ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ


ᓄᓇᕐᔪᐊᕐᒥᑦ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ ᓄᓇᕐᔪᐊᓕᒫᒥ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᖏᖃᑎᒌᒍᑕᐅᕗᖅ, ᓇᓗᓇᐃᔭᐃᓪᓗᓂ  ᑕᒪᐃᓐᓂᒃ ᐱᔪᓐᓇᐅᑎᓕᒫᓂᒃ ᒪᒃᑯᒃᑐᑦ ᐱᓯᒪᔭᖏᓐᓂᒃ, ᐊᒻᒪᓗᑦᑕᐅᖅ ᐱᓕᕆᐊᑦᓴᐃᑦ ᒐᕙᒪᒃᑯᓐᓂᑦ ᑲᓲᒪᑎᑦᓯᓂᕐᒥᑦ ᑕᒪᒃᑯᓂᖓ ᐱᔪᓐᓇᐅᑎᒋᔭᐅᔪᓂᒃ. ᓄᑕᖅᑲᑦ ᐱᔪᓐᓇᐅᑎᖏᑦ ᐱᒋᔭᐅᕙᒃᐳᑦ ᑕᒪᕐᒥᑦᑎᐊᖅ ᒪᒃᑯᑦᑐᑦ ᐱᓯᒪᓪᓗᐊᖅᓱᓂᔾᔪᒃ, ᓲᕐᓗ ᐃᒪᓐᓇ, ᐊᑐᖅᑕᖃᖃᑦᑕᕈᓐᓇᕐᓂᖅ ᖁᐊᖅᓵᕐᓇᙱᑦᑐᒥᒃ ᐃᒪᕐᒥᒃ ᓂᕿᑦᑎᐊᕙᖕᓂᒡᓗ, ᐱᓕᕆᐊᕆᔪᓐᓇᓪᓗᐊᖅᑕᖏᓐᓄᓪᓘᓐᓃᑦ, ᓲᕐᓗ, ᐃᓕᓐᓂᐊᕆᐊᖅᐸᒡᓗᑎᒃ ᐃᓕᓐᓂᐊᖅᑎᑕᐅᕙᒡᓗᑎᒡᓗ ᓇᖕᒥᓂᖅ ᐅᖃᐅᓯᕐᒥᑎᒍᑦ. ᐊᑐᕈᓐᓇᕐᓂᖅ ᑕᒪᒃᑯᓂᖓ ᐃᑲᔪᖅᐸᒃᐳᖅ ᓄᑕᖅᑲᓂᒃ, ᒪᒃᑯᑦᑐᓂᒃ, ᐃᓚᖏᓐᓂᒡᓗ ᐱᐅᔪᓂᒃ ᓂᕈᐊᕆᔭᖃᕈᓐᓇᖅᐸᑦᓱᑎᒃ ᐃᓅᓯᕐᒥᓄᑦ, ᐃᑲᔪᖅᕈᑕᐅᕙᑦᑐᓂ ᐱᕈᖅᐸᓪᓕᐊᓂᖏᓐᓄᑦ ᐋᖅᑭᒃᓱᐃᕙᓪᓕᐊᕙᑦᓱᑎᓪᓗ ᐱᓕᕆᔪᓐᓇᑦᓯᐊᕐᓂᕐᒧᓪᓗ ᓄᓇᖅᑲᑎᒥᓄᑦ ᐃᒻᒥᓂᒃ, ᐃᓚᒥᓂᒃ ᓄᓇᓕᒻᒥᓂᓪᓗ ᒪᑭᑕᔪᓐᓇᖅᑎᑦᑎᕙᑦᓱᑎᒃ.
 
ᒪᒃᑯᑦᑐᓕᒫᑦ ᑖᒃᑯᓂᖓ ᐱᔪᓐᓇᐅᑎᓖᑦ, ᑭᒃᑰᒐᓗᐊᖅᐸᑕ ᐃᓱᒪᒋᔭᐅᙱᖦᖢᑎᒃ, ᓇᓂᕐᒥᐅᑕᐅᒐᓗᐊᖅᐸᑕ, ᐊᖓᔪᖅᑳᖏᑦ ᑭᓱᓕᕆᔨᐅᒐᓗᐊᖅᐸᑕ, ᖃᓄᖅ ᐅᖃᐅᓯᖅᑕᖃᕋᓗᐊᖅᐸᑕ, ᓇᒧᑦ ᐅᒃᐱᕋᓗᐊᖅᐸᑕ, ᐊᖑᑕᐅᒐᓗᐊᖅᐸᑕ ᐊᕐᓇᐅᒐᓗᐊᖅᐸᑕ, ᖃᓄᖅ ᐃᓕᖅᑯᓯᖃᕋᓗᐊᖅᐸᑕ, ᑎᒥᒥᒍᑦ ᐊᔪᕈᑎᖃᕋᓗᐊᖅᐸᑕ, ᐊᔪᖅᓴᙱᒃᑲᓗᐊᖅᐸᑕ ᐊᔪᖅᓴᕋᓗᐊᖅᐸᑕᓘᓐᓃᑦ. ᓇᓕᐊᑐᐃᓐᓇᖅ ᓄᑕᕋᖅ ᑲᒪᒋᔭᐅᓪᓗᐊᙱᓚᖅ ᐊᔾᔨᖃᖅᑎᑕᐅᙱᓪᓗᓂ ᖃᓄᑐᐃᓐᓇᑦᑎᐊᖅ, ᑎᑎᕋᖅᓯᒪᔪᑎᑐᑦ  2−ᑐᑦ ᐅᑯᓇᓂ, ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ.
 
ᓇᓕᐊᑐᐃᓐᓇᖅ ᐃᓛᒃᑰᖅᑐᖅ ᐱᔪᓐᓇᐅᑎᒋᔭᐅᔪᖅ ᐱᒻᒪᕆᐅᓂᖅᓴᐅᙱᓚᖅ ᐊᓯᐊᓂᑦ ᐊᒻᒪᓗ ᐃᒪᓐᓇᐅᒐᔪᒃᐸᒃᖢᓂ, ᐊᑕᐅᓯᕐᒥᒃ ᐱᔪᓐᓇᐅᑎᒥᒃ ᐊᖑᒻᒪᑎᔪᖃᙱᒃᑳᖓᑦ, ᐃᒪᓐᓇᐅᒐᔪᒃᐸᒃᐳᖅ, ᖃᔅᓯᑲᓪᓚᐃᑦᑕᐅᖅ ᐱᔪᓐᓇᐅᑏᑦ ᐊᖑᒻᒪᑎᑎᑕᐅᕙᙱᓚᑦ.
 
ᑲᓇᑕ ᐊᑎᓕᐅᓚᐅᖅᑎᓪᓗᒍ ᓄᓇᕐᔪᐊᕐᒥᑦ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ 30-ᓂᑦ ᐊᕐᕌᒍᕐᓂᑦ ᐅᖓᑖᓄᑦ, ᑲᓇᑕᐅᑉ ᐱᓇᓱᐊᕈᒪᓂᕋᐃᓚᐅᖅᐳᑦ ᒪᒃᑯᒃᑐᓕᒫᑦ ᐃᓚᔮᖏᓪᓗ ᑲᓇᑕᒥᓕᒫᒥ, ᐃᓚᒋᔭᐅᓪᓗᓂ ᓄᓇᕗᑦ,  ᐊᑐᐃᓐᓇᐅᑎᑕᐅᓗᑎᑦ ᓇᓗᓇᐃᖅᓯᒪᔭᓕᒫᖏᓐᓂ ᓄᓇᕐᔪᐊᕐᒥᑦ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ.