ᐃᖅᑲᓇᐃᔭᖅᑎᕗᑦ


 

ᖁᓛᓂ ᑎᑎᕋᖅᓯᒪᔪᑦ ᐅᖃᐅᓯᖃᖅᐳᑦ ᐊᑖᓂ ᑎᑎᕋᖅᓯᒪᔪᓂᒃ.

ᑕᒪᕐᒥᑦᑎᐊᖅ ᐃᖅᑲᓇᐃᔭᖅᑎᕗᑦ ᑭᒡᒐᖅᑐᐃᔨᐅᔪᑦ ᑲᑐᔾᔨᖃᑎᒌᒡᕕᑦᑎᓐᓂ: ᑐᙵᓇᖅᑐᑦ, ᐱᓕᕆᖃᑎᖃᑦᑎᐊᓲᑦ ᐃᑲᔪᖅᓱᐃᑦᑎᐊᖅᐸᒃᖢᑎᒡᓗ. ᑖᓐᓇ ᐱᓕᕆᔾᔪᓯᖅ ᖃᐅᔨᒪᔾᔪᑎᒋᓲᕗᑦ ᖃᓄᐃᓕᐅᕐᓗᑕ ᐱᓕᕆᖃᑎᒌᒍᓐᓇᕐᒪᖓᑦᑕ ᖃᓄᐃᓕᐅᖅᖢᑕᓗ ᓄᑕᖅᑲᓂᒃ ᐱᓕᕆᖃᑎᖃᓲᖑᖕᒪᖔᑦᑕ, ᒪᒃᑯᒃᑐᓂᒡᓗ ᖃᑕᙳᑎᖏᓐᓂᒡᓗ. ᐊᐅᓚᑕᐅᔪᐃᓐᓇᐅᔪᒍᑦ ᒪᒃᑯᒃᑐᑦ ᓄᓇᕗᒥᐅᑕᑦ ᐅᒃᐱᕆᓂᑦᑎᓐᓄᑦ ᓂᕆᐅᒃᐳᒍᓪᓗ ᓯᕗᓂᒃᓴᖃᑦᑎᐊᓛᖁᓪᓗᑎᒍᑦ.  

ᐃᓱᒪᔪᒪᓲᖑᖕᒥᒐᑦᑕ ᐃᓱᒪᒋᔭᑦᑕ ᐅᖓᑎᓗᐊᒃᑲᓐᓂᖓᓄᑦ ᐱᓕᕆᑎᑦᑎᑯᓘᔭᓕᖅᐸᒃᖢᑕᓗ!  ᑕᐃᒪᐃᓐᓂᖓᓄᑦ ᐅᕙᑦᑎᑦᑕ ᒥᒃᓵᓄᑦ ᑎᑎᕋᑐᐃᓐᓇᙱᖦᖢᑕ, ᐊᓯᑦᑕ ᒥᒃᓵᓄᑦ ᑎᑎᕋᖔᑲᑕᓕᓚᐅᖅᐳᒍᑦ.  ᐊᓕᐊᓇᐃᒍᓱᑦᑎᐊᖅᖢᑕ ᓴᖅᑭᓐᓂᐊᓕᖅᑕᕗᑦ ᐃᖅᑲᓇᐃᔭᖅᑎᑦᑎᐊᕙᒻᒪᕆᐊᓗᒃᐳᑦ!

 
images

ᔭᐃᓐ ᐸᐃᑦᔅ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ

ᔭᐃᓐ ᐅᓂᑳᖓ ᐱᒋᐊᓚᐅᖅᐳᖅ ᒥᓯᓵᒍᐊ, ᐋᓐᑎᐅᕆᐅᒥᑦ ᓂᐸᐃᑦᑐᒥᑦ ᐊᖏᕐᕋᒥᓂᒃ ᑎᒍᐊᕐᑎᒥᓂᒃ. ᖁᕕᐊᒋᔭᖃᐃᓐᓇᐅᔭᖅᑐᖅ ᐃᑲᔪᖃᑦᑕᕐᓂᕐᒧᑦ ᒪᒃᑯᒃᑐᓂᑦ, ᐱᒋᐊᕈᑎᒋᓚᐅᕐᐹ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓄᓕᕆᓂᕐᒧᑦ Ryerson ᓯᓚᑦᑐᕐᓴᕐᕕᒡᔪᐊᒥᑦ. ᐃᖃᓇᐃᔮᒥᓂᒃ ᐱᒋᐊᓕᓵᖅᑎᓪᓗᒍ, ᑭᐅᓚᐅᕐᓯᒪᖕᒪᑦ ᐅᑭᐅᕐᑕᖅᑐᒧᐊᖁᔭᐅᓕᕐᒪᑦ ᓅᒋᓪᓗᓂ ᕙᐃᑦᕼᐅᐊᔅᒧᑦ.

ᐃᖃᓇᐃᔭᖅᑎᓪᓗᒍ ᔫᑳᓐᒥᑦ, ᔭᐃᓐ ᐊᒃᑐᖅᓯᓯᒪᔪᖅ ᐃᓄᒋᐊᑦ ᐃᓅᓯᖏᓐᓂᑦ ᐊᒻᒪᓗ ᐃᓚᖏᓪᓗ ᐃᑲᔫᑎᖃᖃᑦᑕᕐᓂᖏᓐᓄᑦ ᓄᑕᕋᕐᓂᑦ ᓴᐳᔾᔨᓂᕐᒥᑦ, ᐃᓄᓕᕆᔨᒃᑯᑦ, ᐱᕐᕈᓗᐊᕿᕐᔪᐊᕐᑐᓄᑦ ᖃᐅᔨᓴᖅᑐᓕᕆᔩᑦ, ᒪᒃᑯᒃᑐᓄᑦ ᒪᓕᒐᓕᕆᔨᒃᑯᑦ, ᐊᒃᓱᕈᕐᓇᖅᑐᓃᑦᑐᓄᑦ ᐋᖀᓇᓱᒃᑐᑦ, ᐊᒻᒪᓗ ᐅᑎᕐᑎᑎᓇᓱᐊᕐᑐᓪᓗ ᓄᓇᓕᖕᓂᑦ ᑲᑎᒪᔨᖏᑦ. ᐃᖃᓇᐃᔮᒥᓂᒃ, ᖃᐅᔨᒪᔨᑕᖃᖃᑦᑕᓚᐅᕐᒪᑦ ᐊᖏᔪᖄᕐᒥᑦ ᐱᐅᓛᒥᑦ ᐱᓕᕆᐊᒃᓴᖃᖁᔨᔪᒥᑦ ᓄᑕᕋᕐᓄᑦ.

Winnie the pooh ᐊᒻᒪᓗ Star Wars−ᓂᑦ ᐊᓕᐊᓇᐃᒍᓱᒃᑐᑦ ᐅᕐᓄᓂᖅᐹᓂᑦ ᐱᔭᐅᔪᒪᕙᒃᑐᑦ, ᖁᕕᐊᒋᕙᓪᓕᐊᑐᐃᓐᓇᕐᑕᖓ ᐊᔾᔨᒌᖏᕈᓘᔭᖃᑦᑕᕐᓂᖓ ᐃᓅᓯᕐᒥᑦ ᐊᐳᕐᐸᓪᓕᐊᔭᖏᑦ. ᐅᐃᖓ ᕌᔅ, ᐊᒻᒪᓗ ᕿᒻᒥᖓ ᒋᔅᒨ ᐃᑲᔪᖅᓱᑦᑎᐊᕐᑐᑦ ᓅᓚᐅᕐᓂᖓᓄᑦ ᓄᓇᕗᒻᒧᑦ. ᔭᐃᓐ ᑲᔪᓯᑎᑦᑎᑦᑎᐊᕐᑐᑦ ᐱᔨᑦᑎᕋᕐᓂᕐᒧᑦ ᒪᒃᑯᒃᑐᓄᑦ ᓄᓇᕗᒻᒥᐅᓂᑦ ᐱᔪᓐᓇᐅᑎᖏᓪᓗ ᐃᑲᔪᖅᓱᖅᑕᐅᑦᑎᐊᕐᖢᑎᒃ.

