ᑲᓇᑕᒥᐅᓄᑦ ᑲᑎᒪᔩᑦ ᐅᑯᓄᖓ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᐅᔾᔨᖅᓴᑦᑎᐊᖁᔨᔪᑦ ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ


ᑐᕌᓐᑐ (ᓄᕕᐱᕆ 20, 2017) − ᐅᓪᓗᒥ, ᓇᓗᓇᐃᖅᑕᕗᑦ ᑲᓇᑕᒥ ᓄᑕᖅᑲᑦ ᐅᓪᓗᕆᓂᐊᕐᓗᓂᐅᒃ, ᑲᑎᒪᔩᑦ ᑲᓇᑕᒥᐅᑕᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᑦ ᐱᒋᐊᖁᔨᔪᑦ ᒐᕙᒪᑐᖃᒃᑯᓂᑦ, ᑲᓇᑕᒥᑦ ᐊᕕᑦᑐᓯᒪᓂᖏᓐᓂᑦ ᐊᒻᒪᓗ ᓄᓇᓖᑦ ᒐᕙᒪᖏᓐᓂᑦ, ᐊᒻᒪᓗ ᑲᓇᑕᒥᐅᓕᒫᓂᑦ, ᐃᖃᐅᒪᖁᔨᓪᓗᑎᒃ ᓯᕗᓪᓕᖅᐸᐅᓗᓂ ᐱᓕᕆᐊᕆᔭᐅᖁᔭᐅᓪᓗᑎᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐱᔪᓐᓇᐅᑎᑦ. ᑲᑎᒪᔩᑦ ᑲᓇᑕᒥᐅᑕᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᓄᑦ ᑲᑐᔾᔨᖃᑎᒌᖑᒻᒪᑕ ᓄᑕᖅᑲᓄᑦ ᑭᒡᒐᖅᑐᐃᒻᒪᑕ, ᐊᑲᕆᔭᐅᖏᑦᑐᓂᒃ ᖃᐅᔨᓴᕐᓂᒃᑯᑦ ᐊᒻᒪᓗ ᑭᒡᒐᖅᑐᐃᔨᓂᑦ ᑲᓇᑕᓕᒫᒥᑦ ᐱᓕᕆᔭᕆᐊᖃᖅᑕᖏᓐᓂᑦ ᐃᓚᒋᓗᒋᑦ ᐅᖃᐅᔨᒋᐊᖃᑦᑕᕐᓗᑎᒃ ᐱᔪᓐᓇᐅᑎᖏᓐᓂᑦ ᓄᑕᖅᑕᑦ ᒪᒃᑯᒃᑐᐃᓪᓗ. ᐃᒻᒥᒃᑰᖢᑕ ᐱᓕᕆᔨᐅᒐᑦᑕ ᑭᒡᒐᖅᑐᐃᓂᕐᒧᑦ ᒪᓕᒐᐅᔪᓂᑦ, ᐊᒻᒪᓗ ᐱᓕᕆᐊᖃᕋᑦᑕ ᐃᓱᒫᓗᑎᒋᔭᐅᔪᓂᑦ. ᐅᔾᔨᕆᑦᑎᐊᕐᓗᒋᑦ ᐱᔪᓐᓇᐅᑎᑦ ᓄᑕᖅᑲᓄ ᒪᒃᑯᒃᑐᓄᓪᓗ ᓯᕗᓪᓕᖅᐸᐅᑎᓐᓂᐊᕋᑦᑎᒍ.

ᓄᑕᖅᑲᓄᑦ ᐱᔪᓐᓇᐅᑎᑦ ᐅᔾᔨᕐᓇᑐᐃᓐᓇᖏᒻᒪᑕ; ᓇᓗᓇᐃᖅᓯᒪᑦᑎᐊᖅᑐᑦ ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ, ᓴᖢᓴᐃᖅᑕᐅᓯᒪᔪᑦ ᑲᓇᑕᒥᐅᑦ ᒐᕙᒪᖏᓐᓄᑦ 1991−ᒥᓂᑦ. ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ ᐊᑕᒻᒪᑦ ᑐᑭᓯᐅᒪᒻᒪᑕ ᓯᕗᓪᓕᖅᐹᒥᑦ ᐱᓕᕆᐊᕆᔭᐅᔭᕆᐊᖃᕐᓂᖓᓂᑦ ᓄᑕᖅᑲᓕᒫᓄᑦ.

