ᐃᖅᑲᓇᐃᔭᖅᑎᕗᑦ


 

ᖁᓛᓂ ᑎᑎᕋᖅᓯᒪᔪᑦ ᐅᖃᐅᓯᖃᖅᐳᑦ ᐊᑖᓂ ᑎᑎᕋᖅᓯᒪᔪᓂᒃ.

ᑕᒪᕐᒥᑦᑎᐊᖅ ᐃᖅᑲᓇᐃᔭᖅᑎᕗᑦ ᑭᒡᒐᖅᑐᐃᔨᐅᔪᑦ ᑲᑐᔾᔨᖃᑎᒌᒡᕕᑦᑎᓐᓂ: ᑐᙵᓇᖅᑐᑦ, ᐱᓕᕆᖃᑎᖃᑦᑎᐊᓲᑦ ᐃᑲᔪᖅᓱᐃᑦᑎᐊᖅᐸᒃᖢᑎᒡᓗ. ᑖᓐᓇ ᐱᓕᕆᔾᔪᓯᖅ ᖃᐅᔨᒪᔾᔪᑎᒋᓲᕗᑦ ᖃᓄᐃᓕᐅᕐᓗᑕ ᐱᓕᕆᖃᑎᒌᒍᓐᓇᕐᒪᖓᑦᑕ ᖃᓄᐃᓕᐅᖅᖢᑕᓗ ᓄᑕᖅᑲᓂᒃ ᐱᓕᕆᖃᑎᖃᓲᖑᖕᒪᖔᑦᑕ, ᒪᒃᑯᒃᑐᓂᒡᓗ ᖃᑕᙳᑎᖏᓐᓂᒡᓗ. ᐊᐅᓚᑕᐅᔪᐃᓐᓇᐅᔪᒍᑦ ᒪᒃᑯᒃᑐᑦ ᓄᓇᕗᒥᐅᑕᑦ ᐅᒃᐱᕆᓂᑦᑎᓐᓄᑦ ᓂᕆᐅᒃᐳᒍᓪᓗ ᓯᕗᓂᒃᓴᖃᑦᑎᐊᓛᖁᓪᓗᑎᒍᑦ.  

ᐃᓱᒪᔪᒪᓲᖑᖕᒥᒐᑦᑕ ᐃᓱᒪᒋᔭᑦᑕ ᐅᖓᑎᓗᐊᒃᑲᓐᓂᖓᓄᑦ ᐱᓕᕆᑎᑦᑎᑯᓘᔭᓕᖅᐸᒃᖢᑕᓗ!  ᑕᐃᒪᐃᓐᓂᖓᓄᑦ ᐅᕙᑦᑎᑦᑕ ᒥᒃᓵᓄᑦ ᑎᑎᕋᑐᐃᓐᓇᙱᖦᖢᑕ, ᐊᓯᑦᑕ ᒥᒃᓵᓄᑦ ᑎᑎᕋᖔᑲᑕᓕᓚᐅᖅᐳᒍᑦ.  ᐊᓕᐊᓇᐃᒍᓱᑦᑎᐊᖅᖢᑕ ᓴᖅᑭᓐᓂᐊᓕᖅᑕᕗᑦ ᐃᖅᑲᓇᐃᔭᖅᑎᑦᑎᐊᕙᒻᒪᕆᐊᓗᒃᐳᑦ!

 
images

ᔭᐃᓐ ᐸᐃᑦᔅ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ

ᔭᐃᓐ ᐅᓂᑳᖓ ᐱᒋᐊᓚᐅᖅᐳᖅ ᒥᓯᓵᒍᐊ, ᐋᓐᑎᐅᕆᐅᒥᑦ ᓂᐸᐃᑦᑐᒥᑦ ᐊᖏᕐᕋᒥᓂᒃ ᑎᒍᐊᕐᑎᒥᓂᒃ. ᖁᕕᐊᒋᔭᖃᐃᓐᓇᐅᔭᖅᑐᖅ ᐃᑲᔪᖃᑦᑕᕐᓂᕐᒧᑦ ᒪᒃᑯᒃᑐᓂᑦ, ᐱᒋᐊᕈᑎᒋᓚᐅᕐᐹ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓄᓕᕆᓂᕐᒧᑦ Ryerson ᓯᓚᑦᑐᕐᓴᕐᕕᒡᔪᐊᒥᑦ. ᐃᖃᓇᐃᔮᒥᓂᒃ ᐱᒋᐊᓕᓵᖅᑎᓪᓗᒍ, ᑭᐅᓚᐅᕐᓯᒪᖕᒪᑦ ᐅᑭᐅᕐᑕᖅᑐᒧᐊᖁᔭᐅᓕᕐᒪᑦ ᓅᒋᓪᓗᓂ ᕙᐃᑦᕼᐅᐊᔅᒧᑦ.

ᐃᖃᓇᐃᔭᖅᑎᓪᓗᒍ ᔫᑳᓐᒥᑦ, ᔭᐃᓐ ᐊᒃᑐᖅᓯᓯᒪᔪᖅ ᐃᓄᒋᐊᑦ ᐃᓅᓯᖏᓐᓂᑦ ᐊᒻᒪᓗ ᐃᓚᖏᓪᓗ ᐃᑲᔫᑎᖃᖃᑦᑕᕐᓂᖏᓐᓄᑦ ᓄᑕᕋᕐᓂᑦ ᓴᐳᔾᔨᓂᕐᒥᑦ, ᐃᓄᓕᕆᔨᒃᑯᑦ, ᐱᕐᕈᓗᐊᕿᕐᔪᐊᕐᑐᓄᑦ ᖃᐅᔨᓴᖅᑐᓕᕆᔩᑦ, ᒪᒃᑯᒃᑐᓄᑦ ᒪᓕᒐᓕᕆᔨᒃᑯᑦ, ᐊᒃᓱᕈᕐᓇᖅᑐᓃᑦᑐᓄᑦ ᐋᖀᓇᓱᒃᑐᑦ, ᐊᒻᒪᓗ ᐅᑎᕐᑎᑎᓇᓱᐊᕐᑐᓪᓗ ᓄᓇᓕᖕᓂᑦ ᑲᑎᒪᔨᖏᑦ. ᐃᖃᓇᐃᔮᒥᓂᒃ, ᖃᐅᔨᒪᔨᑕᖃᖃᑦᑕᓚᐅᕐᒪᑦ ᐊᖏᔪᖄᕐᒥᑦ ᐱᐅᓛᒥᑦ ᐱᓕᕆᐊᒃᓴᖃᖁᔨᔪᒥᑦ ᓄᑕᕋᕐᓄᑦ.

Winnie the pooh ᐊᒻᒪᓗ Star Wars−ᓂᑦ ᐊᓕᐊᓇᐃᒍᓱᒃᑐᑦ ᐅᕐᓄᓂᖅᐹᓂᑦ ᐱᔭᐅᔪᒪᕙᒃᑐᑦ, ᖁᕕᐊᒋᕙᓪᓕᐊᑐᐃᓐᓇᕐᑕᖓ ᐊᔾᔨᒌᖏᕈᓘᔭᖃᑦᑕᕐᓂᖓ ᐃᓅᓯᕐᒥᑦ ᐊᐳᕐᐸᓪᓕᐊᔭᖏᑦ. ᐅᐃᖓ ᕌᔅ, ᐊᒻᒪᓗ ᕿᒻᒥᖓ ᒋᔅᒨ ᐃᑲᔪᖅᓱᑦᑎᐊᕐᑐᑦ ᓅᓚᐅᕐᓂᖓᓄᑦ ᓄᓇᕗᒻᒧᑦ. ᔭᐃᓐ ᑲᔪᓯᑎᑦᑎᑦᑎᐊᕐᑐᑦ ᐱᔨᑦᑎᕋᕐᓂᕐᒧᑦ ᒪᒃᑯᒃᑐᓄᑦ ᓄᓇᕗᒻᒥᐅᓂᑦ ᐱᔪᓐᓇᐅᑎᖏᓪᓗ ᐃᑲᔪᖅᓱᖅᑕᐅᑦᑎᐊᕐᖢᑎᒃ.

 

images

ᔭᕗᕆ ᑯᕋᔅ
ᑲᒪᔨᒻᒪᕆᒃ

ᔭᕗᕆ ᖃᐅᓱᐃᑦᑐᕐᒥ ᐱᕈᖅᓴᓚᐅᖅᓯᒪᔪᖅ ᐊᒻᒪ (ᐅᐱᒋᔭᖃᑦᑎᐊᖅᑐᖅ) ᑭᖑᕚᖃᕐᓂᖓᓂᒃ ᐃᓄᖕᒥᒃ ᐊᒻᒪ ᐋᕝᕆᑲᒥᐅᑕᒥᒃ. ᔭᕝᕆᐅᑉ ᐊᓈᓇᖓ ᐊᖑᓇᓱᒃᑎᓪᓚᕆᐊᓗᓚᐅᖅᓯᒪᔪᖅ. ᐊᓈᓇᒥᑎᑐᑦ, ᐊᐅᓪᓚᖅᓯᒪᔭᕆᐊᒃᓴᖅ ᖁᕕᐊᒋᑦᑎᐊᕐᒥᔭᖓ ᐊᖑᓇᓱᒋᐊᕐᓂᕐᒥᒡᓗ. ᑭᓯᐊᓂ, ᐃᖃᓗᒐᓱᖕᓂᖅ ᖁᕕᐊᒋᓗᐊᙱᑕᖓ (ᔭᕝᕆᒥ ᐊᔾᔨᓕᐅᖅᓯᒪᔪᖅ 

ᔭᕝᕆ ᖃᐅᓱᐃᑦᑐᒥ ᐊᐅᓪᓚᓚᐅᖅᓯᒪᕗᖅ 18-ᓂᒃ ᐅᑭᐅᖃᓕᖅᑎᓪᓗᒍ ᐅᐊᐃᑦᕼᐅᐊᔅ-ᒧᑦ ᐱᕋᔭᒃᑐᓕᕆᓂᕐᒥ ᐃᓕᓐᓂᐊᕆᐊᖅᖢᓂ ᔫᑳᓐᒥ ᓯᓚᑦᑐᖅᓴᕐᕕᖕᒥ. ᐃᓕᑕᕆᔭᐅᔾᔪᑎᑖᕇᖅᓯᒪᓕᕐᒪᑦ, ᔭᕝᕆ ᐃᖃᓗᖕᓄᑦ ᓅᓚᐅᖅᓯᒪᕗᖅ. ᑕᐃᒪᙵᓂ, ᐃᖅᑲᓇᐃᔮᖃᓕᓚᐅᖅᓯᒪᕗᖅ ᓄᓇᓕᖕᓂ ᐱᔨᑦᑎᕋᖅᑎᐅᓪᓗᓂ ᓄᓇᕗᑦ ᒐᕙᒪᒃᑯᑦ ᐃᓄᓕᕆᔨᒃᑯᓐᓄᑦ.