 

images

ᔭᕗᕆ ᑯᕋᔅ
ᑲᒪᔨᒻᒪᕆᒃ

ᔭᕗᕆ ᖃᐅᓱᐃᑦᑐᕐᒥ ᐱᕈᖅᓴᓚᐅᖅᓯᒪᔪᖅ ᐊᒻᒪ (ᐅᐱᒋᔭᖃᑦᑎᐊᖅᑐᖅ) ᑭᖑᕚᖃᕐᓂᖓᓂᒃ ᐃᓄᖕᒥᒃ ᐊᒻᒪ ᐋᕝᕆᑲᒥᐅᑕᒥᒃ. ᔭᕝᕆᐅᑉ ᐊᓈᓇᖓ ᐊᖑᓇᓱᒃᑎᓪᓚᕆᐊᓗᓚᐅᖅᓯᒪᔪᖅ. ᐊᓈᓇᒥᑎᑐᑦ, ᐊᐅᓪᓚᖅᓯᒪᔭᕆᐊᒃᓴᖅ ᖁᕕᐊᒋᑦᑎᐊᕐᒥᔭᖓ ᐊᖑᓇᓱᒋᐊᕐᓂᕐᒥᒡᓗ. ᑭᓯᐊᓂ, ᐃᖃᓗᒐᓱᖕᓂᖅ ᖁᕕᐊᒋᓗᐊᙱᑕᖓ (ᔭᕝᕆᒥ ᐊᔾᔨᓕᐅᖅᓯᒪᔪᖅ 

ᔭᕝᕆ ᖃᐅᓱᐃᑦᑐᒥ ᐊᐅᓪᓚᓚᐅᖅᓯᒪᕗᖅ 18-ᓂᒃ ᐅᑭᐅᖃᓕᖅᑎᓪᓗᒍ ᐅᐊᐃᑦᕼᐅᐊᔅ-ᒧᑦ ᐱᕋᔭᒃᑐᓕᕆᓂᕐᒥ ᐃᓕᓐᓂᐊᕆᐊᖅᖢᓂ ᔫᑳᓐᒥ ᓯᓚᑦᑐᖅᓴᕐᕕᖕᒥ. ᐃᓕᑕᕆᔭᐅᔾᔪᑎᑖᕇᖅᓯᒪᓕᕐᒪᑦ, ᔭᕝᕆ ᐃᖃᓗᖕᓄᑦ ᓅᓚᐅᖅᓯᒪᕗᖅ. ᑕᐃᒪᙵᓂ, ᐃᖅᑲᓇᐃᔮᖃᓕᓚᐅᖅᓯᒪᕗᖅ ᓄᓇᓕᖕᓂ ᐱᔨᑦᑎᕋᖅᑎᐅᓪᓗᓂ ᓄᓇᕗᑦ ᒐᕙᒪᒃᑯᑦ ᐃᓄᓕᕆᔨᒃᑯᓐᓄᑦ.

ᔨᐊᕝ ᖃᑕᙳᑎᖏᑦ, ᐃᓚᐅᓪᓗᑎᒃ ᐱᖓᓱᑦ ᕿᑐᕐᖓᖏᑦ, ᐱᕐᔪᐊᕆᔭᖏᑦ ᑲᒪᒋᑦᑎᐊᕐᖢᒋᓪᓗ ᐱᓕᕆᕐᔪᐊᕐᓇᕐᖢᓂ ᓯᓚᑖᓂ ᐃᖅᑲᓇᐃᔮᖓᑕ. ᐊᖑᓇᓱᖕᓂᖅᑐᑦᑕᐅᖅ ᖁᕕᐊᒋᔭᖃᕆᓪᓗᓂ ᕚᔅᑭᑦᕚᓪ, ᕗᕆᔅᐱ-ᒥᒃ ᐃᒋᑦᑎᑲᑕᒃᑐᓂᒃ ᐊᑯᖅᓯᑲᑕᒃᑐᓂᒡᓗ, ᐅᖃᓕᒫᓕᖅᐸᒃᖢᓂᓗ Star Wars ᐱᔭᒃᓴᖃᙱᓗᐊᓕᕌᖓᑦ. 

ᔭᕝᕆ ᑭᒡᒐᖅᑐᐃᔨᐅᓕᓚᐅᖅᓯᒪᕗᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᐊᓂ 2015-ᒥ ᐅᐱᕐᖔᒃᑯᑦ. ᐊᕐᕌᒍᒐᓴᖕᓂ ᑲᑐᔾᔨᖃᑎᒌᒦᓚᐅᕐᖢᓂ, ᐱᔪᒪᓂᖓ ᐃᑲᔪᕐᓂᖅ ᐊᓯᒥᓂᒃ ᑭᒡᒐᖅᑐᐃᕝᕕᖓᑕ ᐱᔾᔪᑎᖏᓐᓂ ᐱᕈᕐᔪᐊᑐᐃᓐᓇᖅᑐᖅ.

 

images

ᓕᓐ ᒫᑦ
ᑐᑭᒧᐊᖅᑎᑦᑎᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᓄᑦ ᐱᔨᑦᑎᕋᖅᑎᓄᑦ - ᒫᓐᓇᐅᔪᖅ ᓄᑕᕋᒃᓴᖃᕐᓂᕐᒧᑦ ᓄᖅᑲᖓᔪᖅ

ᓕᓐ ᐃᓱᒪᑐᕗᖅ, ᖃᐅᔨᒪᓂᖃᑦᑎᐊᖅᖢᓂ, ᐱᓕᕆᐊᖃᕐᕕᖃᒻᒪᕆᒍᒪᕙᒃᖢᓂᓗ ᐱᓕᕆᐊᕆᕙᒃᑕᒥᓂᒃ. ᑖᓐᓇ ᐃᑲᔪᕐᓂᖃᑦᑎᐊᖅᐸᒃᐳᑦ ᐊᑐᕐᓂᖃᓪᓚᕆᒃᐳᕐᓗ ᑎᑎᕋᕐᕕᑦᑎᓐᓄᑦ! ᓕᓐ ᓄᑕᕋᐅᓚᐅᖅᓯᒪᕗᖅ ᐅᕙᓂ, ᐊᔨᐅᓪᑕ, ᒥᑭᑦᑐᑯᓗᒃ ᓄᓇᓕᒃ ᐊᓐᑎᐅᕆᐅᒥ. ᐱᕈᖅᓴᓚᐅᖅᐳᖅ ᐃᒡᓗᕐᔪᐊᒥ ᐊᖓᔪᖅᑳᒥᓃᖦᖢᓂ, ᐊᓂᒥᓂ, ᓂᖏᐅᕐᒥᓂᓗ ᐃᑦᑐᕐᒥᓂᓗ. ᐊᖓᔪᖅᑳᒥᓂᒃ ᐱᔪᒃᓯᑎᑕᐅᓯᒪᕗᖅ ᐱᔪᒪᓂᕆᕙᒃᑕᒥᓂᒃ ᐆᒃᑐᕈᒪᐃᓐᓇᐅᔭᖅᖢᓂ ᓄᑖᓂᒃ ᐱᓕᕆᓚᐅᖅᓯᒪᙱᑕᒥᓂᒃ.

ᓯᓚᑦᑐᖅᓴᕐᕕᒡᔪᐊᒥ, ᓕᓐ ᐱᓚᐅᖅᐳᖅ ᐅᐱᒋᔭᐅᓂᕐᒥᒃ Bachelor−ᖃᓕᕐᓂᕐᒧᑦ ᖃᓪᓗᓈᑑᒧᑦ ᖃᓄᐃᓕᐅᖅᑕᐅᕙᓚᐅᖅᑐᓄᓪᓗ ᓄᓇᕐᔪᐊᓕᒫᒥᓗ ᐊᔪᕈᓐᓃᖅᓴᕈᓐᓇᕐᓂᕐᒧᑦ ᓇᓗᓇᐃᒃᑯᑕᕐᒥᒃ. ᑭᖑᓂᒃᑲᓐᓂᐊᒍᑦ ᓂᐅᕙᐅᓐᓛᓐᑦ−ᒧᙵᐅᓚᐅᖅᐳᖅ ᐱᔭᖅᑐᖅᖢᓂ Master’s ᐊᓂᒍᐃᓂᕐᒧᑦ ᓇᓗᓇᐃᒃᑯᑕᕐᒥᒃ ᐅᓂᒃᑳᖅᑐᐊᓄᑦ. ᐊᓕᐊᓇᐃᒋᔭᓕᒃ ᓄᒃᑕᖅᖢᓂ ᐱᓕᕆᖃᑦᑕᖅᓯᒪᓪᓗᓂᓗ ᐊᔪᕈᓐᓃᖅᓴᖃᑦᑕᖅᓯᒪᓪᓗᓂᓗ ᐱᔪᒥᓇᖅᑐᓂ ᐃᓂᓂ ᐊᓯᖏᓐᓂ ᓄᓇᕐᔪᐊᒥ ᓄᓇᒋᔭᐅᔪᓂ, ᐃᓚᒋᔭᐅᓪᓗᓂ ᐃᙵᓚᒥᐅᓂ ᐅᔭᖅᑲᒥᒃ ᓴᓇᓯᒪᔪᒥᒃ ᐃᓂᒋᔭᐅᕙᒃᑐᒥᒃ. ᑕᒪᓐᓇ ᑕᒪᕐᒥᒃ ᑐᑭᖃᖅᐳᖅ ᐃᒪᓐᓇ, ᓕᓐ ᐅᓂᒃᑳᑦᑎᐊᔪᔪᒻᒪᕆᐅᕗᖅ!

ᓕᓐ ᓄᓇᕗᒻᒥᒃ ᐊᖏᕐᕋᖃᖅᓯᒪᓂᕋᖅᓯᒪᓕᖅᐳᖅ 2011−ᖑᓚᐅᕐᓂᖓᓂᑦ. ᐱᖓᓱᓂᒃ ᐱᐅᔪᑯᓄᖕᓂ ᕿᑐᕐᖓᓕᒃ. ᐱᕕᖃᕐᕕᒋᖃᑦᑕᖅᑕᖓ ᓂᒃᓯᒃᑕᕐᓂᖅ, ᐊᐅᓪᓚᕐᓂᖅ ᓄᓇᒧᑦ, ᓴᐃᓕᓂᕐᓘᓐᓃᑦ ᐅᖃᓕᒫᕐᖢᓂ.