ᓲᖃᐃᒻᒪ ᐱᔪᓐᓇᐅᑎᑦ ᓇᓗᓇᐃᔭᖅᓯᒪᑦᑎᐊᖅᑐᑦ, ᑭᓯᐊᓂ, ᑭᒃᑯᓕᒫᓄᑦ ᖃᐅᔨᒪᔭᐅᖏᒻᒪᑦ − ᑕᒪᓐᓇ ᐊᓯᔾᔨᕆᐊᖃᓪᓚᕆᒃᑐᖅ. ᐃᓚᒋᔭᐅᔪᖅ 54−ᒥᑦ ᑎᑎᕋᖅᓯᒪᓂᓕᒻᒥᑦ, ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ ᓇᓗᓇᐃᖅᓯᓯᒪᒻᒪᑦ ᓄᑕᖅᑕᑦ ᐱᔪᓐᓇᐅᑎᖃᕐᒪᑕ ᓈᓚᒃᑕᐅᔪᓐᓇᕐᓗᑎᒃ (ᑎᑎᕋᖅᓯᒪᓂᓕᒃ 12−ᒥᑦ) ᐱᔪᓐᓇᐅᑎᓖᑦ ᓂᕿᓂᑦ, ᐊᓐᓄᕌᖃᕐᓂᕐᒥᑦ ᐊᖏᕐᕋᖃᕐᓂᕐᒥᓪᓗ (ᑎᑎᕋᖅᓯᒪᓂᓕᒃ 27−ᒥᑦ), ᐱᔪᓐᓴᐅᑎᓖᑦ ᐃᓕᖅᑯᓯᑐᖃᕐᒥᓂᑦ ᐊᑐᕈᓐᓇᖅᑐᑦ (ᑎᑎᕋᖅᓯᒪᓂᓕᒃ 30-ᒥᑦ), ᐱᔪᓐᓇᐅᑎᓖᑦ ᐃᓖᔭᕆᔭᐅᑕᐃᓕᓂᕐᒥᑦ (ᑎᑎᕋᖅᓯᒪᓂᓕᒃ 19, 34, 35, 36,37) ᐊᒻᒪᓗ ᐱᔪᓐᓇᐅᑎᓖᑦ ᐋᓐᓂᐊᖃᖅᑕᐃᓕᓂᕐᒥᑦ (ᑎᑎᕋᖅᓯᒪᓂᓕᒃ 24−ᒥ) ᐊᒻᒪᓗ ᐃᓕᓐᓂᐊᕐᓂᕐᒥᑦ (ᑎᑎᕋᖅᓯᒪᓂᓕᒃ 28−ᒥᑦ).

ᑲᓇᑕᒥ ᓄᑕᖅᑲᑦ ᐅᓪᓗᖓ ᓇᓪᓕᐅᑎᒃᐸᑦ, ᑎᓕᐅᕆᕗᒍᑦ ᑭᒃᑯᑐᐃᓐᓇᕐᓂᑦ ᐃᑲᔪᖅᓱᐃᖁᔨᓪᓗᑕ ᐊᒻᒪᓗ ᐱᔪᒥᓇᖅᓴᕆᓗᑎᑦ ᓄᑕᖅᑕᑦ ᐱᔪᓐᓇᐅᑎᖏᓐᓂᑦ. ᐱᓗᐊᖅᑐᒥᑦ ᐃᓚᒋᖃᓯᐅᑎᔪᓕᒫᓄᑦ ᐱᔪᓐᓇᐅᑎᓄᑦ ᓄᓇᖃᖅᑳᖅᓯᒪᔪᑦ ᓄᑕᖅᑲᖏᓐᓄᑦ ᒪᒃᑯᒃᑐᖏᓐᓄᓪᓗ ᑭᒡᒐᖅᑐᖅᑕᐅᖃᑦᑕᖏᒻᒪᑕ ᓄᑕᖅᑲᑦ ᖃᓄᐃᓕᐅᖅᑕᐅᔾᔪᓯᖏᓐᓄᑦ.

