Havaktivut


Tahapkuat titiraqhimayut hamna qaangani naunaiyaqtaa inungit hamna ataani. 

 

Tamarmik tamaitalu havaktivut naunaiqtitaa aliahuuninnga timiqutigiyaptikni: tunngahuktittut, atayumik, ikayuinnaqtuqlu.

Una aliahungninnga naunaipkaqtaatigut qanuqtut havaktugut atauttimut qanuqtullu havaktugut nutaqqanut, inuulrammiit ilanginnullu. Akhuuqtipkaiyaatigut ukpirigaptitkit inuulrammiit Nunavunmiutat ihumagiyautivullu piqaqtugut hivunikhanginnik. Hilataanit aadlangayumik ihumagiyumayuktugut taimaa aadlamik pigiami! Titirangitkaluaqluta uvaptigut unipkaaliuqhuta inuuhiptiknik, titiraqtugut aadlap inuup inuuhianganik. Quviahukpiaqtumik naunaipkaiyavut aglinganaqtut aadlatqiinguyullu havaqatikput!


Jane Bates
Nutaqqanut Inulramirnullu Uqaqtikhaanik

 

 

Jeffrey Kheraj
Hanaqiyanguqtakhanun Naunaiyaiyi

Jeffrey nunagiyaa Qausuittuq (quviagiyaa) Inuinnauvluni African-nguvlunilu. Jeff maamaa annguniaqtiuyuq. Maamatigut, nutarauvluni inirninguliqhuni hanikpaniittaamini annguniaqhunilu aliagiyaa. Kihimi, Jeff aliagingitaa iqalukhiuriamini (ililugu Jeff piksaa hamunga).   

Jeff nunani qimaktaa ilihariaktuqhuni Naunaitkutikhaminut Ihuinaaqtuliqinikkut Yukon College-mi talvani Whitehorse. Naunaitkutinikkami ilihautiminut, Jeff nuuttuq Iqalungnut. Talvani, havaariliqtaa nunallaami qyurhaqtunut ikayuqtiuvluni Nunavut Kavamangani Inulirijikkut.

Jeff pania ilaillu piqpagiyait munarittiakpagaillu. Annguniaqpakhuni, Jeff aliagiyait mukpangniq basketball-mik, Frisbee-lu, taiguaqpagaillu Star Wars-mik huliyakhairaangami. Jeff havagvigiliktait Ikayuqtit Nutqqanut Inulramminullu havagviani auyami 2015-mi. Ilihimatquyaatit ikayuqniaqhuni nutaqqanik inulramminiklu Nunavunmi.   

 

 

 

 

Lynn Matte
Aulapkaiyiat Nutaqqat Inulramiit Ikayuqtikhaq Pivikhaqautikhanik

Lynn ayuitutuq, ilihimatiaqtuq, quviagiyaalu havani. Quanahivaktuq havagviptini! Lynn angigliyuq Azilda-mi, mikiyuq nunallaaq Ontario-mi. Angigliyuq igluani angayuqani, aqqaluangalu, aattaatiap/anaanattiaplu.  Quyagivaktait angayuqani taki uuktuqattaqlutin nutamik hunanik.

Iliharvikyuanginni, Lynn iniqtiqtuq Bachelor in English Ilitquhiliqyiingitlu uvalu Nunaryuami Ilihainikkut Naunaikutikhaq. Newfoundland-mungavaktuq pigiaminni IIiharyuarnikkut Iniqtirut Folklore-mik. Aliagiyaa aquiqattariami havakpakturlu ilihaivakturlu alianaqtun ilangit aalani nunaryuangit, ilauyurlu English castle-mik. Illa Lynn unipkaatiayuiyuq!

Lynn nunagivakta Nunavut 2011-min. Hamani, quviahuutigiqpiaqtaa Ukiuqtaqtuq piqpagiliqhugulu Kevin, uinga. Malrunik nutaarakhaqqaqtuq irniqaqhunilu. Unaguiqhinaqtuq mikhuqluni taiguaqluniluuniin makpiramik.

