ᓄᑕᖅᑲᑦ ᐱᔪᓐᓇᐅᑎᖏᑦ ᐊᒻᒪ ᓇᖕᒥᓂᖅ ᑭᒡᒐᖅᑐᕈᓐᓇᕐᓂᖅ ᐅᖃᓕᒫᒐᖅ ᐱᔭᒃᓴᐅᓕᖅᑐᑦ ᓄᓇᕗᒻᒥ ᐃᓕᓐᓂᐊᕐᕕᐊᕈᓯᕐᓂᒃ


ᐱᕙᓪᓕᐊᔪᑦ ᓴᖅᑭᑕᑦ
ᓴᖅᑭᑕᐅᑲᐅᑎᒋᒋᐊᓕᒃ

ᓄᑕᖅᑲᑦ ᐱᔪᓐᓇᐅᑎᖏᑦ ᐊᒻᒪ ᓇᖕᒥᓂᖅ ᑭᒡᒐᖅᑐᕈᓐᓇᕐᓂᖅ ᐅᖃᓕᒫᒐᖅ ᐱᔭᒃᓴᐅᓕᖅᑐᑦ ᓄᓇᕗᒻᒥ ᐃᓕᓐᓂᐊᕐᕕᐊᕈᓯᕐᓂᒃ

ᐃᖃᓗᐃᑦ, ᓄᓇᕗᑦ − ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ ᐅᐱᒍᓱᒃᖢᓂ ᑐᓴᖅᑎᑦᑎᔪᒪᕗᖅ ᐅᖃᓕᒫᒐᓕᐊᕆᔭᐅᓯᒪᓕᕐᓂᖓᓂᒃ ᒨᓯᓯ ᐅᖃᓪᓚᒃᐳᖅ, ᓯᕗᓪᓕᖅᐹᖑᓪᓗᓂ ᐅᖃᓕᒫᒐᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᑦ ᑕᒪᑦᑕ ᐱᔪᓐᓇᐅᑎᖃᖅᑐᒍᑦ ᐅᖃᓕᒫᒐᕐᓂᒃ. ᐅᖃᓕᒫᒐᖅ, ᓴᖅᑭᑕᐅᓚᐅᖅᑐᖅ ᑲᑐᔾᔨᖃᑎᒌᒍᑕᐅᓪᓗᓂ ᐃᓕᓐᓂᐊᕐᓂᓕᕆᔨᒃᑯᓐᓂ ᐊᒻᒪ Inhabit ᐃᓕᓐᓂᐊᖅᑐᓕᕆᔨᒃᑯᓐᓂ, ᐅᖃᓕᒫᒐᙳᖅᑎᑕᐅᓚᐅᖅᐳᖅ ᐃᑲᔪᖅᑐᐃᔾᔪᑕᐅᓇᓱᒃᖢᓂ ᐃᓕᓐᓂᐊᕈᑎᓕᖕᓄᑦ 3-ᒧᑦ ᐅᖃᓕᒫᕆᐅᖅᐸᓪᓕᐊᔪᓄᑦ ᐅᖃᓕᒫᕆᐅᖅᓴᓂᕐᒥᒃ, ᐃᓕᓐᓂᐊᕐᓂᓕᕆᔨᒃᑯᓐᓄᑦ ᖃᐅᔨᒪᔾᔪᑕᐅᓪᓗᓂ ᐅᖃᓕᒫᒐᒃᓴᖅ.

ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᑦ ᐱᓕᕆᐊᒃᓴᖃᖅᐳᑦ ᐱᐅᓯᒋᐊᖅᑎᑦᑎᓂᕐᒥᒃ ᓄᑕᖅᑲᑦ ᒪᒃᑯᒃᑐᓪᓗ ᐱᔪᓐᓇᐅᑎᖏᓐᓂᒃ ᓄᓇᕗᒻᒥ ᐅᔾᔨᕆᔭᐅᓕᖅᑎᓪᓗᒋᓪᓗ ᓂᐱᖏᑦ, "ᑖᒃᑯᐊ ᐃᑲᔫᑎᒃᓴᑦ ᓴᖅᑭᓐᓇᓱᒃᖢᒋᑦ ᓯᕗᓪᓕᐅᔾᔭᐅᓵᖅᐳᖅ ᑎᑎᕋᕐᕕᑦᑎᓐᓂ," ᐅᖃᓚᐅᖅᐳᖅ ᓯᐅᕆ ᒪᒃᓃᐅᓪ−ᒧᓚᒃ, ᑭᒡᒐᖅᑐᖅᑎ ᓄᑕᖅᑲᓄᑦ ᒪᒃᑯᒃᑐᓄᓪᓗ. "ᐅᓂᒃᑳᖅ ᒨᓯᓯ−ᒥ ᐱᔾᔪᑎᓕᒃ ᓇᖕᒥᓂᖅ ᑭᒡᒐᖅᑐᖅᖢᓂ, ᖃᑕᙳᑎᖏᓐᓂᒃ ᐃᑲᔪᖅᑎᖃᖅᖢᓂ, ᐅᓂᒃᑳᖑᕗᖅ ᑎᓕᐅᕈᑕᐅᔪᓐᓇᖁᓪᓗᒍ ᒪᒃᑯᒃᑐᓄᑦ ᓄᓇᕗᒥᐅᓄᑦ ᓇᖕᒥᓂᖅ ᐅᖃᓪᓚᒍᒪᓕᕌᖓᑕ ᓯᕗᕋᙱᓐᓂᖅᓴᐅᔪᓐᓇᖁᓪᓗᒋᑦ."

