Kituuvat Nutaqqat Pilaarutingit?


Inuup pilaarutingit hunavaluit tamaita inuit piqaqtukhat, ittukhaq piyakhangillu inuukmata. Inuup pilaarutingit piyuq aadjikutariikhutik tamainnut inuknut – humaangittuq arnaugumi angutaugumiluuniit, humi nunaqarumi, pitquhinga ukiungaluuniit. Piqarumi inuup pilaarutinik ikayurniaqtuq kinaliqaak nakuuyumik pigiami. Kihimi nutaqqat inuulrammiillu ayurhalluaqtut inirninit. Ilaani ihariagiyut nakuutqiamik ikayuutikhamik aaniqtailiniqmiklu. Taimaatut, 1989mi, tamna Nunaryuami Katimayiit angiqtaa tamna Katimayut Pilaarutinginnut Nutaqqat. Tamna makpiraaq naunaiqhimayuq hapummiyait “pilaarutingit tamaita nutaqqat pipkaidjutihimaittumik inuuhiqmut inminik ihumaginiqmik unalu inmiknik piumayanginnik.”

Tamna Katimainga piqaqtuq 54nik aadlatqiinguyunik titiraqhimaninngit ilangilluuniit. Hapkuat titiraqhimaninngit naunaiqtaa amihut aadlatqiit nutarap pilaarutinginnik. Naunaiyaqtaallu havaangit munariyangillu ilagiiktut kavamatkullu piqaqtut ikayuutautigiami hapkuat pilaarutingit.

Akhuurutauyuq ilitarigiami tamaita hapkuat titiraqhimaninngit Katimayingani atayut. Avvalimaitaik aadlamit kinalu quulipkalimaitaa aadlamik. Kihimi, tamaita pilaarutingit, havaangit munariyangillu ihumagiyauyukhaugaluat ihumaliulirumi ayurhautipkaiyuq nutaqqanik inuulrammiiniklu.

Ilangit nutarap pilaarutingit Katimayingani hapkuninnga ilaliutihimayut:

  • pilaarutiqarluni atiqaqluni kinauyaakhaaniklu
  • pilaarutiqarluni niqiqattiaqhimaluni qayangnaittumiklu piluni
  • pilaarutiqarluni, taimaa, munariyauyukhaq angayuqqaaminit
  • pilaarutiqarluni ilihaqtukhaq
  • pilaarutiqarluni ilauyukhaq ilamiknik, ilihaqluni inukmiulunilu inuuyukhaq
  • pilaarutiqarluni hapummiyauyukhaq ningaqtunit

Ihumagiyugut hapummilugit atuliqtitaulugillu nutarap pilaarutingit ikayuqniaqtuq avaliittut inuulrammiit, ilangit, tamaitalu nunaqatigiyangit nakuuyumik pigiamikni.