ᓈᓯ ᐱᓗᕆᓐ
ᖃᕋᓴᐅᔭᑎᒎᖓᔪᓂᒃ ᖃᐅᔨᓴᖅᑎᒻᒪᕆᒃ

ᓈᓐᓯ ᓄᓇᓕᕋᓛᓂᒃ ᐱᕈᖅᓴᓂᑯᕕᓂᖅ Trois- Rivières, Québec ᐅᖓᓯᒋᓗᐊᙱᑕᖓᓂᒃ. ᓄᓇᐃᑦ ᐅᐸᓚᐅᖅᓯᒪᙱᑕᖏᑦ ᑕᑯᔭᕆᐅᕈᒪᖃᑦᑕᖅᑕᒻᒪᕆᐊᓗᖏᑦ ᐃᓕᖅᑯᓯᖃᖃᑎᒌᙱᑦᑐᓪᓗ ᓄᓇᕗᒧᐊᓚᐅᖅᓯᒪᕗᖅ 2006-ᖑᑎᓪᓗᒍ. ᐊᑯᓂᐅᙱᑦᑐᖅ ᐃᓅᖃᓐᓂᓈᖅᓯᒐᒥ ᐃᓄᖕᓂᒃ ᐱᐅᒃᓴᓕᓚᐅᖅᑐᖅ, ᓄᓇᖓᓐᓂᒃ ᐊᒻᒪ ᐃᓅᓯᕆᔭᖓᓐᓂᒃ. ᐊᐅᓪᓚᕋᔪᐃᓐᓇᖅᐳᖅ ᓱᓕ ᐅᑭᐅᖅᑕᖅᑐᒦᓕᕋᓗᐊᖅᖢᓂ ᐃᖏᕐᕋᔾᔪᑎᖃᖅᐸᒃᖢᓂ ᓯᑭᑑᒃᑯᑦ, ᖃᔭᒃᑯᑦ, ᐊᐅᓪᓛᖅᓯᒪᓂᒃᑯᑦ ᐊᒻᒪ ᐱᓱᔪᖕᓂᒃᑯᑦ/ᐱᓱᕋᔭᖕᓂᒃᑯᑦ.

ᓈᓐᓯ ᓄᑕᖅᑲᓂᒃ ᐱᓕᕆᖃᑎᖃᖅᖢᓂ ᖁᕕᐊᒋᑦᑎᐊᖅᑕᖓ ᓄᑕᖅᑲᑦ ᐱᓂᕐᓗᒃᑕᐅᖃᑦᑕᖁᙱᖦᖢᓂᒋᑦ ᐃᓕᓐᓂᐊᖅᑕᒥᓂᒃ ᐱᓕᕆᐊᕆᓛᕈᒪᔭᒥᓂᒡᓗ ᐊᔭᐅᖅᑐᐃᔾᔪᑎᖃᑦᑎᐊᖅᑐᖅ. ᐃᓕᓴᕆᔭᐅᔾᔪᑎᑖᖅᓯᒪᔪᖅ ᓴᓇᙳᐊᖅᑎᐅᓂᕐᒧᑦ ᑎᑎᖅᑐᒐᖅᑎᐅᓂᕐᒧᓪᓗ ᐃᓄᖕᓂ ᐃᓱᒪᓕᕆᓂᕐᒥᒃ (MA). ᐃᓕᑕᕆᔭᐅᔾᔪᑎᖃᖅᑐᖅ ᐃᓕᓐᓂᐊᖅᑎᑦᑎᔪᓐᓇᖅᖢᓂ ᒪᒃᑯᒃᑐᓂᒃ ᐊᒻᒪ ᐃᖅᑲᓇᐃᔭᖅᑎᐅᖃᑎᒥᓂᒃ. ᑕᐃᒃᑯᐊᓗ ᐃᓚᓕᐅᔾᔭᐅᖃᑕᐅᒋᓪᓗᑎᒃ ᐊᑑᑎᓖᑦ ᐃᓅᓯᕐᒥᒃ ᑭᐱᓯᑦᑕᐃᓕᒪᑎᑦᑎᓂᕐᒧᑦ ᐃᓕᓐᓂᐊᖅᓯᒪᔪᑦ (ASIST), ᖃᓄᐃᙱᑦᑎᐊᕐᓗᑎᒃ ᐱᓕᕆᔨᐅᖃᑎᒌᑦ ᐃᓕᓐᓂᐊᖅᑎᑕᐅᔪᑦ, ᐊᒻᒪ ᐱᓂᕐᓗᒃᑕᐅᓲᑦ ᖃᐅᔨᓴᖅᑕᐅᔭᕆᐊᖃᕐᓂᖏᓐᓂᒃ ᐃᓕᓐᓂᐊᖅᑎᑕᐅᔪᑦ.

ᓈᓐᓯ ᐱᙳᐊᖅᑕᐅᕙᒃᑐᓂᒃ ᐱᙳᐊᖃᑕᐅᒃᑲᒻᒪᕆᐊᓗᒃ ᖃᑕᙳᑎᒌᓪᓗ ᐅᓄᖅᓯᕙᓪᓕᐊᑐᐃᓐᓇᖅᖢᑎᒃ ᕿᒻᒥᕐᓂᒡᓗ ᐊᖏᔫᑎᓂᒃ ᐱᐅᒃᓴᖅᑐᒻᒪᕆᐊᓘᓪᓗᓂ.  ᓈᓚᑦᑎᐊᒃᑲᒻᒪᕆᐊᓗᒃ ᐃᓄᐃᓪᓗ ᓂᓪᓕᕈᓐᓇᕐᓂᖏᑦ ᖁᓱᔭᕌᖓᑕᑐᓴᖅᑕᐅᑦᑎᐊᖅᑎᑦᑎᕙᒃᖢᓂ. ᐃᓛᓐᓂᒃᑯᑦ, ᐃᓄᑑᑦᑎᐊᓕᓚᐅᑲᒃᐸᒃᖢᓂ. ᐃᓄᑑᑎᓪᓗᒍ ᓈᒻᒪᖅᑯᖕᓂᕈᖕᓂ, ᐊᒃᓱᕈᙱᐅᔭᕐᓗᓂ ᐅᖃᓕᒫᖅᑐᖅ ᑳᐱᑐᖅᑐᕐᓘᓐᓃᑦ ᑕᑯᓇᔭᖅᑕᒃᓴᕆᕙᔅᓯ.

 
Staff Image

ᑲᐃᑎ ᑎᑦᕼᐊᒻ
ᐊᐅᓚᑦᓯᔨ ᐃᒻᒥᑰᖅᑐᓄᑦ ᑭᒐᒐᖅᑐᐃᓂᕐᒧᑦ ᐱᔨᑦᑎᕋᖅᑎᓄᑦ

ᑲᐃᑎ ᐱᕈᖅᓴᓂᑯ ᑲᐃᑉ ᐳᕆᑎᓐ, ᓅᕙ ᓯᑰᑎᐊᒥ ᐱᖓᓱᓂᒃ ᐊᖓᔪ/ᓄᑲᖏᓐᓂᒃᓗ, ᐱᖓᓱᑦ ᐊᓂᖏᑦ ᐅᓄᖅᑐᓪᓗ, ᐅᓄᖅᑐᑦ ᐊᕐᓇᖃᑎᖏᑦ/ᐊᖑᑎᖃᑎᖏᑦ.

ᐃᓕᓐᓂᕌᓂᓚᐅᖅᑎᓪᓗᒍ ᖁᑦᑎᖕᓂᖅᓴᒥ ᐃᓕᓐᓂᐊᕐᓂᕐᒥ, ᑲᐃᑎ ᐃᓕᓐᓂᐊᒃᑲᓐᓂᓕᕐᖢᓂ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᖃᐅᔨᓴᕐᓂᖅ ᐆᒪᔪᐃᑦ ᐃᓕᖅᑯᓯᖏᓐᓂᒃ ᓴᐃᓐᑦ ᕗᕌᓐᓯᔅ ᓵᕕᐊᕐ ᓯᓚᑦᑐᖅᓴᕐᕕᖕᒥ. ᐱᖃᕐᒥᔪᖅ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓄᓕᕆᓂᕐᒧᑦ bᓪHᐆᓯ ᓯᓚᑦᑐᖅᓴᕐᕕᖕᒥ ᐊᒻᒪ ᐊᕐᕌᒍᓄᑦ ᑎᓴᒪᓄᑦ ᐃᓕᓐᓂᐊᕌᓂᒍᓯᐊᖅ ᓴᓇᔪᓕᕆᓂᖅ ᐊᔪᕈᑎᖃᖅᑐᓄᑦ ᐊᐅᓚᑦᑎᓂᕐᒥ ᓯᓚᑦᑐᖅᓴᕐᕕᖓᓂ ᐅᐊᖕᓇᖅᐸᓯᖅ ᐳᕆᑎᔅ ᑲᓚᒻᐱᐊ, ᖁᕕᐊᒋᔭᖓᒍᑦ ᐃᑲᔪᕐᓂᕐᒥ ᐃᓄᖕᓂᒃ ᐱᒋᐊᕐᖢᓂ ᑲᐃᑎᐅᑉ ᐱᔪᒪᓂᖓ ᐊᐅᓪᓚᑲᑕᒃᓗᓂ ᓄᓇᕗᒻᒧᐊᖅᑎᖦᖢᓂᐅᒃ ᐊᐅᔭᖏᓐᓂ 2001, 2002, ᐊᒻᒪ 2003. ᐱᐅᒋᓂᖓᓄᑦ ᐅᑭᐅᖅᑕᖅᑐᖅ ᑲᐃᑎ ᐃᖃᓗᐃᑦᒥ ᐊᖏᕐᕋᖃᕐᓂᕋᓕᖅᑐᖅ ᑕᐃᒪᙵᑦ 2004−ᒥ.

