊᑕᐅᑦᑎᒧᑦ ᑭᒡᒐᖅᑐᐃᓂᕐᒧᑦ ᐱᔨᑦᑎᕋᖅᑏᑦ ᐊᐅᓚᑦᑎᔨᖓ.  ᓇᓗᓇᐃᖅᓯᔪᒪᒋᕗᖓᑦᑕᐅᖅ ᐱᓕᕆᔨᓪᓚᕆᖕᓂᒃ ᑎᓴᒪᓂᑦ ᐱᓪᓗᐊᑕᕐᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᔨᑦᑎᕋᕐᕕᖕᓄᑦ ᐱᓕᕆᕝᕕᒋᔭᐅᔪᓄᑦ ᑎᑎᕋᕐᕕᑦᑕ ᐱᓕᕆᕝᕕᒋᒐᔪᒃᐸᒃᑕᖏᑦ ᖃᖓᙳᕌᖓᑦ: ᐃᓕᓐᓂᐊᕐᓂᓕᕆᔨᒃᑯᑦ, ᐃᓄᓕᕆᔨᒃᑯᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐊᒻᒪ ᒪᓕᒐᓕᕆᔨᒃᑯᑦ. ᐅᐱᒍᓱᒃᐳᖓ ᑲᑎᒪᔨᕋᓛᑦ ᐃᓕᖕᓂᒃ ᐅᐸᒍᑎᓯᒪᖁᔨᓚᐅᕐᒪᑕ ᐅᓪᓗᒥᓗ ᑲᑎᒪᖃᑕᐅᖁᔨᓚᐅᕐᒪᑦ. ᑐᙵᓱᒋᑦ.

ᖃᐅᔨᒪᔭᐃᓐᓇᕆᔭᓯ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᑦ ᑎᑎᕋᕐᕕᖓᑦ ᐃᓛᒃᑰᖅᖢᓂ ᑎᑎᕋᕐᕕᒋᔭᐅᕗᖅ ᒪᓕᒐᓕᐅᕐᕕᖕᒥ ᓄᓇᕗᒻᒥ.  ᑕᐃᒪᐃᓐᓂᖓᓄᑦ, ᑎᑎᕋᕐᕕᑦᑎᓐᓂ ᑲᒪᒋᔭᒃᓴᖃᖅᐳᒍᑦ ᖃᐅᔨᒪᓇᓱᒋᐊᖃᖅᖢᑎᒍᑦ ᐱᔨᑦᑎᕋᐅᑎᑦ ᐊᒻᒪ ᐃᑲᔪᖅᓱᐃᔾᔪᑎᑦ ᒪᓂᒻᒪᒃᑕᐅᔪᑦ ᓄᓇᕗᑦ ᒐᕙᒪᒃᑯᓐᓄᑦ ᐋᖅᑭᐅᒪᑦᑎᐊᕐᓗᑎᒃ, ᓈᒻᒪᒡᓗᑎᒃ, ᐊᓯᔾᔨᖅᑕᙱᖦᖢᑎᒃ ᒪᒃᑯᒃᑐᓕᒫᑦᑎᐊᓄᓪᓗ ᓄᓇᕗᒥᐅᓄᑦ, ᐃᓚᖏᓪᓗ.

ᐅᖃᓪᓚᓗᐊᓚᐅᙱᓐᓂᓐᓂ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒃᑯᑦ ᑎᑎᕋᕐᕕᖓᑦ ᐅᕙᖓᓗ ᖁᔭᓕᔪᒪᑦᑎᐊᕋᑦᑕ ᐊᒥᓱᒻᒪᕆᐊᓗᖕᓂᒃ ᐃᓄᖕᓂᒃ ᕿᓄᐃᓵᖅᖢᑎᒃ ᐱᓕᕆᓲᓄᑦ ᐱᔨᑦᑎᕋᕈᒪᓪᓗᑎᒃ ᑕᑎᒋᔭᑦᑎᓐᓂ ᐱᔨᑦᑎᕋᑦᑎᐊᓲᖑᓪᓗᑎᒡᓗ ᓄᓇᕗᒥᐅᑦ ᐱᓕᕆᐊᒃᑯᒥᒋᔭᖏᑦ ᐃᓱᒪᒥᐅᑕᕆᓪᓗᒋᑦ.  ᑕᑯᕙᑦᑎᒋᑦ. ᐊᒻᒪ ᖁᔭᒋᕙᑦᑎᒋᑦ.

