2017 ᒥᑦᑎᒪᑕᓕᒃ ᓄᓇᓕᖓᓄᑦ ᐅᐸᒍᑎᓂᖅ


ᐱᓴᓱᐊᕈᓯᖓᓂ ᒫᑦᓯ 6-10, 2017, ᒪᕐᕉᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒻᒪᕆᖁᑎᕗᒃ, ᑕᐃᕕᑦ ᖁᐊᕋᖅ ᐊᒻᒪ ᑯᕆᔅᑕ ᑯᓄᒃ ᑭᒡᒐᖅᑐᐃᔨᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓᓂ (RCYO) ᐅᐸᒍᑎᓪᓗᑎᒃ ᓄᓇᓕᖓᓄᑦ ᒥᑦᑎᒪᑕᓕᒃ. ᐅᐸᒍᑎᓯᒪᑎᓪᓗᒋᒃ, ᑕᐃᕕᑦ ᐱᕕᖃᓚᐅᖅᑐᖅ ᑲᑎᖃᑎᖃᕐᓂᕐᒥ ᐃᓕᓐᓂᐊᖅᑎᓂᒃ ᐅᓛᔪᒃ ᐊᑦᑎᓐᓂᖅᓴᒥ ᐃᓕᓐᓂᐊᕐᕕᖓᓂ ᐊᒻᒪ ᓇᓯᕝᕕᒃ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖓᓂ ᐅᔾᔨᕈᓱᒃᑎᑦᑎᒋᐊᕐᖢᓂ ᓄᑕᖅᑲᑦ ᒪᒃᑯᒃᑐᓪᓗ ᐱᔪᓐᓇᐅᑎᖏᓐᓂ. ᑯᕆᔅᑕ ᑕᐃᕕᑦᓗ ᐊᓕᐊᓇᐃᒍᓱᓚᐅᕐᒥᔪᒃ ᐃᓚᐅᖃᑕᐅᓂᕐᒥᓂᒃ ᓄᓇᓕᖓᑕ ᓈᓚᐅᑎᖃᕐᕕᖓᓂ ᐅᖃᐅᓯᖃᕐᖢᑎᒃ ᐃᖅᑲᓇᐃᔮᖏᓐᓂ ᑭᒡᒐᖅᑐᐃᔨᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓᓂ, ᑐᓴᖅᑎᑦᑎᓪᓗᑎᒃ ᓇᓗᓇᐃᔭᐅᑎᓂᒃ ᐅᐸᒍᑎᓯᒪᔾᔪᑎᖏᑕ ᓄᓇᓕᖓᓄᑦ ᑭᐅᒋᐊᖅᐸᒃᖢᑎᒃᓗ ᐊᐱᖅᑯᑎᒃᓴᓕᖕᓄᑦ ᓄᓇᓕᖕᒥᐅᑕᓂᒃ. ᑕᒪᕐᒥᒃ ᑭᒡᒐᖅᑐᐃᔨᒻᒪᕇᒃ ᑲᑎᖃᑎᖃᕆᓪᓗᑎᒃ ᐃᓚᒋᔭᐅᔪᒥᒃ ᒪᓕᒐᓕᐅᕐᕕᖕᒥ ᓄᓇᕗᒻᒧᑦ, ᔫ ᐃᓄᒃ ᓄᓇᓕᖕᒥᓗ ᐱᔨᑦᑎᕋᕐᓂᕐᒧᑦ ᐱᑎᑦᑎᔨᓄᑦ, ᐃᓚᐅᓪᓗᑎᒃ ᐃᓗᐊᖅᓴᐃᔨᑦ, ᐃᓱᒪᓕᕆᔨᑦ, ᐃᓄᓕᕆᔨᑦ, ᐃᖅᑲᑐᐃᔨᒧᑦ ᑎᓕᔭᐅᓯᒪᔪᓄᑦ ᑎᑎᕋᖅᑎᖓᓄᑦ ᐊᒻᒪᓗ, ᒪᒃᑯᒃᑐᓄᑦ ᑲᑎᒪᔨᕋᓛᓄᑦ. ᑯᕆᔅᑕ ᐊᒻᒪ ᑕᐃᕕᑦ ᖁᔭᓕᔪᒃ ᑐᙵᓱᒃᑎᑕᐅᑦᑎᐊᓚᐅᕐᓂᕐᒥᓂᒃ ᓄᓇᓕᐅᔪᓂ ᓂᕆᐅᓕᕇᕐᖢᑎᒃᓗ ᑭᖑᓪᓕᕐᒥ ᐅᐸᒍᑎᕝᕕᒃᓴᖏᓐᓄᑦ!