ᔭᕝᕆ ᐊᑕᐅᓯᕐᒥᒃ ᐸᓂᓕᒃ, ᐅᖃᐅᓯᕆᓲᖓ ᐃᓚᒥᓄᑦ ᐃᓱᒪᒃᑭᙳᖅᓴᔭᐅᓗᐊᕐᓂᖓᓂᒃ. ᑕᐃᒪᐃᓐᓂᖓᓄᓪᓗ ᐃᓕᓴᕋᓱᓲᖓ ᐃᓅᓯᑦᑎᐊᕙᖕᒥᒃ. ᖃᑕᙳᑎᒌᑦ ᐱᒻᒪᕆᐅᒋᖕᒪᒋᑦ ᔭᕝᕆᐅᑉ ᑕᐃᒪᐃᓐᓂᖓᓄᑦ ᓇᖕᒥᓂᖅ ᐃᓚᑯᓗᖏᑦ ᑲᒪᒋᑦᑎᐊᕋᓱᖃᑦᑕᖅᑕᖏᑦ. ᐊᖑᓇᓱᖕᓂᖅᑐᑦᑕᐅᖅ ᖁᕕᐊᒋᔭᖃᕆᓪᓗᓂ ᕚᔅᑭᑦᕚᓪ, ᕗᕆᔅᐱ-ᒥᒃ ᐃᒋᑦᑎᑲᑕᒃᑐᓂᒃ ᐊᑯᖅᓯᑲᑕᒃᑐᓂᒡᓗ, ᐅᖃᓕᒫᓕᖅᐸᒃᖢᓂᓗ Star Wars ᐱᔭᒃᓴᖃᙱᓗᐊᓕᕌᖓᑦ. 

ᔭᕝᕆ ᑭᒡᒐᖅᑐᐃᔨᐅᓕᓚᐅᖅᓯᒪᕗᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᐊᓂ 2015-ᒥ ᐅᐱᕐᖔᒃᑯᑦ. ᖃᐅᔨᒪᔭᐅᔪᒪᑦᑎᐊᖅᑐᖅ ᑕᒫᓂ ᐃᖅᑲᓇᐃᔭᕐᓂᖓᓂᒃ ᐃᑲᔪᕈᒪᓪᓗᓂᒋᑦ ᓄᑕᖅᑲᑦ ᒪᒃᑯᒃᑐᓪᓗ ᓄᓇᕗᒥᐅᑕᑦ.

 

images

ᓕᓐ ᒫᑦ
ᑐᑭᒧᐊᖅᑎᑦᑎᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᓄᑦ ᐱᔨᑦᑎᕋᖅᑎᓄᑦ - ᒫᓐᓇᐅᔪᖅ ᓄᑕᕋᒃᓴᖃᕐᓂᕐᒧᑦ ᓄᖅᑲᖓᔪᖅ

ᓕᓐ ᐃᓱᒪᑐᕗᖅ, ᖃᐅᔨᒪᓂᖃᑦᑎᐊᖅᖢᓂ, ᐱᓕᕆᐊᖃᕐᕕᖃᒻᒪᕆᒍᒪᕙᒃᖢᓂᓗ ᐱᓕᕆᐊᕆᕙᒃᑕᒥᓂᒃ. ᑖᓐᓇ ᐃᑲᔪᕐᓂᖃᑦᑎᐊᖅᐸᒃᐳᑦ ᐊᑐᕐᓂᖃᓪᓚᕆᒃᐳᕐᓗ ᑎᑎᕋᕐᕕᑦᑎᓐᓄᑦ! ᓕᓐ ᓄᑕᕋᐅᓚᐅᖅᓯᒪᕗᖅ ᐅᕙᓂ, ᐊᔨᐅᓪᑕ, ᒥᑭᑦᑐᑯᓗᒃ ᓄᓇᓕᒃ ᐊᓐᑎᐅᕆᐅᒥ. ᐱᕈᖅᓴᓚᐅᖅᐳᖅ ᐃᒡᓗᕐᔪᐊᒥ ᐊᖓᔪᖅᑳᒥᓃᖦᖢᓂ, ᐊᓂᒥᓂ, ᓂᖏᐅᕐᒥᓂᓗ ᐃᑦᑐᕐᒥᓂᓗ. ᐊᖓᔪᖅᑳᒥᓂᒃ ᐱᔪᒃᓯᑎᑕᐅᓯᒪᕗᖅ ᐱᔪᒪᓂᕆᕙᒃᑕᒥᓂᒃ ᐆᒃᑐᕈᒪᐃᓐᓇᐅᔭᖅᖢᓂ ᓄᑖᓂᒃ ᐱᓕᕆᓚᐅᖅᓯᒪᙱᑕᒥᓂᒃ.

ᓯᓚᑦᑐᖅᓴᕐᕕᒡᔪᐊᒥ, ᓕᓐ ᐱᓚᐅᖅᐳᖅ ᐅᐱᒋᔭᐅᓂᕐᒥᒃ Bachelor−ᖃᓕᕐᓂᕐᒧᑦ ᖃᓪᓗᓈᑑᒧᑦ ᖃᓄᐃᓕᐅᖅᑕᐅᕙᓚᐅᖅᑐᓄᓪᓗ ᓄᓇᕐᔪᐊᓕᒫᒥᓗ ᐊᔪᕈᓐᓃᖅᓴᕈᓐᓇᕐᓂᕐᒧᑦ ᓇᓗᓇᐃᒃᑯᑕᕐᒥᒃ. ᑭᖑᓂᒃᑲᓐᓂᐊᒍᑦ ᓂᐅᕙᐅᓐᓛᓐᑦ−ᒧᙵᐅᓚᐅᖅᐳᖅ ᐱᔭᖅᑐᖅᖢᓂ Master’s ᐊᓂᒍᐃᓂᕐᒧᑦ ᓇᓗᓇᐃᒃᑯᑕᕐᒥᒃ ᐅᓂᒃᑳᖅᑐᐊᓄᑦ. ᐊᓕᐊᓇᐃᒋᔭᓕᒃ ᓄᒃᑕᖅᖢᓂ ᐱᓕᕆᖃᑦᑕᖅᓯᒪᓪᓗᓂᓗ ᐊᔪᕈᓐᓃᖅᓴᖃᑦᑕᖅᓯᒪᓪᓗᓂᓗ ᐱᔪᒥᓇᖅᑐᓂ ᐃᓂᓂ ᐊᓯᖏᓐᓂ ᓄᓇᕐᔪᐊᒥ ᓄᓇᒋᔭᐅᔪᓂ, ᐃᓚᒋᔭᐅᓪᓗᓂ ᐃᙵᓚᒥᐅᓂ ᐅᔭᖅᑲᒥᒃ ᓴᓇᓯᒪᔪᒥᒃ ᐃᓂᒋᔭᐅᕙᒃᑐᒥᒃ. ᑕᒪᓐᓇ ᑕᒪᕐᒥᒃ ᑐᑭᖃᖅᐳᖅ ᐃᒪᓐᓇ, ᓕᓐ ᐅᓂᒃᑳᑦᑎᐊᔪᔪᒻᒪᕆᐅᕗᖅ!

ᓕᓐ ᓄᓇᕗᒻᒥᒃ ᐊᖏᕐᕋᖃᖅᓯᒪᓂᕋᖅᓯᒪᓕᖅᐳᖅ 2011−ᖑᓚᐅᕐᓂᖓᓂᑦ. ᑕᒫᓃ, ᐅᖓᒋᑦᑎᐊᓕᓚᐅᖅᓯᒪᔭᖓ ᐅᑭᐅᖅᑕᖅᑐᖅ ᐊᒻᒪᓗ ᐅᐃᖓ ᑭᐊᕕᓐ. ᒪᕐᕉᖕᓂᒃ ᑎᒍᐊᖃᖅᐳᖅ ᐃᕐᓂᖃᖅᖢᓂᓗ. ᐱᓕᕆᓗᐊᕈᓐᓃᕌᖓᒥ ᒥᖅᓱᒃᐸᒃᐳᖅ ᐅᖃᓕᒫᒐᕐᒥᒡᓘᓐᓃᑦ ᐅᖃᓕᒫᖅᐸᒃᐳᖅ.

images

ᑯᕆᔅᑕ ᑯᓄᒃ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᑯᕆᔅᑕᐅᑉ ᐃᖅᑲᓇᐃᔮᓂ ᐃᖅᑲᓇᐃᔮᕆᓪᓗᐊᑦᑎᐊᖅᑕᖓ ᐃᖅᑲᓇᐃᔭᖃᑎᒋᔭᐃᓐᓄᒋᒐᑦᑎᒍᑦ ᐊᒃᓲᕗᖅ! ᐊᔪᕈᓐᓃᑦᑎᐊᓲᖅ ᓄᑕᖅᑲᓂᒃ ᒪᒃᑯᒃᑐᓂᒡᓗ ᐱᓕᕆᖃᑎᖃᕐᓂᐊᓕᕌᖓᑦ ᓇᓗᓇᙱᑦᑎᐊᖅᖢᓂᓗ. 