ᑭᓯᐊᓂ, ᐱᓕᕆᐊᒃᓴᕆᔭᐅᓪᓗᓂ ᐃᓛᒃᑰᖅᑐᒧᑦ ᐱᓕᕆᔨᒧᑦ, ᓴᖅᑭᑕᐅᕙᓪᓕᐊᕙᒃᑐᑦ ᐅᕙᑦᑎᓐᓄᑦ ᐅᓐᓂᕐᓗᒍᑕᐅᔪᑦ, ᐊᑲᐅᙱᓕᐅᕈᑏᑦ, ᐱᑕᖃᙱᓐᓂᐅᔪᓪᓗ. ᑖᒃᑯᐊ ᐃᓱᒫᓗᑕᐅᔪᑦ ᐃᓕᔅᓯᓐᓄᐊᖃᑦᑕᖅᐸᕗᑦ ᐱᓕᕆᖃᑎᒌᒍᓐᓇᕐᓂᑦᑎᓐᓂᑦ ᐱᐅᓯᕚᓪᓕᖁᓪᓗᒋᑦ ᐱᔨᑦᑎᕋᐅᑏᑦ ᒪᒃᑯᒃᑐᓄᑦ ᓄᓇᕗᒻᒥᐅᓄᑦ ᐅᐸᒍᑎᓯᒪᔪᐃᓐᓇᐅᓪᓗᑕᓗ ᐅᖃᐅᓯᕆᔪᒪᓪᓗᑎᒍ ᐅᓪᓗᒥ.

2019-2020-ᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᒥ ᐱᓕᕆᐊᒃᓴᖃᑦᑎᐊᓚᐅᖅᑐᑦ.

