ᒐᕙᒪᒃᑯᑦ ᓄᓇᕗᒻᒥ ᑐᑦᓯᕋᖅᑐᑦ ᖃᓄᐃᓕᐅᖁᔨᓂᕐᒥᑦ ᐅᖃᐅᓯᖃᕐᓂᕐᒧᑦ ᐃᓱᒪᓕᕆᓂᕐᒧᑦ ᐱᔭᕆᐊᖃᕐᓂᕐᒥᑦ ᒪᒃᑯᑦᑐᓄᑦ ᓄᓇᕗᒻᒥᐅᓄᑦ ᐃᓱᒪᒋᔭᐅᑦᓯᐊᕆᐊᓕᒃ “ᓈᒻᒪᖏᑦᑐᓪᓚᕆᐅᒋᐊᖓᓂᑦ” ᑭᒡᒐᖅᑐᐃᔨᖓᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ


ᐱᕙᓪᓕᐊᔪᑦ ᓴᖅᑭᑕᑦ
ᓴᖅᑭᑕᐅᑲᐅᑎᒋᒋᐊᓕᒃ

ᔪᓚᐃ 7, 2020

ᐃᖃᓗᐃᑦ, ᓄᓇᕗᑦ − ᑭᐅᔾᔪᑕᐅᔪᑦ ᐱᔭᐅᔪᑦ ᒐᕙᒪᒃᑯᓐᓂᑦ ᓄᓇᕗᒻᒥ ᓄᓇᕗᒻᒥᓪᓗ ᓯᓚᑦᑐᖅᓴᕐᕕᒻᒥ (ᐱᓕᕆᕝᕕᒋᔭᐅᔪᓂᑦ) ᓇᓗᓇᐃᔭᐃᔪᓂᑦ ᑐᑦᓯᕋᐅᑎᖏᓐᓂᑦ ᖃᓄᐃᓕᐅᖁᔨᓂᕐᒥᑦ ᐊᑦᑐᐃᓂᕐᒧᑦ ᒪᒃᑯᑦᑐᓂᑦ-ᑐᓴᐅᒪᑎᑦᓯᓂᕐᒧᑦ ᐊᑐᓕᖁᔭᐅᔪᓂᑦ ᐃᓱᒪᕗᑦ ᓱᖁᑕᐅᔪᑦ: ᒪᒃᑯᑦᑐᓂᑦ-ᑐᓴᐅᒪᑎᑦᓯᓂᕐᒧᑦ ᕿᒥᕐᕈᓂᕐᒧᑦ ᐃᓱᒪᓕᕆᓂᕐᒧᑦ ᐱᔨᑦᓯᕋᕐᓂᕐᒧᑦ ᒪᒃᑯᑦᑐᓂ ᓄᓇᕗᒻᒥᐅᓂᑦ (ᐃᓱᒪᕗᑦ ᓱᖁᑕᐅᔪᑦ), ᐱᔾᔪᑎᒋᑦᓱᒍ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᓪᓚᕝᕕᖓ ᐊᑦᑐᐊᓂᖃᖅᑐᓂᑦ ᕿᒥᕐᕈᓂᕐᓄᑦ ᐃᓱᒪᓕᕆᓂᕐᒧᑦ ᐱᔨᑦᓯᕋᕐᓂᕐᒥᑦ ᒪᒃᑯᑦᑐᓂᑦ, “ᓈᒻᒪᖏᑦᑐᓪᓚᕆᐅᒋᐊᓂᑦ”.

ᐅᓂᒃᑳᓕᐊᕆᔭᐅᔪᖅ ᓴᖅᑭᑕᐅᑎᓪᓗᒋᑦ ᒪᐃ 2019-ᒥ, ᐱᓕᕆᕝᕖᑦ ᐅᖃᐅᔾᔭᐅᓚᐅᖅᐳᑦ ᑭᐅᔭᕆᐊᖃᕐᓂᖏᓐᓂᒃ, ᖃᓄᐃᓕᐅᕆᐊᖃᖅᑕᖏᓐᓂᒡᓗ ᑐᓴᖅᑎᑕᐅᓪᓗᑎᒃ ᐊᑐᓕᖁᔭᐅᔪᑦ ᐊᑐᓕᖅᑎᑕᐅᔪᓐᓇᕈᑦᓴᖏᓐᓂᒃ, ᓯᑦᑎᒻᕙ 30, 2019.

ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ, ᔮᓂᑦ ᐸᐃᑦᔅ, “ᐊᓪᓚᕝᕕᑦᑎᓐᓂ ᐱᓕᕆᖃᑦᑕᖅᓯᒪᕗᑦ ᑕᒪᐃᓐᓂᒃ ᕿᓄᐃᓵᖅᓱᑎᒃ ᐊᒻᒪ ᐱᓕᕇᓐᓇᖅᐸᑦᓱᑎᒃ ᐱᓕᕆᕝᕕᖏᑦ ᑭᐅᙱᑦᑕᕌᖓᑕ ᑭᐅᖁᔭᐅᔫᒐᓗᐊᓂᒃ, ᐊᒥᓱᐊᖅᑎᖅᓱᑎᓪᓗ ᑭᐅᒋᐊᖃᖅᑕᕋᓗᐊᒥᓂᒃ ᖄᖏᖅᑎᑦᓯᑐᐃᓐᓇᕋᐃᒻᒪᑕ, ᑭᐅᔾᔪᑕᐅᔪᑦ ᐱᑕᖃᖅᑎᓪᓗᒋᑦ ᓈᒻᒪᙱᑦᑐᓂᒃ ᑐᑭᓯᒋᐊᒐᒃᓴᓂᒃ ᐱᓕᕆᕝᕕᓐᓂ ᐱᓕᕆᐊᖑᒋᐊᖃᖅᑑᒐᓗᐊᓂᒃ ᐊᒃᑐᐃᔾᔪᑕᐅᓗᑎᒃ ᐊᑐᓕᖁᔭᐅᔪᓄᑦ, ᐊᒻᒪ ᑐᑭᓯᒋᐊᒐᒃᓴᑦ ᐊᓯᔾᔨᖅᑎᓪᓗᒋᑦ ᐊᑕᐅᓯᕐᒥᒃ ᑭᐅᔾᔪᑎᒥᒃ ᐊᓯᐊᓄᐊᕐᓗᓂᓗ.” ᑭᖑᓪᓕᐹᖅ ᑭᐅᔾᔪᑎ ᐊᑐᐃᓐᓇᐅᑎᑕᐅᓚᐅᖏᑦᑐᖅ ᕕᐅᓪᓗᐊᓕ 28, 2020-ᒧᓄ.

ᐊᖅᑯᑎᒋᔭᐅᓗᓂ ᑎᑎᖅᑲᐃᑦ ᐱᔭᐅᔪᑦ, ᓇᓗᓇᐃᖅᓯᓚᐅᑦᑐᒍᑦ ᐊᖏᖃᑎᒌᒍᑎᖃᕆᐊᖓᓂ ᐱᖓᓲᔪᖅᑐᓂᑦ, ᐃᓚᐃᓐᓇᖏᓐᓂᑦ ᐊᖏᖃᑎᒌᒍᑎᓂᑦ ᑕᓪᓕᒪᑦ, ᐊᖏᖃᑎᒌᒍᑎᖃᕋᑕᓗ ᐊᑕᐅᓯᕐᒥᑦ 15-ᓄ ᐊᑐᓕᖁᔭᐅᔪᓄᑦ. ᐱᖓᓱᓄᑦ ᐊᑐᓕᖁᔭᐅᔪᓂᑦ, ᓱᓕ ᓇᓗᓇᖅᑐᖅ ᐊᖏᖃᑎᒌᒍᑎᖃᕐᒪᖔᑦ ᐊᖏᖃᑎᒌᒍᑎᖃᕋᑕᓘᓐᓃᑦ. ᐃᓚᓕᐅᑎᓯᒪᔪᑦ ᐊᔾᔨᖏᑦ ᐅᖃᐅᓯᒃᓴᕆᔭᐅᓚᐅᕐᑐᑦ ᓄᓇᕗᑦ ᒐᕙᒪᒃᑯᖏᓐᓂᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᓪᓗ ᐱᔾᔪᑎᖃᖅᑐᐃᑦ ᐊᑐᓕᖁᔭᐅᓚᐅᕐᑐᓂᑦ.

“ᑐᓐᓂᖅᑯᑎᒋᓯᒪᓕᖅᑕᒃᑲ ᐱᓕᕆᕝᕕᒻᒥ ᑭᐅᔾᔪᑕᐅᓯᒪᔪᑦ ᐃᓱᒪᒋᔭᖏᑦ ᖃᐅᔨᕗᖓᓗ ᑐᑦᓯᕋᐅᑕᐅᓯᒪᔪᑦ ᐱᓕᕆᐊᖑᖁᔭᐅᔪᑦ ᐱᑕᖃᑦᑎᐊᙱᓐᓂᖏᓐᓂᒃ ᐊᖏᖅᓯᒪᓂᕐᒥᑦ, ᑲᑐᔾᔨᖃᑎᒌᒋᐊᖃᕐᓂᕐᒥᑦ, ᑐᐊᕕᕐᓇᕐᓂᖓᓂᓪᓗ ᐃᓱᒪᓕᕆᓂᕐᒧᑦ ᒪᒃᑯᑦᑐᓂᑦ ᓄᓇᕗᒻᒥᐅᑦ ᐱᔭᕆᐊᖃᕐᓂᖏᓐᓂᑦ.” ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᖃᓄᐃᓐᓂᐅᔪᖅ ᖃᐅᔨᒃᑲᐃᔾᔪᑕᐅᓚᐅᖅᑐᖅ ᑲᒥᓯᓇᐅᑉ ᓯᕗᓕᖅᑏᑦ ᑲᑎᒪᔨᖏᓐᓄᑦ, ᒪᓕᓪᓗᒍ ᐃᓚᒍᑖ 34(2) ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᖁᔭᖓ.
 
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
 
ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᔪᓕᕆᓂᖕᓄᑦ ᑭᒃᑯᓕᒫᓄᓪᓗ ᐅᔾᔨᖅᓱᐃᑎᑦᑎᓂᖕᒧᑦ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ
867-975-5091 | kfoster@rcynu.ca