ᐃᓚᒋᔭᐅᓪᓗᓂ ᐃᑲᔪᖅᓱᐃᔾᔪᑎᓄᑦ ᐱᕙᓪᓕᐊᓂᕆᔭᐅᔪᒧᑦ ᓇᖕᒥᓂᖅ−ᑭᒡᒐᖅᑐᐃᔪᓐᓇᕐᓂᕐᒧᑦ ᐊᔪᕈᓐᓃᖅᑕᐅᓲᑦ, ᒨᓯᓯ ᐅᖃᓪᓚᒃᐳᖅ ᑐᕌᒐᖃᕐᒥᔪᖅ ᐅᖃᓕᒫᖅᑐᑦ ᓇᖕᒥᓂᖅ ᐅᔾᔨᕈᓱᓕᕈᓐᓇᖁᓪᓗᒋᑦ, ᑎᓕᐅᕐᓗᒋᑦ ᖃᓄᐃᙱᑦᑎᐊᕐᓇᖅᑐᑦ ᑲᒪᒋᔭᕆᐊᓖᑦ, ᖃᐅᔨᔭᐅᑎᓪᓗᒍᓗ ᐱᒻᒪᕆᐅᓂᖓ ᐊᑑᑎᖃᑦᑎᐊᖅᑐᓂᒃ ᑐᓴᐅᒪᔪᓕᕆᓂᖅ.

ᐅᐃᒍᓕᐅᑎᔪᓐᓇᖅᑐᑦ ᐱᓕᕆᐊᒃᓴᑦ ᒨᓯᓯ ᐅᖃᓪᓚᒃᐳᖅ ᐅᖃᓕᒫᖅᑕᐅᓚᐅᕐᓗᓂ ᐋᖅᑭᒃᑕᐅᓚᐅᖅᐳᑦ ᐃᑲᔫᑎᒃᓴᐅᓪᓗᑎᒃ ᐃᓕᓴᐃᔨᓄᑦ ᐃᓕᓐᓂᐊᖅᑎᑦ ᐃᓚᐅᑎᑦᑐᓐᓇᕐᓗᒋᑦ ᐱᔾᔪᑕᐅᔪᒥᒃ, ᐃᑲᔪᖅᓱᕐᓗᒋᓪᓗ ᐅᖃᐅᓯᖃᖅᑎᓪᓗᒋᑦ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᕐᕕᐊᕈᓯᖏᓐᓂᒃ.

ᒨᓯᓯ ᐅᖃᓪᓚᒃᐳᖅ ᐱᔭᒃᓴᐅᓕᕐᓂᐊᖅᑐᖅ ᓄᓇᕗᒻᒥ ᐃᓕᓐᓂᐊᕐᕕᓕᒫᓂᒃ ᐃᓄᒃᑎᑑᖅᓯᒪᓗᓂ ᐊᒻᒪ ᖃᓪᓗᓈᑐᑦ ᒫᔾᔨ 2019−ᒥ ᐱᒋᐊᕐᓗᒍ, ᑭᖑᓂᐊᒍᑦ ᓴᖅᑭᓛᕆᓪᓗᑎᒃ ᐃᓄᐃᓐᓇᖅᑐᓐ ᑎᑎᕋᖅᓯᒪᓗᑎᒃ ᐊᒻᒪ ᐅᐃᕖᑐᑦ.

ᑐᑭᓯᒋᐊᒃᑲᓂᕈᒪᒍᕕᑦ:
ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᔪᓕᕆᓂᖕᓄᑦ ᑭᒃᑯᓕᒫᓄᓪᓗ ᐅᔾᔨᖅᓱᐃᑎᑦᑎᓂᖕᒧᑦ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ
867-975-5091 | kfoster@rcynu.ca