ᐱᓕᕆᐊᒃᓴᓪᓗᐊᑕᑦ


ᑭᒡᒐᖅᑐᐃᓂᖅ

ᑭᒡᒐᖅᑐᐃᓂᖅ ᐱᓕᕆᐊᖑᓲᖑᕗᖅ ᐃᒃᐱᒍᓱᑦᑎᐊᕐᓗᓂ ᑎᓕᐅᕆᔾᔪᑎᒋᕙᒡᓗᒋᑦ, ᐃᑲᔪᖅᓱᖅᐸᒡᓗᒋᑦ ᐅᕝᕙᓘᓐᓃᑦ ᐱᖁᔨᕗᖔᓕᐅᖅᐸᒡᓗᒋᑦ ᐱᓕᕆᐊᖑᖁᔭᑦ ᐃᓄᑐᐊᒧᑦ ᐃᓄᖕᒧᑦ, ᑭᒃᑯᓕᒫᓄᑦ ᐱᔾᔪᑕᐅᔪᑦ, ᐅᕝᕙᓘᓐᓃᑦ ᐊᑐᐊᒐᕐᒥᒃ ᐊᓯᔾᔨᖅᑕᐅᔪᓄᑦ. ᑭᒡᒐᖅᑐᐃᔨᒥᒃ ᐅᖃᖅᑐᖃᕋᔪᒃᑐᖅ ᐊᓯᒥᓂᒃ ᐱᔾᔪᑎᖃᖅᖢᓂ ᐃᑲᔪᖅᓱᐃᕙᒃᖢᓂᓘᓐᓃᑦ ᐃᓄᒃ ᐅᖃᓪᓚᒐᓱᒃᑐᖅ ᐅᖃᕈᓐᓇᐃᓪᓕᑎᓪᓗᒍ ᐃᑲᔪᓲᖑᒋᓪᓗᑎᒃ.

ᓄᑕᖅᑲᓄᑦ ᐱᓕᕆᐊᒃᑯᒥᒋᔭᐅᔪᑦ

ᑖᓐᓇ ᐃᓱᒪᒋᔭᒃᓴᖅ, ᐱᕕᒃᓴᐅᕗᖅ ᐃᓐᓇᕐᓄᑦ ᖃᐅᔨᓴᕈᑎᒋᔪᓐᓇᖅᖢᒍ ᐃᓱᒪᓕᐊᕆᔭᐅᔪᓂᒃ ᓄᑕᖅᑲᒥᒃ ᐱᔾᔪᑎᖃᖅᑐᓄᑦ. ᐃᓱᒪᓕᐅᕆᓂᐊᕐᓗᓂ ᑐᙵᕕᒋᓗᒋᑦ ᓄᑕᖅᑲᓄᑦ ᐱᓕᕆᐊᒃᑯᒥᒋᔭᐅᔪᑦ ᑐᑭᖃᕐᒪᑦ ᓄᑕᕋᐅᑉ ᖃᓄᐃᙱᑦᑎᐊᕈᓯᖏᓐᓂᒃ ᐃᓱᒪᓕᐅᕆᓂᐊᖅᑎᓪᓗᒋᑦ  ᑖᒃᑯᓂᖓ ᐱᔾᔪᑕᐅᔪᓂᒃ ᓄᑕᖅᑲᓂᒃ - ᐃᓐᓇᕐᒧᑦ ᓈᒻᒪᒋᔭᐅᓛᑦ ᐱᓕᕆᐊᖑᔾᔪᑕᐅᙱᖔᕐᓗᑎᒃ ᐅᕝᕙᓘᓐᓃᑦ ᒐᕙᒪᒃᑯᑦ.

ᓄᓇᕐᔪᐊᕐᒥ ᑲᑐᔾᔨᖃᑎᒌᓂᒃ ᐊᖏᖃᑎᒌᒍᑎᑦ ᓄᑕᖅᑲᑦ ᐱᔪᓐᓇᐅᑎᖏᓐᓄᑦ ᐅᖃᖅᓯᒪᖕᒪᑦ ᒐᕙᒪᒃᑯᑦ ᐃᓱᒪᓕᐅᕆᔭᕆᐊᖃᕐᓂᖏᓐᓂᒃ ᓄᑕᖅᑲᓄᑦ ᐱᓕᕆᐊᒃᑯᒥᒋᔭᐅᔪᓂᒃ ᓄᑕᖅᑲᑦ ᐱᔾᔪᑕᐅᓗᑎᑦ ᐃᓱᒪᓕᐅᕆᓕᕌᖓᑕ. ᐊᖏᖃᑎᒌᒍᑎ ᓴᖅᑭᑦᑎᓯᒪᖕᒥᖕᒪᑦ ᐊᖓᔪᖅᑳᑦ ᒪᓕᒋᐊᖃᕐᓂᖏᓐᓂᒃ ᕿᑐᕐᖓᖏᑦᑕ ᐱᓕᕆᐊᒃᑯᒥᒋᔭᖏᓐᓂᒃ ᐱᕈᖅᓴᐃᑎᓪᓗᒋᑦ ᕿᑐᕐᖓᖏᓐᓂᒃ.

ᖃᔅᓯᑲᓪᓚᑦ ᐱᔾᔪᑏᑦ ᐃᑲᔫᑕᐅᔪᓐᓇᕐᒪᑕ ᐃᓱᒪᓕᐅᕈᑎᒋᓗᒋᑦ ᓄᑕᖅᑲᓄᑦ ᑭᓱᓂᒃ ᐱᓕᕆᐊᒃᑯᒥᒍᓱᖕᒪᖔᑕ. ᐅᑯᓂᖓ ᐃᓚᖃᕈᓐᓇᖅᑐᑦ (ᑭᓯᐊᓂ ᑭᒡᓕᖃᙱᖦᖢᑎᒃ):

  • ᓄᑕᕋᖅ ᐅᖃᖅᐸᑦ ᑭᓱᓂᒃ ᐱᔭᕆᐊᖃᕐᒪᖔᑦ (ᐱᔪᓐᓇᕐᓂᖏᑦ ᒪᓕᒃᑕᐅᓗᑎᒃ)
  • ᓄᑕᕋᖅ ᐊᑦᑕᕐᓇᖅᑐᒥᔾᔮᙱᒃᑲᓗᐊᕐᒪᖔᑦ
  • ᓄᑕᕋᐅᑉ ᐱᔪᓐᓇᕐᓂᖓ ᐃᓕᖅᑯᓯᖓᓐᓄᑦ ᐊᒻᒪ ᖃᑕᙳᑎᖏᑦᑕ ᐊᒃᑐᐊᓂᕆᔭᖏᓐᓄᑦ
  • ᓄᑕᕋᐅᑉ ᐱᕈᖅᓴᔭᕆᐊᖃᕐᓂᖓ ᖃᓄᐃᙱᑦᑎᐊᕐᓗᓂ

ᐱᔪᓐᓇᕐᓂᕆᔭᐅᔪᖅ

ᐃᒃᐱᒋᑦᑎᐊᕐᓗᒋᑦ ᓄᑕᖅᑲᓂᒃ ᐱᔪᓐᓇᕐᓂᖅᑖᕆᔭᐅᕙᓪᓕᐊᔪᑦ ᐃᓱᒪᒋᔭᐅᓪᓗᐊᑕᓲᑦ ᓄᓇᕐᔪᐊᕐᒥ ᑲᑐᔾᔨᖃᑎᒌᓂᒃ ᐊᖏᖃᑎᒌᒍᑎᓂᒃ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ.

ᐃᓱᒪᒋᔭᐅᔪᑦ ᐃᓕᑕᖅᓯᐅᒪᖕᒪᑕ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᐃᓄᑑᖃᑎᒋᓗᒋᑦ ᐅᖃᖃᑎᒋᔪᓐᓇᕐᓗᒋᑦ ᐱᕚᓪᓕᕈᑕᐅᔪᓐᓇᕐᓂᖏᓐᓄᑦ ᐃᓐᓇᕈᖅᐸᓪᓕᐊᓕᕌᖓᑕ. ᑕᒪᕐᒥᒃ ᓄᑕᖅᑲᑦ ᐊᖅᑯᑎᖏᑦ ᐊᑕᖐᔪᑦ, ᐃᓐᓇᕐᓂᒃ ᐱᔪᓐᓇᖅᓯᑦᑎᐊᕐᓗᓂ ᐊᔾᔨᒋᔭᐅᙱᒻᒪᑦ ᖃᐅᔨᓴᖅᑕᐅᔭᕆᐊᖃᖅᖢᑎᒡᓗ ᐅᑭᐅᖏᑦ ᐃᓐᓇᕐᕙᓲᓂᖏᓪᓗ ᒪᓕᒃᑕᐅᓗᑎᒃ.

ᐃᓱᒪᒋᔭᐅᔪᑦ ᐃᒪᓐᓇᐅᖁᔨᔪᓐᓇᕐᒥᖕᒪᑦ ᒐᕙᒪᒃᑯᑦ ᐊᒻᒪ ᐊᖓᔪᖅᑳᕆᔭᐅᔪᑦ ᐃᑲᔪᖅᓱᐃᖏᓐᓇᕆᐊᖃᕆᔭᐅᓪᓗᑎᒃ ᓄᑕᖅᑲᒧᑦ ᑐᙵᕕᒋᔭᐅᓗᑎᒃ ᓄᑕᖅᑲᑦ ᐱᔪᓐᓇᕐᓂᖅᑖᕆᕙᓪᓕᐊᔭᖏᑦ.

ᓄᑕᕋᖅ/ᓱᕈᓯᖅ

ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᕐᒧᑦ ᓇᓗᓇᐃᖅᓯᖕᒪᑦ ᓄᑕᖅᑲᑦ ᐅᑭᐅᖃᑐᐊᖅᐸᑕ 16 ᑐᖔᓂ ᓄᑕᕋᐅᓂᖏᓐᓂᒃ.