  • ᑎᑎᕋᕐᕕᑦᑎᓐᓂ ᑐᓴᖅᑎᑕᐅᓚᐅᖅᐳᒍᑦ ᐅᓄᓛᑦᑎᐊᓂᒃ ᐅᖃᐱᓘᑕᐅᓚᐅᖅᑐᑦ ᒫᓐᓇᒧᑦ ᑎᑭᖦᖢᒍ ᑲᒪᒋᔭᖃᓚᐅᖅᐳᒍᓪᓗ 98−ᓂᒃ ᓄᑖᓂᒃ ᐃᓛᒃᑰᖅᑐᓂ ᑭᒡᒐᖅᑐᕆᐊᖃᖅᑕᑦᑎᓐᓂᒃ.
  • ᓴᖅᑭᑦᑎᓚᐅᖅᐳᒍᑦ ᓯᕗᓪᓕᖅᐹᒥ ᐅᓂᒃᑳᓕᐊᑦᑎᓐᓂᒃ ᑕᐃᒎᓯᓕᖕᒥᒃ, ᐃᓱᒪᕗᑦ ᐊᓐᓂᕐᓇᖅᑐᑦ: ᒪᒃᑯᒃᑐᓄᑦ ᑐᓴᒐᒃᓴᖅ ᕿᒥᕐᕈᔭᐅᓯᒪᔪᑦ ᐃᓱᒪᒧᑦ ᖃᓄᐃᙱᑦᑎᐊᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᕗᒻᒥᐅᓄᑦ. 
  • ᐊᓯᔾᔨᖅᓯᓚᐅᖅᑐᒍᑦ ᑲᒪᒋᓲᑦᑎᓐᓂᒃ ᐊᒻᒪ ᐅᓂᒃᑲᐅᓯᑦᑎᓐᓂᒃ ᐊᑕᖐᔪᓂᒃ ᐱᔾᔪᑎᓂᒃ ᐋᖅᑭᒃᓯᓚᐅᖅᖢᑕᓗ ᑲᑎᖦᖢᒋᑦ 33−ᓂᒃ ᐱᖁᔨᕗᖔᓕᐊᕆᔭᐅᔪᓂᒃ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ.
  • ᒪᓕᒃᖢᑕ ᑭᐅᔾᔪᑕᐅᔪᓂ ᐱᖃᖅᑎᐅᖃᑕᐅᔪᓂ, ᐋᖅᑭᒋᐊᖅᓯᓚᐅᖅᑐᒍᑦ ᖃᓄᖅ ᓇᓗᓇᐃᔭᐃᕙᖕᒪᖔᑦ ᐱᓕᕆᓂᕆᕙᒃᑕᑦᑎᓐᓂᒃ.
  • ᐱᓕᕆᖃᑎᖃᓚᐅᖅᐳᒍᑦ ᐃᓐᓇᕐᓂᒃ ᐅᖃᐅᔾᔨᒋᐊᖅᑎᓂᒃ ᖃᐅᔨᒪᔭᐅᖁᓪᓗᒍ ᑐᑭᓕᐅᖅᑕᕗᑦ ᖃᓄᖅ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ ᓄᑕᖅᑲᑦ ᐱᔪᓐᓇᐅᑎᖏᑦ, ᓇᓗᓇᐃᖅᑕᐅᓯᒪᔪᑦ ᓄᓇᕐᔪᐊᕐᒥᑦ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ, ᐱᓕᕆᖃᑎᒌᓕᖅᖢᑎᒃ. 
  • ᐊᒻᒪ ᓄᓇᕘᓕᒫᒥ, ᐊᑦᑕᑕᖅᑎᑦᑎᓚᐅᖅᐳᒍᑦ 1,100 ᐅᖓᑖᓂ ᒪᒃᑯᒃᑐᓂ, ᐱᓕᕆᖁᓪᓗᒋᑦ ᓂᐱᖅᑯᖅᑐᓯᒋᐊᕐᓗᑎᑦ: ᓇᖕᒥᓂᖅ ᑭᒡᒐᖅᑐᖅᑎᐅᓂᕐᒧᑦ ᐃᓕᓐᓂᐊᖅᓯᓐᓈᑦ ᑲᑎᒪᓂᖅ ᐊᒻᒪ ᓯᓚ ᓂᒡᓚᓱᒃᑐᖅ: ᐱᙳᐊᕈᓯᖅ ᐃᒡᓗᕕᒐᓕᐅᕐᓂᖅ, ᐅᓇ ᐃᓚᒋᔭᐅᔪᖅ ᑎᑎᕋᕐᕕᑦᑎᓐᓂ ᐱᓕᕆᐊᖑᓚᐅᖅᑑᑉ ᐃᓚᖓ ᑕᒪᑐᒪᓂ ᐊᕐᕌᒍᒥ.

ᑲᒪᓐᓇ ᐃᓱᒪᒋᓗᒍ, ᑕᐃᒪᑐᖅ ᐊᑐᕐᓂᐊᖅᐸᕗᑦ ᖃᐅᔨᒪᓂᕋ ᑎᑎᕋᕐᕕᓕᕆᓂᖅ ᓇᓗᓇᐃᖅᓯᓂᕐᒧᑦ ᓈᒻᒪᓈᖅᓯᒪᙱᓐᓂᐅᔪᑦ ᐱᑕᖃᙱᓐᓃᓪᓗ ᐱᔨᑦᑎᕋᐅᑎᓂᒃ ᖃᐅᔨᒪᔭᑦᑎᓐᓂᒃ ᐱᑕᓕᖕᓂᒃ, ᐱᓕᕆᖃᑎᒌᒡᓗᑕᓗ ᑕᒻᒪᖅᑕᖅᓯᒪᔪᓂ ᑲᒪᒋᔭᖃᕐᓂᕐᒥᒃ ᑖᒃᑯᓇᙵᑦ ᐊᑲᐅᙱᓕᐅᕈᑎᓂᒃ ᐱᐅᓛᒃᑯᑦ ᐱᔪᒥᓇᖅᓯᑎᓯᒪᐃᓐᓇᕐᓗᑎᒍᑦ ᒪᒃᑯᒃᑐᓄᑦ ᓄᓇᕗᒻᒥᐅᓄᑦ, ᖃᑕᙳᑎᖏᓐᓄᑦ, ᓯᕗᓂᒃᓴᒥᓪᓗ ᓄᓇᕗᓕᒫᒧᑦ, ᐃᓱᒪᒋᓗᒍ.

