2017 ᖃᒪᓂᑦᑐᐊᖅ ᑎᑭᕋᕐᔪᐊᕐᓗ ᓄᓇᓕᖏᓐᓄᑦ ᐅᐸᒍᑎᓂᖅ


ᒪᐃ 5th − 12th, ᐋᓐᑐᕉ ᓄᓇᔾ ᐊᒻᒪ ᑕᐃᕕᑦ ᖁᐊᕋᖅ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒻᒪᕇᒃ, ᐅᐸᒍᑎᓪᓗᑎᒃ ᖃᒪᓂᑦᑐᐊᖅ ᑎᑭᕋᕐᔪᐊᒧᓪᓗ. ᑕᐃᑲᓂ, ᐋᓐᑐᕉ ᐊᒻᒪ ᑕᐃᕕᑦ ᑲᑎᖃᑎᖃᕐᖢᑎᒃ ᐅᓄᖅᑐᓂᒃ ᐃᓚᒋᔭᐅᔪᓂᒃ ᓄᓇᓕᖕᓂ. ᖃᒪᓂᑦᑐᐊᕐᒥ, ᑕᒪᒃᑮᓂᒃ ᐃᓕᓐᓂᐊᕐᕕᖕᒦᑲᑕᓚᐅᖅᑑᒃ ᐅᖃᖃᑎᖃᕐᖢᑎᒃ ᓄᑕᖅᑲᑦ ᐱᔪᓐᓇᐅᑎᖏᓐᓂ ᐃᓕᓐᓂᐊᖅᑎᓄᑦ ᐃᓕᓐᓂᐊᓕᓵᖅᑐᓂ ᖁᑦᑎᖕᓂᓕᖕᓄᑦ ᑕᓪᓕᒪᓄᑦ ᕋᐃᑦᓱ ᐊᕐᖕᓇᒻᒪᒃᑎᖅ ᒥᑭᓐᓂᖅᓴᓄᑦ ᐃᓕᓐᓂᐊᕐᕕᖕᒥ ᖁᑦᑎᖕᓂᓕᖕᓄᑦ 6-12 ᔫᓇ ᐊᒥᑦᓈᖅ ᐃᓕᓐᓂᐊᕐᕕᖓᓂ. ᑲᑎᖃᑎᖃᕆᓪᓗᑎᒃ ᒐᕙᒪᒃᑯᑦ ᐱᔨᑦᑎᕋᖅᑎᒃᑯᖏᑕ ᐱᑎᑦᑎᔨᖏᓐᓂ ᐃᓚᐅᓪᓗᑎᒃ ᐃᓕᓴᐃᔨᑦ, ᐃᓗᐊᖅᓴᐃᔨᑦ, ᒪᒃᑯᒃᑐᓕᕆᔨᑦ, ᐊᓯᒃᑲᓐᓂᖏᓪᓗ. ᓄᓇᓕᖓ ᐃᓚᐅᖃᑕᐅᑦᑎᐊᓚᐅᖅᑐᑦ ᐅᖃᖃᑎᖃᕐᓂᕐᒥ ᐃᖅᑲᓇᐃᔮᖓᓂ ᑎᑎᕋᕐᕕᐅᑉ ᑐᙵᓇᑦᑎᐊᕐᖢᑎᒃᓗ. ᐋᓐᑐᕉ ᐊᒻᒪ ᑕᐃᕕᑦ ᑭᐳᖃᓚᐅᖅᑑᒃ ᓂᐅᕕᕐᕕᖕᒥ ᐅᓄᖅᑐᑦ ᐱᔪᒪᓂᖃᑦᑎᐊᖅᑐᑦ ᖃᑕᙳᑎᒌᑦ ᓄᓇᓕᐅᔪᓪᓗ ᐃᓕᑦᑎᒃᑲᓐᓂᕈᓐᓇᓚᐅᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑕ ᑭᒡᒐᖅᑐᐃᔨᖏᓐᓂ. ᑎᑭᕋᕐᔪᐊᕐᒥ, ᑕᒪᒃᑭᕐᖢᑎᒃ ᓄᓇᓕᐅᔪᑦ ᐃᓚᐅᖃᑕᐅᓪᓗᑎᒃ ᐱᔪᒪᓂᖃᑦᑎᐊᕐᖢᑎᒃ ᐃᓕᑦᑎᓂᕐᒥᒃ ᑭᒡᒐᖅᑐᐃᔨᑦ ᑎᑎᕋᕐᕕᖓ ᖃᓄᐃᓕᐅᖃᑦᑕᕐᒪᖔᑦ ᑭᓱᓂᒃᓗ ᐱᔨᑦᑎᕋᐅᑎᓂᒃ ᐱᑎᑦᑎᖃᑦᑕᕐᒪᖔᑕ. ᐋᓐᑐᕉ ᐊᒻᒪ ᑕᐃᕕᑦ ᐅᖃᖃᑎᖃᕐᖢᑎᒃ ᓄᑕᖅᑲᓂᒃ ᒪᒃᑯᒃᑐᓂᒃᓗ ᐃᓄᒡᓚᒃ ᐃᓕᓐᓂᐊᕐᕕᖓᓂ. ᐃᓚᐅᖃᑕᐅᒻᒪᕆᒃᖢᑎᒃ ᐱᙳᐊᕐᓂᕐᓂ ᓄᓇᓕᖓᑕ ᐱᙳᐊᕐᕕᖓᓂ! ᐱᒃᑯᒍᓱᑦᑎᐊᓚᐅᖅᑐᑦ ᑲᑎᙵᑦᑎᐊᕐᓂᖏᓐᓂᒃ ᖃᓂᒌᖕᓂᖏᓐᓂᒃᓗ ᓄᓇᓕᐅᔪᖅ ᖃᓄᐃᓕᐅᕈᑎᓕᒫᓪᓗ ᐱᑕᖃᐅᖅᑐᓪᓗ ᓄᓇᓕᒃ ᐋᖅᑭᒃᓯᒪᑎᑦᑎᓪᓗᓂ ᒪᒃᑯᒃᑐᖁᑎᖏᓐᓄᑦ.