RCYO −ᒃᑯᑦ ᐅᐸᒍᑎᓂᖓᑦ ᓇᐅᔮᓄᑦ ᒪᐃ 25-ᒥᑦ – ᒪᐃ 28-ᒧᑦ 2017


ᓈᓐᓯ, ᐊᐅᓚᑦᑎᔾᔪᑎᓄᑦ ᖃᐅᔨᓴᖅᑎᐅᖃᑕᐅᔪᖅ, ᐅᑎᓵᓚᐅᖅᑐᖅ ᑲᑎᒪᑎᑦᑎᓂᕐᒥ ᒪᒃᑯᒃᑐᓂᒃ ᐊᒻᒪ ᐱᔨᑦᑎᕋᖅᑎᓄᑦ ᐊᑐᐃᓐᓇᐅᑎᑦᑎᔪᓄᑦ ᓇᐅᔮᓂ. ᐅᕝᕙᐅᑯᐊ ᐅᖃᐅᓯᕆᓚᐅᖅᑕᖏᑦ ᐊᐅᓪᓚᕐᓂᕆᓚᐅᖅᑕᖓᓂ:

ᐱᖓᓱᐃᖅᖢᖓ ᑎᑭᓐᓇᓱᓚᐅᖅᑐᖓ ᓇᐅᔮᓄᑦ, ᐅᐱᒍᓱᑦᑎᐊᓚᐅᖅᐳᖓ RCYO − ᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᑎᑭᑦᑐᓐᓇᓚᐅᕐᓂᕐᓄᑦ ᑕᒪᐅᖓ ᐱᐅᔪᒻᒪᕆᖕᒧᑦ ᓄᓇᓕᖕᓄᑦ.

ᓇᐅᔮᓃᑎᓪᓗᖓ, ᑲᑎᖃᑎᖃᓚᐅᖅᐳᖓ ᐃᖅᑲᓇᐃᔭᖅᑎᓂᒃ ᐃᓕᓐᓂᐊᖅᑎᓂᒡᓗ ᑐᓴᕐᕕᒃ ᓴᓪᓕᖅ ᐃᓕᓐᓂᐊᕐᕕᖕᒥ ᐱᕕᖃᓚᐅᕐᓂᓐᓄᑦ ᐅᖃᐅᓯᖃᕈᓐᓇᖅᖢᖓ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᐱᓕᕆᓂᕆᔭᑦᑎᓐᓂᓗ ᑎᑎᕋᕐᕕᑦᑎᓐᓂ. ᑲᑎᒪᓂᑦᑎᐊᕙᐅᓚᐅᖅᑐᖅ ᐃᓕᓐᓂᐊᖅᑎᓕᒫᑦ - ᐊᓕᐊᓇᐃᑦᑎᐊᓚᐅᕐᒪᑕ! ᑭᖑᓪᓕᖅᐹᖅᓱᕈᔪᖕᓇᕐᓂᕐᒧᑦ ᐃᓕᓐᓂᐊᕐᓂᐅᑉ ᓄᙳᐊᓂ, ᑲᑎᖃᑎᖃᓕᓚᐅᕐᒥᒐᒪ ᑎᓪᓕᖅ ᐃᓕᓐᓂᐊᖅᑎᓂᒃ ᐱᙳᐊᕐᕕᖕᒥ ᐅᓐᓄᒃᑯᑦ. ᐅᓄᖅᑐᑦ ᒪᒃᑯᒃᑐᑦ ᑲᑎᖃᑎᒋᓚᐅᖅᑕᒃᑲ ᐊᒃᓱᕉᑎᖃᑦᑎᐊᓚᐅᖅᑐᑦ ᐃᓄᒃᑎᑑᕐᓂᕐᒥᒃ ᐱᖅᑯᓯᖏᓐᓂᒡᓗ.

ᐃᓂᒃᓴᓕᐅᕆᓯᒪᔭᕋ ᑕᑖᕋᓗᐊᖅᑎᓪᓗᒍ, ᐃᖃᓪᓕᐊᖃᑕᐅᖦᖤᐱᓚᐅᖅᑐᖓ ᐃᓚᒌᑯᓗᖕᓂ ᓄᓇᓕᖕᓂ. ᑕᐃᒪᐃᒃᑲᓗᐊᖅᑎᓪᓗᒍ ᐃᖃᓗᓚᐅᙱᑦᑐᖓ “ᐱᐅᙱᑦᑐᒥ ᐃᖃᓗᖕᒥ” ᑭᓯᐊᓂ ᐊᓕᐊᓇᐃᓚᐅᖅᑐᖅ ᐊᓃᕋᔭᒋᐊᒃᓴᖅ ᓯᑯᒦᖦᖢᓂᓗ.

ᖁᔭᓐᓇᒦᒃ ᑕᐃᒃᑯᐊ ᐱᕕᖃᓚᐅᖅᑐᑦ ᐃᒃᓯᕚᖃᑎᖃᕆᐊᒃᓴᖅ ᐅᖃᓪᓚᖃᑎᖃᕆᐊᒃᓴᕐᓗ ᓇᐅᔮᓃᑎᓪᓗᖓ. ᐊᓕᐊᓇᐃᑦᑎᐊᓚᐅᖅᑐᖅ ᐊᕙᓗᔭᐅᓯᒪᓪᓗᓂ ᐅᓄᖅᑐᓂᒃ ᐃᓄᒃᑎᑐᑦ ᐅᖃᓪᓚᒃᑐᓂᒃ ᒪᒃᑯᒃᑐᓂᒃ.