ᓄᑕᕋᒃᑯᕕᑦ ᐊᒻᒪ ᒪᒃᑯᒃᑐᒃᑯᕕᑦ

ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᖅ ᒪᓕᒃᖢᒍ, ᓄᑕᕋᒃᑯᕖᑦ ᒪᒃᑯᒃᑐᒃᑯᕖᓪᓗ ᐱᖃᓲᖑᕗᑦ ᑎᒥᒧᑦ ᑐᕌᖓᔪᓂᒃ ᐋᖅᑭᒃᓱᖅᓯᒪᔪᓂᒃ ᐱᔨᑦᑎᕋᕈᑕᐅᔪᓐᓇᖅᖢᑎᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᒪᓕᒐᖅᑎᒍᑦ ᓄᓇᕗᒻᒥ ᐊᔾᔨᐸᓗᖏᓐᓂᒡᓘᓐᓃᑦ ᐱᕋᔭᒃᐸᒃᑐᓄᑦ ᐃᖅᑲᖅᑐᐃᕕᓕᕆᔾᔪᑎᒃᑯᑦ.

ᓄᑕᕋᒃᑯᕖᑦ ᒪᒃᑯᒃᑐᒃᑯᕖᓪᓗ ᐃᒪᐃᑦᑐᖃᐅᖅᑐᑦ ᐃᓕᓐᓂᐊᕐᕖᑦ, ᐋᓐᓂᐊᕐᕖᑦ, ᐃᓄᓕᕆᔨᒃᑯᑎᒍᑦ ᐸᖅᑭᔭᐅᑎᑦᑎᔩᑦ ᐊᒻᒪ ᐃᑲᔪᖅᑕᐅᕝᕖᑦ. ᐱᑕᖃᕆᓪᓗᑎᒡᓗ ᓄᑕᖅᑲᓄᑦ ᐸᐃᕆᕕᖕᓂᒃ ᓄᓇᕗᑦ ᒐᕙᒪᒃᑯᓐᓂ ᐱᔪᓐᓇᐅᑎᖃᖅᑐᓂᒃ ᐊᐅᓚᑦᑎᔾᔪᑎᒋᔪᓐᓇᕐᓗᒍ.

ᐃᓕᙵᒡᔪᐊᖅᓯᒪᔪᑦ

ᐃᓕᙵᒃᓯᒪᔪᖃᓗᐊᕐᓂᑯᒧᑦ ᑐᖁᔪᖃᕐᓂᖅᐸᑦ ᐃᓄᖕᒥᒃ ᐅᕝᕙᓘᓐᓃᑦ ᐱᕕᒡᔪᐊᕐᓗᓂ ᐊᑯᓂᐊᓗᒡᓘᓐᓃᑦ ᐊᔪᕈᑎᖃᓕᕐᓗᓂ ᐃᓅᑉ ᖃᓄᐃᙱᑦᑎᐊᕈᓯᖓᓄᑦ.

ᑎᒃᑯᐊᖅᑕᐅᓯᒪᔪᑦ ᐱᔪᓐᓇᕐᓂᖃᖅᑎᑦᑎᔨᑦ

ᑎᒃᑯᐊᖅᑕᐅᓯᒪᔪᑦ ᐱᔪᓐᓇᕐᓂᖃᖅᑎᑦᑎᔨᑦ ᑲᑐᔾᔨᖃᑎᒌᖑᕗᑦ ᓇᓗᓇᐃᖅᑕᐅᓯᒪᓪᓗᑎᒃᑎᑎᕋᖅᓯᒪᓂᓕᒃ ᐃ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᕐᒥ. ᑭᒡᒐᖅᑐᖅᑎᑦ ᐱᓕᕆᐊᒃᓴᖃᖅᖢᑎᒃ ᐱᔪᓐᓇᕐᓂᖃᖅᖢᑎᒡᓗ ᑖᒃᑯᓂᖓ ᑲᑐᔾᔨᖃᑎᒌᓂᒃ ᐱᔾᔪᑎᖃᖅᑐᓂᒃ, ᑭᒡᒐᖅᑐᖅᑎᒋᔭᐅᔪᑦ ᐊᔾᔨᑦᑎᐊᕆᓪᓗᓂᒋᑦ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ.

ᐃᑭᐊᖅᑭᕕᖕᒦᑦᑐᓕᒫᑦ, ᐅᖃᐅᓯᖃᕌᖓᑦᑕ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ, ᐅᖃᐅᓯᖃᓲᖑᒋᕗᒍᑦ ᑎᒃᑯᐊᖅᑕᐅᓯᒪᔪᓂᒃ ᐱᔪᓐᓇᕐᓂᖃᖅᑎᑦᑎᔨᓂᒃ.

ᒫᓐᓇ ᑎᒃᑯᐊᖅᑕᐅᓯᒪᔪᑦ ᐱᔪᓐᓇᕐᓂᖃᖅᑎᑦᑎᔨᑦ ᐅᑯᐊᖑᕗᑦ:

  • ᓄᓇᕗᒻᒥ ᐃᖅᑲᓇᐃᔮᕆᔭᐅᔪᒪᔪᓂᒃ ᐃᓕᓐᓂᐊᕐᕕᒃ, ᓴᓇᔨᕈᕆᐅᖅᓴᓂᕐᒧᑦ ᑲᑎᒪᔨᑦ ᐃᓕᑕᕆᔭᐅᔾᔪᑎᑖᖅᑎᑦᑎᔨᑦ
  • ᐃᖅᑲᓇᐃᔭᖅᑎᓄᑦ ᐊᑐᐊᒐᓕᕆᔨᒃᑯᑦ ᑲᑎᒪᔨᖏᑦ
  • ᒪᓕᒐᓂᒃ ᑐᑭᓯᓂᐊᕐᕕᒃᑯᑦ ᑲᑎᒪᔨᖏᑦ ᓄᓇᕘᒥ
  • ᓄᓇᕗᒻᒥ ᓯᓚᑦᑐᖅᓴᕐᕕᒃ
  • ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ
  • ᐱᕋᔭᒃᑕᐅᓯᒪᔪᑦ ᐃᑲᔪᖅᑏᑦ ᑲᑎᒪᔨᖏᑦ
  • ᐊᐅᓚᑦᑎᔩᑦ ᐊᒻᒪ ᐱᔪᓐᓇᐅᑎᖃᖅᑐᑦ ᐸᐃᕆᕖᑦ
  • ᐃᓕᓐᓂᐊᖅᑐᓕᕆᔨᒃᑯᑦ
  • ᒐᕙᒪᒃᑯᓐᓄᑦ ᑎᒥᒋᔭᐅᔪᑦ ᐃᓕᓐᓂᐊᕐᕕᖕᓂ, ᓇᓗᓇᐃᖅᑕᐅᓯᒪᔪᑦ ᐊᒡᒍᖅᓯᒪᓂᓕᒃ 197 ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᒥ

ᒐᕙᒪᒃᑯᑦ ᐱᓕᕆᕝᕕᖏᑦ

ᑕᕝᕙᓂᓕᒫᖅ ᐃᑭᐊᖅᑭᕕᖕᒥ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓲᕆᕙᕗᑦ ᐱᔾᔪᑎᒋᓪᓗᑎᒍᑦ ᓄᓇᕗᑦ ᒐᕙᒪᒃᑯᓐᓂ ᐱᓕᕆᕝᕖᑦ, ᐱᔨᑦᑎᕋᕐᕖᑦ, ᑎᑎᕋᕐᕖᑦ ᐊᒻᒪ ᑎᒃᑯᐊᖅᑕᐅᓯᒪᔪᑦ ᐱᔪᓐᓇᕐᓂᖃᖅᑎᑦᑎᔩᑦ (ᑕᑯᓗᒍ ᖁᓛᓃᑦᑐᖅ ᑕᐃᒎᓯᓕᐅᖅᓯᒪᓂᖓ).

ᑕᐃᒎᓯᓕᐅᖅᓯᒪᓂᖓ ᐃᓚᓕᐅᔾᔨᓯᒪᙱᑦᑐᖅ ᒪᓕᒐᓕᐅᕐᕕᖕᒥᐅᑕᓂᒃ ᐅᕝᕙᓘᓐᓃᑦ ᐃᓛᒃᑰᖅᑐᑦ ᐱᓕᕆᔨᓂᒃ ᓲᕐᓗ ᐅᖃᐅᓯᕐᓄᑦ ᑭᒡᒐᖅᑐᖅᑎ. ᐃᓚᓕᐅᔾᔭᐅᓯᒪᙱᒃᑭᓪᓗᑎᒃ ᑲᓇᑕᒥ, ᐅᕝᕙᓘᓐᓃᑦ ᒐᕙᒪᑐᖃᒃᑯᑦ.

ᐃᓄᐃᑦ ᐱᒻᒪᕆᐅᒋᔭᖏᑦ

ᐃᓄᐃᑦ ᐱᒻᒪᕆᐅᒋᔭᖏᑦ ᐱᐅᓯᕆᔭᐅᕗᑦ ᐃᓚᓕᐅᔾᔭᐅᕙᒃᖢᑎᒃ ᐃᓄᐃᑦ ᖃᐅᔨᒪᔭᑐᖃᖏᑦ ᒫᓐᓇᓕᓴᕐᒧᑦ ᐋᖅᑭᒃᓯᒪᓂᕆᔭᐅᔪᒧᑦ ᖃᐅᑕᒫᓪᓗ ᐱᓕᕆᐊᖑᕙᒃᑐᓄᑦ.