ᐃᖅᑲᓇᐃᔭᓕᓚᐅᙱᑎᓪᓗᒍ ᑎᑎᕋᕐᕕᑦᑎᓐᓂ, ᐃᖅᑲᓇᐃᔭᓚᐅᖅᑐᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ  ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑎᒃᑯᑦ ᓄᓇᕗᒻᒥ, ᐃᑲᔪᕐᖢᒋᑦ ᐃᓄᐃᑦ ᐱᔭᕇᖅᓵᓕᓂᕐᓄᑦ ᐊᑦᑕᕐᓇᙱᑦᑐᒃᑯᓪᓗ ᐅᑎᕐᓂᕐᒧᑦ ᐃᖅᑲᓇᐃᔮᖏᓐᓄᑦ ᐋᓐᓂᐊᓚᐅᖅᑎᓪᓗᒋᑦ ᐋᓐᓂᓚᐅᖅᑎᓪᓗᒋᓪᓘᓐᓃᑦ.

ᑲᐃᑎ ᐱᓕᕆᓗᐊᖃᑦᑕᙱᑦᑐᖅ ᐅᐃᒋᔭᒥᓄᑦ ᒪᕐᕉᖕᓄᓪᓗ ᕿᑐᕐᖓᖏᓐᓄ, ᑳᐱᑑᔭᖅᑐᒃᓴᐅᔪᖅ, ᑕᕐᕆᔭᕐᖢᓂ ᐅᓂᒃᑳᓕᐊᓂᒃ, ᑐᓴᕋᓐᓈᕐᖢᓂᓘᓐᓃᑦ ᓂᐱᓕᐅᕆᓯᒪᔪᓂᒃ. 

ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᖃᑎᒌᒃᑐᓕᕆᓂᕐᒧᑦ ᑭᒃᑯᑐᐃᓐᓇᕐᓄᓪᓗ ᐅᔾᔨᕈᓱᓕᖅᑎᑦᑎᓂᖅ

ᐃᓂᖃᓚᐅᖅᑎᓪᓗᒋᑦ ᑲᓇᖕᓇᕐᒥ ᐱᖓᓐᓇᖓᓂᓗ ᑲᓇᑕᐅᑉ, ᑭᒻ ᓄᒃᑎᕐᖢᓂ ᐅᑭᐅᖅᑕᖅᑐᒧᑦ 2017−ᒥ. ᐃᑲᔪᕐᖢᓂᒋᑦ ᓄᑕᖅᑲᑦ, ᒪᒃᑯᒃᑐᑦ, ᐊᒻᒪ ᖃᑕᙳᑎᒌᑦ, ᐃᓚᒋᕐᔪᐊᖅᓯᒪᔭᖓ ᑭᒻ ᐃᓅᓯᖓᓂ, ᐃᖅᑲᓇᐃᔭᓵᓚᐅᕐᖢᓂ ᕌᓄᑦ ᒪᒃᑖᓄᑦ ᐃᒡᓗ ᐃᑲᔪᕋᓱᐊᖅᑎᒃᑯᓐᓂ® ᓂᒋᖅᐸᓯᕐᒥ ᕿᑎᐊᓂᓗ ᐃᐅᓪᐴᑕ. 

ᑭᒻ ᐱᓪᓗᓂᐅᒃ ᐃᓕᓐᓂᐊᕌᓂᒍᓯᐊᖓ ᑐᓴᐅᒪᔪᓕᕆᔨᒃᑯᓐᓂ ᓯᓚᑦᑐᖅᓴᕐᕕᖓ ᑳᓪᒍᕆ ᐊᒻᒪ ᐊᕐᕌᒎᖕᓄ ᒪᕐᕉᖕᓄ ᐃᓕᓐᓂᐊᕌᓂᒍᓯᐊᖅ ᐃᓄᐃᑦ ᐃᓅᓯᖏᓐᓂ ᐅᓂᒃᑲᐅᓯᖃᕐᓂᖅ ᑎᑎᕋᖅᑎᒍᑦ ᓂᒋᖅᐸᓯᐊᓂ ᐃᐅᓪᐴᑕ ᓯᓚᑦᑐᖅᓴᕐᕕᒃ ᖃᕆᑕᐅᔭᓕᕆᓂᕐᓄᑦ (S.A.I.T).

ᐱᔪᒪᓂᖅᐹᕆᔭᖓ ᐃᓚᖓᒍᑦ ᐊᐅᓪᓚᑲᑕᖕᓂᖅ, ᖁᕕᐊᒋᓂᕐᒥᓄᑦ ᐃᓕᑦᑎᓗᓂ ᐊᑐᕐᓗᓂᓗ ᐊᔾᔨᒌᖏᑦᑐᓂᒃ ᐃᓕᖅᑯᓯᕐᓂ ᓂᕿᓂᒃᓗ. ᐊᑐᖁᙳᐊᕋᔭᖅᑕᒥᓂᒃ ᓂᕆᐅᖕᓂᓕᒃ ᕿᒥᕐᕈᒃᑲᓐᓂᕐᓗᒍ ᐅᑭᐅᖅᑕᖅᑐᖅ ᐊᕐᕌᒎᓂᐊᖅᑐᓂ. ᑎᑎᕋᕐᕕᖕᒦᖏᑦᑕᕌᖓᒥ, ᑕᑯᑐᐃᓐᓇᕆᐊᖃᖅᑕᑦ ᑭᒻ ᕿᒻᒥᒥᓂᒃ ᐱᓱᒃᑎᑦᑎᔪᖅ, Hᐊᑦᓴᓐ.

ᑭᒻ ᐅᖃᖅᑐᖅ ᖁᔭᓕᓂᖃᖅᑐᖅ ᐱᔪᓐᓇᖅᑎᑕᐅᓂᕐᒥᓂᒃ ᐃᖅᑲᓇᐃᔭᕐᓗᓂ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒃᑯᑦ ᑎᑎᕋᕐᕕᖓᓂ ᓲᖃᐃᒻᒪ ᑐᑭᖃᑦᑎᐊᕐᖢᓂ ᐃᖅᑲᓇᐃᔮᖑᓂᖓᓄᑦ ᐃᑲᔪᕐᓗᒋᑦ ᐱᔪᓐᓇᐅᑎᖏᑦ ᒪᒃᑯᒃᑐᑦ ᓄᓇᕗᒻᒥ ᖃᑕᙳᑎᖏᓪᓗ. ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒃᑯᑦ ᑎᑎᕋᕐᕕᖓ ᐊᔾᔨᑦᑎᐊᖓᒍᑦ ᖁᕕᐊᓲᑎᖃᖅᑐᑦ ᑭᒻ ᐃᓚᐅᓂᖓᓄᑦ ᐱᓕᕆᖃᑎᒌᑦᑎᓐᓂ − ᖁᕕᐊᒋᕐᔪᐊᖅᑕᕗᑦ ᐱᔪᒪᓂᕆᑦᑎᐊᖅᑕᖓ ᐱᐅᔪᒃᑯᓪᓗ ᐆᒻᒪᕆᖕᓂᕐᒥᒃ ᑎᑎᕋᕐᕕᑦᑎᓐᓄᐊᖅᓯᓂᖓ!

ᑎᐋᓇ ᓴᐃᓪᒋᕈ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᐅᑭᐅᖅᑕᖅᑐᒧᐊᓚᐅᖅᑳᕋᓂ, ᑕᐃᐋᓐ ᓄᓇᖃᓚᐅᖅᐳᖅ ᐋᑐᕚ, ᐊᓐᑎᐅᕆᐅ−ᒥ. ᑕᐃᐋᓐ ᐊᔪᕈᓐᓃᖅᓴᓚᐅᖅᐳᖅ Cognitive Science−ᒥᒃ ᐅᕙᓂ, Carleton ᓯᓚᑦᑐᖅᓴᕐᕕᒡᔪᐊᒥ ᑕᐃᒪᙵᓂᓪᓗ ᐱᓇᔪᒃᓯᒪᕗᖅ ᐊᔾᔨᒋᙱᑦᑐᓂᒃ ᐅᖃᐅᔾᔪᐃᕙᖕᓂᕐᒧᑦ ᓇᓗᓇᐃᒃᑯᑕᕐᓂᒃ, ᑕᐅᑐᒐᖃᓪᓗᐊᑕᖅᖢᑎᒃ     ᐊᒃᓱᕈᕐᓇᖅᑐᓂᒃ-ᑐᓴᐅᒪᓂᕐᒧᑦ ᐱᓕᕆᐊᖑᕙᒃᑐᓂᒃ.