ᐅᔾᔨᕈᓱᒃᑐᒃᓴᐅᓚᐅᖅᐳᓯ ᐊᒥᓱᓯᒍᑦ, 2019-2020 ᐊᕐᕌᒍᓕᒫᖅᓯᐅᑦ ᐅᓂᒃᑳᕗᑦ ᐊᔾᔨᒋᔭᐅᙱᓐᓂᖓᓂᒃ ᑭᖑᓂᖔᑦᑎᓐᓂ ᐊᕐᕌᒍᓂ. ᐊᓯᔾᔨᖅᑕᐅᔪᑦ ᑕᑯᔭᓯ ᑖᒃᑯᓇᓂ ᐊᕐᕌᒍᓕᒫᖅᓯᐅᑎᑦ ᐅᓂᒃᑳᓂᒃ ᐋᖅᑭᒃᑕᐅᓚᐅᖅᐳᑦ ᑐᙵᕕᒋᔭᐅᓪᓗᑎᒃ ᑭᐅᔾᔪᑕᐅᖃᑦᑕᓚᐅᖅᑐᑦ ᐊᑐᐃᓐᓇᕈᖅᑎᑕᐅᔪᑦ ᑎᑎᕋᕐᕕᑦᑎᓐᓄᑦ ᐊᐅᓚᑦᑎᔨᓂᒃ ᐊᒻᒪ ᐱᔨᑦᑎᕋᖅᑎᒃᑯᑦ ᑲᑎᒪᔨᓂᒃ ᐊᒻᒪ ᑲᑎᒪᔨᕋᓛᖏᓐᓂᒃ. ᓴᖅᑭᔮᖅᑎᑕᐅᓚᐅᖅᒪᓪᓗ ᐱᕙᓪᓕᐊᔪᓕᕆᔨᓂᑦ ᒪᓕᒐᓕᐅᕐᕕᖕᒥᓪᓗ, 2019-2020−ᒧᑦ ᐊᕐᕌᒍᓕᒫᖅᓯᐅᑎᑦ ᐅᓂᒃᑳᓕᐊᑦ, ᑎᑭᑕᐅᑲᑕᓕᓚᐅᖅᑐᒍᑦ ᐊᔾᔨᒌᙱᕈᓘᔭᖅᑐᓂ ᑭᐅᔭᐅᓂᕐᓂᒃ ᐱᓕᕆᕝᕕᖕᒥᐅᓂ ᐱᔾᔪᑎᖃᖅᖢᑎᒃ ᐋᖅᑭᒃᓯᒪᓂᖏᓐᓂᒃ ᐃᓗᓕᖏᓐᓂᒡᓗ. ᐃᓚᖏᑦ ᐱᓕᕆᕝᕖᑦ ᐱᓕᕆᖃᑎᖃᕈᒪᓚᐅᖅᑐᑦ ᐅᕙᑦᑎᓐᓂᒃ ᓇᓗᓇᐃᖅᓯᔪᒪᓪᓗᑎᒃ ᑐᓴᐅᒪᔾᔪᑎᒃᓴᑦ ᑕᒻᒪᖅᑕᖅᓯᒪᖏᓐᓂᖓᓂᒃ ᐱᐊᓂᒃᓯᒪᑦᑎᐊᖅᖢᓂᓗ ᐃᓚᖏᓪᓗ ᒪᓕᑦᑎᐊᙱᖦᖢᑎᒃ, ᑐᓴᖅᑕᐅᔭᕆᐊᖃᖏᑦᑐᑦ ᐃᓱᒫᓘᑕᐅᓪᓗᑎᑦ. ᑐᙵᓱᒃᑎᑦᑎᔪᖓ ᐅᖃᐅᓯᒃᓴᓂ ᑲᑎᒪᔨᕋᓛᓂ ᐋᖅᑭᒋᐊᖅᑕᐅᓯᒪᔪᓂ ᐊᓯᔾᔨᕆᐊᕐᓂᕐᓂᒃ ᐃᓗᓕᖏᓂᒡᓗ ᐊᕐᕌᒍᓕᒫᖅᓯᐅᑎᒧᑦ ᐅᓂᒃᑳᓕᐊᑦᑎᓐᓄᑦ.