ᑲᓇᑕᒥᐅᑦ ᐱᓕᕆᑦᑎᐊᖅᑐᑦ ᑕᒪᒃᑯᓂᖓ, ᒐᕙᒪᕗᑦ ᑲᒪᙱᓗᐊᕐᒪᑕ ᐃᒃᐱᒍᓱᒋᐊᒃᓴᖅ ᓄᑕᖅᑲᑦ ᐱᔪᓐᓇᐅᑎᖏᑦ ᐊᓯᖏᓐᓄᑦ, ᓲᕐᓗ ᑐᓴᐅᒪᑎᑦᑎᐊᕐᓗᒋᑦ ᓄᑕᖅᑲᑦ ᐃᓐᓇᐃᓪᓗ ᓄᑕᖅᑲᑦ ᐱᔪᓐᓇᐅᑎᖏᓐᓂᑦ, ᐊᒻᒪᓗ ᐃᓚᒋᖃᓯᐅᑎᓗᒋᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐃᓕᓐᓂᐊᕈᑎᓃᓗᑎᒃ ᐃᓕᓐᓂᐊᖅᑕᐅᖃᑦᑕᕐᓂᐊᕐᒪᑕ. ᒪᒃᑯᒃᑐᒥᑦ ᓄᓇᖃᖅᑳᖅᓯᒪᔪᒥᑦ ᐅᖃᖅᑐᖃᓚᐅᕐᒪᑦ, “ᓄᑕᖅᑲᑦ ᐊᒻᒪᓗ ᑎᒍᐊᖑᐊᖅᐸᑦᑐᑦ ᖃᐅᔨᒪᑲᐅᑎᒋᔭᕆᐊᓖᑦ ᓄᑕᖅᑲᑦ ᐱᔪᓐᓇᐅᑎᖏᓐᓂᑦ ᐊᒻᒪᓗ ᖃᓄᐃᓕᐅᕈᑎᒋᓗᒍ.”ᓄᑕᖅᑲᓄᑦ ᑭᒡᒐᖅᑐᐃᔨᐅᓪᓗᑕ, ᖃᓄᐃᖏᑦᑎᐊᖁᔨᖃᑦᑕᕋᑦᑕ ᓄᑕᖅᑲᑦ ᒪᒃᑯᒃᑐᓪᓗ ᑐᓴᐅᒪᑦᑎᐊᕋᓗᐊᕐᒪᖔᑕ ᐱᔪᓐᓇᐅᑎᒥᓂᑦ. ᐊᔪᕐᓇᖃᑦᑕᕋᓗᐊᖅᑎᓪᓗᒍ ᓄᑕᖅᑲᓄᑦ ᒪᒃᑯᒃᑐᓄᓪᓗᓃᑦ ᐅᔾᔨᕈᓱᓐᓂᕐᒥᑦ ᓇᒻᒥᓂᑦ ᐱᔪᓐᓇᐅᑎᖏᑦ ᐊᑐᕐᓂᕐᓗᒃᑕᐅᓂᖏᓐᓄᑦ. ᑕᐃᒪᐃᓐᓂᖓᓄᑦ ᑭᓇᑐᐃᓐᓇᒧᑦ ᐃᑲᔪᖅᑕᐅᔪᒪᕙᒃᑐᒍᑦ.

ᑲᓇᑕᒥᐅᑦ, ᐃᓚᒋᓪᓗᒋᑦ ᒐᕙᒪᐅᔪᑦ, ᓯᕗᓪᓕᐅᔨᖁᓗᒋᑦ ᐅᔾᔨᕈᓱᑦᑎᐊᕐᓂᕐᒥᑦ ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ, ᐃᑲᔪᖅᓯᖁᔨᕗᒍᑦ ᓄᑕᖅᑲᑦ ᐱᔪᓐᓇᐅᑎᖏᓂᑦ, ᐊᒻᒪᓗ ᐱᒋᐊᖅᑎᑦᑎᓗᓯ ᐅᔾᔨᖅᓴᑦᑎᐊᕐᓂᕐᒥᑦ ᐱᔪᓐᓇᐅᑎᒋᔭᐅᔪᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᓅᓯᕗᑦ ᓴᐳᑎᓯᒪᓂᐊᕋᑦᑎᒍ.

ᖃᓄᑐᒑᔭᖅᐸ ᐱᒋᐊᖅᑎᑦᑎᓂᖅ? ᑐᑭᓕᒃ ᐱᓕᕆᐊᖑᕙᓪᓕᐊᓗᓂ ᑐᓴᐅᒪᑎᑦᑎᓂᖅ ᓄᑕᖅᑲᑦ ᐱᔪᓐᓇᐅᑎᖏᑦ. ᑐᑭᖃᖅᐳᖅ ᐃᑲᔪᖃᑦᑕᕐᓗᒋᑦ ᓄᑕᖅᑲᑦ ᒪᒃᑯᒃᑐᓪᓗ ᓄᓇᑦᑎᓐᓂᑦ ᐅᔾᔨᕈᓱᒃᑎᑦᑎᐊᕐᓗᒋᑦ ᐱᔪᓐᓇᐅᑎᖏᓐᓂᑦ. ᐊᒻᒪᓗ ᑐᑭᖃᕐᒥᔪᖅ ᐅᖃᐅᓯᕆᖃᑦᑕᕐᓗᒋᑦ ᓄᑕᖅᑲᑦ ᐅᕝᕙᓗᓃᑦ ᒪᒃᑯᒃᑐᑦ ᐃᑲᔪᖅᑕᐅᔭᕆᐊᖃᖅᐸᑕ. ᐊᒻᒪᓗ ᑐᑭᖃᕆᐊᖃᖅᐳᖅ ᓂᕆᐅᒋᓗᒋᑦ ᒐᕙᒪᐃᑦ ᐊᑐᑦᑎᐊᕋᓗᐊᕐᒪᖔᑕ ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ, ᐊᒻᒪᓗ ᑕᑎᒋᔭᐅᔪᓐᓇᕐᓗᑎᒃ.

###

ᐱᔾᔪᑎᒋᓪᓗᒋᑦ ᑲᓇᑕᒥᐅᓄ ᑲᑎᒪᔩᑦ ᓄᑕᖅᑲᓐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒋᔭᐅᔪᑦ

ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᓪᓗᑎᒃ ᑲᑐᔾᔨᖃᑎᒌᖑᕗᑦ ᒪᓕᒐᑎᒍᑦ ᑎᓕᔭᐅᓯᒪᓪᓗᑎᒃ ᑭᒡᒐᖅᑐᐃᔨᐅᓪᓗᑎᒃ ᐱᔪᓐᓇᐅᑎᒋᔭᐅᔪᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ. ᑕᒪᒃᑯᐊ ᑭᒡᒐᖅᑐᖅᑏᑦ ᐊᐅᓚᑐᐃᓐᓇᕆᐊᖃᖅᐳᑦ ᐊᔾᔨᒌᙱᑦᑐᑎᒍᑦ ᑕᐃᔭᐅᕙᒃᑐᑎᒍᑦ (ᓲᕐᓗ ᐃᒪᓐᓇ,−ᑭᐅᓯᔨ ᑭᒡᒐᖅᑐᐃᔨ,ᐱᓕᕆᖃᑎᖃᖅᑎ, ᑲᒥᓯᓇ) ᑭᓯᐊᓂ ᑕᒪᕐᒥᑦᑎᐊᖅ ᑭᒡᒐᖅᑐᖅᑎᓪᓚᕆᒋᔭᐅᕗᑦ ᐅᖃᐅᓯᐅᓯᒪᔪᓂ ᐊᕕᒃᓯᒪᓂᕆᔭᐅᔪᓂ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕐᓂ. ᑕᒪᕐᒥᑦᑎᐊᖅ CCCYA−ᒧᑦ ᐃᓚᒋᔭᐅᔪᑦ ᐃᓛᒃᑰᖅᖢᑎᒃ ᐱᓕᕆᔨᓪᓚᕆᐅᓪᓗᑎᒃ ᐅᖃᕐᕕᖃᑲᐅᑎᒋᕙᒃᖢᑎᒃ ᒪᓕᒐᓕᐅᕐᕕᖕᒥᐅᓄᑦ ᐱᓕᕆᕝᕕᒋᔪᓐᓇᖅᑕᒥᓂ ᐃᓂᒥᓂᒃ ᐱᔾᔪᑎᖃᕐᓗᑎᒃ. ᑕᒪᕐᒥᒃ ᐊᑐᓂᑦ CCCYA−ᒧᑦ ᐃᓚᒋᔭᐅᔪᓄᑦ ᑎᑎᕐᕕᒋᔭᐅᔪᖅ ᐋᖅᑭᒃᑕᐅᓯᒪᕗᖅ ᐱᖁᔭᑎᒍᑦ ᐊᐅᓚᓂᐊᕐᓗᑎᒃ ᐃᓛᒃᑰᕐᓗᑎᒃ ᒐᕙᒪᒃᑯᑦ ᐱᔪᓐᓇᐅᑎᒋᔭᖏᓐᓂᑦ ᐊᐅᓚᑕᖏᓐᓃᓪᓘᓐᓃᑦ. ᑲᑎᒪᔨᒋᔭᐅᔪᑦ ᐃᓚᖃᖅᐳᑦ ᐃᓚᒋᔭᐅᔪᓂᒃ 9-ᓂᑦ ᐊᕕᒃᓯᒪᓂᕆᔭᐅᔪᓂᑦ ᒪᕐᕉᖕᓂᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᓂᑦ ᐅᑯᓇᓂ, ᐋᓪᐴᑕ, ᕈᐳᕆᑎᔅ ᑲᓚᒻᐱᐊ, ᒪᓂᑑᐸ, ᓂᐅ ᐳᕋᓐᔅᐅᐃ, ᓂᐅᕙᐅᓐᓛᓐᑦ, ᐊᒻᒪᓗ ᓛᐸᑐᐊ, ᓅᕙ ᒡᑰᓯᐊ, ᓄᓇᕗᑦ, ᐊᓐᑎᐅᕆᐅ, ᑯᐃᐸᒃ, ᓇᔅᑳᑦᓱᐊᓐ ᐊᒻᒪᓗ ᔫᑳᓐ.