ᑕᐃᐋᓐ ᐊᓕᐊᓇᐃᒋᓪᓚᕆᒃᑕᖓ ᓄᒃᑕᕐᓂᖅ  ᐱᓕᕆᕝᕕᖃᕈᒪᓪᓚᕆᒃᐸᖕᓂᕐᓗ ᓄᑕᖅᑲᓂᒃ ᒪᒃᑯᒃᑐᓂᒡᓗ ᖃᐅᔨᑎᑦᑎᔾᔪᑎᒋᓚᐅᖅᐸᐅᒃ ᐅᑭᐅᖅᑕᖅᑐᒥᒃ.  ᖃᖓᑦᑎᐊᖑᓛᒃᑯᑦ, ᑕᐃᐋᓐ ᓄᓇᖃᓚᐅᖅᐳᖅ ᑲᖏᖅᖠᓂᕐᒥ, ᐃᖅᑲᓇᐃᔭᖅᖢᓂ ᐅᕙᓂ, ᐳᓛᕐᕕᒃ ᖃᑉᓗ ᐱᖃᓐᓇᕆᔭᖃᖅᐸᖕᓂᕐᒧᑦ ᐃᓂᒋᔭᐅᔪᒥ. ᑕᐃᑲᓂ ᐱᖃᓐᓇᕆᔭᖃᖅᐸᖕᓂᕐᒧᑦ ᐃᓂᒥ ᐃᖅᑲᓇᐃᔭᕐᓂᕐᒥᓂ, ᑕᐃᐋᓐ ᐱᕕᒃᓴᖃᓚᐅᖅᐳᖅ ᓄᒃᑕᕐᓂᕐᒥᒃ ᐊᔾᔨᒌᙱᑦᑐᓄᑦ ᓄᓇᓕᖕᓄᑦ ᓄᓇᕗᒻᒥ ᐃᑲᔪᖅᑐᐃᔪᓐᓇᖅᖢᓂᓗ ᐃᓚᒌᓂᒃ ᒪᒃᑯᒃᑐᓂᒡᓗ ᐊᒃᓱᕈᕐᓇᖅᑐᒦᓐᓂᖏᓐᓂ.

ᑕᐃᐋᓐ ᐃᖃᓗᐃᑦ ᐊᖏᕐᕋᕆᓂᕋᓕᕆᕚ ᑎᑎᕋᕐᕕᒃᐳᓪᓗ ᐱᒃᑯᒍᓱᑦᑎᐊᖅᐳᖅ ᑖᓐᓇ ᐱᓕᕆᖃᑎᒌ ᓄᑦ ᐃᓚᓕᐅᑎᔪᓐᓇᓕᕐᒪᑦ.

 

 

ᓄᕝᕕᔭ ᐃᓄᐊᕋᕐᒃ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᓄᑉᐱᔭ ᐃᓄᐊᕋᖅ ᓄᑖᖑᓂᖅᐹᕆᔭᕗᑦ ᓄᑕᖅᑲᓄᑦ ᒪᒃᑯᑦᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᐅᑦᓱᓂ ᒪᐃ 2020.

ᓄᑉᐱᔭ ᐃᓕᓐᓂᐊᕆᐊᖅᓯᒪᔪᖅ ᑖᓪᕼᐊᐅᓯ ᓯᓚᑦᑐᖅᓴᕐᕕᔾᔪᐊᖅᒧᑦ, ᕼᐊᓕᕚᒃᔅ, ᓅᕙ ᔅᑰᓯᐊᒥ, ᐊᒻᒪᓗ ᔫᓂ 2017, ᐱᔭᕇᖅᓯᓚᐅᖅᑐᖅ ᐃᓕᓐᓂᐊᕐᓂᕐᒥᑦ ᐅᖃᖅᑎᑦᓯᔨᐅᑦᓱᓂᓗ ᓄᓇᕗᒻᒥ ᓯᓚᑦᑐᖅᓴᕐᕕᒃᒧᑦ ᐱᑦᓱᓂᓗ ᐱᔭᕇᖅᓯᔾᔪᓯᐊᖅ ᓯᕗᓪᓕᖅᒥ ᖃᐅᔨᓴᕐᓂᕐᒧᑦ ᐅᑭᐅᖅᑕᖅᑐᖅᒥ ᐋᓐᓂᐊᓯᐅᖅᑎᐅᓂᕐᒧᑦ. ᐱᔭᕇᖅᓯᒋᐊᖅᑐᓚᐅᖅᑐᖅ ᐋᓐᓂᐊᓯᐅᖅᑎᐅᓂᕐᒧᑦ ᑲᔪᖏᖅᓴᐃᔪᓕᕆᓂᕐᒧᑦ ᐱᓕᕆᐊᒧᑦ ᐃᓂᖃᖅᑎᑕᐅᓚᐅᖅᑐᖅ ᐊᔾᔨᒌᖏᑦᑐᓂᑦ ᑲᒪᒋᔭᐅᒋᐊᖃᓪᓚᕆᑦᑐᓄᑦ ᐊᑯᓂᐅᔪᒥᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐋᖅᑭᑦᓯᒪᓂᓕᓐᓂᑦ ᕿᑭᖅᑕᓂ ᐋᓐᓂᐊᕕᒃᒥ (QGH). ᓯᕗᕐᖓᒍᑦ ᐃᓚᒋᔭᐅᓕᓚᐅᕋᓂ ᐱᓕᕆᖃᑎᒌᑎᓐᓄᑦ ᐋᓐᓂᐊᓯᐅᖅᑎᐅᓚᐅᖅᑐᖅ ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᕝᕕᖓᓂᑦ ᕿᑭᖅᑕᓂ ᐋᓐᓂᐊᕕᒃᒥ. ᓄᑉᐱᔭ ᐱᕚᓪᓕᓚᐅᖅᑐᖅ ᐃᓚᖏᓐᓂᑦ ᐱᒻᒪᕆᐅᔪᓂᑦ ᖃᐅᔨᒪᓂᖅᒥ, ᐊᔪᙱᑕᖃᕐᓂᖅᒥ, ᐱᔪᓐᓇᕐᓂᖃᕐᓂᕐᒥᓪᓗ ᐊᕐᕌᒍᓐᓄᑦ ᒪᕐᕉᓐᓄᑦ ᐃᓕᑕᕆᔭᐅᔾᔪᑎᖃᖅᓱᓂ ᐋᓐᓂᐊᓯᐅᖅᑎᐅᓂᕐᒧᑦ ᕿᑭᖅᑕᓂ ᐋᓐᓂᐊᕕᒃᒥ ᐃᑉᐱᓐᓂᐊᓂᖃᖅᓱᓂᓗ ᐱᐅᔪᒃᑯᑦ ᐃᑲᔫᑎᖃᓚᖓᒋᐊᖓ ᑕᐅᑐᖅᑰᖅᑕᖓᓂᑦ ᐊᓪᓚᕝᕕᑦᑕ.

ᖁᕕᐊᒋᔭᖃᕐᓂᖓ ᐱᔨᑦᓯᕋᕐᓂᕐᒥᑦ ᑭᒃᑯᑐᐃᓐᓇᕐᓂᑦ ᓇᓗᓇᐃᖅᓯᓂᕐᒥᓪᓗ ᐱᔨᑦᓯᕋᐅᑏᑦ, ᐊᑐᐊᒐᐃᑦ, ᐱᓕᕆᔾᔪᓰᓪᓗ ᐋᖅᑭᑦᓯᒪᔪᐃᑦ ᓄᓇᕗᒻᒥ ᓈᒻᒪᒃᑲᐊᕐᒪᖔᑕ ᐱᔭᕆᐊᓕᖏᓐᓄᑦ ᐃᓄᒋᐊᓐᓂᖏᓐᓄᑦ. ᐃᖅᑲᓇᐃᔮᖓᑎᒍᑦ, ᓂᕆᐅᓐᓂᖃᖅᑐᖅ ᓴᙱᓕᑎᑦᓯᓂᕐᒥᑦ ᐊᒻᒪᓗ/ᐅᕝᕙᓗᓃᑦ ᐃᑲᔫᑎᖃᕐᓂᕐᒥᑦ ᐱᕙᓪᓕᐊᑎᑦᓯᓂᕐᒧᑦ ᖃᓄᐃᙱᑦᓯᐊᕐᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᐃᑦ.

 

ᑲᐅᑕᖅ ᖃᑉᓗᑦᓯᐊᖅ
ᑭᒡᒐᖅᑐᐃᔪᖅ ᐊᐅᔭᒃᑯᑦ ᐃᓕᓐᓂᐊᖅᑎ
(2021-ᒥ ᐊᐅᔭᒃᑯᑦ)

ᑲᐅᑕᖅ ᐊᕐᕕᐊᕐᒥᐅᑕᒃᓴᔭᐅᕗᖅ ᒫᓐᓇᓗ ᓄᓇᖃᖅᖢᓂ ᐃᖃᓗᖕᓂ. ᐱᕈᖅᓴᑎᑕᐅᓚᐅᖅᑐᖅ ᐊᖓᔪᖅᑳᒥᓂᑦ ᐊᕐᕕᐊᕐᒥ ᐃᓚᖃᖅᖢᓂ ᐱᖓᓱᓂᒃ ᐊᖓᔪᒥᓂᒃ/ᓄᖃᕐᒥᓂᒃ, ᐊᑕᐅᓯᕐᒥᒡᓗ ᐊᓂᖃᖅᖢᓂ, ᑕᐃᑲᓃᑦᑐᓐᓂᓚᐅᖅᓯᒪᓪᓗᓂ ᐊᐅᓪᓚᕋᒥ ᓯᓚᑦᑐᖅᓴᕐᕕᖕᒧᑦ 18−ᓂᒃ ᐊᕐᕌᒍᖃᓕᖅᖢᓂ.