ᐅᓂᒃᑳᑦᑎᓐᓂ ᐊᓯᔾᔨᕐᓂᖅᐹᖑᖃᑕᐅᔪᖅ ᐃᓚᓕᐅᔾᔭᐅᓂᖓ ᒪᒃᑯᒃᑐᑦ ᓄᓇᕗᒻᒥᐅᑦ ᖃᓄᐃᓕᖓᓕᕐᓂᖏᓐᓂᒃ. ᐅᖃᐅᓯᕆᖅᑲᐅᔭᕋ ᑕᕝᕙᓂ ᑭᒡᒐᖅᑐᐃᔩᑦ ᐅᓂᒃᑳᖏᓐᓂᒃ ᐊᑐᐃᓐᓇᐅᑎᓪᓗᒋᑦ ᑐᑭᓯᒋᐊᒐᒃᓴᑦ ᑐᙵᕕᖏᑦ  ᐊᑐᖅᑕᐅᔪᓐᓇᖅᑐᑦ ᐃᓱᒪᓕᐅᕆᔨᓄᑦ, ᓲᕐᓗ ᐃᓕᔅᓯᑐᑦ, ᐃᓱᒪᒋᔭᔅᓯᓐᓂᒃ ᑐᓴᖅᑕᐅᑎᑦᑎᓂᐊᓕᕌᖓᔅᓯ ᐃᑲᔪᕐᓂᐊᕌᖓᔅᓯᓗ ᐊᑐᐃᓐᓇᐅᑎᓪᓗᒋᑦ ᑐᑭᓯᓇᖅᑐᑦ, ᑲᑐᔾᔨᖃᑎᒌᒍᑕᐅᔪᑦ, ᓯᕗᒻᒧᐊᒋᐊᖃᕐᓂᕐᒧᑦ, ᐊᑕᐅᑦᑎᒃᑯᑦ. ᑕᐃᒪᐃᓐᓂᖓᓄᑦ, ᑕᒪᓐᓇ ᐊᑐᐃᓐᓇᐅᑎᓐᓂᐊᖅᑕᕗᑦ ᐊᒡᒍᖅᓯᒪᓂᖓ  ᐊᕐᕌᒍᑕᒫᑦ.

