2017−ᒥ ᐅᓂᒃᑳᓯ, ᓂᐱᓯ ᓵᓚᒃᓴᕋᓱᒃᑐᓂᒃ ᓵᓚᒃᓴᖅᑐᑦ ᐅᖃᐅᓯᐅᔪᑦ!


ᐃᖃᓗᐃᑦ, ᓄᓇᕗᑦ – ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᐃᔨ ᐅᐱᒍᓱᒃᖢᑎᒃ ᑐᓴᖅᑕᐅᑎᑦᑎᕗᑦ 2017−ᒥ ᓵᓚᒃᓴᓚᐅᖅᑐᓂᒃ ᐊᕐᕌᒍᑕᒫᑦ ᐱᓕᕆᐊᖑᔪᒥᒃ, ᐅᓂᒃᑳᑦ, ᓂᐲᑦ ᓵᓚᒃᓴᕋᓲᑕᐅᔪᒥᒃ. ᓵᓚᒃᓴᕋᓲᑕᐅᔪᖅ ᐅᔾᔨᕆᔭᐅᓕᖅᑎᑦᑎᓂᐊᖅᐳᖅ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᓇᓗᓇᐃᖅᓯᔾᔪᑕᐅᓪᓗᓂᓗ ᑲᓇᑕᒥ ᓄᑕᖅᑲᑦ ᐅᓪᓗᖓᓐᓂ, ᖁᕕᐊᓲᑕᐅᖏᓐᓇᖃᑦᑕᓕᖅᑐᖅ ᐊᕐᕌᒍᑕᒫᑦ ᓄᕕᐱᕆ 20−ᐅᓕᕌᖓᑦ. ᐱᓕᕆᐊᖑᓂᐊᖅᑐᖅ ᑕᒪᑐᒪᓂ ᐊᕐᕌᒍᒥ ᓵᓚᒃᓴᕋᓱᒃᑐᓂᒃ ᐅᓇᐅᓚᐅᖅᐳᖅ “ᐱᙳᐊᕈᓐᓇᕐᓂᖅ/ᐱᖃᑦᑖᕈᓐᓇᕐᓂᖅ” ᐊᒻᒪ ᐃᓕᓐᓂᐊᕐᕕᖕᒥ ᐃᓕᓐᓂᐊᕐᕕᐊᕈᓯᕐᓂ ᓄᓇᕘᒥ ᐃᓚᐅᔪᓐᓇᖅᑎᑕᐅᓚᐅᖅᐳᑦ. ᐃᓕᓐᓂᐊᕐᕕᐊᕈᓯᕐᒦᑦᑐᑦ ᐊᒥᐊᖅᓯᒪᔪᒥᒃ/ᒥᖑᐊᖅᓯᒪᔪᓂᒃ ᓇᒃᓯᐅᔾᔨᖁᔭᐅᓚᐅᖅᐳᑦ ᐱᔾᔪᑎᓕᖕᓂ ᑕᒪᑐᒪᓂ ᐊᕐᕌᒍᒥ ᐱᔾᔪᑕᐅᔪᒥ.