ᐊᔪᕈᓐᓃᖅᓴᖃᑦᑕᓚᐅᖅᑐᖅ ᓄᓇᕗᒻᒥ ᓯᕗᓂᒃᓴᕗᒃᑯᓐᓂ ᐊᕐᕌᒎᑉ ᐅᖓᑖᓄᑦ, ᐊᒻᒪᐃᓛᒃ Carleton ᓯᓚᑦᑐᖅᓴᕐᕕᒡᔪᐊᒥ ᐊᕐᕌᒍᒃᑲᓐᓂᕐᒧᑦ ᐊᑕᐅᓯᕐᒧᑦ. ᐅᑭᐊᒃᓵᖑᓕᖅᐸᑦ 2021−ᒥ, ᓅᓛᓕᖅᐳᖅ ᐅᕗᖓ, Laurentian ᓯᓚᑦᑐᖅᓴᕐᕕᒡᔪᐊᒧᑦ ᐱᓕᕆᔭᖅᑐᕐᓗᓂ ᐊᓂᒍᐃᓚᐅᙱᓐᓂᕐᒥᓂ ᐊᔪᕈᓐᓃᖅᓴᖅᑕᒥᓂᒃ. ᐱᒃᑯᓕᔪᒻᒪᕆᐊᓘᕗᖅ ᓯᕗᓂᒃᓴᖓ ᑭᓱᑕᖃᕐᓂᐊᓂᖓᓂᒃ ᐃᒻᒥᒧᑦ ᓇᒡᓕᒋᔭᖏᓐᓄᓪᓗ.

ᑲᐅᑕᖅ ᐊᓕᐊᓇᐃᒋᔭᓕᒃ ᐱᓱᔪᖕᓂᕐᒥᒃ, ᓴᐸᖓᓕᕆᓂᕐᒥᒃ, ᐅᓪᓚᖕᓂᕐᒥᒃ, ᓇᒧᙵᐅᓂᕐᒥᒃ, ᐃᒻᒥᓂᒡᓗ ᐊᓂᒍᖅᑎᑦᑎᓇᓱᒍᒪᕙᒃᖢᓂ ᐆᒃᑐᕈᒪᕙᒃᖢᓂ ᓄᑖᓂᒃ ᖃᖓᙳᕌᖓᑦ. ᐊᓕᐊᓇᐃᒋᔭᖓᑦᑕᐅᖅ ᑕᐅᑐᒃᖢᒍ ᐅᓇ, Grey’s Anatomy, ᐱᕕᒃᓴᖃᓕᕌᖓᒥ.

ᑲᐅᑕᖅ ᐱᓕᕆᐊᖃᕐᕕᖃᒻᒪᕆᒍᒪᕙᒃᐳᖅ ᑭᒡᒐᖅᑐᐃᔨᐅᓂᕐᒥᒃ ᐊᒃᑐᖅᑕᐅᓴᕋᐃᑦᑐᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓄᓇᕗᒻᒥ, ᑕᐃᒪᐃᓐᓂᖓᓄᑦ ᑕᕝᕙ ᐱᒃᑯᓕᒻᒪᕆᒃᐳᖅ ᐱᓕᕆᖃᑎᖃᕐᓂᐊᕐᓂᕐᒥᓂᒃ ᑭᒡᒐᖅᑐᐃᔨᒥᒃ ᓄᑕᖅᑲᑦ ᒪᒃᑯᒃᑐᓪᓗ ᑎᑎᕋᕐᕕᐊᓂ ᐊᐅᔭᐅᓂᐊᖅᑐᒥ! ᐱᒃᑯᓕᑦᑎᐊᖅᐳᒍᑦ ᑖᓐᓇ ᐱᓕᕆᖃᑎᒌᑦᑎᓐᓄᑦ ᐃᓚᓕᐅᑎᓂᐊᕐᓂᖓᓂᒃ!

 

ᕇᔭ ᒫᓐᑎᐅᕉ
ᑲᒪᔨ ᑐᓴᒐᓴᓕᕆᓂᕐᒧᑦ
(2018-ᒥ ᐊᐅᔭᒃᑯᑦ)

ᕇᔭ ᓅᓚᐅᖅᑐᖅ ᐃᖃᓗᖕᓄᑦ ᒧᒻᐸᐃᒥᖔᖅᖠᓂ, ᐃᓐᑎᔭᒥᑦ, ᒪᐃᖑᑎᓪᓗᒍ 2017−ᒥᑦ. ᐅᑭᐅᖅᑕᖅᑐᕐᒧᑦ ᓅᓚᐅᖅᑎᓪᓗᒍ ᐊᔾᔨᙱᑦᑐᒧᐊᓪᓚᕆᓚᐅᖅᑐᖅ ᐃᓅᓯᓕᒫᖅ ᐅᖅᑰᔪᒦᓚᐅᖅᑎᓪᓗᒍ ᐃᓄᒋᐊᒃᖢᓂᓗ. ᐃᖏᖃᑦᑕᕐᓂᕐᒥᑦ ᖁᕕᐊᒋᔭᖃᕐᓂᖅ ᑐᕌᕈᑎᒋᓚᐅᖅᐹ ᐃᓚᐅᖃᑕᐅᓂᕐᒧᑦ ᐃᓄᒃᓱᒃ ᕿᓚᐅᔾᔭᖅᑎᖏᓐᓂᑦ ᐅᖃᓚᐅᖅᑐᖅ, "ᐅᕙᓐᓄᑦ ᐊᑲᐅᔪᑦ ᐃᓄᒃᑐᑦ ᐅᖃᕆᐅᕈᓐᓇᖅᓯᓚᐅᕋᒪ ᐊᒻᒪᓗ ᖃᐅᔨᕚᓪᓕᖅᖢᖓ ᐃᓄᐃᑦ ᐃᓕᖁᓯᑐᖃᖏᓐᓂᑦ."

ᕇᔭᐅ ᐊᐅᔭᒃᑯᑦ ᐃᖃᓇᐃᔮᕆᓚᐅᑲᒃᑕᖓ ᓄᑕᖃᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ ᓯᕗᓪᓕᖅᐹᑦᑎᐊᒥᑦ ᐃᖃᓇᐃᔮᖅᑖᓚᐅᖅᐳᖅ!

ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨᐅᓂᖓᓄᑦ ᑲᒪᒋᔭᖃᖅᑐᖅ ᐅᓪᓗᑕᒫᖅ ᑐᓴᖅᑕᐅᔪᒃᓴᓂᑦ ᓇᐅᑦᑎᕐᓱᖅᐸᒃᖢᓂ ᐊᐅᓚᑦᑎᕙᒃᖢᓂᓗ ᑭᒃᑯᑐᐃᓐᓇᕐᓄᑦ ᐱᓕᕆᐊᒃᓴᓄᑦ ᐱᕕᖃᖅᑎᑦᑎᓂᕐᒧᑦ ᐃᖃᓗᐃᑦ ᓂᐅᕕᕐᕕᖕᓂᑦ ᐊᒻᒪᓗ ᐅᐱᕐᖔᒃᑯᑦ ᓱᕈᓯᕐᓂᑦ ᐱᓕᕆᐊᒃᓴᖃᖅᑎᑦᑎᓂᕐᒧᑦ.

ᕇᔭ ᐃᓕᑦᑎᓚᐅᕐᒥᔪᖅ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᖕᓂᕆᔭᖏᑦ ᓄᑕᕋᐅᑉ ᐊᒻᒪᓗ ᐃᑲᔪᓚᐅᕆᓪᓗᓂ ᓂᕈᐊᕐᓂᕐᒧᑦ ᐱᔪᓐᓇᐅᑎᒥᑦ ᑐᕌᕆᔭᐅᓂᐊᖅᑐᒥ 2018 ᐅᓂᑳᕗᑦ, ᓂᐲᕗᑦ ᓵᓚᒃᓴᕋᓱᑦᑕᐅᔪᒥᑦ. ᕇᔭ ᐱᓕᕆᕐᔪᐊᖃᑕᐅᓯᒪᖕᒥᔪᖅ ᑕᐅᑐᙳᐊᕐᑕᐅᔪᓂ ᐅᔾᔨᕐᓇᓕᖅᑎᑦᑎᓂᕐᒥᑦ ᒪᒃᑯᒃᑐᑦ ᓂᐱᓂᑦ ᑎᑎᕋᕐᕕᐊᓂ ᕿᒥᕐᕈᔭᐅᔪᒃᓴᓂᑦ ᐃᓱᒪᓕᕆᔨᒃᑯᓐᓂᑦ.