 

 

 

 

 

Christa Kunuk (Ilihainikkut Havaguikhimalaktuq)
Nutaqqat Inulramiit Ikayuqtikhaq Ayuikhattiakhimayuq

Ihumagiugut Christa inuuhimayuq uumunnga havarigiangani quviahuktugullu ilaukmat havakviptikni! Ayuitpiaqhimayuq havagahualiraangat nutaqqanik inuulrammiinullu naunaittuqlu.

Christa inuuhimayuq Qikiqtarjuaqmi. Nuuttuq Victoria, British Columbia-mut mikkautilluni tiguaqminit. Ilanga nakuuriqpiaqtaa mikkautilluni ilihimayangit hilamiitilluni ulapqiqatigiplugit aningit angayukhanginnit. Christa quviahukpiaqtuq utiffaariami Ukiuqtaqtumut 1994mi. Ihumagiyuq aullangittutut ipluni.

Christa havaanga qauyimadjutingit nutarannuat ilihalihaaliqtillugit unalu ihumamitigut aaniaqtailiniq. Havaktuugaluaq ikayuqtiuyuq uqaqatigiikhuni Nakasuk Nukarhiit Iliharvingani 7nik ukiunik. Tuhaqtugut qangarnitat ilihaqtuq utiffaaliqpaktut Nakasukmut pulaariamikni Christa-mut. Taimaa, naunaittuq havaktuqniqtuq!

Christa ihumagiyuq kinauyaakhaanik pitquhingillu akhuurutauyut inuulrammiup nakurudjutinganut. Iglaqtipkainnaqtuq iglaliraangat tuhaannaqtuq havakvikmi. Havangitkaangat, Christa aliagiyaa ilaminiitkaangat; uinga David nutaqqangillu Alana, Emily, Manu Piitalu.

 

 

Nancy Pellerin

Atanilluaq Atuqtauyukhanut Naunaiyaiyi/Ilittuqhaiyi

Nancy qaihimayuq inugiakpallaangittumit nuna haniani Trois- Rivières, Québec-mi. Aliagiyaanik paqigiami nutaanik nunanik pitquhinginniklu qaipkaqtaa Nunavunmut 2006mi. Qilaminnuaq piqpagiliqta inungit, nunanga kayumingninnga inuuhiq. Qiniqhimmaaqtaa angiyuq Ukiuqtaqtuqmi nunanga sikiittuukkut, kayakkut, maniqqamiitilluni pihuuyaqhunilu.

Nancip aliagininnga nutaqqat nakurudjutinganik pipkaidjutigiyaa ilihaidjutinga havaanganullu. Arnaq pihimajuq Titiraqarhimaliqhuni Iliharutikkut Uqaudjiunikkut Ihumaliqinikkut (Master of Arts in Counselling Psychology (MA)). Naunaitkutaliklu tunigiami ayuittiaqhimayunik ilihaidjutikhanganik inuulrammiinut inuknullu havaqatigiyanginnut. Una ilaliutihimayuq Atayumik Inminiiqtailidjutimut Ayuirhainiq (ASIST), nakuuyumik piqatigiikniqmut ilihaidjutikhanik, ningaqtailiniqmullu ihivriuqniq ilihaidjutikhanik.

Nancy ulapqiinnaqtuq nutarakyuumiliqhunilu quviagiplugillu angiyut qinminik. Naalainnaqtuq uqaqtunik uqainnarialiklu inuknut inmiknik naunaiqtut nipiqaqtunik. Ilaani, avaliingaqhuni. Takugukni hapkuninnga atuqtilluni, nalayuknaqhiyuq taiguqtuq taiguaqtuq kaapiturallittunilu.

 

 

 

 
 
 

David Korgak
Nutaqqanut Inulramirnullu Uqaqtiuyi Ayuittiaqhimayuq Ayiukhaqtuq

David inuhimayuq pamiqtauvluni Iqaluni, Nunavut uvalu quviagikpiaqtait itqaumatjutinik nutaraubluni ilihaqtiluni Iqalutimi nukaghiit akulliitlu Iliharvikni. Angayukhiuyuq tallimat-malruq nutaqani, David ayukhangituq havaqatigilugit nutaqqat inulrammiinnunlu.

