ᐊᐃᖓᐃ ᐃᖅᑐᖅ:
ᑲᓇᑕᒥᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᖏᑦ ᑲᑐᔾᔨᔨᐅᕗᑦ ᓄᑕᖅᑲᓄᑦ ᐊᕕᒃᑐᖅᓯᒪᔪᓂᑦ ᑭᒡᒐᖅᑐᐃᔨᓂᑦ ᐱᓇᓱᐊᒐᖃᖅᑐᑦ ᖁᕝᕙᕆᐊᖅᓯᓂᖕᓂᑦ ᐱᔪᓐᓇᖕᓂᕆᔭᐅᔪᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓂᐱᖃᕆᐊᖅᑎᑦᑎᓂᖕᒥᓪᓗ. ᑭᒡᒐᖅᑐᐃᔩᑦ ᐃᓛᒃᑯᑦ ᐱᓕᕆᔨᐅᕗᑦ ᒪᓕᒐᓂᖅ ᐱᔪᓐᓇᖕᓂᖃᕐᕕᖏᓐᓂᑦ. ᑲᑎᒪᔨᒃᑯᑦ, ᓇᓗᓇᐃᕐᓯᓯᒪᒐᑦᑕ ᐊᒥᓱᓂ ᐃᓱᒫᓘᑎᒋᔭᑦᑎᓐᓂᑦ, ᐱᓕᕆᔪᒪᓪᓗᑕᓗ ᓴᖅᑭᑦᑎᓂᖕᓂᑦ ᐱᓕᕆᐊᖃᖕᓂᖕᓂᑦ ᐊᑲᐅᙱᓕᐅᕈᑎᓂᑦ ᑲᓇᑕᒥᑦ.ᑎᑎᕋᕐᕕᒋᕙᑦᑎᒋᑦ ᐃᑲᔪᖅᑐᐃᖁᓪᓗᑎᒋᑦ ᒪᓕᒐᒃᓴᒥᑦ S-206−ᐊᓯᔾᔨᖅᑕᐅᓯᒪᙱᖅᑐᖅ−ᐊᑐᕈᓐᓃᖅᑎᑕᐅᓗᓂᓗ 43 ᐱᕋᔭᒃᑐᓄᑦ ᒪᓕᒐᖅ, ᐋᓐᓂᖅᑎᕆᑎᑦᑎᔪᓐᓇᕈᑕᐅᔪᖅ ᓄᑕᖅᑲᓄᑦ ᐸᖅᑭᔨᖏᓐᓂᒃ.
ᑎᒥᐅᔪᑦ ᖃᐅᔨᓴᖕᓂᖏᑦ ᖃᐅᔨᔾᔪᑕᐅᓯᒪᕗᑦ ᑎᒥᒃᑯᑦ ᓱᐊᖕᓃᑦ ᐊᑐᖅᑕᐅᒐᔪᓛᖑᓂᖏᓐᓂᑦ ᐋᓐᓂᖅᑎᕆᓂᖅ ᓄᑕᖅᑲᓄᑦ, ᐊᒃᑐᐊᑦᑎᐊᕐᖢᑎᒡᓗ ᑕᒪᐃᓐᓄᑦ ᐃᒻᒥᒧᑦ ᐃᓄᖕᓄᑦ ᐅᓗᕆᐊᓇᖅᑐᓂᑦ. ᓄᑕᕋᒥᑦ ᐋᓐᓂᕐᓯᓂᖅ ᓯᖁᒥᑦᑎᓂᐅᕗᖅ ᐃᓅᓂᖏᓐᓄᑦ ᐱᔪᓐᓇᖕᓂᖏᓐᓂᑦ. ᐱᔪᓐᓇᖕᓂᖅ ᐃᓱᒪᕐᓱᕐᓗᓂ ᐋᓐᓂᖅᓱᖅᑕᐅᔾᔮᙱᓪᓗᓂ ᓴᐳᒻᒥᔭᐅᔪᒻᒪᕆᐊᓗᑦ ᓄᓇᕐᔪᐊᒥᑦ ᑲᑎᒪᔨᖏᑦᑕ ᐱᔪᓐᓇᖕᓂᖏᓐᓂᑦ ᓄᑕᖅᑲᓄᑦ, ᓄᓇᕐᔪᐊᒥᑦ ᓇᓗᓇᐃᔭᐅᑎᑦ ᐃᓅᑉ ᐱᔪᓐᓇᖕᓂᖏᓐᓂᑦ, ᑲᓇᑕᒥᓪᓗ ᐱᔪᓐᓇᖕᓃᑦ ᐃᓱᒪᖅᓱᕈᓐᓇᖕᓂᖕᓂᓪᓗ.
