Unipkaavut


Pidjutinga piliuriami Havaktinga Nutaqqanut Inuulrammiinullu Nunavunmi naunaiqtittiyuq akhuurutininnga amihut Nunavunmiutat!

Nunavut ilitariyaupluni avikturhimanguqtuq 1999mi. Talvani ukiumi, Debbie Gray, Iqaluktuutiami sikuuqtittii, hivulliqpaami pipkaidjutiliuqtuq avikturhimayumi nutaqqanik ikayuqtikhanginnik. Ihumagiyuq inmikkut ikayuqtikhamik ikayuqniaqtuq kavamanga pigiami nutaqqat aadlatqiittut ihariagininngit.

Miiyaugaluaq Iqaluktuutiamut, Keith Peterson, talvannga naunaiqtitaa ayurhaut inuknut. Kiudjutinga, nutaaq Nunavut Kavamatkut qiniqhiayut ihumaliuqtauyuq 2000mi. Angiqtaa nutaqqat ihariagininngit ihariagiyuq ihumagilluaqtakhaanik ikayuqtikhaniklu. Kihimi qilamiuqhutik pingittut piliuriami inmikkut havakvikhanganik.

Taimaa 9nik ukiunik, talvannga kavamatkut havakhimmaaqtaa ayurhautinganik. Nutaqqat Hivulliqpaaq Katimayiryuangaliuqtut. Una kavamatkut havaqatigiiktut talvannga angikliyuumiqtuq ilaliutigiamitku NGO-tkunnik ilihimaliyauliqtut Nunavuutim Uqariiktamiknik Nutaqqanut Inuulrammiinullu.

Talvanngattauq, 2009mi, kavamatkut, pipkaidjutiyauyumit Hivuliqtiugaluamit Eva Aariamit, naunaipkaqtaa Tamapta Maliktakhangit (2009mit – 2013mut). Una makpiraaq ilitariyaat piliurninnga inmikkut Nutaraq Inuulrammiillu Havaktinga ihumagilluaqtauyumik havaaqhauhiqmik. Una angiyuq hivumuurut. Nunavut Kavamatkut naunaittumik uqariiyaqtamiknik piliuriami inmikkut Havaktikhaq Nutaqqanut Inuulrammiinullu.

Talvannga hivulliutiyakhaq ilitariyaukmat, Kavamaliqiyiitkut pipkaidjutiyut Hivumuaqtittillutik Katimayiinik aadlatqiinik kavamatkunni havakvinginnit aadlatlu akhuurutauyut tigumiaqtiuyunik, Nunavut Tunngavitkutlu.

Amihunik katimapkaiyut uqautigiyangillu. Hapkuat ilaliutihimayut havaat Tuttarvitkunnut, Inuit Qaujimajatuqangit Katimayiingit, inuulrammiit havaktingit, aadlat Kaanatamiutat inuulrammiinik ikayuqtiuyut havakvinginnit, UNICEF Kaanatalu, nunallaani aaniaqtailiniqmut katimayiit, aadlatqiit ikayuqtiuyut inuitlu.

2012mi, hivulliqpaaq iniqhimaittuq Havaktinga Nutaqqanut Inuulrammiinullu Maliganga iniqtiqtauyuq. Aippaangurmat, Saptaipa 17mi, 2013mi, RCY Maliganga angiqtauyuq Nunavuutim Maligaliurvingani. June 16mi, 2014mi, Nunavuutim hivulliqpaanga Havatinga Nutaqqanut Inuulrammiinullu, Sherry McNeil-Mulak tikkuaqtauyuq. RCY Havakvinga angmaqtaat ukkuangit Saptaipa 30, 2015mi.

1999mit 2015mut, amigaittut Nunavunmiutat – kavamatkunni hivuliqtiuyunit havaktingillu ilauyullu inuit – tuniyut akhuurutingit ikayuqninngillu piliurninnganut havakviptiknik. Amigaitpallaaq taimaa tamaita atingit titiralimaitavut hamani. Kihimi, ilangit akhuuqtut inuit timiqutigiyauyullu ilaliutiyuq Maligaliuqtiuyut Keith Pederson, Rebekah Williams, Ron Elliott Johnny Ningeonganlu; Brenda Jancke; Elwood Johnson; David General, Nunavut Katimayiingit Haamlangat, Nunavut Kavamanga Nunavut Tunngavitkutlu.

Ilagiiqatigiyaqqut ihumagiyut ihuaqtumik utiqtitiyaangat inuuhirnik akhut havaanganun tapkunga qaivakhimayut uvaptingnun!