ᐊᐱᖅᑯᑕᐅᒐᔪᒃᑐᑦ FAQ


ᐊᐱᖅᑯᑕᐅᒐᔪᒃᑐᑦ ᐅᓇᓃᑦᑐᑦ ᖃᐅᔨᔾᔪᑎᒋᔪᓐᓇᖅᑕᑎᑦ ᐊᐱᖅᑯᑎᒋᔭᕐᓄᑦ ᐊᒡᓚᒡᕕᑦᑕ ᒥᒃᓵᓄᑦ.

ᐊᒡᓚᒡᕖᑦ ᖃᓄᐃᓕᐅᓲᖑᕙ?

ᐊᒡᓚᒡᕕᒃᐳᑦ ᐃᑲᔪᖃᑦᑕᖅᐳᑦ ᒪᒃᑯᒃᑐᓂᑦ ᐱᔪᓐᓇᐅᑎᖏᑦᑕ ᒥᒃᓵᓄᑦ ᓇᓗᓇᐃᖅᐸᒃᖢᑕᓗ ᓄᓇᕗᑦ ᒐᕙᒪᖓ ᐃᑲᔪᖅᓯᕋᓗᐊᕐᒪᖔᑦ ᐸᐸᑦᑎᒐᓗᐊᕐᒪᖔᓪᓗ ᑕᒪᒃᑯᓂᖓ ᐱᔪᓐᓇᐅᑎᓂᒃ.

ᐃᑲᔪᕈᑎᒋᖃᑦᑕᕐᒥᔭᕗᑦ ᐃᓛᒃᑯᑦ ᑭᒡᒐᖅᑐᐃᓪᓗᑕ. ᑖᓐᓇ ᑐᑭᖃᖅᐳᖅ ᐊᑕᐅᓯᕐᒥᑦ ᒪᒃᑯᒃᑐᒥᑦ ᐃᓛᒃᑯᑦ ᐃᑲᔪᕐᓗᑕ. ᐃᒪᐃᑦᑐᓐᓇᖅᑐᒍᑦ:

  • ᑐᑭᓯᒋᐊᕈᑎᖃᖅᑎᓪᓗᑦᑎᒋᑦ ᐱᔪᓐᓇᐅᑎᕕᑦ ᒥᒃᓵᓄᑦ
  • ᐃᑲᔪᕐᓗᑦᑎᒋᑦ ᐃᓚᑎᓪᓘᓐᓃᑦ ᐱᔨᑦᑎᕋᐅᑎᓯᐅᕈᑎᓗᒋᑦ ᐱᓕᕆᐊᒃᓴᓂᓪᓘᓐᓃᑦ ᐱᔭᕆᐊᖃᖅᑕᕐᓂᑦ
  • ᐃᓕᓐᓂᐊᖅᑎᓪᓗᑦᑎᒋᑦ ᖃᓄᖅ ᓇᓗᓇᐃᕈᓐᓇᕐᒪᖔᖅᐱᑦ ᐱᔭᕆᐊᖃᖅᑕᕐᓂᑦ
  • ᐃᓚᐅᖃᑕᐅᔪᓐᓇᖅᓯᑎᓪᓗᑎᑦ ᐃᓱᒪᓕᐅᕆᔭᐅᓇᓱᐊᖅᑐᓄᑦ ᐃᒡᕕᑦ ᒥᒃᓵᓄᑦ
  • ᐃᒃᓯᕚᖃᑎᒋᓗᑦᑎᒋᑦ ᑲᑎᒪᖃᑎᖃᖅᑎᓪᓗᑎᑦ ᐋᓐᓂᐊᓯᐅᖅᑎᒥᒃ, ᐃᓄᓕᕆᔨᒥᒃ, ᐅᐊᑦᑎᔨᒥᒃ, ᐊᓯᖏᓐᓂᒡᓘᓐᓃᑦ ᒐᕙᒪᒥ ᐃᖅᑲᓇᐃᔭᖅᑎᒥᒃ

ᖃᓄᖅ ᐃᑲᔪᕐᓂᕗᑦ ᐃᓕᖕᓂ ᑕᑎᖃᖅᐳᖅ ᑭᓱᒥᒃ ᐱᔭᕆᐊᖃᕐᒪᖔᖅᐱᑦ ᖃᓄᕐᓗ ᐅᕙᑦᑎᓐᓄᑦ ᐅᖃᕐᒪᖔᖅᐱᑦ!

