Nipinga Nutarap


Havakviptikni, uqaliqpaktugut nipinganik nutarap. Kihimi qanuritpa uqaraangapta uuminnga? Qanuqlu pipkaidjutiva havaaptiknik?

Nipinga nutarap akhuraaluk imaatut ittuq inuulramiit piqaqtut pittaarninnganik piliuriami qanuqtut ihumagiyamiknik pittaaqtuq uqarumayamiknik. Una pilaarutaut atuqtaunginnaqtuq tamainni Nunaryuami Katimayiit Katimayut Pilaarutinginnut Nutaqqat. Tamna Katimayiit naunaiqtaalu kavamatkut ihumagiyakhaa nutarap ihumagiyanganik, piyuq nutarap pidjutinganut.

Ihumaliurut naalagiami nipinganik nutarap nutaanguyuq amigaittunut inuknut tamainni nunaryuaptikni. Kihimi tamna nipinga nutarap naunaiqtitaa nutaamik quviahuutimik inuulramiit havaanganik ihumaliuriamikni. Piqaqtuq angikliyuumiqtumik ilihimaniq inuulramiit ihumagiyanginnik angikliyuumiqtaaqtaa nakuutqiamik hivunikhaq tamainnut inuknut. Nipinga nutarap imaatut ittuq nutaqqat pingitmata kavamatkunnit ihumaliurutinginnit. Kihimi, akhuuquyauyut ilauyukhat akhuurutauyunit hunavaluit ayurhautipkaqtamiknit.

Puiguqtailugu itqaumagiami tahapkuunaraaluk titiqqat Katimayiini atauttikkut havaktut. Piittuq ihuatqiaq akhuurutaulluaqtuq aadlamit. Tamna nutarap pilaarutinga uqariami ihumagiyauyukhaq hanianit angayuqqap munarininnga nutaqqiqigiami.

Qanuqtut una ihumaliurut naunaiqtivaa havakvikput? Uqarumayugut tamaita havavut piyuq nipinganit nutarap. Ikayuraangaptitku tamna nutaraq, tamna nutaraq inuulramiiqluuniit havaktipkaidjutigiyaatigut, piyuq aktikkulaanganut. Pigaangapta ihivriuqtaptiknik, qiniqtugullu qanuqtut ihumagiyaptiknik nutaqqanit inuulraminnitlu. Inmata, taimaa, ayurhaqtipkaidjuaqtaukmata maligainnit, maliganit, ilihaidjutinit ikayuutiptiknitlu ihivriuqtaptiknik..