Kanatami katimayiit Nutaqqanun Inulramminullu Akhuuqhaiyut kangiqhipkaiyuumiyumavlugit nutaqqanut pilaarutinut uumani Nunakyuami Nutaqqanun Ublua


Hikutirvia 20, 2018 –Kanatami Katimayiit Nutaqqanun Inulramminullu Akhuukhaidjutikhainut (Canadian Council of Child and Youth Advocates - CCCYA) pitquyait tamaita Kanatamiutat ilaulutik uumunga Nunakyuami Nutaqanun Ubluani hulilukaarutikhanut nunakyuami ublumi talvanilu havainiqmi.

“Nunakyuami Nutaqqanun Ublua ukiungani pidjutikhaq ihumagilugit pilaarutikhainut nutaqqanun, ikayuutiginahugitpaktavullu ihuaqhiyuumilugit atuliqlugillu ukuat pilaarutikhat ubluk tamaat,” uqaqtuq Del Graff, Alberta Nutaqqanun Inulramminullu Ikayuqti, nutaaklu Angiyuqqaaq CCCYA-kunut. “Una UN Convention on the Rights of the Child (UNCRC) naunaikhimayait inuit pilaarutikhait nutaqqanun inulramminullu, pitquyavullu inuit tamaat ikayuqlutik akhuurutigilugit ukuat pilaarutikhanut.”

Tikiliktuq 30-ni ukiut aullalirmata UNCRC. Kanata atiliurutingmadjuk angirutikhanut UNCRC-kunut talvani Qiqaiyaluarvia 1990 angiqmadjuk titiraq 1991-mi. UNCRC-kut munarivaktait amihut pilaarutikhat munaqhiliqidjutinut, qayangnautikhanut ilihaudjutikhanullu nutaqqanun. Nunakyuami Nutaqqanun Ublua quviahuutigiyauvaktuq UNCRC-kunut.

Taimaali Kanata nakuuyumik aulaliqtut ilainni kituni, uvagut kavamavut naunaitpiaqtumik pidjutigiluangitait pittiaqnikkut haffumunga nutaqqat pilaarutainun aallanin, imaa kangiqhipkainiqmik nutaqqanun inungnullu ukuninga nutaqqanun pilaarutikhainun iliharvikni ilihaidjutikhainut. Aalla ihumagiyakhaq una Kanataup ayuqhautigivagaat uqarilugit aallangayut nunaqaqqaaqhimayunut nutaqqat inulrammiillu – unalluaq ikitpallaat nampait nunaqaqqaaqhimayut nutaqqat inulrammiillu munariyauyut, aadjikkiingittutik ihumaaluutiqaqtunut ikayuutikhat ihuaqtunut pivikhanit upalungaiyautikhanullu uqariyaanginni anmigaikpiaktunut inminiiqpaktunut tahapkuani uaqaqqaaqhimayut inuulrammiuyut.

Nutaqqanun uqaqtiunikkut, akhuuqtugut piyaangini nutaqqat inulgamiit ilihimapkaqlugit inmi pilaagutainun. Ayungnaqtuq nutaqqat uvaluuniin inulgamiup ilitagilugu pilaagutitik ihuinaaqtakpata. Taimaa pitquyavut inuit Kanatamiutat, hapkualu kavamatkut, hivuliutilugu ilihimalugit hapkua UNCRC-kut, ikayuliqlugit nutaqqat pilaarutikhainut, havaliqlutik munarilugit pilaarutikhait nutaqqanun inulraminullu inuuhikhainut munariliqlugit.