ᑭᓲᖕᒪᑕ ᓄᑕᖅᑲᑦ ᐱᔪᓐᓇᐅᑎᖏᑦ?

ᓱᕈᓯᕐᓂᑦ ᐱᔪᓐᓇᐅᑎᒋᔭᐅᔪᖅᑕᖃᕆᐊᖃᖅᐳᖅ ᐊᔪᙱᓪᓗᒋᓘᓐᓃᑦ ᐃᓅᔪᓐᓇᕐᓂᐊᕋᕕᑦ ᐊᑕᖏᐅᒪᔪᒥᑦ. ᓱᕈᓰᑦ ᓄᓇᕐᔪᐊᕐᒥᑦ ᐱᔪᓐᓇᐅᑎᖃᕈᓐᓇᖅᐳᑦ - ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ, ᓇᒥ ᓄᓇᖃᕋᓗᐊᕈᓂ, ᓇᒧ ᐅᒃᐱᕋᓗᐊᕈᓂ ᓇᓂᕐᒥᐅᑕᐅᒐᓗᐊᕈᓂᓘᓐᓃᑦ. 

ᐆᒃᑑᑎᒋᓗᒍ, ᐃᒪᓐᓇ ᐱᔪᓐᓇᐅᑎᖃᖅᑐᑎᑦ:

  • ᓂᕿᑦᑎᐊᕙᖃᕈᓐᓇᕐᓂᕐᒥᑦ
  • ᐅᓗᕆᐊᓇᙱᑦᑐᒥ ᐊᖏᕐᕋᖃᕐᓂᕐᒥᑦ
  • ᐃᓅᓯᖃᕐᓂᕐᒥ ᐅᓇᑕᖅᑐᖃᖃᑦᑕᙱᑦᑐᒥᑦ
  • ᐃᓕᖅᑯᓯᑐᖃᕐᓂᑦ
  • ᑲᒪᒋᔭᐅᑦᑎᐊᕐᓂᕐᒥᑦ, ᐊᔪᕐᓇᙱᓐᓂᓕᒫᖓᓂᑦ, ᐊᖓᔪᖅᑳᕐᓂᑦ
  • ᐃᓱᒪᒋᔭᕐᓂᑦ ᐅᖃᕈᓐᓇᕐᓂᕐᒥᑦ ᐃᓐᓇᕐᓂᒡᓗ ᓈᓚᒃᑕᐅᓗᑎᑦ

ᑭᓱᓂᒃ ᐱᔾᔪᑎᖃᕐᓗᖓ ᖃᐅᔨᒋᐊᕋᔭᖅᐳᖓ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓄᑦ?

ᐊᒥᓱᓂᒃ ᐱᔾᔪᑎᑕᖃᖅᐳᖅ ᑭᓱᒧᑦ ᖃᐅᔨᒋᐊᕋᔭᕐᒪᖔᖅᐱᑦ ᐊᒡᓚᒡᕕᑦᑎᓐᓄᑦ:

  • ᒐᕙᒪᒥᑦ ᑲᒪᒋᔭᐅᓂᕐᓄᑦ ᐃᑲᔪᖅᑕᐅᔪᒪᓗᑎᓪᓗ ᐅᖃᖃᑎᖃᕋᓱᐊᖅᑎᓪᓗᑎᑦ ᐃᓄᓕᕆᔨᒥᑦ ᐃᓚᖕᓂ ᐳᓛᖅᑕᐅᖃᑦᑕᕐᓂᕐᒧᑦ.
  • ᐃᓱᒫᓘᑎᒋᔭᖅᐱᑦ ᒥᒃᓵᓄᑦ ᑐᓴᖅᑎᑦᑎᔪᒪᓂᕐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᒃᓵᓄᑦ ᐃᓱᒪᓕᕆᔨᒧᑦ, ᐋᓐᓂᐊᓯᐅᖅᑎᒧᑦ ᐊᓯᖏᓐᓄᓪᓗ.
  • ᐃᑲᔪᖅᑕᐅᒃᑲᓐᓂᕈᒪᓗᑎᑦ ᐱᔾᔪᑎᖃᕐᓗᒍᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᑮᓇᐅᔭᖁᑎᖏᓐᓄᑦ ᐱᓇᓱᐊᕐᓂᕆᔭᑦ ᐱᕙᓪᓕᐊᑦᑎᐊᙱᓐᓂᖓᓄᑦ.
  • ᓇᓗᓕᕈᕕᑦ ᓇᓕᐊᒃ ᒐᕙᒪᐅᑉ ᐱᓕᕆᕝᕕᖓ ᐱᓕᕆᐊᒃᓴᖓᓘᓐᓃᑦ ᐃᓕᖕᓂ ᐃᑲᔪᕈᓐᓇᕐᒪᖔᑦ.