ᐃᓄᐃᑦ ᖃᐅᔨᒪᔭᑐᖃᖏᑦ ᐅᕝᕙᓘᓐᓃᑦ ᖃᓪᓗᓈᑐᑦ ᑕᐃᔭᐅᒃᐸᑦ Traditional Inuit Knowledge ᖃᐅᔨᒪᔭᑐᖃᐅᕗᑦ ᐊᕐᕌᒍᒐᓵᓗᖕᓄᑦ ᖃᐅᔨᒪᔭᐅᔪᑐᖃᐅᓕᖅᖢᑎᒃ ᐃᓄᖕᓂᒃ. ᐃᓚᓕᐅᔾᔨᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᖃᑎᒌᓲᖑᖕᒪᑕ ᐱᓕᕆᔨᐅᖃᑎᒌᑦ, ᖃᑕᙳᑎᒌᑦ ᐊᒻᒪ ᐊᕙᑎᖏᓐᓃᑦᑐᑦᓂᒃ.

ᑭᒡᒐᖅᑐᖅᑎᑦ

ᑭᒡᒐᖅᑐᖅᑎ ᑭᓇᑐᐃᓐᓇᐅᕗᖅ ᓂᕈᐊᖅᑕᐅᓯᒪᔪᖅ ᐱᓕᕆᖁᔭᐅᓪᓗᓂ ᐅᖃᓪᓚᖁᔭᐅᓪᓗᓂᓘᓐᓃᑦ ᐃᓄᒋᐊᓄᑦ. ᓄᓇᕗᒻᒥ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓂᕈᐊᖅᑕᐅᓯᒪᓲᖑᕗᖅ ᖃᐅᔨᒪᔨᑕᕆᔭᐅᓪᓗᓂ ᒐᕙᒪᒃᑯᑦ ᐱᓕᕆᕝᕕᖏᑦ (ᑕᑯᓗᒍ ᑕᐃᒎᓯᓕᐅᖅᓯᒪᔪᖅ ᖁᓛᓂ) ᑐᓴᕌᖓᑦ ᐃᓱᒪᓕᐅᕆᔭᕌᖓᓪᓗ ᓄᓇᕗᒥᐅᑦ ᒪᒃᑯᒃᑐᑦ ᐱᔪᓐᓇᐅᑎᖏᓐᓂᒃ.  ᑭᒡᒐᖅᑐᖅᑎ ᐱᔪᓐᓇᕐᓂᖃᖅᐳᖅ ᐃᓄᑑᓗᓂ ᐊᒻᒪ ᐊᔾᔨᒌᒃᑎᑦᑎᓗᓂ ᖃᐅᔨᓴᕈᓐᓇᖃᑦᑕᕐᓗᓂ ᒐᕙᒪᒃᑯᑦ ᐱᓕᕆᐊᖏᓐᓂᒃ, ᐃᓄᐃᑦ ᑐᓴᖅᑎᑉᐸᒡᓗᓂᒋᑦ ᑎᓕᐅᕆᐸᓘᔭᖅᑐᓂᒡᓗ ᐱᖁᔨᕗᖔᓕᐅᖅᐸᒡᓗᓂ.  ᐊᓯᖏᑦ ᑕᐃᒎᓯᖅᑕᑦ ᑖᔅᓱᒧᖓ ᑭᒡᒐᖅᑐᖅᑎᒧᑦ ᒪᑯᐊᖑᕗᑦ ᓄᑕᕋᕐᒧᑦ ᑭᒡᒐᖅᑐᖅᑎ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ, ᓄᑕᖅᑲᓄᑦ ᐅᓂᕐᓗᒡᕕᐅᓲᑦ ᐊᒻᒪ ᓄᑕᖅᑲᓄᑦ ᑭᒡᒐᖅᑐᖅᑎ ᑲᒪᓯᓇᐅᓪᓗᓂ.

ᐱᔪᓐᓇᐅᑎᑦ

ᐱᔪᓐᓇᐅᑎᑦ ᒪᑯᐊᖑᓪᓗᑎᒃ ᐃᓄᓕᒫᑦᑎᐊᑦ ᐊᑕᖏᑦᑎᐊᖅᖢᑎᒃ ᐱᖃᕆᐊᖃᖅᐳᑦ ᐊᔪᙱᑦᑕᕆᐊᖃᖅᐳᓪᓘᓐᓃᑦ ᐃᓅᓯᑦᑎᐊᕙᖕᒥᑦ ᓯᕗᒻᒧᑦ ᐃᖏᕐᕋᓇᓱᒡᓗᑎᒃ ᐱᑦᑎᐊᓕᓗᑎᒃ ᐊᒻᒪ ᐱᕈᖅᐸᓪᓕᐊᑐᐃᓐᓇᕐᓗᑎᒃ.  ᓄᑕᖅᑲᑦ ᐱᔪᓐᓇᐅᑎᖏᑦ ᓇᓗᓇᐃᖅᑕᐅᓯᒪᕗᑦ ᓄᓇᕐᔪᐊᕐᒥ ᑲᑐᔾᔨᖃᑎᒌᓂᒃ ᐊᖏᖃᑎᒌᒍᑎᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ. ᐊᖏᖃᑎᒌᒍᑎ 54-ᓂᒃ ᐊᔾᔨᒌᙱᑦᑐᓂᒃ ᑎᑎᕋᖅᓯᒪᔪᖃᖅᐳᖅ ᐊᒡᒍᖅᓯᒪᔪᓂᒡᓗ ᑲᑎᓗᒃᑖᖅᖢᒋᑦ. ᑖᒃᑯᐊ ᑎᑎᕋᖅᓯᒪᔪᑦ ᓇᓗᓇᐃᖅᓯᓯᒪᕗᑦ ᖃᔅᓯᑲᓪᓛᓗᖕᓂᒃ ᐊᔾᔨᒌᙱᑦᑐᓂᒃ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ.  ᑐᑭᓯᓇᖅᓯᑎᑦᑎᓯᒪᒋᕗᑦ ᖃᓄᐃᓕᐅᖅᑕᐅᔾᔪᓯᕐᓂᒃ ᑲᒪᒋᔭᒃᓴᓂᒡᓗ ᒐᕙᒪᒃᑯᓐᓄᑦ ᐃᑲᔫᑕᐅᕙᒃᑐᓂᒃ ᑖᒃᑯᓄᖓ ᐱᔪᓐᓇᐅᑎᓄᑦ.

ᐃᓚᖏᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐊᖏᖃᑎᒌᒍᑎᒥ ᐅᑯᓂᖓ ᐃᓚᖃᖅᐳᑦ:

  • ᐱᔪᓐᓇᐅᑎᖃᕐᓂᖅ ᐊᑎᖃᕐᓗᓂ ᐊᒻᒪ ᑲᓇᑕᒥᐅᑕᐅᓗᓂ
  • ᓂᕆᔭᒃᓴᑦᑎᐊᕙᖕᓂᒃ ᓂᕆᖃᑕᐅᔪᓐᓇᕐᓗᓂ ᐊᒻᒪ ᐊᑦᑕᕐᓇᙱᑦᑐᒥᒃ ᐃᓂᖃᖃᑕᐅᓗᓂ
  • ᐱᔪᓐᓇᕐᓂᖃᖅᑐᑦ, ᐊᔪᕐᓇᙱᓐᓂᓕᒫᖓᓂᒃ, ᑲᒪᒋᔭᐅᔭᕆᐊᖃᖅᐳᑦ ᐊᖓᔪᖅᑳᒥᓄᑦ
  • ᐃᓕᓐᓂᐊᖃᑕᐅᕙᒡᓗᑎᒃ
  • ᖃᑕᙳᑎᒌᓂᒃ ᐃᓚᐅᕙᒡᓗᑎᒃ, ᐃᓕᖅᑯᓯᓕᕆᔪᓂᒃ ᐊᒻᒪ ᐃᓅᓇᓱᐊᕐᓂᕐᒥᒃ
  • ᐋᓐᓂᖅᓱᖅᑕᐅᔭᕆᐊᖃᙱᓪᓗᑎᒃ

ᑎᑎᕋᖅᓯᒪᔪᓕᒫᑦ ᐊᖏᖃᑎᒌᒍᑎᒥ ᐊᒃᑐᐊᔪᐃᓐᓈᓘᕗᑦ. ᐊᒡᒍᖅᑕᐅᔪᓐᓇᙱᑦᑐᑦ ᐊᑕᐅᓯᕐᒥᒡᓘᓐᓃᑦ ᐱᔪᓐᓇᐅᑎᒥᒃ ᐱᓂᖅᓴᐅᔪᖃᕈᓐᓇᙱᒻᒪᑦ. ᐃᒪᓐᓇᖔᕐᓕ, ᐱᔪᓐᓇᐅᑎᓕᒫᑦ, ᖃᓄᐃᓕᐅᖅᑕᐅᔭᕆᐊᓕᓕᒫᑦ ᑲᒪᒋᔭᐅᔭᕆᐊᖃᖅᑐᓕᒫᓪᓗ ᐃᓱᒪᒋᔭᐅᔭᕆᐊᖃᖅᐳᑦ ᐃᓱᒪᓕᐅᕆᔪᖃᓕᕌᖓᑦ ᐊᒃᑐᐃᔾᔪᑕᐅᔪᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ. 

ᓄᑕᖅᑲᑦ ᓂᐱᖏᑦ

ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᐊᖏᖃᑎᒌᒍᑎᒥ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ ᐅᖃᖅᓯᒪᖕᒪᑦ ᒪᒃᑯᒃᑐᓕᒫᑦ ᐱᔪᓐᓇᕐᓂᖃᖅᑐᐃᓐᓇᐅᓂᖏᓐᓂᒃ ᐃᓱᒪᒋᔭᖏᓐᓂᒃ ᐅᖃᕆᐊᒃᓴᖅ ᐱᔪᒪᔭᕆᐊᒃᓴᕐᓘᓐᓃᑦ ᐱᒻᒪᕆᐅᔪᓂᒃ ᐱᓕᕆᓕᕌᖓᑕ ᐊᒃᑐᐃᔾᔪᑎᒋᔭᖏᓐᓂᒃ, ᒪᓕᒃᑕᐅᕙᒃᖢᑎᒃ ᐱᔪᓐᓇᓂᕆᔭᖏᑦ (ᖁᓛᓃᑦᑐᖅ ᑕᐃᒎᓯᖅᑕᖅ ᑕᑯᓗᒍ).  