ᕇᔭ ᐅᖃᓚᐅᖅᑐᖅ "ᐃᖃᓇᐃᔮᖃᕐᖢᓂ ᓄᑕᖃᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ ᑐᑭᓯᑦᑎᑕᐅᑐᐃᓐᓇᖏᑦᑐᖅ ᐱᒻᒪᕆᐅᓂᖏᓐᓂᑦ ᓄᑕᖃᐃᑦ ᐱᔪᓐᓇᐅᑎᖏᑦ ᑭᓲᓂᖏᓐᓂᑦ, ᐃᑲᔫᑎᖃᕐᒥᔪᑦ ᑲᒪᒋᔭᖃᕈᓐᓇᑦᑎᐊᕐᓂᕐᒥᑦ ᑲᒪᒋᔭᖃᕈᓐᓇᕐᓂᕐᒥᓗ ᐊᑲᐅᖏᑦᑑᒐᓗᐊᓂ, ᐱᓗᐊᕐᑐᒥᑦ ᐃᓱᒪᒃᓴᖅᓯᐅᖃᑕᐅᔪᓐᓇᕐᓂᕐᒥᑦ ᑐᓴᐅᒪᖃᑦᑕᐅᑎᓂᕐᒥᓗ ᐱᓕᕆᖃᑎᒋᔭᖓᓂ. ᐊᓕᐊᓇᐅᒍᓱᒃᐳᖓ ᐊᔪᖏᑦᑎᐊᕐᑐᓂ ᐃᖃᓇᐃᔭᖃᑎᖃᓚᐅᕋᒪ ᐅᒃᐱᕈᓱᒃᑐᓂ ᓄᑕᖃᐃᑦ ᒪᕐᖁᒃᑐᓪᓗ ᓂᐱᖏᑦ ᐱᒻᒪᕆᐅᓂᖏᓐᓂᒃ."

ᐊᓕᐊᓇᐅᒍᓱᖕᒥᕗᒍᑦ ᕇᔭ ᐃᓚᐅᖃᑕᐅᔪᓐᓇᕐᒪᑦ ᐃᖃᓇᐃᔭᕐᕕᑦᑎᓐᓂ, ᐅᐱᖔᒃᑰᑐᐃᓐᓇᖅᐸᑦ!

ᑭᐅᕈᓚᐃᓐ ᐊᖓᓕᒃ
ᐱᐅᓯᖕᓄᑦ ᖃᐅᔨᓴᖅᑎᐅᑉ ᐃᑲᔪᖅᑎᐊ
(ᐊᐅᔭᖅ 2017−ᒥ)

ᑭᐅᕈᓚᐃᓐ ᐊᖓᓕᒃ ᐊᓕᐊᓇᐃᒋᔭᖃᑦᑎᐊᖅᑐᖅ ᐃᑲᔪᖅᑐᐃᓂᖕᒥᑦ ᐊᓯᒥᓂᒃ ᑐᓂᓯᓂᖕᒥᒡᓗ. ᖁᕕᐊᒋᔭᓕᒻᒪᕆᒃ ᐱᓕᕆᖃᑎᖃᖕᓂᖕᒥᑦ ᓄᑕᖅᑲᓂᑦ ᐊᑐᓕᖅᖢᓂᐅᒡᓗ ᐱᔪᒪᓚᐅᖅᑕᓂᑦ ᐃᓕᓴᐃᔨᙳᕐᓂᖕᒥᑦ ᓯᕗᒧᐊᒃᖢᓂ ᖁᕝᕙᓯᖕᓂᖅᐹᒥᑦ ᐃᓕᓐᓂᐊᖕᓂᖕᒥᑦ ᓄᓇᕗᒻᒥᑦ ᐃᓕᓴᐃᔨᐅᓂᒃᓴᒧᑦ ᐃᓕᓐᓂᐊᒐᒃᓴᑎᒍᑦ. ᑭᐅᕈᓚᐃᓐ ᐊᐃᑉᐸᕆᓕᖅᑕᖓᓄᑦ ᐊᕐᕌᒍᖓᓄᐊᖕᓂᐊᓕᖅᑐᖅ ᐃᓕᓐᓂᐊᕐᑕᒥᓂᒃ ᓯᑎᐱᕆ 2017−ᒥᑦ.

ᐊᕐᕕᐊᓃᓐᓂᑰᓪᓗᓂ, ᖃᒪᓂ’ᑐᐊᒥᓪᓗ, ᐃᖃᓗᖕᓃᖏᓐᓇᐸᓗᒃᖢᓂ, ᑭᐅᕈᓚᐃᓐ ᓄᓇᕗᒻᒦᑦᑐᖅ ᐃᓅᓯᓕᒫᒥᓂᒃ.  ᑭᐅᕈᓚᐃᓐ ᐊᓕᐊᓇᐃᒋᔭᓕᒃ ᓄᓇᕗᒻᒦᖦᖢᓂ – ᐱᓗᐊᖅᑐᒥᑦ ᑲᔾᔮᖕᓇᖕᓂᖓ ᓄᓇᐅᑉ, ᐆᒪᔪᖃᑦᑎᐊᖕᓂᖓᓂ, ᐃᓕᖅᑯᓯᖕᒥᑦ, ᐃᓄᖏᓐᓂᒡᓗ. ᐊᓕᐊᓇᐃᒋᖕᒥᔭᖏᑦ ᒥᖅᓱᖕᓂᖅ, ᓂᖅᖠᐅᕐᓂᖅ, ᐃᓚᒥᓃᑲᑕᒃᖢᓂᓗ, ᐱᓗᐊᖅᑐᒥᑦ ᕿᑐᙵᒥᓂᒃ.

ᑭᐅᕈᓚᐃᓐ ᖃᐅᔨᓴᕈᓐᓇᖕᓂᖓ ᑐᓴᖅᑎᑦᑎᔪᓐᓇᖕᓂᖓᓗ ᐱᒻᒪᕆᐅᔪᓂᑦ ᐃᓱᒪᒋᔭᓂᑦ ᐃᖅᑲᓇᐃᔭᖃᑎᖏᓐᓂᑦ ᐃᓚᒋᔭᐅᕌᕐᔪᒃᐳᖅ ᑭᐅᕈᓚᐃᓐ ᑐᙵᓱᒃᑎᑕᐅᓪᓗᓂ ᐃᓚᑖᖑᖕᒪᑦ ᑭᒡᒐᖅᑐᐃᔨᒃᑯᑦ ᑎᑎᕋᕐᕕᐊᓄ 2017−ᒥᑦ ᐊᐅᔭᒃᑯᑦ ᐃᓕᓐᓂᐊᕐᑎᐅᓪᓗᓂ.

 

 

 

ᑭᓕᐅᕋ ᐋᑯᓗᔪᒃ
ᑐᓴᐅᒪᑎᑦᑎᓂᕐᒧᑦ ᐱᓕᕆᔨ
(ᐊᐅᔭᖅ 2016−ᒥ)

ᑭᓕᐅᕋ ᐋᑯᓗᔪᒃ  ᐸᓐᓂᖅᑑᕐᒥᐅᑕᐅᕗᖅ, ᓄᓇᕗᒻᒥ ᑕᐃᑲᓂᓗ ᐱᕈᖅᓴᖅᑕᐅᓚᐅᖅᓯᒪᓪᓗᓂ ᐊᓈᓇᖓᓄᑦ ᐃᓚᒥᓄᓪᓗ. ᖁᑦᑎᖕᓂᖅᓴᒥ ᐃᓕᓐᓂᐊᕌᓂᐊᓪᓚᓚᐅᖅᖢᓂ, ᑭᓕᐅᕋ ᖃᔅᓯᑲᓪᓚᖕᓂ ᐊᓐᑎᐅᕆᐅᒥ ᓄᓇᖃᓚᐅᖅᓯᒪᔪᖅ ᐊᔪᕈᓐᓃᖅᓴᕈᒪᓪᓗᓂ ᐃᓕᓐᓂᐊᕐᕕᓪᓚᑦᑖᒥ ᐃᓕᓐᓂᐊᕌᓐᓚᓚᐅᖅᖢᓂ ᐃᓕᓐᓂᐊᒃᑲᓐᓂᕐᓂᕐᒥᒃ. ᐃᓕᓐᓂᐊᖃᑦᑕᓚᐅᖅᑐᖅ ᐱᓪᓗᓂᓗ ᖃᔅᓯᑲᓪᓛᕐᔪᖕᓂᒃ ᓇᓗᓇᐃᒃᑯᑕᓂᒃ ᓄᓇᕗᑦ ᓯᕗᓂᒃᓴᕗᒃᑯᓐᓂᑦ ᐅᕙᓂ, Algonquin College ᐃᓕᓐᓂᐊᕆᐅᖅᓴᓕᓵᖅᑐᓄᓪᓗ ᐃᓕᓐᓂᐊᕐᓂᕐᒧᑦ ᐱᓕᕆᐊᖑᕙᒃᑐᒥᒃ ᐅᕙᓂ, Georgian College. ᑭᓕᐅᕋ ᒫᓐᓇ ᐊᔪᕈᓐᓃᖅᓴᖅᐸᓪᓕᐊᕗᖅ ᐃᒪᐃᑦᑐᖅᑖᕆᓛᖅᑕᒥᓄᑦ, Bachelor of Education, ᐅᑯᑎᒎᓇᒃ, ᓄᓇᕗᒻᒥ ᐃᓕᓴᐃᔨᕈᖅᓴᓂᕐᒧᑦ ᐱᓕᕆᐊᖑᕙᒃᑐᒥ ᐃᖃᓗᓐᓂ. ᐱᖓᔪᖓᓂᒃ ᐊᕐᕌᒍᒥᒃ ᐃᓕᓐᓂᐊᕐᓂᐊᓕᖅᑐᖅ ᓯᑎᐱᕆ 2016-ᖑᓕᖅᐸᑦ, ᑖᓐᓇᓗ ᐊᕐᕌᒍᓄᑦ ᑎᓴᒪᓄᑦ ᐱᓕᕆᐊᖑᕙᒃᑐᓂ.

ᐊᓕᐊᓇᐃᒋᔭᖓ ᐃᓚᒥᓂᒃ ᐃᓅᖃᑎᖃᕆᐊᒃᓴᖅ ᐃᖃᓗᖕᓂ ᐸᓐᓂᖅᑑᕐᒥᓗ, ᐊᐅᓪᓚᖅᓯᒪᖃᑎᖃᖅᑐᓂ ᐃᑦᑐᕐᒥᓂᒃ ᓂᖏᐅᕐᒥᓂᓪᓗ ᐊᐅᔭᒃᑯᒃ, ᓇᒧᙵᐅᕙᓪᓕᐊᑲᑕᕈᓘᔭᖅᑐᓂ ᐊᔾᔨᓕᐅᕆᑲᑕᒃᑐᓂᓪᓗ. ᑭᓕᐅᕋ ᐊᓐᓂᕆᔭᖃᑦᑎᐊᖅᑐᖅ ᐃᓅᓂᕐᒥᓂᒃ ᐃᓕᖅᑯᓯᕆᔭᐅᕙᒃᑐᓂᒃ ᐊᒻᒪᓗ ᖃᐅᔨᒃᑲᓐᓂᕈᒪᓇᔭᑦᑎᐊᖅᑐᓂ ᓄᓇᖃᖅᑲᖅᑐᑦ ᐃᓕᖅᑯᓯᖏᓐᓂᒃ ᐅᑭᐅᖅᑕᖅᑐᒥ ᓄᓇᓕᐅᖃᑎᒌᒃᐸᒃᑐᓂᒃ.

ᑭᓕᐅᕋ ᐅᖃᖅᑐᓂ ᐃᓚᒋᔭᐅᓂᕐᒥᓄᑦ ᑭᒡᒐᖅᑐᐃᔨᐅᖃᑕᐅᓪᓗᓂ ᓄᑕᖅᑲᓪᓗ ᒪᒃᑯᒃᑐᓪᓗ ᑎᑎᕋᕐᕕᖓᓂ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᓂ ᐃᖅᑲᓇᐃᔭᕐᓂᕐᒥᓄᑦ ᐃᑲᔪᖃᑦᑕᖅᓯᒪᕗᖅ ᑐᑭᓯᐅᒪᓕᕐᓂᕐᒥᒃ ᖃᓄᖅ ᐱᒻᒪᕆᐅᑎᒋᖕᒪᖔᑕ ᓄᑕᖅᑲᑦ ᐱᔪᓐᓇᐅᑎᒋᔭᖏᑦ ᖃᓄᕐᓗ ᑕᒪᑦᑕ ᐱᕚᓪᓕᖅᓯᒪᓕᕈᓐᓇᕐᒪᖔᑦᑕ ᑕᒪᒃᑯᓂᖓ ᐅᔾᔨᕐᓇᖅᓯᑎᑦᑎᓂᐊᕈᓐᑕ ᐃᒃᐱᒋᑦᑎᐊᕐᓂᐊᕈᑦᑎᒍᓗ.

ᑭᓕᐅᕋ ᓇᒃᓴᖅᐳᖅ ᓴᙱᔪᓂᒃ ᐋᖅᑭᒃᓱᐃᔪᓐᓇᕐᓂᕐᒧᑦ ᐱᕙᒌᔭᕈᓐᓇᕐᓂᕐᒧᓪᓗ ᐊᔪᙱᓐᓂᕐᓂᒃ RCY−ᑯᑦ ᑎᑎᕋᕐᕕᖓᓄᑦ. ᐱᒃᑯᓕᔪᒻᒪᕆᐅᕗᒍᑦ ᑖᓐᓇ ᐅᕙᑦᑎᓐᓄ ᐃᓚᓕᐅᑎᓯᒪᔪᓐᓇᕐᓂᖓᓂᒃ! 

 

ᒦᒐᓐ ᐱᓕᐅ
ᒪᒃᑯᒃᑐᓂᒃ ᖃᓄᐃᓕᐅᖅᑎᑦᑎᓗᑎᒃ ᐃᓚᐅᑎᑦᑎᔪᓐᓇᕐᒪᖔᑕ ᖃᐅᔨᓴᖅᑎ
(2015-ᒥ ᐊᐅᔭᒃᑯᑦ)

ᓅᕙ ᔅᑰᓴᒥᐅᑕᒃᓴᔭᖅ, ᒦᒐᓐᓗ ᖃᑕᙳᑎᒌᓪᓗ ᓅᓚᐅᖅᓯᒪᕗᑦ ᐃᖃᓗᖕᓄᑦ 2004-ᖑᑎᓪᓗᒍ. ᐃᖃᓗᖕᒥᐅᑕᐅᔅᓲᔭᓕᖅᑎᓪᓗᒍ, ᒦᒐᓐ ᖁᕕᐊᒋᔭᖃᑦᑎᐊᓵᖅᐳᖅ ᐱᕈᖅᓴᑎᓪᓗᒍ ᓄᓇᕘᒥ. ᐃᖃᓗᖕᓂ ᐃᓕᓐᓂᐊᕌᓂᓚᐅᖅᓯᒪᓪᓗᓂ ᖃᑯᒍᑦᑎᐊᕐᓗ ᐃᓕᑕᕆᔭᐅᔾᔪᑎᑖᓛᓕᖅᖢᓂ Bachelor of Arts ᐃᓄᐃᑦ ᐱᔪᓐᓇᐅᑎᖏᑦ ᐱᓪᓗᒋᑦ Carleton ᓯᓚᑦᑐᖅᓴᕐᕕᒡᔪᐊᕐᒥ. ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᑎᓪᓗᒍ, ᒦᒐᓐ ᓂᕆᐅᒃᐳᖅ ᓄᓇᕗᒦᖏᓐᓇᓛᕈᒪᓪᓗᓂ ᐃᓄᐃᓪᓗ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᖏᓐᓇᕐᓗᓂ ᐊᐃᓯᒪᓗᓂ. 

ᒦᒐᓐ ᓇᕈᓇᒃᑲᒻᒪᕆᐊᓗᒃ ᓇᒧᙵᕈᓘᔭᖃᑦᑕᖅᓯᒪᑎᓪᓗᒍᓗ ᐊᓕᐊᓇᐃᒋᑦᑎᐊᖅᖢᓂᐅᒃ. ᓂᕆᐅᒋᔭᖃᖅᑐᖅ ᖃᑯᒍᒃᑲᓐᓂᖅ ᓱᓕ ᐆᒪᑎᓪᓗᒍ ᓄᓇᕐᔪᐊᓕᒫᖅ ᓇᕈᓇᒡᕕᒋᓚᐅᖅᓯᒪᔪᒪᓪᓗᓂᐅᒃ ᖃᐅᔨᐅᕋᑦᑎᐊᕐᓗᓂᒋᓪᓗ ᐊᔾᔨᒌᙱᑦᑑᑎᒻᒪᕆᐊᓗᐃᑦ ᐃᓕᖅᑯᓯᕆᔭᑦ ᐊᒻᒪ ᐱᐅᓯᕆᔭᐅᖃᑦᑕᕐᓂᑯᑦ.

ᐊᐅᔭᒃᑯᑦ ᐃᖅᑲᓇᐃᔭᖅᑎᐅᖃᑕᐅᑎᓪᓗᒍ ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓐᓂᒃ ᑕᑯᕚᓪᓕᕐᔪᐊᖅᓯᒪᓕᖅᑐᖅ ᒦᒐᓐ ᓴᖅᑭᑦᑎᓯᒪᓕᖅᖢᓂᓗ ᐱᔪᒃᓯᓐᓇᑦᑎᐊᖅᑐᒥᒃ ᓄᑕᖅᑲᑦ ᒪᒃᑯᒃᑐᓪᓗ ᐱᔪᓐᓇᐅᑎᖏᑦ ᐱᓪᓗᒋᑦ. ᖁᕕᐊᓱᑦᑎᐊᖅᑐᖅ ᑕᑯᔭᕆᐊᒃᓴᖅ ᐃᑲᔪᕆᐊᒃᓴᕐᓗ ᐱᕙᓪᓕᐊᓂᕆᔭᐅᔪᒧᑦ ᑎᑎᕋᕐᕕᖕᒥ ᑭᒡᒐᖅᑐᐃᔨᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓄᓇᕘᒥ.