ᑭᓲᖕᒪᑕ ᓄᑕᖅᑲᑦ ᐱᔪᓐᓇᐅᑎᖏᑦ?


ᓄᐃᑦ ᐱᔪᓐᓇᐅᑎᖏᑦ ᒪᑯᐊᖑᕗᑦ ᐃᓄᓕᒫᓂᒃ ᐱᒋᔭᐅᔭᕆᐊᖃᖅᑐᑦ, ᐱᓕᕆᔪᓐᓇᖅᑕᖏᑦ ᖃᓄᐃᓕᐅᕈᓐᓇᖅᑕᖏᓪᓗ ᐃᓅᓂᖏᑦ ᐱᔾᔪᑕᐅᓪᓗᑎᒃ.

ᐃᓄᐃᑦ ᐱᔪᓐᓇᐅᑎᖏᑦ ᐃᓄᓕᒫᓄᑦ ᓇᓕᒧᒌᒃᑎᑕᐅᓪᓗᑎᒃ ᐱᔪᓐᓇᐅᑎᒋᔭᐅᕗᑦ - ᐊᖑᑕᐅᖕᒪᖔᑕ ᐊᕐᓇᐅᖕᒪᖔᑕ, ᓇᓂᒥᐅᑕᐅᖕᒪᖔᑕ, ᖃᓄᖅ ᐃᓕᖅᑯᓯᖃᕐᒪᖔᑕ ᖃᓄᕐᓗ ᐅᑭᐅᖃᖅᑎᒋᖕᒪᖔᑕ ᐃᓱᒪᒋᔭᐅᙱᖦᖢᑎᒃ . ᐃᓄᐃᑦ ᐱᔪᓐᓇᐅᑎᖏᑦ ᐃᑲᔪᕈᓐᓇᑐᐃᓐᓇᕆᐊᖃᕐᒪᑕ ᑭᓇᒥᒃᑭᐊᖅ ᓯᕗᒻᒧᑦ ᐃᖏᕐᕋᔪᓐᓇᖅᑎᓪᓗᒋᑦ. ᑭᓯᐊᓂ ᓄᑕᖅᑲᑦ ᒪᒃᑯᒃᑐᓪᓗ ᐱᔭᕆᐊᑭᓐᓂᖅᓴᐅᖕᒪᑕ ᐃᓐᓇᕐᓂᒃ. ᐃᓛᓐᓂᒃᑯᑦ ᐱᑦᑎᐊᓕᔭᐅᓗᑎᒃ ᐃᑲᔪᖅᑕᐅᔭᕆᐊᖃᓲᖑᖕᒪᑕ ᓴᐳᔾᔭᐅᓯᒪᔭᕆᐊᖃᖅᐸᒃᖢᑎᒡᓗ. ᑕᐃᒪᐃᓐᓂᖓᓄᑦ, 1989-ᖑᑎᓪᓗᒍ, ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᐊᑐᓕᖅᑎᑦᑎᓚᐅᖅᓯᒪᕗᑦ ᐊᖏᖃᑎᒌᒍᑎ ᐱᖁᔨᕗᖔᕈᑎᒃᑯᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ.

ᑎᑎᕋᖅᑕᐅᓯᒪᔪᑦ ᐅᖃᐅᓯᐅᓯᒪᕗᑦ ᓴᐳᔾᔨᔾᔪᑕᐅᓂᕋᖅᑕᐅᓪᓗᑎᒃ “ᓄᑕᖅᑲᓕᒫᑦ ᐱᔪᓐᓇᐅᑎᖏᓐᓂᒃ ᑭᑭᑦᑎᙱᑦᑎᐊᕐᓗᑎᒃ ᐃᓄᖕᓂᒃ ᐱᑦᑎᐊᓕᔪᓂᒃ ᐊᒻᒪ ᐃᒻᒥᓂᒃ ᐅᐱᒋᔪᓐᓇᖅᓯᑎᑦᑎᕙᒃᖢᑎᒃ.” ᐊᖏᖃᑎᒌᒍᑎ 54-ᓂᒃ ᐊᔾᔨᒌᙱᑦᑐᓂᒃ ᑎᑎᕋᖅᓯᒪᔪᖃᖅᐳᖅ ᐅᕝᕙᓘᓐᓃᑦ ᐊᒡᒍᖅᓯᒪᓪᓗᑎᒃ ᑎᑎᕋᖅᓯᒪᓂᖃᖅᐳᑦ. ᑖᒃᑯᐊ ᑎᑎᕋᖅᓯᒪᔪᑦ ᓇᓗᓇᐃᖅᓯᓯᒪᕗᑦ ᖃᔅᓯᑲᓪᓚᖕᓂᒃ ᐊᔾᔨᒌᙱᑦᑐᓂᒃ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ. ᖃᓄᐃᓕᐅᖅᑕᐅᔭᕆᐊᓕᖕᓂᒃ ᑲᒪᒋᔭᒃᓴᓂᒡᓗ ᓇᓗᓇᐃᖅᓯᓯᒪᒋᕗᑦ ᖃᑕᙳᑎᒌᓄᑦ ᑐᕌᖓᔪᓂᒃ ᒐᕙᒪᒃᑯᓪᓗ ᐱᔪᓐᓇᕐᓂᖃᕐᕕᒋᔭᖏᓐᓂᒃ ᐃᑲᔪᖅᓱᐃᔾᔪᑎᒋᔪᓐᓇᖅᖢᓂᒋᑦ ᑖᒃᑯᓄᖓ ᐱᔪᓐᓇᐅᑎᓄᑦ.

ᐱᒻᒪᕆᐅᖕᒪᑦ ᐃᓕᑕᖅᓯᐅᒪᔭᕆᐊᒃᓴᖅ ᑖᒃᑯᐊᓕᒫᖅ ᑎᑎᕋᖅᓯᒪᔪᑦ ᐊᖏᖃᑎᒌᒍᑎᒥ ᐊᒃᑐᐊᔪᐃᓐᓈᓘᖕᒪᑕ. ᐊᒡᒍᖅᑕᐅᔪᓐᓇᙱᑦᑐᑦ ᐊᑕᐅᓯᕐᒥᒡᓘᓐᓃᑦ ᐱᔪᓐᓇᐅᑎᒥᒃ ᐱᓂᖅᓴᐅᔪᖃᕈᓐᓇᙱᒻᒪᑦ. ᐃᒪᓐᓇᖔᕐᓕ, ᐱᔪᓐᓇᐅᑎᓕᒫᑦ, ᖃᓄᐃᓕᐅᖅᑕᐅᔭᕆᐊᓕᓕᒫᑦ ᑲᒪᒋᔭᐅᔭᕆᐊᖃᖅᑐᓕᒫᓪᓗ ᐃᓱᒪᒋᔭᐅᔭᕆᐊᖃᖅᐳᑦ ᐃᓱᒪᓕᐅᕆᔪᖃᓕᕌᖓᑦ ᐊᒃᑐᐃᔾᔪᑕᐅᔪᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ.      

ᐃᓚᖏᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐊᖏᖃᑎᒌᒍᑎᒥ ᐅᑯᓂᖓ ᐃᓚᖃᖅᐳᑦ:

  • ᐱᔪᓐᓇᐅᑎᖃᕐᓂᖅ ᐊᑎᖃᕐᓗᓂ ᐊᒻᒪ ᑲᓇᑕᒥᐅᑕᐅᓗᓂ
  • ᓂᕆᔭᒃᓴᑦᑎᐊᕙᖕᓂᒃ ᓂᕆᖃᑕᐅᔪᓐᓇᕐᓗᓂ ᐊᒻᒪ ᐊᑦᑕᕐᓇᙱᑦᑐᒥᒃ ᐃᓂᖃᖃᑕᐅᓗᓂ
  • ᐱᔪᓐᓇᕐᓂᕆᔭᐅᔪᖅ, ᐊᔪᕐᓇᙱᓐᓂᓕᒫᖓᓂᒃ, ᑲᒪᒋᔭᐅᔭᕆᐊᖃᖅᐳᑦ ᐊᖓᔪᖅᑳᒥᓄᑦ
  • ᐃᓕᓐᓂᐊᖃᑕᐅᔪᓐᓇᕐᓗᑎᒃ
  • ᖃᑕᙳᑎᒌᓂᒃ ᐃᓚᐅᕙᒡᓗᑎᒃ, ᐃᓕᖅᑯᓯᓕᕆᔪᓂᒃ ᐊᒻᒪ ᐃᓅᓇᓱᐊᕐᓂᕐᒥᒃ                
  • ᐋᓐᓂᖅᓱᖅᑕᐅᔭᕆᐊᖃᙱᓪᓗᑎᒃ

ᐅᒃᐱᕈᓱᒃᑲᑦᑕ ᓴᐳᑎᓯᒪᒍᑦᑎᒍᑦ ᐅᔾᔨᕆᔭᐅᓕᖅᑎᖃᑦᑕᕈᑦᑎᒍᓪᓗ ᓄᑕᖅᑲᑦ ᐱᔪᓐᓇᐅᑎᖏᑦ ᐃᑲᔫᑕᐅᔪᓐᓇᕐᓂᖓᓂᒃ ᒪᒃᑯᒃᑐᓂᒃ, ᖃᑕᙳᑎᖏᓐᓂᒃ, ᓄᓇᖅᑲᑎᒌᓕᒫᓪᓗ  ᓯᕗᒻᒧᐊᒍᓐᓇᑦᑎᐊᕈᑎᒋᔪᓐᓇᕐᓗᓂᔾᔪᒃ.