ᑲᓇᑕᒥᐅᑦ ᐃᓐᓇᐃᑦ ᒪᓕᒐᓄᑦ ᑐᙵᕕᖃᖅᐳᑦ ᓴᐳᔾᔭᐅᓂᐊᕐᓗᑎᒃ ᐋᓐᓂᖅᑎᕆᓂᖕᒥᑦ. ᓄᑕᖅᑲᑦ ᐊᔾᔨᑐᐃᓐᓇᖏᓐᓂᑦ ᐱᔪᓐᓇᖕᓂᓖᑦ ᓴᐳᑎᔭᐅᓗᑎᒃ ᒪᓕᒐᒃᑯᑦ. ᐅᖃᖅᓯᒪᔭᖓ 43−ᒥᑦ ᑐᖓᐅᓯᒪᖕᒪᑦ ᑭᒃᑯᓕᒫᓄᑦ ᐃᓕᓐᓂᐊᕐᓂᖅ ᐋᓐᓂᖅᑎᕆᓂᒃᑯᑦ ᓱᐊᖕᓃᑦ ᐊᓯᐊᒍᓪᓗ ᖃᓄᐃᓕᐅᖔᕆᐊᖃᖕᓂᖕᓂᑦ ᐱᐅᔪᒥᒡᓗ ᐃᓂᖅᑎᕆᓂᖕᓂᑦ ᐱᕈᖅᓴᐃᓂᖕᒥᑦ
ᑎᑎᕋᖅᓯᒪᔪᖅ 43 ᓄᑕᐅᑎᑦᑐᖅ ᑲᓇᑕᐅᑉ ᐱᖁᔭᖓᓂ. 53 ᓄᓇᕐᔪᐊᖕᒥᐅᑦ ᓴᐳᔾᔨᑦᑎᐊᕐᓯᒪᓕᖅᐳᑦ ᓄᑕᖅᑲᖁᑎᖏᓐᓂᑦ ᐋᓐᓂᖅᑎᕆᓂᖕᒥᑦ − ᐲᔭᖅᑕᐅᓪᓗᑎᒃ ᓄᑕᐅᙱᑦᑐᑐᖃᐃᑦ ᓴᐳᔾᔨᔾᔪᑎᕕᓃᑦ ᐸᖅᑭᔨᓄ ᐋᓐᓂᖅᑎᕆᔪᓄᑦ ᓄᖅᑲᖅᑎᑕᐅᑦᑎᐊᕐᖢᑎᒡᓘᓐᓃᑦ ᐋᓐᓂᖅᑎᕆᓃᑦ. 54−ᑲᓐᓃᑦ ᐊᖏᖅᓯᒪᓕᖕᒥᔪᑦ ᑕᐃᒪᐃᓕᐅᕈᒪᓪᓗᑎᒃ; ᑲᓇᑕ ᐃᓚᒋᔭᐅᙱᑦᑐᖅ. ᖁᔭᓈᖅᑕᐅᖁᔭᐅᕗᖅ 43 ᓱᓕᔪᓂ ᑭᒡᓕᓯᓂᐊᖕᓂᕐᒧᓪᓗ ᖃᐅᔨᓴᖅᑎᒃᑯᓐᓂᑦ ᑲᓇᑕᒥᑦ. ᑲᓇᑕᐅᑉ ᑲᑐᔾᔨᓪᓗᑎᒃ ᐅᖃᖅᓯᒪᔭᖏᑦ ᑎᒥᒃᑯᑦ ᓱᐊᖕᓃᑦ ᓄᑕᖅᑲᓂᑦ ᒪᒃᑯᒃᑐᓂᒡᓗ, ᐊᑎᓕᐅᖅᑕᐅᓯᒪᔪᑦ 600 ᐅᖓᑖᓄᑦ ᑲᑐᔾᔨᖃᑎᒌᖑᔪᓂᑦ, ᐊᔾᔨᒋᔭᐅᔪᓂᑦ ᓴᐳᔾᔨᔾᔪᑎᒃᓴᖃᖁᔨᕗᑦ ᓄᑕᖅᑲᓂᑦ ᐋᓐᓂᖅᑎᕆᔭᐅᓂᖕᒧᑦ ᑐᙵᕕᖃᖅᖢᑎᒃ ᐃᓐᓇᖕᓂᑦ.
ᑐᐊᒡᓕᒋᐊᖅᑕᐅᓂᖓ ᑎᑎᕋᖅᓯᒪᔪᒥᑦ 43−ᒧᑦ ᓴᐳᑎᔾᔪᑕᐅᓪᓗᓂ (ᑲᓇᑕᒥᑦ ᖁᑦᑎᓛᒥᑦ ᐃᖅᑲᖅᑐᐃᕕᐊ ᐊᕕᒃᓯᒪᓚᐅᖅᑐᑦ 43 ᐊᑭᓴᖅᑐᖅᑕᐅᓪᓗᓂ, 2004) ᓴᐳᔾᔨᔪᓐᓇᖕᓂᖃᙱᒻᒪᑦ ᓄᑕᖅᑲᓕᒫᓂᒃ ᐊᖓᔪᖅᑳᕆᔭᓂᑦ ᐸᖅᑭᔨᓂᒡᓗ ᐋᓐᓂᐊᖅᑕᐅᓗᑎᒃ. ᐃᓱᒪᓕᐅᕆᔭᖅ ᓇᓗᓈᕿᔾᔪᑕᐅᓚᐅᖅᐳᖅ ᐱᔪᓐᓇᕐᑎᑦᑎᓪᓗᑎᒃ ᐋᓐᓂᖅᑎᕆᓂᖕᒥᑦ ᓄᑕᖅᑲᒥᑦ ᐸᖅᑭᔨᒧᑦ, ᑕᒪᒃᑯᐊ ᓄᑕᖅᑲᑦ ᐅᑭᐅᓖᑦ 2−ᓗ 12−ᓗ ᐊᑯᙵᓐᓃᑦᑐᑦ ᓴᐳᑎᔭᐅᓯᒪᓇᑎᒃ. ᑲᓇᑕ ᑐᓴᐅᒪᔭᐅᑦᑎᐊᕐᑐᖅ ᐃᓄᖕᓄᑦ ᒪᓕᒐᓕᕆᔨᓂᖏᓐᓂᑦ ᓯᕗᓕᖅᑎᐅᓂᖏᓐᓂᒡᓗ ᐊᑦᑕᖕᓇᖅᑐᓂᑦ ᐃᓄᖕᓂᑦ ᓴᐳᔾᔨᓂᖕᓂᑦ. ᑭᓯᐊᓂ ᑲᓇᑕ ᑭᖑᕙᓯᒃᑐᖅ ᒪᒃᑯᓛᕗᑦ ᐱᔭᕆᐊᑭᓛᓪᓗ ᐊᔾᔨᖏᓐᓂᑦ ᓴᐳᑎᔭᐅᓯᒪᓂᖏᓐᓂᑦ ᐋᓐᓂᖅᑎᕆᓂᖕᒥᑦ ᐊᑲᕐᕉᑕᐅᕙᒃᑐᑦ ᐃᓐᓇᖕᓄᑦ.
ᐊᑐᕈᓐᓃᖅᑎᑲᐅᖅᑐᓚᐅᖅᓯᐅᒃ 43 ᐃᑲᔪᖅᑐᐃᓗᓯ ᒪᓕᒐᒃᓴᒥᑦ S-206-u5.
ᐃᓚᓐᓇᕆᔭᐃᑦ,
ᐆᕕᓐ ᐅᐃᓪᒪᓐ
ᐊᔪᖅᑳᖅ ᑲᓇᑕᒥᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᖏᓐᓂᑦ
(ᐊᕕᒃᓯᒪᓂᕆᔭᐅᔪᒥ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ)
ᐱᔾᔪᑎᒋᓪᓗᒋᑦ ᑲᓇᑕᒥᐅᓄ ᑲᑎᒪᔩᑦ ᓄᑕᖅᑲᓐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒋᔭᐅᔪᑦ
ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᓪᓗᑎᒃ ᑲᑐᔾᔨᖃᑎᒌᖑᕗᑦ ᒪᓕᒐᑎᒍᑦ ᑎᓕᔭᐅᓯᒪᓪᓗᑎᒃ ᑭᒡᒐᖅᑐᐃᔨᐅᓪᓗᑎᒃ ᐱᔪᓐᓇᐅᑎᒋᔭᐅᔪᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ. ᑕᒪᒃᑯᐊ ᑭᒡᒐᖅᑐᖅᑏᑦ ᐊᐅᓚᑐᐃᓐᓇᕆᐊᖃᖅᐳᑦ ᐊᔾᔨᒌᙱᑦᑐᑎᒍᑦ ᑕᐃᔭᐅᕙᒃᑐᑎᒍᑦ (ᓲᕐᓗ ᐃᒪᓐᓇ,−ᑭᐅᓯᔨ ᑭᒡᒐᖅᑐᐃᔨ,ᐱᓕᕆᖃᑎᖃᖅᑎ, ᑲᒥᓯᓇ) ᑭᓯᐊᓂ ᑕᒪᕐᒥᑦᑎᐊᖅ ᑭᒡᒐᖅᑐᖅᑎᓪᓚᕆᒋᔭᐅᕗᑦ ᐅᖃᐅᓯᐅᓯᒪᔪᓂ ᐊᕕᒃᓯᒪᓂᕆᔭᐅᔪᓂ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕐᓂ. ᑕᒪᕐᒥᑦᑎᐊᖅ CCCYA−ᒧᑦ ᐃᓚᒋᔭᐅᔪᑦ ᐃᓛᒃᑰᖅᖢᑎᒃ ᐱᓕᕆᔨᓪᓚᕆᐅᓪᓗᑎᒃ ᐅᖃᕐᕕᖃᑲᐅᑎᒋᕙᒃᖢᑎᒃ ᒪᓕᒐᓕᐅᕐᕕᖕᒥᐅᓄᑦ ᐱᓕᕆᕝᕕᒋᔪᓐᓇᖅᑕᒥᓂ ᐃᓂᒥᓂᒃ ᐱᔾᔪᑎᖃᕐᓗᑎᒃ. ᑕᒪᕐᒥᒃ ᐊᑐᓂᑦ CCCYA−ᒧᑦ ᐃᓚᒋᔭᐅᔪᓄᑦ ᑎᑎᕐᕕᒋᔭᐅᔪᖅ ᐋᖅᑭᒃᑕᐅᓯᒪᕗᖅ ᐱᖁᔭᑎᒍᑦ ᐊᐅᓚᓂᐊᕐᓗᑎᒃ ᐃᓛᒃᑰᕐᓗᑎᒃ ᒐᕙᒪᒃᑯᑦ ᐱᔪᓐᓇᐅᑎᒋᔭᖏᓐᓂᑦ ᐊᐅᓚᑕᖏᓐᓃᓪᓘᓐᓃᑦ. ᑲᑎᒪᔨᒋᔭᐅᔪᑦ ᐃᓚᖃᖅᐳᑦ ᐃᓚᒋᔭᐅᔪᓂᒃ 9-ᓂᑦ ᐊᕕᒃᓯᒪᓂᕆᔭᐅᔪᓂᑦ ᒪᕐᕉᖕᓂᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᓂᑦ ᐅᑯᓇᓂ, ᐋᓪᐴᑕ, ᕈᐳᕆᑎᔅ ᑲᓚᒻᐱᐊ, ᒪᓂᑑᐸ, ᓂᐅ ᐳᕋᓐᔅᐅᐃ, ᓂᐅᕙᐅᓐᓛᓐᑦ, ᐊᒻᒪᓗ ᓛᐸᑐᐊ, ᓅᕙ ᒡᑰᓯᐊ, ᓄᓇᕗᑦ, ᐊᓐᑎᐅᕆᐅ, ᑯᐃᐸᒃ, ᓇᔅᑳᑦᓱᐊᓐ ᐊᒻᒪᓗ ᔫᑳᓐ.