ᓇᓗᒍᕕᑦ ᐃᑲᔪᕈᓐᓇᕐᓂᑦᑎᓐᓂᒃ ᐃᓕᖕᓂᑦ, ᐅᕙᑦᑎᓐᓄᑦ ᖃᐅᔨᒋᐊᖏᓐᓇᖁᕙᑦᑎᒋᑦ. ᐃᑲᔪᕈᓐᓇᙱᒃᑯᑦᑕ, ᐃᓕᖕᓄ ᓇᓂᓯᓂᐊᖅᑐᒍᑦ ᑭᓇᒥᑦ ᐃᑲᔪᕈᓐᓇᖅᑐᒥᑦ.

ᐃᓱᒫᓗᒃᑐᖓ ᐃᓚᒪ ᒥᒃᓵᓄᑦ, ᐃᑲᔪᕈᓐᓇᖅᐱᑦ?

ᐱᔪᓐᓇᐅᑎᖃᖅᑐᑎᑦ ᐃᓅᓯᖃᕐᓂᕐᒥᑦ ᖃᓄᐃᙱᑦᑎᐊᖅᑐᒥᑦ ᐃᓚᒌᓂᑦ ᐃᓕᖕᓂᑦ ᐃᑲᔪᖅᓯᖅᑐᓂᒃ ᒐᕙᒪᒃᑯᓪᓗ ᐱᓕᕆᐊᒃᓴᖃᕐᒥᔪᑦ ᐃᑲᔪᖅᓯᕐᓂᕐᒥᑦ ᐃᓚᒌᓂᒃ. ᐃᓚᖏᑦᑎᒍᑦ ᐃᑲᔪᕈᓐᓇᖅᑐᒍᑦ ᐃᓕᖕᓂᑦ ᐃᓚᖕᓂᓪᓗ. ᓈᓚᒍᓐᓇᖅᑐᒍᑦ ᐃᓱᒫᓗᑎᒋᔭᖅᐱᑦ ᒥᒃᓵᓄᑦ. ᐃᑲᔪᕈᓐᓇᖅᑐᒍᑦ ᐃᓕᖕᓂᑦ ᐃᓚᖕᓂᓪᓗ ᐱᓕᕆᐊᒃᓴᑦ ᐱᔨᑦᑎᕋᐅᑏᓪᓗ ᒥᒃᓵᓄᑦ. ᐃᒃᓯᕚᖃᑎᖃᕈᓐᓇᖅᑐᒍᑦ ᐃᓕᖕᓂ ᑲᑎᒪᓗᑕ, ᐃᓚᑎᓪᓗ ᒐᕙᒪᒥᓪᓗ ᐃᖅᑲᓇᐃᔭᖅᑎ ᐊᐱᕆᒍᕕᑦ ᑕᐃᒪᓐᓇ.

ᓱᕈᓯᑐᐃᓐᓇᐅᔪᖓ. ᐊᒡᓚᒡᕕᖕᓄ ᐅᖄᓚᔪᓐᓇᖅᐳᖓ?

ᑭᓇᑐᐃᓐᓇᖅ ᐅᕙᑦᑎᓐᓄ ᐅᖄᓚᔪᓐᓇᖅᑐᖅ. ᐃᒡᕕ ᐅᖄᓚᔪᓐᓇᖅᑐᑎᑦ ᐃᓐᓇᕐᒥᒡᓘᓐᓃᑦ ᐅᖃᓗᒃᑎᑦᑎᔪᓐᓇᖅᑐᑎᑦ.  

ᖃᐅᔨᔪᖃᕐᓂᐊᖅᐸ ᐃᓕᖕᓄ ᐅᖃᓗᖕᓂᕐᓄ?