David quviagiyait mukpa ktut, hapkuatlu ulapqiuyat (uqaqpaktuq   taimaa akirariktainnaqtuq –  ukuninga ulapqiuyat  Monopoly and Connect Four). Inulgamiutilluni, David ilauhimavaktuq malrutuikhuni Arctic Winter Games-mi. Ilauyumanirnik ulapqidjutini aullaqattaqpaktuqlu Alberta-mun and Newfoundland-munlu. Ilaali, David aullaqpaktuq tamainiq ukiuktaqtuni aviktuqniitunilu Kanantami, kihiani Prince Edward Islandlu. Qangannuaq, David piqpagiyait aullarangami uuktuinaqtuqlu nutamik hulidjutit Australia-mugautitiya, talvani inuugaakhimayuk malrunik ukiut.

Havagvikput quviahuktuq ilaulirman David RCYO-kunnun inirhimalirami nakuujumik una Hivuliqtikhat Iliharnikkut Pinahuaruti.

 
 
 
 
 

 

Katie Didham
Atanilluaq Atuqtauyukhanut Naunaiyaiyi/Ilittuqhaiyi

Katie inuuhimayuk Cape Breton-mi, Nova Scotia pingahunik nukariitqaqtuq, pingahuniktauk aniqaqtuq amihuyutauq arnaqatait. Atauhiq aliagikpiaqta itqaumadjutini uvvanga munagiktiluni ataatattiata nauvakviani ilagigitlu ilamingniklu.

Iniqtirami hamanga Angayukhiit Ilihaqviani, Katie ilhaffagiatuq piyumablugu Naunaitkutalirihimayuq Hunavaluknik Ihivriuqniq uumayuliginiqmi hamanga Saint Francis Xavier University. Katip piyumayanginiit Nunavumungautiya auyami 2001, 2002, uvalu 2003-mi. Piqpagikpiagamiuq Ukiuqtaqtumi Katie atiqtuqta ihimavia Iqaluni taimunga 2004-mi.  

Katie Naunaitkutalirihimayuq inuuliqiyiit hapkungnanga Dalhousie University-mi uvalu Naunaitkutalirihimayuq Ayurnautiqaqtuq Munariniqmut hapkungnani University of Northern British Columbia-mi, tahamani  inmi quviagiyait ikayukhugit inuit inuhimini.

Havaktinani havaviptingni, havakpakhimayuq hapkunani Havaktiit Aanniaqtailinginni Akiliuhirnikkullu Katimayiingit Nunavunmi 9-nik ukiuni, ikayuqhugit inuit utirnagikhimayut namaqtumik havamingnun aniaruiqata mamitpataluniit aniqhimayut.

Unaguikhirvikmi, huliyungnigangata aipani nutaqqanilu, unagiuhikhivaktuq kapitukhuni taiguqhunilu makpiganik. 

 
 


Kim Foster
Atannguyat Tuhaqtipkainikkut Inungniklu Qauyimayakhainik

Kim inuuhimayuq talvani Hemet, California, kihiani, ilangit utiqpaktun nuutpakhimayut Kanatamun taima Kim 2nik ukiuqaqtiluni. Ilagiyaangalu aniqatigiyaingit, Kim pamikhimavakhimayuq Nova Scotiami Albertamilu. Kim tikivakhimayuq Iqalungnun Apitilirvik 2017mi taima nuutaanguyuq tununganirmun, allaungituq uqaqtiuyaangat nutaqqanun inulramiinunlu. Talvuuna, ilautinani talvuna RYCOnun Kim havakpakhimayuq Angiyukhiupluni Niuvailiqiyunik Tuhaqtitiliqiyunik Uqautiupluni talvani Ronald McDonald House Ikayuktiuyunik Hivuraani Qitqanilu Albertami taima avatquhimayuq tallimanik ukiunik

Kim piqaqtuq ilitagiryuarutingnik tuhaqtitiliqinikkut talvanga Iliharvikyuangani Calgarymi unalu ilitagidjutikhanga tuhaqtitiliqinikkut talvanga Hivuraani Alberta Iliharvikyuangnik Qaritauyaliqiyunik (S.A.I.T.). Kim quviagiya ayuigianganik havakpakhimayainik allatqiinik pitquhiqaqtunik, taima aulaagianganik aihinun ikayuutigiinaqta hivuliutigiyaalu titiraqhimayunik. Nigiukhimayurlu qiniqhimaagumainaqtaa tamaat Kanata tununganirmi talvuuna hivunirmi ukiunganik.