ᐊᖏᖃᑎᒌᒍᑎ ᑐᑭᓯᓇᑦᑎᐊᖅᑐᒥᒃ ᐅᖃᖅᓯᒪᖕᒥᖕᒪᑦ ᒐᕙᒪᒃᑯᑦ ᐃᓱᒪᓕᐅᕆᐊᖃᕐᓂᖏᓐᓂᒃ ᒪᒃᑯᒃᑐᑦ ᐃᓱᒪᒋᔭᖏᓐᓂᒃ ᐅᖃᐅᓯᖃᓕᕌᖓᑦ ᐱᔾᔪᑕᐅᑎᓪᓗᒍ. ᑕᐃᒪᐃᓕᐅᓕᕌᖓᑕ, ᐅᖃᐅᓯᕆᓲᕗᑦ ᐃᓗᐊᓃᑦᑐᖅ ᓄᑕᕋᖅ ᐅᖃᕈᒪᔭᒥᓂᒃ ᐅᖃᕐᓂᕋᖅᖢᑎᒍᑦ. 

ᓄᑕᕋᐅᑉ ᓂᐱᖓ ᐃᓱᒪᒋᔭᒃᓴᑦᑎᐊᕙᒻᒪᕆᐊᓘᓲᖑᖕᒪᑦ. ᑭᒡᒐᖅᑐᐃᓲᖑᖕᒪᑦ ᓄᑕᖅᑲᑦ ᐃᓱᒪᔾᔪᓯᖓᓐᓂᒃ ᐱᔾᔪᑕᐅᙱᖔᕐᓗᑎᒃ ᐃᓐᓇᐃᑦ ᐃᓱᒪᓕᐊᕆᔭᖏᑦ. ᐃᒪᓐᓇᖔᕐᓕ, ᐃᓕᑕᖅᓯᐅᒪᖕᒪᑦ ᐃᓛᓐᓂᒃᑯᑦ ᒪᒃᑯᒃᑐᑦ ᓴᖅᑭᑦᑎᓪᓚᕆᒍᓐᓇᕐᓂᖏᓐᓂᒃ ᐱᔭᕆᐊᖃᖅᑕᖏᓐᓂᒃ ᖃᓄᐃᙱᑦᑎᐊᕈᓯᖏᓐᓄᑦ ᑐᕌᖓᔪᓂᒃ.

ᐃᓱᒪᒋᓪᓗᒋᑦ ᓄᑕᖅᑲᑦ ᓂᐱᖏᑦ ᐱᒻᒪᕆᐅᖕᒪᑦ ᑕᐃᒃᑯᓄᖓ ᐃᓱᒪᓕᐅᕆᔨᓄᑦ ᐊᒃᑐᐃᔾᔪᑕᐅᑐᐃᓐᓇᕆᐊᖃᖃᑦᑕᕐᓂᖏᓐᓄᑦ ᒪᒃᑯᒃᑐᓄᑦ ᐃᓅᓯᓕᒫᖏᓐᓄᑦ. ᓄᑕᖅᑲᑦ ᓂᐱᖏᑦ ᐊᖏᕈᑕᐅᓲᖑᖕᒪᑦ ᓄᑕᖅᑲᑦ ᐃᓚᐅᔪᒪᔪᒪᑐᐃᓐᓇᕆᐊᖃᓲᖑᓂᖏᓐᓂᒃ ᐃᓱᒪᓕᐊᕆᔭᐅᔪᓂᒃ ᒐᕙᒪᒃᑯᓐᓂ ᑖᒃᑯᐊ ᓄᑕᖅᑲᑦ ᐱᔾᔪᑕᐅᓪᓗᑎᒃ. ᐊᖏᕈᑕᐅᓲᖑᖕᒪᑕ  ᒪᒃᑯᒃᑐᑦ ᖃᓄᐃᓕᐅᕐᓗᑎᒃ ᐃᑲᔪᕆᐊᖃᕐᓂᖏᓐᓂᒃ - ᑎᓕᐅᕈᑕᐅᙱᓪᓗᑎᒃ - ᐃᓱᒪᓕᐊᕆᔭᐅᔪᓂᒃ - ᐃᖏᕐᕋᑦᑎᐊᕈᓐᓇᖅᑎᑕᐅᔪᓂᒃ.

ᒪᒃᑯᒃᑐᑦ

ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᖅᑎᒍᑦ, ᒪᒃᑯᒃᑑᓂᕋᖅᑕᐅᕗᑦ 16-ᓂ 18-ᓄᑦ ᑎᑭᓪᓗᒍ ᐅᑭᐅᓖᑦ. ᑭᓯᐊᓂ, ᐱᖁᔭᖅ ᓇᓗᓇᐃᖅᓯᓯᒪᖕᒥᖕᒪᑦ ᑭᑭᑕᐅᓯᒪᔪᓂᒃ 18 ᐅᖓᑖᓂ ᐅᑭᐅᓖᑦ ᐱᓕᕆᐊᖑᔪᑦ ᒪᒃᑯᖕᓂᕋᖅᑕᐅᔪᓐᓇᕐᒥᖕᒪᑕ. ᐃᒪᓐᓇ ᐅᑭᐅᖃᖅᑎᒋᔪᑦ ᒪᒃᑯᖕᓂᕋᖅᑕᐅᔪᓐᓇᕐᒥᖕᒪᑕ 19-ᒥ 21-ᒧᑦ ᐃᒪᐃᑦᑑᑐᐊᖅᐸᑕ:

  • ᑐᒃᓯᕋᖅᓯᒪᑐᐊᖅᐸᑕ ᐱᔨᑦᑎᕋᖅᑕᐅᓯᒪᑐᐊᖅᐸᑕᓘᓐᓃᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᒃᑯᑦ ᐊᔪᙱᖃᑕᐅᓗᑎᒡᓗ ᐱᖁᔭᖅ ᒪᓕᒡᓗᒍ ᐃᓕᓐᓂᐊᖅᑎᐅᖃᑕᐅᓗᑎᒡᓗ
  • ᐸᓯᔭᒃᓴᙳᖅᑎᑕᐅᓯᒪᒃᐸᑕ ᐱᕋᔭᒃᓂᑰᒃᐸᑕᓗ ᒪᓕᒡᓗᒍ ᒪᒃᑯᒃᑐᑦ ᐱᕋᔭᒃᓯᒪᔪᑦ ᒪᓕᒐᓕᕆᔨᒃᑯᑦ ᐱᖁᔭᒃᑯᑦ ᐅᕝᕙᓘᓐᓃᑦ ᒪᒃᑯᒃᑐᑦ ᐸᓯᔭᒃᓴᙳᖅᑎᑕᐅᓯᒪᔪᑦ ᐱᖁᔭᒃᑯᑦ ᐸᓯᔭᒃᓴᙳᖅᑎᑕᐅᕌᓂᒃᓯᒪᙱᑦᑐᑦ ᐸᓯᔭᒃᓴᐅᔾᔪᑎᖃᕐᒪᖔᑕᓗ ᖃᐅᔨᔭᐅᙱᑦᑐᑦ
  • ᐱᕋᔭᒃᓯᒪᒃᐸᑕ ᐸᓯᔭᒃᓴᐅᔪᓪᓗ ᖃᐅᔨᔭᐅᓯᒪᓗᑎᒃ ᒪᓕᒡᓗᒍ ᒪᒃᑯᒃᑐᑦ ᐱᕋᔭᒃᓯᒪᔪᑦ ᒪᓕᒐᓕᕆᔨᒃᑯᑦ ᐱᖁᔭᖅ ᐅᕝᕙᓘᓐᓃᑦ ᒪᒃᑯᒃᑐᑦ ᐸᓯᔭᒃᓴᙳᖅᑎᑕᐅᓯᒪᔪᑦ ᐱᖁᔭᖅ ᐊᒻᒪ ᐃᖅᑲᖅᑐᐃᕕᒃᑯᑦ ᖃᓄᐃᓕᐅᖁᔭᐅᓯᒪᔪᓂᒃ ᐊᓂᒍᐃᓯᒪᙱᑉᐸᑕ
  • ᑎᒥᒥᒍᑦ, ᐃᓱᒪᒥᒍᑦ ᐱᒡᒐᕈᑎᖃᔅᓲᔭᖅᐸᑦ, ᐃᓱᒪᔪᓐᓇᕐᓂᒃᑯᑦ ᐅᕝᕙᓘᓐᓃᑦ ᐃᒃᐱᒋᔭᒥᒍᑦ ᐊᔪᕈᑎᖃᖅᐸᑕ

ᑭᑭᑕᐅᖃᑕᐅᓯᒪᔪᖅ ᐃᓚᖓ ᐃᓄᒃ ᐅᑭᐅᖃᖅᐸᑦ 19 ᐊᒻᒪ 25 ᐊᑯᓐᓂᖓᓐᓂ ᐃᑲᔪᖅᑕᐅᕐᔪᐊᖅᓯᒪᒃᐸᑕ ᓄᑕᖅᑲᑦ ᐊᒻᒪ ᖃᑕᙳᑎᒌᑦ ᐱᖁᔭᒃᑯᑦ. ᐃᓄᒃ ᐃᓱᒪᒋᔭᐅᒃᐸᑦ ᒪᒃᑯᒃᑑᓇᓱᒋᔭᐅᓗᓂ ᑭᒡᒐᖅᑐᖅᑎᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᖅᑎᒍᑦ, ᒪᓕᒐᖅᑎᒍᑦ ᐃᑲᔪᕈᓐᓇᑦᑎᐊᖅᑕᕗᑦ.