ᐱᑦᑎᐊᖅᐸᕗᑦ ᐃᒻᒥᒃᑰᕐᓃᑦ. ᑐᓂᓯᔾᔮᖏᑦᑐᒍᑦ ᐃᒡᕕᑦ ᒥᒃᓵᓅᖓᔪᓂᒃ ᐃᓕᖕᓂ ᐱᔪᓐᓇᖅᑎᑕᐅᓚᐅᙱᓪᓗᑕ. ᑭᓯᐊᓂᓕ, ᖃᔅᓰᓐᓇᕐᓂᒃ ᖃᓄᐃᔾᔪᑎᖃᖅᑎᓪᓗᑕ ᐅᓂᒃᑲᐅᓯᕆᔭᕆᐊᖃᖅᑕᕗᑦ ᐅᖃᐅᓯᕆᔭᑎᑦ. ᒪᑯᐊᖑᕗᑦ:
 
  • ᐅᖃᕈᕕᑦ ᐃᒡᕕᑦ ᑭᓇᓘᓐᓃᑦ ᐅᓗᕆᐊᓇᖅᑐᒦᓕᕐᓂᖓᓂᑦ
  • ᐅᖃᕈᕕᑦ ᐃᒡᕕᑦ ᑭᓇᓘᓐᓃᑦ ᐃᑲᔪᖅᑕᐅᑲᐅᑎᒋᔭᕆᐊᖃᕐᓂᖓᓂᑦ
     
ᖃᐅᔨᒋᐊᕆᐊᖃᑐᐃᓐᓇᕆᐊᖃᕐᒥᔪᒍᑦ ᐊᖓᔪᖅᑳᕐᓄᑦ ᑲᒪᔨᒋᔭᕐᓄᓪᓘᓐᓃᑦ ᐅᑭᐅᖃᕈᕕᑦ 12 ᑐᖔᓄᓪᓗ ᖃᐅᔨᒋᐊᕈᕕᓪᓗ ᐊᒡᓚᒡᕕᑦᑎᓐᓄᑦ ᐃᑲᔪᖅᑕᐅᔪᒪᓗᑎ. ᑭᓯᐊᓂ ᑕᐃᒪᐃᓚᐅᖅᓯᒪᔾᔮᖏᑦᑐᒍᑦ ᐃᓱᒪᒍᑦᑕ ᐃᓕᖕᓄ ᐃᑲᔪᑦᑎᐊᔾᔮᖏᓐᓂᖓᓂ.  ᖃᐅᔨᒪᔭᕆᐊᖃᕆᕙᑦ ᖃᐅᔨᑎᑦᑎᔭᕆᐊᖃᕈᑦᑕ ᐃᒡᕕᑦ ᒥᒃᓵᓄᑦ, ᐱᓕᕆᖃᑎᒋᓂᐊᖅᑕᑦᑎᒋᑦ ᖃᓄᖅ ᑕᐃᒪᐃᑦᑕᕆᐊᖃᕐᒪᖔᑦ.

ᖃᓅᓂᐊᖅᐸ ᐃᓕᖕᓄ ᖃᐅᔨᒋᐊᕈᒪ?

ᓯᕗᓪᓕᖅᐹᖅ ᐅᖃᖃᑎᒋᔭᑦ ᑲᒪᒋᔭᐅᔪᓕᕆᔨᐅᓂᐊᖅᑐᖅ. ᐃᓕᖕᓂ ᐊᐱᕆᓂᐊᖅᑐᖅ:

  • ᐊᑎᕐᓂᑦ
  • ᐃᓅᓕᕐᕕᒃᓯᐅᑎᕐᓂᑦ
  • ᑐᑭᓯᒋᐊᕐᕕᖕᓂᑦ
  • ᐃᓱᒫᓘᑎᒋᔭᕐᓂᑦ

ᑭᖑᓪᓕᕐᒥᑦ, ᐅᖃᖃᑎᖃᓕᓪᓗᐊᖅᑐᑎ ᓱᕈᓯᕐᓂᑦ ᒪᒃᑯᒃᑐᓂᓪᓗ ᑭᒡᒐᖅᑐᐃᔨᑦᑎᓐᓂᒃ. ᑕᐃᒎᓯᖃᖅᑎᑕᕗᑦ ᑕᒪᒃᑯᐊ ᐃᖅᑲᓇᐃᔭᖅᑏᑦ ᑭᒡᒐᖅᑐᐃᔩᑦ ᓇᐃᓈᕐᓗᒍᑦ. ᑭᒡᒐᖅᑐᐃᔨ ᐅᖃᐅᓯᖃᕐᓂᐊᖅᑐᖅ ᖃᓄᖅ ᐊᒡᓚᒡᕕᒃᐳᑦ ᐃᑲᔪᕈᓐᓇᕐᒪᖔᑦ, ᓇᓗᓇᐃᔭᕐᓗᓂ ᐱᔪᓐᓇᐅᑎᒋᔭᕐᓂᑦ ᐃᒻᒥᒃᑰᕈᓐᓇᕐᓂᕐᓂᑦ ᓇᓗᓇᐃᕐᓗᓂᓗ ᐱᓕᕆᖃᑎᖃᕈᒪᓂᕐᓂᑦ.

 ᐃᒪᐃᓕᕐᓗᓂᓗ:

  • ᐃᓕᖕᓂ ᓈᓚᓕᕐᓗᓂ
  • ᐊᐱᖅᓱᕐᓗᓂ ᑐᑭᓯᑦᑎᐊᕈᒪᓗᓂ ᖃᓄᐃᒻᒪᖔᑦ
  • ᐊᐱᕆᓗᓂ ᖃᓄᐃᑦᑐᒪᖕᒪᖔᖅᐱᑦ
  • ᐅᖃᐅᓯᖃᕐᓗᓂ ᖃᓄᖅ ᐃᑲᔪᕈᓐᓇᕐᒪᖔᑦᑕ 

ᑕᒪᓐᓇᐅᕌᓂᒃᑯᓂ, ᐃᓱᒪᓕᐅᕆᔪᓐᓇᖅᑐᑎᑦ ᐱᓕᕆᖃᑎᖃᕈᒪᖕᒪᖓᖅᐱᑦ ᑭᒡᒐᖅᑐᐃᔨᒥᑦ. ᓯᕗᑎᐅᓂᐊᖅᑐᑎᑦ ᑕᒪᑐᒥᖓ. ᑲᑎᙵᓗᓯ, ᓴᖅᑭᑦᑎᓂᐊᖅᑐᓯ ᑭᒡᒐᖅᑐᖅᑕᐅᓂᕐᒧᑦ ᐸᕐᓇᐅᒻᒥ.

ᐊᒡᓚᒡᕕᔅᓯᓐᓄ ᖃᐅᔨᒋᐊᕈᒪᒐᓗᐊᖅᑐᖓ ᑭᓯᐊᓂ ᒐᕙᒪᒥᑦ ᑲᒪᒋᔭᐅᓪᓗᖓ ᐃᓄᑑᓚᐅᑲᒋᐊᒃᓴᕐᓗ ᐊᔪᕐᓇᕆᓪᓗᒍ. ᖃᓅᓇᔭᖅᐳᖓ?

ᐱᔪᓐᓇᐅᑎᖃᖅᑐᑎᑦ ᐃᒻᒥᒃᑯᑦ ᖃᐅᔨᒋᐊᕆᐊᒃᓴᖅ ᐊᒡᓚᒡᕕᑦᑎᓐᓄᑦ. ᑖᓐᓇ ᑐᑭᖃᖅᐳᖅ ᑲᒪᒋᔭᖃᖅᑐᖅ ᐃᓂᒋᔭᕐᓂᑦ ᐃᓄᑑᓚᐅᑲᒃᑎᑦᑎᔭᕆᐊᖃᕐᓂᖓᓂ ᐅᖄᓚᔪᓐᓇᖁᓪᓗᑎᑦ ᐃᕐᖐᓐᓈᖅᑕᐅᒃᑯᓘᓐᓃᑦ ᑎᑎᕋᕈᓐᓇᖁᓪᓗᑎᑦ. ᐊᒻᒪᐃᓛᒃ, ᑎᑎᕋᕈᒪᒍᕕᑦ ᐅᕙᑦᑎᓐᓄᑦ, ᐃᓕᖕᓂ ᑲᒪᒋᔭᖃᖅᑐᖅ ᓇᒃᓯᐅᔾᔨᔭᕆᐊᓕᒃ ᑎᑎᖅᑲᒥᑦ ᒪᒃᐱᕐᓂᑰᙱᑦᑐᒥᑦ.

ᑭᓱᒥᒃ ᐊᒡᓚᒡᕖᑦ ᐃᑲᔪᙱᑦᑕᕆᐊᖃᖅᐸ?

ᐱᓕᕆᐊᕗᑦ ᑐᕌᕈᑎᖃᖅᑎᑕᐅᕗᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐱᖁᔭᖓᓂ. ᑖᓐᓇ ᒪᓕᒐᖅ ᐋᖅᑭᒃᓯᓯᒪᕗᖅ ᐊᒡᓚᒡᕕᒃᐳᑦ ᖃᓄᐃᓕᐅᕈᑎᒋᔪᓐᓇᖅᑕᖏᓐᓂᒃ ᖃᓄᐃᓕᐅᕈᑎᒋᔪᓐᓇᙱᑕᖏᓐᓂᒡᓗ.

ᐱᖁᔭᖅᑎᒍᑦ, ᐃᒪᐃᓕᐅᕈᓐᓇᙱᑦᑐᒍᑦ:

  • ᒪᓕᒐᓕᕆᔨᒋᔭᐅᓂᖅ
  • ᐃᓱᒪᓕᐅᕆᓂᖅ ᒪᓕᒐᑎᒍᑦ ᐱᓯᒪᑎᑦᑎᓂᕐᒧᑦ
  • ᐃᓚᐅᓕᖃᑕᐅᓂᖅ ᐃᓛᒃᑯᑦ ᐊᖏᖃᑎᒌᙱᓐᓂᐅᔪᓂᒃ ᓇᖕᒥᓂᕆᔭᐅᔪᒧᑦ ᑎᒥᒋᔭᐅᔪᒧᓪᓘᓐᓃᑦ

ᑭᓯᐊᓂ ᖃᓄᑐᐃᓐᓇᖅ ᐃᑲᔪᖅᑕᐅᔪᒪᒍᕕᑦ, ᐅᕙᑦᑎᓐᓄᑦ ᖃᐅᔨᒋᐊᖁᕙᑦᑎᒋᑦ. ᐃᓕᖕᓂ ᐃᑲᔪᕈᓐᓇᙱᒃᑯᑦᑕ, ᐃᓕᖕᓄ ᓇᓂᓯᓂᐊᖅᑐᒍᑦ ᐃᑲᔪᕈᓐᓇᖅᑐᒥᑦ.

ᒪᓕᒐᑎᒍᑦ ᖃᓄᐃᖁᔨᔾᔪᑎᔪᓐᓇᖅᐱᙵ?

ᒪᓕᒐᓕᕆᔨᐅᙱᑦᑎᒍᑦ ᑕᐃᒪᐃᒻᒪᑦ ᒪᓕᒐᑎᒍᑦ ᖃᓄᐃᖁᔨᔪᓐᓇᙱᑦᑐᒍᑦ. ᑭᓯᐊᓂ ᐊᓯᖏᑦᑎᒍᑦ ᐃᓕᖕᓂ ᐃᑲᔪᕈᓐᓇᖅᑐᒍᑦ, ᐱᖃᓯᐅᑎᓪᓗᓂ ᒪᓕᒐᓕᕆᔨᒥᑦ ᐃᓕᖕᓄ ᕿᓂᕐᓂᖅ.

ᐃᑲᔪᕈᓐᓇᖅᐱᙵ ᓄᓇᕗᑦ ᓯᓚᑖᓃᒃᑲᓗᐊᕈᒪ?

ᐅᕙᑦᑎᓐᓄ ᖃᐅᔨᒋᐊᕐᕕᒋᖁᕙᑦᑎᒋᑦ ᓄᓇᕗᒻᒥᐅᑕᐅᒍᕕᑦ ᑭᓯᐊᓂ ᒐᕙᒪᒥ ᑲᒪᒋᔭᐅᒍᕕᑦ ᐱᔨᑦᑎᕋᖅᑕᐅᒍᕕᓘᓐᓃᑦ ᓄᓇᕗᑦ ᓯᓚᑖᓂ. ᐊᒡᓚᒡᕕᒃᐳᑦ ᐱᓕᕆᖃᑎᖃᕈᓐᓇᑐᐃᓐᓇᖅᐳᑦ ᑕᒡᕙᐅᒻᒪᕆᒡᓗᓂ ᖃᓄᐃᔾᔪᑕᐅᔪᑦ ᓄᓇᕗᒻᒥ. ᑭᓯᐊᓂ ᐃᑲᔪᕈᓐᓇᑐᐃᓐᓇᕆᐊᖃᖅᑐᒍᑦ ᐱᓕᕆᖃᑎᖃᕐᓗᑕ ᓱᕈᓯᕐᓂᑦ ᐃᕕᒃᑲᓂᒡᓗ ᑭᒡᒐᖅᑐᐃᔨᒥᑦ ᐃᓂᒋᔭᕐᓃᑦᑐᒥᑦ.
 
ᐅᖄᓚᔪᓐᓇᖅᑐᑎᑦ ᐊᑭᖃᙱᑦᑐᒃᑯᑦ ᐅᕗᖓ 1-855-449-8118, ᓇᒡᒐᔾᔭᒥ ᐅᓪᓗᑐᐃᓐᓇᕐᒧᑦ 8:30 ᐅᓪᓚᒃᑯᑦ 5:00 ᐅᓐᓄᒃᓴᒧᑦ.