ᑯᕆᔅᑕ ᕿᑭᖅᑕᕐᔪᐊᕐᒥ ᐃᓅᓚᐅᖅᓯᒪᕗᖅ. ᕕᒃᑑᕆᐊ ᐳᕆᑎᔅ ᑲᓚᒻᐱᐊ-ᒧᑦ ᓅᓚᐅᖅᓯᒪᓪᓗᓂ ᒪᒃᑯᒃᑲᓐᓂᖅᑎᓪᓗᒍ ᑎᒍᐊᖅᓯᖏᑦ ᐊᐅᓪᓚᖃᑎᒋᓪᓗᓂᒋᑦ. ᓄᑕᕋᐅᑎᓪᓗᒍ ᐃᖅᑲᐅᒪᓂᖅᐹᕆᖃᑦᑕᕐᒥᔭᖏᑦ ᐊᓂᖏᓐᓂᒃ ᐊᓃᕋᔭᖃᑎᖃᖅᐸᒃᑎᓪᓗᒍ. ᑯᕆᔅᑕ ᖁᕕᐊᓱᑦᑎᐊᓚᐅᖅᓯᒪᕗᖅ ᐅᑭᐅᖅᑕᖅᑐᒧᑦ ᐅᑎᖅᑎᓪᓗᒍ 1994-ᒥ. ᓲᕐᓗᓕᒎᖅ ᐊᐅᓪᓚᓚᐅᖅᓯᒪᙱᖦᖢᓂ.

ᑯᕆᔅᑕᐅᑉ ᐃᖅᑲᓇᐃᔮᕆᖃᑦᑕᖅᓯᒪᔭᖏᑦ ᐃᓕᓐᓂᐊᕆᐅᖅᓴᔪᓂᒃ ᐊᒻᒪ ᐃᓱᒪᓕᕆᔨᓂᒃ. ᐃᓅᓯᓕᕆᔨᒋᔭᐅᓚᐅᖅᓯᒪᓪᓗᓂ ᓇᑲᓱᒃ ᓄᑲᖅᖡᑦ ᐃᓕᓐᓂᐊᕐᕕᖕᒥ ᐊᕐᕌᒍᓄᑦ 7-ᓄᑦ.  ᐅᖃᐅᓯᐅᕈᓘᔭᖃᑦᑕᖅᓯᒪᔪᖅ ᑭᖑᓂᑦᑎᓐᓂ ᓇᑲᓱᒃ ᐃᓕᓐᓂᐊᕐᕕᖕᒧᑦ ᐃᓕᓐᓂᐊᖅᐸᓚᐅᖅᓯᒪᔪᑦ ᓇᑲᓱᒃ ᐃᓕᓐᓂᐊᕐᕕᖕᒧᑦ ᐅᑎᒃᑲᓐᓂᕈᒪᓇᔭᕐᓂᖏᓐᓂᒃ ᑯᕆᔅᑕᒧᑦ ᐳᓛᕆᐊᑐᐃᓐᓇᑦᑎᐊᕐᓗᑎᒃ. ᐅᐊᑲᓪᓚᖔ, ᐱᕕᒡᔪᐊᕆᔭᐅᔪᑯᓘᖕᒪᑦ ᐊᓕᐊᓇᐃᑦ!

ᑯᕆᔅᑕ ᐅᒃᐱᕈᓱᒃᐳᖅ ᐃᓕᓴᕐᓇᐅᑎᑦ ᐊᒻᒪ ᐃᓕᖅᑯᓯᖅ ᐱᓪᓚᕆᐊᓗᒋᔭᐅᓂᖏᓐᓂᒃ ᒪᒃᑯᒃᑐᓄᑦ ᐃᓄᖕᓄᑦ ᖃᓄᐃᙱᑦᑎᐊᕈᓯᖏᓐᓄᑦ. ᐃᒡᓚᖅᓴᕋᐃᓐᓂᖓ ᑐᓴᖅᑕᐅᒐᔪᒃᐳᖅ ᑎᑎᕋᕐᕕᑦᑎᓐᓂᓕᒫᖅ. ᐃᖅᑲᓇᐃᔭᕈᓐᓃᕌᖓᑦ, ᑯᕆᔅᑕ ᖃᑕᙳᑎᒥᓂ ᐅᐸᒍᑎᓯᒪᓪᓗᓂ ᖁᕕᐊᒋᑦᑎᐊᓲᕆᖕᒥᔭᖓ; ᐅᐃᖓ ᑕᐃᕕᑎ ᐊᒻᒪ ᑭᑐᕐᖓᖏᑦ ᐊᓛᓇ,ᐊᒪᓕ, ᒪᓄ ᐊᒻᒪ ᐲᑕ.

ᓈᓯ ᐱᓗᕆᓐ
ᖃᕋᓴᐅᔭᑎᒎᖓᔪᓂᒃ ᖃᐅᔨᓴᖅᑎᒻᒪᕆᒃ

ᓈᓐᓯ ᓄᓇᓕᕋᓛᓂᒃ ᐱᕈᖅᓴᓂᑯᕕᓂᖅ Trois- Rivières, Québec ᐅᖓᓯᒋᓗᐊᙱᑕᖓᓂᒃ. ᓄᓇᐃᑦ ᐅᐸᓚᐅᖅᓯᒪᙱᑕᖏᑦ ᑕᑯᔭᕆᐅᕈᒪᖃᑦᑕᖅᑕᒻᒪᕆᐊᓗᖏᑦ ᐃᓕᖅᑯᓯᖃᖃᑎᒌᙱᑦᑐᓪᓗ ᓄᓇᕗᒧᐊᓚᐅᖅᓯᒪᕗᖅ 2006-ᖑᑎᓪᓗᒍ. ᐊᑯᓂᐅᙱᑦᑐᖅ ᐃᓅᖃᓐᓂᓈᖅᓯᒐᒥ ᐃᓄᖕᓂᒃ ᐱᐅᒃᓴᓕᓚᐅᖅᑐᖅ, ᓄᓇᖓᓐᓂᒃ ᐊᒻᒪ ᐃᓅᓯᕆᔭᖓᓐᓂᒃ. ᐊᐅᓪᓚᕋᔪᐃᓐᓇᖅᐳᖅ ᓱᓕ ᐅᑭᐅᖅᑕᖅᑐᒦᓕᕋᓗᐊᖅᖢᓂ ᐃᖏᕐᕋᔾᔪᑎᖃᖅᐸᒃᖢᓂ ᓯᑭᑑᒃᑯᑦ, ᖃᔭᒃᑯᑦ, ᐊᐅᓪᓛᖅᓯᒪᓂᒃᑯᑦ ᐊᒻᒪ ᐱᓱᔪᖕᓂᒃᑯᑦ/ᐱᓱᕋᔭᖕᓂᒃᑯᑦ.

ᓈᓐᓯ ᓄᑕᖅᑲᓂᒃ ᐱᓕᕆᖃᑎᖃᖅᖢᓂ ᖁᕕᐊᒋᑦᑎᐊᖅᑕᖓ ᓄᑕᖅᑲᑦ ᐱᓂᕐᓗᒃᑕᐅᖃᑦᑕᖁᙱᖦᖢᓂᒋᑦ ᐃᓕᓐᓂᐊᖅᑕᒥᓂᒃ ᐱᓕᕆᐊᕆᓛᕈᒪᔭᒥᓂᒡᓗ ᐊᔭᐅᖅᑐᐃᔾᔪᑎᖃᑦᑎᐊᖅᑐᖅ. ᐃᓕᓴᕆᔭᐅᔾᔪᑎᑖᖅᓯᒪᔪᖅ ᓴᓇᙳᐊᖅᑎᐅᓂᕐᒧᑦ ᑎᑎᖅᑐᒐᖅᑎᐅᓂᕐᒧᓪᓗ ᐃᓄᖕᓂ ᐃᓱᒪᓕᕆᓂᕐᒥᒃ (MA). ᐃᓕᑕᕆᔭᐅᔾᔪᑎᖃᖅᑐᖅ ᐃᓕᓐᓂᐊᖅᑎᑦᑎᔪᓐᓇᖅᖢᓂ ᒪᒃᑯᒃᑐᓂᒃ ᐊᒻᒪ ᐃᖅᑲᓇᐃᔭᖅᑎᐅᖃᑎᒥᓂᒃ. ᑕᐃᒃᑯᐊᓗ ᐃᓚᓕᐅᔾᔭᐅᖃᑕᐅᒋᓪᓗᑎᒃ ᐊᑑᑎᓖᑦ ᐃᓅᓯᕐᒥᒃ ᑭᐱᓯᑦᑕᐃᓕᒪᑎᑦᑎᓂᕐᒧᑦ ᐃᓕᓐᓂᐊᖅᓯᒪᔪᑦ (ASIST), ᖃᓄᐃᙱᑦᑎᐊᕐᓗᑎᒃ ᐱᓕᕆᔨᐅᖃᑎᒌᑦ ᐃᓕᓐᓂᐊᖅᑎᑕᐅᔪᑦ, ᐊᒻᒪ ᐱᓂᕐᓗᒃᑕᐅᓲᑦ ᖃᐅᔨᓴᖅᑕᐅᔭᕆᐊᖃᕐᓂᖏᓐᓂᒃ ᐃᓕᓐᓂᐊᖅᑎᑕᐅᔪᑦ.

ᓈᓐᓯ ᐱᙳᐊᖅᑕᐅᕙᒃᑐᓂᒃ ᐱᙳᐊᖃᑕᐅᒃᑲᒻᒪᕆᐊᓗᒃ ᖃᑕᙳᑎᒌᓪᓗ ᐅᓄᖅᓯᕙᓪᓕᐊᑐᐃᓐᓇᖅᖢᑎᒃ ᕿᒻᒥᕐᓂᒡᓗ ᐊᖏᔫᑎᓂᒃ ᐱᐅᒃᓴᖅᑐᒻᒪᕆᐊᓘᓪᓗᓂ.  ᓈᓚᑦᑎᐊᒃᑲᒻᒪᕆᐊᓗᒃ ᐃᓄᐃᓪᓗ ᓂᓪᓕᕈᓐᓇᕐᓂᖏᑦ ᖁᓱᔭᕌᖓᑕᑐᓴᖅᑕᐅᑦᑎᐊᖅᑎᑦᑎᕙᒃᖢᓂ. ᐃᓛᓐᓂᒃᑯᑦ, ᐃᓄᑑᑦᑎᐊᓕᓚᐅᑲᒃᐸᒃᖢᓂ. ᐃᓄᑑᑎᓪᓗᒍ ᓈᒻᒪᖅᑯᖕᓂᕈᖕᓂ, ᐊᒃᓱᕈᙱᐅᔭᕐᓗᓂ ᐅᖃᓕᒫᖅᑐᖅ ᑳᐱᑐᖅᑐᕐᓘᓐᓃᑦ ᑕᑯᓇᔭᖅᑕᒃᓴᕆᕙᔅᓯ.

images

ᑕᐃᕕᑎ ᖁᐊᕋᖅ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆ

ᑕᐃᕕᑎ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᐃᖃᓗᐃᑦ, ᓄᓇᕗᒻᒥ ᐊᒻᒪᓗ ᓱᕈᓯᐅᓪᓗᓂ ᖁᕕᐊᒋᓂᖅᐹᕆᓯᒪᔭᖓ ᐃᓕᓐᓂᐊᕆᐊᓕᓵᖅᑐᓄᑦ ᐃᓕᓐᓂᐊᕐᕕᒻᒥ ᐃᓕᓐᓂᐊᖅᑎᐅᓪᓗᓂ ᐊᒻᒪᓗ ᕿᑎᕋᓕᖅᑐᓄᑦ ᐃᓕᓐᓂᐊᖅᑎᐅᓪᓗᓂ.  ᐊᖏᔪᑦᑎᐹᖅ 7ᓂᑦ ᓱᕈᓯᕐᓂᑦ, ᑕᐃᕕᑎ ᓄᑕᖃᓄᑦ ᒪᒃᑯᑦᑐᓄᓪᓗ ᐱᓕᕆᔭᕆᐊᑦᓴᖅ ᐊᔪᖏᑦᑎᐊᖅᑐᖅ.

ᑕᐃᕕᑎ ᖁᕕᐊᒋᔭᓕᒃ ᐊᖅᓴᓂᕐᒥᑦ ᐊᕿᓂᕐᒥᓪᓗ, ᐊᓯᖏᓐᓂᓪᓗ ᐊᓪᓕᕋᓕᓐᓂᑦ ᐱᙳᐊᕈᑎᓂᒃ (ᓵᓚᑦᓴᕋᓱᒋᐊᑦᓴᖅ ᖁᕕᐊᒋᔭᖃᒻᒪᕆᑦᑐᖅ − ᒪᑭᒋᐊᖃᑦᑕᓂᑦ ᐋᕿᑦᓱᕆᐊᓕᓐᓂᓪᓗ).  ᒪᒃᑯᑑᓪᓗᓂ, ᑕᐃᕕᑎ ᒪᕐᕈᐃᖅᓱᖅᑐᓂ ᐅᑭᐅᖅᑕᖅᑐᒥᑦ ᐱᙳᐊᕕᔾᔪᐊᖅᑐᓂᑦ ᐃᓚᒋᔭᐅᓯᒪᔪᖅ.  ᐱᙳᐊᖅᑐᓂᑦ ᐃᓚᒋᔭᖃᑦᑕᕋᒥ ᐊᐅᐴᑕᒨᓚᐅᖅᓯᒪᒻᒥᔪᖅ ᐊᒻᒪᓗ ᓂᐅ ᕙᐅᓐᓛᓐᒧᑦ. ᑕᐃᕕᑎ ᐊᐅᓪᓚᖃᑦᑕᖅᓯᒪᔪᖅ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖏᓐᓄᑦ ᐊᒻᒪᓗ ᑲᓇᑕᒥᑦ ᖃᓪᓗᓈᑦ ᓄᓇᖓᓄᑦ, ᐅᐸᓚᐅᖅᓯᒪᖏᑕᑐᐊᖏᑦ ᐳᕆᔅ ᐃᕗᐊᑦ ᕿᑭᖅᑕᖓᓄᑦ.  ᒫᓇᖃᑖᕈᓗᒃ, ᑕᐃᕕᑎ ᐊᐅᓚᖃᑦᑕᕆᐊᑦᓴᖅ ᖁᕕᐊᒋᔭᖃᒻᒪᕆᑦᑐᖅ ᐊᒻᒪᓗ ᓱᓇᑐᐃᓐᓇᓂᑦ ᓄᑖᓂᑦ ᐊᑐᖅᑕᐅᒐᔪᓗᐊᖏᑦᑐᓂᑦ ᖁᕕᐊᒋᔭᖃᕐᒥᔪᖅ ᐋᔅᑐᕋᓕᐊᒦᖃᑕᓚᐳᕐᒥᔪᖅ, ᐊᕐᕌᒎᓐᓂᒃ ᒪᕐᕉᓂᒃ ᓄᓇᖃᑲᐃᓐᓇᓚᐅᖅᑐᖅ.

ᑕᐃᕕᑎ ᐊᓪᓚᕕᑦᑎᓐᓂᑦ ᑎᑎᕋᕐᕕᖓᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐱᓕᕆᖃᑕᐅᓂᖓ ᐃᓚᒋᔭᐅᓂᐊᕐᓂᕆᓕᖅᑕᖓ ᖁᕕᐊᒋᔭᕗᑦ ᓯᕗᓕᖅᑎᑦᓴᒃᑯᑎᒍᑦ ᐱᔭᕇᓯᒪᔪᖅ.

Staff Image

ᑲᐃᑎ ᑎᑦᕼᐊᒻ
ᖃᕋᓴᐅᔭᑎᒎᖓᔪᓂᒃ ᖃᐅᔨᓴᖅᑎᒻᒪᕆᒃ

ᑲᐃᑎ ᐱᕈᓚᐅᖅᑐᖅ ᑲᐃᑉ ᐳᕆᑕᓐ, ᓅᕙ ᓯᑰᓯᐊᒥᑦ ᐱᖓᓱᓂᒃ ᐊᕐᓇᓂᒃ ᖃᑕᖑᑎᓕᒃ, ᐱᖓᓱᓂᒃ ᐊᓂᖃᖅᖢᓂ ᐊᒻᒪᓗ ᐊᒥᓱᐊᓄᓐᓂᑦ ᐃᓪᓗᖃᐅᖅᑐᑦ ᐊᖑᑎᖃᑎᖏᓪᓗ.  ᐃᖃᐅᒪᓗᐊᖑᐊᑕᖓ ᐊᑖᑕᑦᓯᐊᖓᑕ ᐱᕈᓰᕕᖓᓂᒃ ᐃᑲᔪᖃᑦᑕᓚᐅᕐᓂᕐᒥᓂᒃ ᖃᑕᙳᑎᓂ ᐃᓚᓂᓗ ᐃᑲᔪᖅᑎᒋᓪᓗᓂᒋᑦ.

ᐃᓕᓐᓂᐊᕐᕕᐊᓗᒻᒥᑦ ᐱᔭᕇᕋᒥ, ᑲᐃᑎ ᐃᓕᓐᓂᐊᕆᐊᑲᓐᓂᓚᐅᖅᑐᖅ ᐆᒪᔪᓕᕆᓂᕐᒧᑦ ᖁᕝᕙᓯᓐᓂᖅᓴᒧᑦ ᓴᐃᑦ ᕗᕋᔅᓯᔅ (Saint Francis Xavier University) ᓯᓚᖅᑐᖅᓴᕐᕕᔾᔪᐊᖓᓄᑦ.  ᑲᐃᑎ ᓇᒧᑐᐃᓐᓈᖃᑦᑕᕆᐊᑦᓴᖅ ᖁᕕᐊᒋᔭᖃᕋᒥ ᓄᓇᕗᒻᒧᑦ ᑎᑭᖃᑦᑕᖅᓯᒪᔪᖅ ᐊᐅᔭᒃᑯᑦ  2001 , 2002 ᐊᒻᒪᓗ 2003ᒥ.  ᐅᑭᐅᖅᑕᖅᑐᒥᑦ ᖁᕕᐊᒋᔭᖃᕋᒥ ᐃᖃᓗᓐᓂᑦ ᐊᖏᕐᕋᖃᓕᖅᑐᖅ 2004ᒥᓂᑦ. ᑲᐃᑎ ᐃᓄᓕᕆᓂᕐᒧᑦ ᖁᕝᕙᓯᓐᓂᖅᓴᒥᑦ ᐃᓕᓐᓂᐊᕐᓂᖃᖅᓯᒪᒻᒥᔪᖅ ᑖᕼᐊᐅᓯ ᓯᓚᖅᑐᖅᓴᕐᕕᔾᔪᐊᖓᓂᑦ (Dalhousie University) ᐊᒻᒪᓗ ᐱᔭᕇᓯᓯᒪᒋᓪᓗᓂ ᑎᒥᒥᒍᑦ ᐊᔪᕈᑎᓕᓐᓂᑦ ᐊᐅᓚᑦᑎᓂᕐᒥᑦ ᐳᕆᑎᔅ ᑲᓚᒻᐱᐊ ᓯᓚᖅᑐᖅᓴᕐᕕᔾᔪᐊᖓᓂᑦ (University of Northern British Columbia),  ᑕᐃᒪᖓᓂᑦ ᐃᓅᖃᑎᒥᓂᒃ ᐃᑲᔪᕆᐊᑦᓴᖅ ᖁᕕᐊᒋᔭᓕᒃ.

ᐊᓪᓚᕕᑦᑎᓄᑦ ᐃᖅᑲᓇᐃᔭᕆᐊᓚᐅᖏᓐᓂᕐᒥᓂᑦ, ᐊᕐᕌᒍᓄᑦ 9ᓄᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᑯᒫᓂᒃ ᖃᐅᔨᓴᖅᑎᓄᑦ ᐃᖅᑲᓇᐃᔭᖅᑎᐅᓚᐅᖅᑐᖅ ᓄᓇᕗᒻᒥ, ᐃᑲᔪᖃᑦᑕᓚᐅᖅᑐᖅ ᐃᖅᑲᓇᐃᔭᖅᑎᓂᑦ ᐋᓂᐊᕐᓂᑯᓂᑦ ᐅᕝᕙᓗᓃᖅ ᐱᕐᕈᐊᕿᓂᑯᓂᑦ.