Kim uqallakhimayuq taima quviahuktuq anginirmik havaqatigiyaangat talvani RCYOmi taima tupagianginaqtuq quviahuktumik havagiaqtugianganik ubluq tamaat taima atuguminarman havaanga talvani havakvingmi ikayugianganik inulramiuyut Nunavunmiutat pidjutikhaingitlu. Tamna RYCOngit aadjikiiktumik quviahuutiqaqtun piqagianganik Kim-mik ilauyaangat iliqatigiikman talvani - quviagiyaqqut atuguminaqtuq ihuaqtumik inuuhirikami qaritiinaqtuq havakviptingnun!

 

 

Sharon Reashore
Nutaqqat Inulramiit Ikayuqtikhaq Ayuiqhattiakhimayuq

Sharon nutarauvluni nayukpaga Dundas-mi, Ontario, nunallaanuaq haniani Hamilton, iglumi ilani pigivaktaannut taimaa amigaitqiyaanit 60-ni ukiuni. Talvaniittuni aliagivlugu hulikuaarutikhanik qilakpakhuni, kalikunik pinnikhaqhugit miqiyut qipiliuqpagait, pianaliqpakhunilu!

Hivullikpaami pulaaqhimayuq ukiuqtaqtumi ukununga Goose Bay unalu Northwest River, Labrador. Talvani ayuiqtuq hikumi iqalukhiuriamini ilauvlunilu nattiqhiuqtuni.  Nakuugitqiyait niqainnait ukuat tuktumik suuliuqhimayut piffiniklu.

Sharon iniqtiriyaa ilihaqtaminik una LL.B. naunaitkut iliharvikyuami University of New Brunswick havaarivakhugu ayuiqhaqhuni maligaliqinikkut talvani Nova Scotia, ayuiqhautigivlugu inirniqhaanut maligaliurutinik. Havakhimayuq Nunavut Kavamangani,upalungaiyautigivlugit munariyauhimmaakvikhainut Inirniqhaanut nunami, havaaqaqhimavluni angayughini atan’nguyauvluni RCYO-kuni havagvinni atulihaaliqtuni ukiuni.

Sharon quviagiyait akhuurutigivlugit inungnut pilaarutikhat, akhuurutinut havakpagainni, ikayuqhugillu aallat pivalliadjutikhainut inmik akhuurutikhamingnik ayuiqhaqtittugit. Ikayuqpiakniaqtuq havagviptingnut havaqatigiyumakpiaktakkullu!

 

 

Megan Blair
Inuulrammiinik Ilaliutiniqmut Ihivriuqtiuyuq
(Auyami 2015)

Nova Scotia-miutayuq, Megan nuuttuq ilangalu Iqalungmut 2004mi. Qangaraaluk nunagiyaminik, Megan quviagiyaa tamaat angikliyuumiqtilluni Nunavunmi. Iniqtiqtaa sikuurutinga Iqalungmi qakugunnuaqlu piniaqtaa Iliharyuarvikmut Inuknik uumani Inuit Pilaarutingit Carleton Iliharvikyuanganit. Iniqtiqmagu Ilihaidjutinganik, Megan Nunavunmi ittumayuq havakhimmaaqluni inuit pilaarutinginnik iglumini.

Megan tingmiinaqtuq aadlanut nunanut quviagiyaalu amihut tingmidjutikmani. Ihumagiyuq qakugu tingmiyumayuq tamainnut nunaryuaptiknik aturiami aadlatqiittut pitquhit unipkaangillu.. 

Havaktilluni auyami ayuirhaqtuq RCY-mi ilihaidjutigiyaa naunaiqtipkaiplunilu Megan-mut naunaiqtitaalu nutaaq piumayanganik pilaarutinik aliagiyanganiklu nutaqqat inuulrammiinullu. Quviahuktuq takugiami tunigiamilu piliurninnganik ikayuqtiutikhaqmik nutaqqanut inuulrammiinullu Nunavunmi. 

 

 

Clara Akulukjuk
Tuhagakhaliriyi

(Auyami 2016)

Clara Akulukjuk Pangniqtuumiutauyuq, Nunavut pamikhimayuq maamaminit ilaminillu. Iniqhigami angayughiit iliharviani, Clara nunamiitpaktuq ilanginni Ontario-mi ilihaqyuumiqhuni iliharvikyuani. Iliharvigiyaa tuniyauhimavlunilu titiqqamik naunaitkutikhamik ilihaudjutiminut ukunanga Nunavut Sivuniksavut talvani Algonquin College unalu Early Childhood Education ilihaidjutikhaq talvani Georgian College. Clara tadja ilihaudjutigiyaa Bachelor of Education ukunuuna Nunavunmi Ilihaiyikhanut Ilihaidjutingit Iqalungni. Ilihaudjutigiliqniaqtaa inmi pingahuni ukiunginnut taaffumunga hitamani ukiuni ilihaudjutikhamut talvani Apitilirvik 2016.

Aliagiyaa hulilukaaqatigivlugit ilaqatini Iqalungni Pangniqtuumilu, hanikpaniiqatigivlugit ataattiani ananattianilu auyami, aullaaqhuni piksaliuqpakhunilu. Clara tammaqtittumangitaa inmi Inuit pitquhingit kangiqhiyumavlunilu amihunik Nunaqaqqaaqhimayunut pitquhiinnik Ukiuqtaqtumi nunaqaqtuni.

Clara uqaqtuq taimaa ilauvluni Nutaqqanut Inulramminut Uqaqtikhaanik havagvingmi auyami ilihaqtiuvluni havakhimavluni ikayuutigiyaa kangiqhiyaami qanuq piqutigiyauyut nutaqqanut pilaarutit ittaakhainut qanuqlu ikayuutiginiaqtavut kanggikhipkaidjutigilugit ihumagivaklugillu.

Clara atuqpagait inmi hakugiknikhat auladjutinut upalungairutikhanullu ayuiqhimayani RCY-kut havagviani. 
Quviagikpiaktakkut uvaptingniinmat!

Caroline Angalik
Ikayuktiuyuq Naunairutikharnik Qauyihaiyi

(Auyami 2017)

Caroline Angalik quviagiyaa ikayugiagnaik tuniyaangatlu inungnun. Quviagiyaa havaqatigiyaanganik nuttaqqanun havakhimaaqturlu hivunikharnik ilihaiyaangat havakhimaarhunilu Ilitagidjutigikharnik talvanga Ilinniaqtuliqiyikkut talvuuna Nunavut Ilihaiyiikharnik Iliharutikharnik Havaaqharnik. Caroline ilaunialiqtuq tuglianganik ukium ilihaqtamingnik talvuuna Aippiut 2017mi.

Talvaniitiluni Arviami, Qamanittuarmi talvanilu Iqalungni, Caroine inuuhimaanginaqtun nunaptingnik inuuhirmini. Caroline quviagiyaa inuuhimaagianganik Nuanvunmi - tamna kihiani pinirninga nunam, amigaitilaangitlu uumaniqaqtunik nunami, pitquhingit, inuitlu. Quviagiyaalu miqhungniq, igayaangat, ilauqatigiyaangatlu ilagiyaingit, kihimiluaq nuttaraingit.

Caroline havagiaqaqtainik qauyihaidjutikharnik iliqatigiiktukharnik akhurnaqtuq ihumagiyauyukharnik tapkuninga havaqatigiyainik qaffiuyunuat ihumagiyauyukhat huuq Caroline tunngahuktitauyukhaq havaktukharnik talvani Ilautquyauhimayunik Havakviani talvuuna 2017mi auyami havaktitiunik ilihaqtunik.