ᑐᑭᓯᓇᖅᓯᑎᑦᑎᔪᒪᒐᒪ ᑐᑭᓯᒋᐊᒐᒃᓴᑦ ᐅᖃᐅᓯᐅᔪᑦ ᒪᒃᑯᒃᑐᑦ ᓄᓇᕗᒥᐅᑦ ᖃᓄᐃᓕᖓᓂᖏᓐᓂᒃ ᑐᑭᓯᒋᐊᒐᒃᓴᖁᑎᒋᙱᑕᕗᑦ. ᐊᑐᐃᓐᓇᕈᖅᑎᑕᐅᓚᐅᖅᑐᖅ ᑎᑎᕋᕐᕕᓐᓄᑦ ᐊᓯᖏᓐᓂᒃ ᐱᓕᕆᕝᕕᖕᓂ. ᐃᖅᑲᓇᐃᔭᖅᑎᒃᑲ ᐃᑲᕐᕋᒐᓵᓗᖕᓄᑦ ᑲᒪᒋᔭᖃᓚᐅᖅᑐᑦ, ᓇᓗᓇᐃᔭᐃᓪᓗᑎᒃ ᓇᓗᓇᐃᖅᓯᑦᑎᐊᕐᓂᕐᓗ ᐊᑐᐃᓐᓇᕈᖅᑎᑕᐅᔪᑦ. ᐅᓂᒃᑳᓕᐅᖅᑐᖃᓯᒋᐊᓚᐅᙱᓐᓂᖓᓂ, ᐱᓕᕆᕝᕖᑦ ᐊᑐᐃᓐᓇᕈᕐᕕᐅᓚᐅᖅᐳᑦ ᒪᒃᐱᖅᑐᒐᖏᓐᓂᒃ ᐱᕕᖃᖅᑎᑕᐅᓚᐅᖅᐳᓪᓗ ᑭᐅᔪᓐᓇᖅᑎᑕᐅᓗᐊᒃᑲᓐᓂᕈᓐᓇᖅᖢᑎᒃ ᑐᑭᓯᓇᖅᓯᑎᑦᑎᓗᑎᓪᓘᓐᓃᑦ ᓇᓗᓇᐃᖅᓯᓗᑎᒃ ᓇᓛᒎᖅᑐᓂᒃ ᑭᖑᓪᓕᖅᐹᒥ ᑎᑎᖅᑲᓕᐊᕆᔭᐅᔪᓂᒃ.

ᑖᒃᑯᑎᒎᓇᖅ ᐱᓕᕆᐊᖅᑎᒍᑦ, ᑎᑎᕋᕐᕕᑦᑎᓐᓂ ᖃᐅᔨᓚᐅᖅᐳᑦ, ᐃᓱᒪᕗᖓᓗ ᑕᒪᑦᑕ ᑕᕝᕙᓃᑦᑐᑎᒍᑦ ᐃᓕᑦᑎᖅᑲᐅᔪᒍᑦ, ᑖᒃᑯᐊ ᒪᒃᐱᖅᑐᒐᐃᑦ ᐅᖃᓕᒫᑐᐃᓐᓇᖅᖢᒋᑦ, ᐊᖏᔪᒻᒪᕆᐊᓗᒃ ᑐᑭᓯᒋᐊᒐᒃᓴᓂᙶᖅᑐᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᒪᒃᑯᒃᑐᓄᑦ ᖃᐅᔨᒪᔭᐅᓇᓱᙱᒻᒪᑕ ᓇᓛᒎᕐᒪᖔᑕ ᐅᕝᕙᓘᓐᓃᑦ ᑕᒻᒪᖅᑕᖅᓯᒪᙱᒻᒪᖔᑕ. ᑖᒃᑯᐊᓗ ᑕᐅᑐᒃᖢᒋᑦ ᐊᐱᖅᑯᑎᒃᓴᖃᓕᖅᐳᖓ, ᖃᓄᖅ ᐅᑯᐊ ᒐᕙᒪᒃᑯᑦ ᐃᓱᒪᓕᐅᕆᕙᑦ? ᖃᓄᕐᓕ ᐃᓱᒪᓕᐊᕆᔭᐅᔪᑦ ᐱᓕᕆᐊᖑᔪᒃᓴᓄᑦ ᐋᖅᑭᒃᑕᐅᖃᑦᑕᖅᐸᑦ? ᖃᓄᖅ ᑮᓇᐅᔭᐃᑦ ᑐᓂᐅᖅᑲᐅᖅᑕᐅᕙᑦ? ᖃᓄᕐᓗ ᒪᒃᑯᒃᑐᑦ ᑭᙴᒪᔭᖏᑦ ᑲᒪᒋᔭᐅᕙᑦ ᓇᓗᒍᑦᑕ ᖃᔅᓯᑦ ᐃᓄᐃᑦ ᐱᔨᑦᑎᕋᖅᑕᐅᖕᒪᖔᑕ ᐱᔨᑦᑎᕋᐅᑎᓄᑦ. ᐊᒻᒪ ᐱᒻᒪᕆᐅᓂᖅᐹᖅ ᐊᐱᖅᑯᑎ, ᑭᓇ ᓵᑕᒃᓴᐅᓂᐊᖅᐸ ᑖᒃᑯᓄᖓ ᐃᓱᒪᓕᐊᕆᔭᐅᔪᓄᑦ?

ᓴᖅᑭᑕᐅᓚᐅᖅᑎᓪᓗᒋᑦ 2019-2020 ᐊᕐᕌᒍᓕᒫᖅᓯᐅᑎᑦ ᐅᓂᒃᑳᓕᐊᑦ, ᐅᖃᐅᓯᐅᓚᐅᖅᐳᑦ ᖃᔅᓰᖅᓱᑲᓪᓚᒃᖢᑎᑦ ᒪᓕᒐᓕᐅᕐᕕᖕᒥ, ᐊᐱᖅᑯᑕᐅᕙᒃᖢᓂ ᓵᑕᒃᓴᐅᓂᕆᔭᐅᔪᖅ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ. ᐅᓇ ᐱᔾᔪᑕᐅᔪᖅ ᐅᓂᒃᑳᑦᑎᓐᓄᑦ. ᐅᓇ ᐱᔾᔪᑕᐅᔪᖅ ᑎᑎᕋᕐᕕᑦᑎᓐᓂᒃ ᐱᓕᕆᐊᕐᓄᑦ. ᑲᒪᒋᔭᖅᓴᕆᔭᐅᔪᖅ ᑎᑎᕋᕐᕕᑦᑎᓐᓂᑦ ᓴᖅᑭᑦᑎᔭᕆᐊᒃᓴᖅ ᑖᒃᑯᓇᙵᑦ ᐱᔾᔪᑕᐅᔪᓂᑦ, ᐱᒋᐊᕐᕕᖃᖅᖢᑎᒃ ᐱᑕᖃᙱᓐᓂᐅᔪᓂᑦ ᐊᑲᐅᙱᓕᐅᕈᑎᓂᒡᓗ ᐱᔨᑦᑎᕐᓂᕐᒧᑦ, ᐃᓕᖕᓅᖓᓕᖅᑐᖅ.  ᑲᒪᒋᔭᒃᓴᕆᔭᐅᕗᕐᓗ ᑎᑎᕋᕐᕕᑦᑎᓐᓂᒃ ᐱᓯᒪᒃᖠᕐᓂᕐᒥᒃᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᑕᑎᒋᔭᐅᔪᓂ ᐱᐅᓯᕚᓪᓕᖅᑎᑦᑎᔭᕆᐊᖃᕐᓂᕐᒥᒃ. ᑭᓯᐊᓂ, ᐱᓕᕆᐊᒃᓴᕆᔭᐅᔪᑦ ᓇᓗᓇᐃᖅᓯᓂᕐᒧᑦ ᐱᐅᓯᕚᓪᓕᕆᐊᖃᕐᓂᕐᒧᑦ, ᐱᓕᕆᐊᖃᕐᓂᕐᒥᒃ ᐋᖅᑭᒋᐊᖅᓯᓂᕐᒧᑦ ᐱᓕᕆᔭᕆᐊᓕᖕᓂ, ᐱᐅᓯᕚᓪᓕᖅᑎᑦᑎᓃᓪᓗ ᐱᓕᕆᐊᒃᓴᕆᔭᐅᕗᑦ ᒐᕙᒪᒃᑯᓐᓄᑦ. ᑎᑎᕋᕐᕕᑦᑎᓐᓂ ᑖᒃᑯᐊ ᓴᖅᑭᑕᐅᓚᐅᙱᑦᑐᑦ; ᐊᒡᓛᑦ ᖃᔅᓯᑲᓪᓚᑦ ᐱᑕᖃᐃᓐᓇᓵᖅᑐᑦ ᐱᓕᕆᕝᕕᖕᒥᓗ ᖃᐅᔨᒪᔭᐅᓕᖅᖢᑎᒃ ᖃᔅᓯᓄᒃᑭᐊᖅ ᐅᑭᐅᓄᑦ, ᐱᓕᕆᕝᕕᐅᓪᓗᑎᒃ ᐱᓕᕆᕝᕕᐅᙱᖦᖢᑎᓪᓘᓐᓃᑦ ᑲᒪᒋᓂᐊᕐᓗᒋᑦ. ᑭᓯᐊᓂ, ᐃᓱᒪᒋᖔᕆᐊᖃᖅᑕᕗᑦ ᑐᐊᕕᕐᓇᖅᑐᒃᑯᑦ ᐱᓕᕆᐊᕆᔭᕆᐊᖃᓕᖅᑕᕗᑦ ᐋᖅᑭᒋᐊᕋᓱᒡᓗᒋᑦ ᑖᒃᑯᐊ ᐊᑲᐅᙱᓕᐅᕈᑕᐅᔪᑦ ᐱᑕᖃᙱᓐᓂᐅᔪᓪᓗ ᐱᓕᕆᐊᕆᕙᓪᓕᐊᓗᒋᑦ.

ᑭᒡᓕᓯᓂᐊᖅᑕᐅᔪᓕᒫᑦ ᐅᓂᒃᑳᓕᐊᕆᓯᒪᔭᑦᑎᓐᓂ, ᐱᖁᔨᕗᖔᓕᐊᕆᔭᐅᔪᓕᒫᑦ, ᐊᑲᐅᙱᓪᓕᐅᕈᑎᓕᒫᑦ ᐱᔾᔪᑕᐅᔪᓕᒫᓪᓗ ᓴᖅᑭᑕᐅᖃᑦᑕᖅᑐᑦ ᑎᑎᕋᕐᕕᑦᑎᓐᓂ ᕿᒥᕐᕈᓂᐊᕐᑕᕐᓄᑦ, ᐅᑯᓇᙶᓲᖅ ᓄᑕᖅᑲᓂᒃ, ᒪᒃᑯᒃᑐᓂᒃ, ᐊᒻᒪ ᐃᓚᒌᓂᒃ ᐅᕙᑦᑎᓐᓂᒃ ᑕᑎᖃᖅᑐᓂᒃ ᐃᑲᔪᖅᑕᐅᔪᒪᓪᓗᑎᒃ ᐃᓅᓯᖃᑦᑎᐊᕐᓂᕐᒧᑦ ᐃᓱᒪᓕᐅᕆᔪᓐᓇᑦᑎᐊᕐᓂᕐᒧᓪᓗ ᖃᓄᑐᐃᓐᓇᑦᑎᐊᖅ ᐃᓱᒪᒋᔭᖏᓐᓂᒃ ᐊᑲᐅᓂᖅᐹᒃᑯᑦ. ᐃᓕᒃᓯᓐᓂᓕᒫᖅ ᓂᑯᕕᖓᐃᓐᓇᖁᔨᕗᖓ ᑕᒪᑐᒥᖓ ᐊᒃᓱᕈᕐᓇᖅᑐᒥ.

ᓂᕆᐅᑦᑎᐊᖅᐳᖓ ᑲᑐᔾᔨᖃᑎᒌᖕᓂᐊᕐᓂᑦᑎᓐᓂᒃ ᐊᒻᒪ ᐃᓱᒪᒋᔭᐅᑦᑎᐊᖅᑐᓂᒃ ᑐᓴᐅᒪᖃᑎᒌᖕᓂᐊᕐᓂᑦᑎᓐᓂᒃ. ᖁᔭᓐᓇᒦᒃ, ᑲᑎᒪᑎᑦᑎᔩ.

 
Data gaps contributing to child sexual abuse 'crisis' in Nunavut

 

 Watchdog calls rate of child sexual abuse in Nunavut a crisis