ᓇᑦᓯᐅᖑᔭᐅᑎᓪᓗᒍ ᐅᓐᓄᓴᒃᑯᑦ, ᐱᓕᕆᖃᑎᖃᓗᐊᖏᒃᑯᓂ ᐅᐃᒥᓂᒃ ᐊᒻᒪᓗ ᒪᕐᕉᓐᓂᒃ ᕿᑐᕐᖓᖏᓐᓂᒃ, ᑳᐱᑐᕐᓗᓂ ᐃᓂᓪᓚᖓᑦᑎᐊᑐᐃᓐᓇᕋᔭᖅᑐᖅ ᐅᖃᓕᒫᖓᕐᒥᑦ ᐅᖃᓕᒫᕐᓗᓂ.

 

ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᖃᑎᒌᒃᑐᓕᕆᓂᕐᒧᑦ ᑭᒃᑯᑐᐃᓐᓇᕐᓄᓪᓗ ᐅᔾᔨᕈᓱᓕᖅᑎᑦᑎᓂᖅ

ᑭᒻ ᐃᓅᓯᒪᔪᖅᓯ ᕼᐊᒥᑦ, ᑳᓕᐴᓐᓂᐊᒥᑦ, ᑭᓯᐊᓂᓕ, ᐃᓚᖏᑦ ᑲᓇᑕᒧᑦ ᐅᑎᓚᐅᖅᑐᓯᒪᔪᑦ ᑭᒻ ᐅᑭᐅᖃᓕᖅᑎᓪᓗᒍ ᒪᕐᕉᓐᓂᒃ. ᐊᖏᔪᖓᓗ/ᓄᑲᖓᓗ ᐊᓂᐊᓗ, ᑭᒻ ᐱᕈᓚᐅᖅᑐᑦ ᓅᕙ ᓯᑰᓯᐊᒥᑦ ᐊᒻᒪ ᐃᐅᓪᐴᑕᒥᑦ. ᑭᒻ ᐃᖃᓗᓐᓄᑦ ᑎᑭᔅᓯᒪᔪᖅ ᓰᑏᑉᐱᕆ 2017ᖑᑎᓪᓗᒍ ᐊᒻᒪ ᓄᑖᖑᒐᓗᐊᖅᑎᓪᓗᒍ ᐅᑭᐅᖅᑕᖅᑐᒧᑦ, ᑭᓯᐊᓂ ᓄᑕᖅᑲᓄᑦ ᑭᒡᒐᖅᑐᐃᔨᐅᓂᕐᒥᑦ ᐋᓪᓚᒋᔭᖃᙱᑦᑐᖅ ᒪᒃᑯᑦᑐᓄᓪᓗ. ᑕᐃᒪ, ᓱᓕ ᐱᒋᐊᓚᐅᖅᑎᓐᓇᒍ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᑐᐃᔨᒃᑯᓐᓄᑦ ᐱᓕᕆᔨᒋᔭᐅᓚᐅᖅᑐᖅ ᓂᐅᕐᕈᑎᖃᕐᓂᕐᒧᑦ ᐊᒻᒪ ᑐᓴᐅᒪᖃᑎᒌᑦᑐᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ ᕌᓄᑦ ᒥᒃᑖᓄᑦ ᐃᓪᓗᖓᓐᓄᑦ ᐃᑲᔪᖅᑏᑦ ᑮᓇᐅᔭᖅᑎᒍ® ᐃᐅᓪᐴᑕᐅᑉ ᓂᒋᐊᓂ ᐊᒻᒪ ᕿᑎᖅᐸᓯᐊᓂ ᐊᕐᕌᒍᓄᑦ ᑕᓪᓕᒪᓄᑦ ᐅᖓᑖᓄᓪᓗ!

ᑭᒻ ᐃᓕᓴᕆᔭᐅᔾᔪᑎᑖᖅᓯᒪᔪᖅ ᐱᔭᕇᕈᓯᐊᕐᒥᑦ ᑐᓴᐅᒪᖃᑎᒌᑦᑐᓕᕆᓂᕐᒧᑦ ᑳᒡᒍᕆᐅᑉ ᓯᓚᑦᑐᓴᕐᕕᕐᔪᐊᖓᓂᑦ ᐊᒻᒪ ᐃᓕᓴᕆᔭᐅᔾᔪᑎᖃᕐᒥᔪᖅ ᐱᕙᓪᓕᐊᔪᓂᑦ ᐅᓂᒃᑳᓕᐅᓂᕐᒥᑦ ᐃᐅᓪᐴᑕᑉ ᓂᒋᐊᓂᑦ ᓯᓚᑦᑐᓴᕐᕕᖓᓐᓂᑦ ᑐᓴᐅᒪᔾᔪᑎᓕᕆᓂᕐᒧᑦ (S.A.I.T) ᑭᒥ ᖁᕕᐊᒋᔭᖃᖅᑐᖅ ᐃᓕᖅᑯᓯᖃᑎᒌᙱᑦᑐᓂᑦ ᐃᓕᑉᐸᓪᓕᐊᓂᕐᒥᑦ, ᐊᐅᓪᓚᖃᑦᑕᓂᕐᒥᑦ ᐱᓇᓱᐊᒐᖃᐃᓐᓇᖅᑐᖅ ᓯᕗᓪᓕᐅᑎᑕᖏᓐᓂᑦ. ᑲᓇᑕᐅᑉ ᐅᑭᐅᖅᑕᖅᑐᖓᓐᓂᑦ ᕿᒥᕐᕈᒃᑲᓐᓂᕈᒪᔪᖅ ᐊᕐᕌᒎᓂᐊᖅᑐᓂᑦ.

ᑭᒻ ᐅᖃᖅᑐᖅ ᖁᔭᓕᕆᕋᖅᑐᓂ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᓐᓄᑦ ᐃᖅᑲᓇᐃᔮᖅᑖᕆᐊᒥᑦ ᐃᖅᑯᒪᕋᐃᒐᒥ ᐃᖅᑲᓇᐃᔭᕆᐊᕐᓂᐊᕐᓂᒻᒥᓂᒃ ᖁᕕᐊᓱᖃᑦᑕᖅᑐᖅ ᑖᒃᑯᐊ ᐱᓕᕆᐊᕆᔭᖏᑦ ᐱᐅᔪᓪᓚᕆᐅᓂᖏᓐᓄᑦ ᐃᑲᔪᕐᓂᕆᖃᑦᑕᖅᑕᖏᑦ ᒪᒃᑯᒃᑐᓂᑦ ᓄᓇᕗᒻᒥᐅᓂᑦ ᐊᒻᒪ ᐱᔪᓐᓇᐅᑎᒋᔭᖏᓐᓂᑦ. ᑖᒃᑯᐊ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᑐᐃᔨ ᑕᐃᒫᑦᑕᐅᖅ ᖁᕕᐊᓱᑉᐳᑦ ᑭᒻ ᐱᓕᕆᖃᑎᒋᔭᐅᓐᓂᕐᒪᑦ − ᐱᐅᒋᓪᓚᕆᑦᑕᕗᑦ ᐱᔪᒪᓂᖃᑦᑎᐊᓪᓚᕆᑦᑐᓂᑦ ᐊᒻᒪ ᑲᔪᖅᓯᒪᑦᑎᐊᕐᓂᖓᓄᑦ ᐊᓪᓚᕕᑦᑎᓐᓄᑦ ᐱᔪᒥᓇᖅᑎᑦᑎᖃᑦᑕᖅᑐᖅ ᐅᐸᒐᐃᒻᒪᑦ!

ᑎᐋᓇ ᓴᐃᓪᒋᕈ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᐅᑭᐅᖅᑕᖅᑐᒧᐊᓚᐅᖅᑳᕋᓂ, ᑕᐃᐋᓐ ᓄᓇᖃᓚᐅᖅᐳᖅ ᐋᑐᕚ, ᐊᓐᑎᐅᕆᐅ−ᒥ. ᑕᐃᐋᓐ ᐊᔪᕈᓐᓃᖅᓴᓚᐅᖅᐳᖅ Cognitive Science−ᒥᒃ ᐅᕙᓂ, Carleton ᓯᓚᑦᑐᖅᓴᕐᕕᒡᔪᐊᒥ ᑕᐃᒪᙵᓂᓪᓗ ᐱᓇᔪᒃᓯᒪᕗᖅ ᐊᔾᔨᒋᙱᑦᑐᓂᒃ ᐅᖃᐅᔾᔪᐃᕙᖕᓂᕐᒧᑦ ᓇᓗᓇᐃᒃᑯᑕᕐᓂᒃ, ᑕᐅᑐᒐᖃᓪᓗᐊᑕᖅᖢᑎᒃ     ᐊᒃᓱᕈᕐᓇᖅᑐᓂᒃ-ᑐᓴᐅᒪᓂᕐᒧᑦ ᐱᓕᕆᐊᖑᕙᒃᑐᓂᒃ.

ᑕᐃᐋᓐ ᐊᓕᐊᓇᐃᒋᓪᓚᕆᒃᑕᖓ ᓄᒃᑕᕐᓂᖅ  ᐱᓕᕆᕝᕕᖃᕈᒪᓪᓚᕆᒃᐸᖕᓂᕐᓗ ᓄᑕᖅᑲᓂᒃ ᒪᒃᑯᒃᑐᓂᒡᓗ ᖃᐅᔨᑎᑦᑎᔾᔪᑎᒋᓚᐅᖅᐸᐅᒃ ᐅᑭᐅᖅᑕᖅᑐᒥᒃ.  ᖃᖓᑦᑎᐊᖑᓛᒃᑯᑦ, ᑕᐃᐋᓐ ᓄᓇᖃᓚᐅᖅᐳᖅ ᑲᖏᖅᖠᓂᕐᒥ, ᐃᖅᑲᓇᐃᔭᖅᖢᓂ ᐅᕙᓂ, ᐳᓛᕐᕕᒃ ᖃᑉᓗ ᐱᖃᓐᓇᕆᔭᖃᖅᐸᖕᓂᕐᒧᑦ ᐃᓂᒋᔭᐅᔪᒥ. ᑕᐃᑲᓂ ᐱᖃᓐᓇᕆᔭᖃᖅᐸᖕᓂᕐᒧᑦ ᐃᓂᒥ ᐃᖅᑲᓇᐃᔭᕐᓂᕐᒥᓂ, ᑕᐃᐋᓐ ᐱᕕᒃᓴᖃᓚᐅᖅᐳᖅ ᓄᒃᑕᕐᓂᕐᒥᒃ ᐊᔾᔨᒌᙱᑦᑐᓄᑦ ᓄᓇᓕᖕᓄᑦ ᓄᓇᕗᒻᒥ ᐃᑲᔪᖅᑐᐃᔪᓐᓇᖅᖢᓂᓗ ᐃᓚᒌᓂᒃ ᒪᒃᑯᒃᑐᓂᒡᓗ ᐊᒃᓱᕈᕐᓇᖅᑐᒦᓐᓂᖏᓐᓂ.

ᑕᐃᐋᓐ ᐃᖃᓗᐃᑦ ᐊᖏᕐᕋᕆᓂᕋᓕᕆᕚ ᑎᑎᕋᕐᕕᒃᐳᓪᓗ ᐱᒃᑯᒍᓱᑦᑎᐊᖅᐳᖅ ᑖᓐᓇ ᐱᓕᕆᖃᑎᒌ ᓄᑦ ᐃᓚᓕᐅᑎᔪᓐᓇᓕᕐᒪᑦ.

 

 

ᓄᕝᕕᔭ ᐃᓄᐊᕋᕐᒃ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᓄᑉᐱᔭ ᐃᓄᐊᕋᖅ ᓄᑖᖑᓂᖅᐹᕆᔭᕗᑦ ᓄᑕᖅᑲᓄᑦ ᒪᒃᑯᑦᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᐅᑦᓱᓂ ᒪᐃ 2020.

ᓄᑉᐱᔭ ᐃᓕᓐᓂᐊᕆᐊᖅᓯᒪᔪᖅ ᑖᓪᕼᐊᐅᓯ ᓯᓚᑦᑐᖅᓴᕐᕕᔾᔪᐊᖅᒧᑦ, ᕼᐊᓕᕚᒃᔅ, ᓅᕙ ᔅᑰᓯᐊᒥ, ᐊᒻᒪᓗ ᔫᓂ 2017, ᐱᔭᕇᖅᓯᓚᐅᖅᑐᖅ ᐃᓕᓐᓂᐊᕐᓂᕐᒥᑦ ᐅᖃᖅᑎᑦᓯᔨᐅᑦᓱᓂᓗ ᓄᓇᕗᒻᒥ ᓯᓚᑦᑐᖅᓴᕐᕕᒃᒧᑦ ᐱᑦᓱᓂᓗ ᐱᔭᕇᖅᓯᔾᔪᓯᐊᖅ ᓯᕗᓪᓕᖅᒥ ᖃᐅᔨᓴᕐᓂᕐᒧᑦ ᐅᑭᐅᖅᑕᖅᑐᖅᒥ ᐋᓐᓂᐊᓯᐅᖅᑎᐅᓂᕐᒧᑦ. ᐱᔭᕇᖅᓯᒋᐊᖅᑐᓚᐅᖅᑐᖅ ᐋᓐᓂᐊᓯᐅᖅᑎᐅᓂᕐᒧᑦ ᑲᔪᖏᖅᓴᐃᔪᓕᕆᓂᕐᒧᑦ ᐱᓕᕆᐊᒧᑦ ᐃᓂᖃᖅᑎᑕᐅᓚᐅᖅᑐᖅ ᐊᔾᔨᒌᖏᑦᑐᓂᑦ ᑲᒪᒋᔭᐅᒋᐊᖃᓪᓚᕆᑦᑐᓄᑦ ᐊᑯᓂᐅᔪᒥᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐋᖅᑭᑦᓯᒪᓂᓕᓐᓂᑦ ᕿᑭᖅᑕᓂ ᐋᓐᓂᐊᕕᒃᒥ (QGH). ᓯᕗᕐᖓᒍᑦ ᐃᓚᒋᔭᐅᓕᓚᐅᕋᓂ ᐱᓕᕆᖃᑎᒌᑎᓐᓄᑦ ᐋᓐᓂᐊᓯᐅᖅᑎᐅᓚᐅᖅᑐᖅ ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᕝᕕᖓᓂᑦ ᕿᑭᖅᑕᓂ ᐋᓐᓂᐊᕕᒃᒥ. ᓄᑉᐱᔭ ᐱᕚᓪᓕᓚᐅᖅᑐᖅ ᐃᓚᖏᓐᓂᑦ ᐱᒻᒪᕆᐅᔪᓂᑦ ᖃᐅᔨᒪᓂᖅᒥ, ᐊᔪᙱᑕᖃᕐᓂᖅᒥ, ᐱᔪᓐᓇᕐᓂᖃᕐᓂᕐᒥᓪᓗ ᐊᕐᕌᒍᓐᓄᑦ ᒪᕐᕉᓐᓄᑦ ᐃᓕᑕᕆᔭᐅᔾᔪᑎᖃᖅᓱᓂ ᐋᓐᓂᐊᓯᐅᖅᑎᐅᓂᕐᒧᑦ ᕿᑭᖅᑕᓂ ᐋᓐᓂᐊᕕᒃᒥ ᐃᑉᐱᓐᓂᐊᓂᖃᖅᓱᓂᓗ ᐱᐅᔪᒃᑯᑦ ᐃᑲᔫᑎᖃᓚᖓᒋᐊᖓ ᑕᐅᑐᖅᑰᖅᑕᖓᓂᑦ ᐊᓪᓚᕝᕕᑦᑕ.

ᖁᕕᐊᒋᔭᖃᕐᓂᖓ ᐱᔨᑦᓯᕋᕐᓂᕐᒥᑦ ᑭᒃᑯᑐᐃᓐᓇᕐᓂᑦ ᓇᓗᓇᐃᖅᓯᓂᕐᒥᓪᓗ ᐱᔨᑦᓯᕋᐅᑏᑦ, ᐊᑐᐊᒐᐃᑦ, ᐱᓕᕆᔾᔪᓰᓪᓗ ᐋᖅᑭᑦᓯᒪᔪᐃᑦ ᓄᓇᕗᒻᒥ ᓈᒻᒪᒃᑲᐊᕐᒪᖔᑕ ᐱᔭᕆᐊᓕᖏᓐᓄᑦ ᐃᓄᒋᐊᓐᓂᖏᓐᓄᑦ. ᐃᖅᑲᓇᐃᔮᖓᑎᒍᑦ, ᓂᕆᐅᓐᓂᖃᖅᑐᖅ ᓴᙱᓕᑎᑦᓯᓂᕐᒥᑦ ᐊᒻᒪᓗ/ᐅᕝᕙᓗᓃᑦ ᐃᑲᔫᑎᖃᕐᓂᕐᒥᑦ ᐱᕙᓪᓕᐊᑎᑦᓯᓂᕐᒧᑦ ᖃᓄᐃᙱᑦᓯᐊᕐᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᐃᑦ.

 

ᕇᔭ ᒫᓐᑎᐅᕉ
ᑲᒪᔨ ᑐᓴᒐᓴᓕᕆᓂᕐᒧᑦ
(2018-ᒥ ᐊᐅᔭᒃᑯᑦ)

ᕇᔭ ᓅᓚᐅᖅᑐᖅ ᐃᖃᓗᖕᓄᑦ ᒧᒻᐸᐃᒥᖔᖅᖠᓂ, ᐃᓐᑎᔭᒥᑦ, ᒪᐃᖑᑎᓪᓗᒍ 2017−ᒥᑦ. ᐅᑭᐅᖅᑕᖅᑐᕐᒧᑦ ᓅᓚᐅᖅᑎᓪᓗᒍ ᐊᔾᔨᙱᑦᑐᒧᐊᓪᓚᕆᓚᐅᖅᑐᖅ ᐃᓅᓯᓕᒫᖅ ᐅᖅᑰᔪᒦᓚᐅᖅᑎᓪᓗᒍ ᐃᓄᒋᐊᒃᖢᓂᓗ. ᐃᖏᖃᑦᑕᕐᓂᕐᒥᑦ ᖁᕕᐊᒋᔭᖃᕐᓂᖅ ᑐᕌᕈᑎᒋᓚᐅᖅᐹ ᐃᓚᐅᖃᑕᐅᓂᕐᒧᑦ ᐃᓄᒃᓱᒃ ᕿᓚᐅᔾᔭᖅᑎᖏᓐᓂᑦ ᐅᖃᓚᐅᖅᑐᖅ, "ᐅᕙᓐᓄᑦ ᐊᑲᐅᔪᑦ ᐃᓄᒃᑐᑦ ᐅᖃᕆᐅᕈᓐᓇᖅᓯᓚᐅᕋᒪ ᐊᒻᒪᓗ ᖃᐅᔨᕚᓪᓕᖅᖢᖓ ᐃᓄᐃᑦ ᐃᓕᖁᓯᑐᖃᖏᓐᓂᑦ."

ᕇᔭᐅ ᐊᐅᔭᒃᑯᑦ ᐃᖃᓇᐃᔮᕆᓚᐅᑲᒃᑕᖓ ᓄᑕᖃᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ ᓯᕗᓪᓕᖅᐹᑦᑎᐊᒥᑦ ᐃᖃᓇᐃᔮᖅᑖᓚᐅᖅᐳᖅ!

ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨᐅᓂᖓᓄᑦ ᑲᒪᒋᔭᖃᖅᑐᖅ ᐅᓪᓗᑕᒫᖅ ᑐᓴᖅᑕᐅᔪᒃᓴᓂᑦ ᓇᐅᑦᑎᕐᓱᖅᐸᒃᖢᓂ ᐊᐅᓚᑦᑎᕙᒃᖢᓂᓗ ᑭᒃᑯᑐᐃᓐᓇᕐᓄᑦ ᐱᓕᕆᐊᒃᓴᓄᑦ ᐱᕕᖃᖅᑎᑦᑎᓂᕐᒧᑦ ᐃᖃᓗᐃᑦ ᓂᐅᕕᕐᕕᖕᓂᑦ ᐊᒻᒪᓗ ᐅᐱᕐᖔᒃᑯᑦ ᓱᕈᓯᕐᓂᑦ ᐱᓕᕆᐊᒃᓴᖃᖅᑎᑦᑎᓂᕐᒧᑦ.

ᕇᔭ ᐃᓕᑦᑎᓚᐅᕐᒥᔪᖅ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᖕᓂᕆᔭᖏᑦ ᓄᑕᕋᐅᑉ ᐊᒻᒪᓗ ᐃᑲᔪᓚᐅᕆᓪᓗᓂ ᓂᕈᐊᕐᓂᕐᒧᑦ ᐱᔪᓐᓇᐅᑎᒥᑦ ᑐᕌᕆᔭᐅᓂᐊᖅᑐᒥ 2018 ᐅᓂᑳᕗᑦ, ᓂᐲᕗᑦ ᓵᓚᒃᓴᕋᓱᑦᑕᐅᔪᒥᑦ. ᕇᔭ ᐱᓕᕆᕐᔪᐊᖃᑕᐅᓯᒪᖕᒥᔪᖅ ᑕᐅᑐᙳᐊᕐᑕᐅᔪᓂ ᐅᔾᔨᕐᓇᓕᖅᑎᑦᑎᓂᕐᒥᑦ ᒪᒃᑯᒃᑐᑦ ᓂᐱᓂᑦ ᑎᑎᕋᕐᕕᐊᓂ ᕿᒥᕐᕈᔭᐅᔪᒃᓴᓂᑦ ᐃᓱᒪᓕᕆᔨᒃᑯᓐᓂᑦ.

ᕇᔭ ᐅᖃᓚᐅᖅᑐᖅ "ᐃᖃᓇᐃᔮᖃᕐᖢᓂ ᓄᑕᖃᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ ᑐᑭᓯᑦᑎᑕᐅᑐᐃᓐᓇᖏᑦᑐᖅ ᐱᒻᒪᕆᐅᓂᖏᓐᓂᑦ ᓄᑕᖃᐃᑦ ᐱᔪᓐᓇᐅᑎᖏᑦ ᑭᓲᓂᖏᓐᓂᑦ, ᐃᑲᔫᑎᖃᕐᒥᔪᑦ ᑲᒪᒋᔭᖃᕈᓐᓇᑦᑎᐊᕐᓂᕐᒥᑦ ᑲᒪᒋᔭᖃᕈᓐᓇᕐᓂᕐᒥᓗ ᐊᑲᐅᖏᑦᑑᒐᓗᐊᓂ, ᐱᓗᐊᕐᑐᒥᑦ ᐃᓱᒪᒃᓴᖅᓯᐅᖃᑕᐅᔪᓐᓇᕐᓂᕐᒥᑦ ᑐᓴᐅᒪᖃᑦᑕᐅᑎᓂᕐᒥᓗ ᐱᓕᕆᖃᑎᒋᔭᖓᓂ. ᐊᓕᐊᓇᐅᒍᓱᒃᐳᖓ ᐊᔪᖏᑦᑎᐊᕐᑐᓂ ᐃᖃᓇᐃᔭᖃᑎᖃᓚᐅᕋᒪ ᐅᒃᐱᕈᓱᒃᑐᓂ ᓄᑕᖃᐃᑦ ᒪᕐᖁᒃᑐᓪᓗ ᓂᐱᖏᑦ ᐱᒻᒪᕆᐅᓂᖏᓐᓂᒃ."

ᐊᓕᐊᓇᐅᒍᓱᖕᒥᕗᒍᑦ ᕇᔭ ᐃᓚᐅᖃᑕᐅᔪᓐᓇᕐᒪᑦ ᐃᖃᓇᐃᔭᕐᕕᑦᑎᓐᓂ, ᐅᐱᖔᒃᑰᑐᐃᓐᓇᖅᐸᑦ!

ᑭᐅᕈᓚᐃᓐ ᐊᖓᓕᒃ
ᐱᐅᓯᖕᓄᑦ ᖃᐅᔨᓴᖅᑎᐅᑉ ᐃᑲᔪᖅᑎᐊ
(ᐊᐅᔭᖅ 2017−ᒥ)

ᑭᐅᕈᓚᐃᓐ ᐊᖓᓕᒃ ᐊᓕᐊᓇᐃᒋᔭᖃᑦᑎᐊᖅᑐᖅ ᐃᑲᔪᖅᑐᐃᓂᖕᒥᑦ ᐊᓯᒥᓂᒃ ᑐᓂᓯᓂᖕᒥᒡᓗ. ᖁᕕᐊᒋᔭᓕᒻᒪᕆᒃ ᐱᓕᕆᖃᑎᖃᖕᓂᖕᒥᑦ ᓄᑕᖅᑲᓂᑦ ᐊᑐᓕᖅᖢᓂᐅᒡᓗ ᐱᔪᒪᓚᐅᖅᑕᓂᑦ ᐃᓕᓴᐃᔨᙳᕐᓂᖕᒥᑦ ᓯᕗᒧᐊᒃᖢᓂ ᖁᕝᕙᓯᖕᓂᖅᐹᒥᑦ ᐃᓕᓐᓂᐊᖕᓂᖕᒥᑦ ᓄᓇᕗᒻᒥᑦ ᐃᓕᓴᐃᔨᐅᓂᒃᓴᒧᑦ ᐃᓕᓐᓂᐊᒐᒃᓴᑎᒍᑦ. ᑭᐅᕈᓚᐃᓐ ᐊᐃᑉᐸᕆᓕᖅᑕᖓᓄᑦ ᐊᕐᕌᒍᖓᓄᐊᖕᓂᐊᓕᖅᑐᖅ ᐃᓕᓐᓂᐊᕐᑕᒥᓂᒃ ᓯᑎᐱᕆ 2017−ᒥᑦ.

ᐊᕐᕕᐊᓃᓐᓂᑰᓪᓗᓂ, ᖃᒪᓂ’ᑐᐊᒥᓪᓗ, ᐃᖃᓗᖕᓃᖏᓐᓇᐸᓗᒃᖢᓂ, ᑭᐅᕈᓚᐃᓐ ᓄᓇᕗᒻᒦᑦᑐᖅ ᐃᓅᓯᓕᒫᒥᓂᒃ.  ᑭᐅᕈᓚᐃᓐ ᐊᓕᐊᓇᐃᒋᔭᓕᒃ ᓄᓇᕗᒻᒦᖦᖢᓂ – ᐱᓗᐊᖅᑐᒥᑦ ᑲᔾᔮᖕᓇᖕᓂᖓ ᓄᓇᐅᑉ, ᐆᒪᔪᖃᑦᑎᐊᖕᓂᖓᓂ, ᐃᓕᖅᑯᓯᖕᒥᑦ, ᐃᓄᖏᓐᓂᒡᓗ. ᐊᓕᐊᓇᐃᒋᖕᒥᔭᖏᑦ ᒥᖅᓱᖕᓂᖅ, ᓂᖅᖠᐅᕐᓂᖅ, ᐃᓚᒥᓃᑲᑕᒃᖢᓂᓗ, ᐱᓗᐊᖅᑐᒥᑦ ᕿᑐᙵᒥᓂᒃ.

ᑭᐅᕈᓚᐃᓐ ᖃᐅᔨᓴᕈᓐᓇᖕᓂᖓ ᑐᓴᖅᑎᑦᑎᔪᓐᓇᖕᓂᖓᓗ ᐱᒻᒪᕆᐅᔪᓂᑦ ᐃᓱᒪᒋᔭᓂᑦ ᐃᖅᑲᓇᐃᔭᖃᑎᖏᓐᓂᑦ ᐃᓚᒋᔭᐅᕌᕐᔪᒃᐳᖅ ᑭᐅᕈᓚᐃᓐ ᑐᙵᓱᒃᑎᑕᐅᓪᓗᓂ ᐃᓚᑖᖑᖕᒪᑦ ᑭᒡᒐᖅᑐᐃᔨᒃᑯᑦ ᑎᑎᕋᕐᕕᐊᓄ 2017−ᒥᑦ ᐊᐅᔭᒃᑯᑦ ᐃᓕᓐᓂᐊᕐᑎᐅᓪᓗᓂ.

 

 

 

ᑭᓕᐅᕋ ᐋᑯᓗᔪᒃ
ᑐᓴᐅᒪᑎᑦᑎᓂᕐᒧᑦ ᐱᓕᕆᔨ
(ᐊᐅᔭᖅ 2016−ᒥ)

ᑭᓕᐅᕋ ᐋᑯᓗᔪᒃ  ᐸᓐᓂᖅᑑᕐᒥᐅᑕᐅᕗᖅ, ᓄᓇᕗᒻᒥ ᑕᐃᑲᓂᓗ ᐱᕈᖅᓴᖅᑕᐅᓚᐅᖅᓯᒪᓪᓗᓂ ᐊᓈᓇᖓᓄᑦ ᐃᓚᒥᓄᓪᓗ. ᖁᑦᑎᖕᓂᖅᓴᒥ ᐃᓕᓐᓂᐊᕌᓂᐊᓪᓚᓚᐅᖅᖢᓂ, ᑭᓕᐅᕋ ᖃᔅᓯᑲᓪᓚᖕᓂ ᐊᓐᑎᐅᕆᐅᒥ ᓄᓇᖃᓚᐅᖅᓯᒪᔪᖅ ᐊᔪᕈᓐᓃᖅᓴᕈᒪᓪᓗᓂ ᐃᓕᓐᓂᐊᕐᕕᓪᓚᑦᑖᒥ ᐃᓕᓐᓂᐊᕌᓐᓚᓚᐅᖅᖢᓂ ᐃᓕᓐᓂᐊᒃᑲᓐᓂᕐᓂᕐᒥᒃ. ᐃᓕᓐᓂᐊᖃᑦᑕᓚᐅᖅᑐᖅ ᐱᓪᓗᓂᓗ ᖃᔅᓯᑲᓪᓛᕐᔪᖕᓂᒃ ᓇᓗᓇᐃᒃᑯᑕᓂᒃ ᓄᓇᕗᑦ ᓯᕗᓂᒃᓴᕗᒃᑯᓐᓂᑦ ᐅᕙᓂ, Algonquin College ᐃᓕᓐᓂᐊᕆᐅᖅᓴᓕᓵᖅᑐᓄᓪᓗ ᐃᓕᓐᓂᐊᕐᓂᕐᒧᑦ ᐱᓕᕆᐊᖑᕙᒃᑐᒥᒃ ᐅᕙᓂ, Georgian College. ᑭᓕᐅᕋ ᒫᓐᓇ ᐊᔪᕈᓐᓃᖅᓴᖅᐸᓪᓕᐊᕗᖅ ᐃᒪᐃᑦᑐᖅᑖᕆᓛᖅᑕᒥᓄᑦ, Bachelor of Education, ᐅᑯᑎᒎᓇᒃ, ᓄᓇᕗᒻᒥ ᐃᓕᓴᐃᔨᕈᖅᓴᓂᕐᒧᑦ ᐱᓕᕆᐊᖑᕙᒃᑐᒥ ᐃᖃᓗᓐᓂ. ᐱᖓᔪᖓᓂᒃ ᐊᕐᕌᒍᒥᒃ ᐃᓕᓐᓂᐊᕐᓂᐊᓕᖅᑐᖅ ᓯᑎᐱᕆ 2016-ᖑᓕᖅᐸᑦ, ᑖᓐᓇᓗ ᐊᕐᕌᒍᓄᑦ ᑎᓴᒪᓄᑦ ᐱᓕᕆᐊᖑᕙᒃᑐᓂ.

ᐊᓕᐊᓇᐃᒋᔭᖓ ᐃᓚᒥᓂᒃ ᐃᓅᖃᑎᖃᕆᐊᒃᓴᖅ ᐃᖃᓗᖕᓂ ᐸᓐᓂᖅᑑᕐᒥᓗ, ᐊᐅᓪᓚᖅᓯᒪᖃᑎᖃᖅᑐᓂ ᐃᑦᑐᕐᒥᓂᒃ ᓂᖏᐅᕐᒥᓂᓪᓗ ᐊᐅᔭᒃᑯᒃ, ᓇᒧᙵᐅᕙᓪᓕᐊᑲᑕᕈᓘᔭᖅᑐᓂ ᐊᔾᔨᓕᐅᕆᑲᑕᒃᑐᓂᓪᓗ. ᑭᓕᐅᕋ ᐊᓐᓂᕆᔭᖃᑦᑎᐊᖅᑐᖅ ᐃᓅᓂᕐᒥᓂᒃ ᐃᓕᖅᑯᓯᕆᔭᐅᕙᒃᑐᓂᒃ ᐊᒻᒪᓗ ᖃᐅᔨᒃᑲᓐᓂᕈᒪᓇᔭᑦᑎᐊᖅᑐᓂ ᓄᓇᖃᖅᑲᖅᑐᑦ ᐃᓕᖅᑯᓯᖏᓐᓂᒃ ᐅᑭᐅᖅᑕᖅᑐᒥ ᓄᓇᓕᐅᖃᑎᒌᒃᐸᒃᑐᓂᒃ.

ᑭᓕᐅᕋ ᐅᖃᖅᑐᓂ ᐃᓚᒋᔭᐅᓂᕐᒥᓄᑦ ᑭᒡᒐᖅᑐᐃᔨᐅᖃᑕᐅᓪᓗᓂ ᓄᑕᖅᑲᓪᓗ ᒪᒃᑯᒃᑐᓪᓗ ᑎᑎᕋᕐᕕᖓᓂ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᓂ ᐃᖅᑲᓇᐃᔭᕐᓂᕐᒥᓄᑦ ᐃᑲᔪᖃᑦᑕᖅᓯᒪᕗᖅ ᑐᑭᓯᐅᒪᓕᕐᓂᕐᒥᒃ ᖃᓄᖅ ᐱᒻᒪᕆᐅᑎᒋᖕᒪᖔᑕ ᓄᑕᖅᑲᑦ ᐱᔪᓐᓇᐅᑎᒋᔭᖏᑦ ᖃᓄᕐᓗ ᑕᒪᑦᑕ ᐱᕚᓪᓕᖅᓯᒪᓕᕈᓐᓇᕐᒪᖔᑦᑕ ᑕᒪᒃᑯᓂᖓ ᐅᔾᔨᕐᓇᖅᓯᑎᑦᑎᓂᐊᕈᓐᑕ ᐃᒃᐱᒋᑦᑎᐊᕐᓂᐊᕈᑦᑎᒍᓗ.

ᑭᓕᐅᕋ ᓇᒃᓴᖅᐳᖅ ᓴᙱᔪᓂᒃ ᐋᖅᑭᒃᓱᐃᔪᓐᓇᕐᓂᕐᒧᑦ ᐱᕙᒌᔭᕈᓐᓇᕐᓂᕐᒧᓪᓗ ᐊᔪᙱᓐᓂᕐᓂᒃ RCY−ᑯᑦ ᑎᑎᕋᕐᕕᖓᓄᑦ. ᐱᒃᑯᓕᔪᒻᒪᕆᐅᕗᒍᑦ ᑖᓐᓇ ᐅᕙᑦᑎᓐᓄ ᐃᓚᓕᐅᑎᓯᒪᔪᓐᓇᕐᓂᖓᓂᒃ! 

 

ᒦᒐᓐ ᐱᓕᐅ
ᒪᒃᑯᒃᑐᓂᒃ ᖃᓄᐃᓕᐅᖅᑎᑦᑎᓗᑎᒃ ᐃᓚᐅᑎᑦᑎᔪᓐᓇᕐᒪᖔᑕ ᖃᐅᔨᓴᖅᑎ
(2015-ᒥ ᐊᐅᔭᒃᑯᑦ)

ᓅᕙ ᔅᑰᓴᒥᐅᑕᒃᓴᔭᖅ, ᒦᒐᓐᓗ ᖃᑕᙳᑎᒌᓪᓗ ᓅᓚᐅᖅᓯᒪᕗᑦ ᐃᖃᓗᖕᓄᑦ 2004-ᖑᑎᓪᓗᒍ. ᐃᖃᓗᖕᒥᐅᑕᐅᔅᓲᔭᓕᖅᑎᓪᓗᒍ, ᒦᒐᓐ ᖁᕕᐊᒋᔭᖃᑦᑎᐊᓵᖅᐳᖅ ᐱᕈᖅᓴᑎᓪᓗᒍ ᓄᓇᕘᒥ. ᐃᖃᓗᖕᓂ ᐃᓕᓐᓂᐊᕌᓂᓚᐅᖅᓯᒪᓪᓗᓂ ᖃᑯᒍᑦᑎᐊᕐᓗ ᐃᓕᑕᕆᔭᐅᔾᔪᑎᑖᓛᓕᖅᖢᓂ Bachelor of Arts ᐃᓄᐃᑦ ᐱᔪᓐᓇᐅᑎᖏᑦ ᐱᓪᓗᒋᑦ Carleton ᓯᓚᑦᑐᖅᓴᕐᕕᒡᔪᐊᕐᒥ. ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᑎᓪᓗᒍ, ᒦᒐᓐ ᓂᕆᐅᒃᐳᖅ ᓄᓇᕗᒦᖏᓐᓇᓛᕈᒪᓪᓗᓂ ᐃᓄᐃᓪᓗ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᖏᓐᓇᕐᓗᓂ ᐊᐃᓯᒪᓗᓂ. 

ᒦᒐᓐ ᓇᕈᓇᒃᑲᒻᒪᕆᐊᓗᒃ ᓇᒧᙵᕈᓘᔭᖃᑦᑕᖅᓯᒪᑎᓪᓗᒍᓗ ᐊᓕᐊᓇᐃᒋᑦᑎᐊᖅᖢᓂᐅᒃ. ᓂᕆᐅᒋᔭᖃᖅᑐᖅ ᖃᑯᒍᒃᑲᓐᓂᖅ ᓱᓕ ᐆᒪᑎᓪᓗᒍ ᓄᓇᕐᔪᐊᓕᒫᖅ ᓇᕈᓇᒡᕕᒋᓚᐅᖅᓯᒪᔪᒪᓪᓗᓂᐅᒃ ᖃᐅᔨᐅᕋᑦᑎᐊᕐᓗᓂᒋᓪᓗ ᐊᔾᔨᒌᙱᑦᑑᑎᒻᒪᕆᐊᓗᐃᑦ ᐃᓕᖅᑯᓯᕆᔭᑦ ᐊᒻᒪ ᐱᐅᓯᕆᔭᐅᖃᑦᑕᕐᓂᑯᑦ.

ᐊᐅᔭᒃᑯᑦ ᐃᖅᑲᓇᐃᔭᖅᑎᐅᖃᑕᐅᑎᓪᓗᒍ ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓐᓂᒃ ᑕᑯᕚᓪᓕᕐᔪᐊᖅᓯᒪᓕᖅᑐᖅ ᒦᒐᓐ ᓴᖅᑭᑦᑎᓯᒪᓕᖅᖢᓂᓗ ᐱᔪᒃᓯᓐᓇᑦᑎᐊᖅᑐᒥᒃ ᓄᑕᖅᑲᑦ ᒪᒃᑯᒃᑐᓪᓗ ᐱᔪᓐᓇᐅᑎᖏᑦ ᐱᓪᓗᒋᑦ. ᖁᕕᐊᓱᑦᑎᐊᖅᑐᖅ ᑕᑯᔭᕆᐊᒃᓴᖅ ᐃᑲᔪᕆᐊᒃᓴᕐᓗ ᐱᕙᓪᓕᐊᓂᕆᔭᐅᔪᒧᑦ ᑎᑎᕋᕐᕕᖕᒥ ᑭᒡᒐᖅᑐᐃᔨᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓄᓇᕘᒥ.