ᒪᒃᑯᒃᑐᑦ ᓂᐱᖏᑦ ᑐᓴᖅᑕᐅᕗᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ ᐊᒡᓚᒡᕕᖓᓂ ᕿᒥᕐᕈᓂᐅᔪᒥᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᓱᒪᓕᕆᓂᕐᒧᑦ ᐱᔨᑦᑎᕋᕈᑎᐅᔪᓂᑦ ᓄᓇᕘᒥ


ᐱᕙᓪᓕᐊᔪᑦ ᓴᖅᑭᑕᑦ
ᓴᖅᑭᑕᐅᑲᐅᑎᒋᒋᐊᓕᒃ

ᒪᒃᑯᒃᑐᑦ ᓂᐱᖏᑦ ᑐᓴᖅᑕᐅᕗᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ ᐊᒡᓚᒡᕕᖓᓂ ᕿᒥᕐᕈᓂᐅᔪᒥᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᓱᒪᓕᕆᓂᕐᒧᑦ ᐱᔨᑦᑎᕋᕈᑎᐅᔪᓂᑦ ᓄᓇᕘᒥ ᐃᖃᓗᐃᑦ, ᓄᓇᕗᑦ – ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐊᒡᓚᒡᕕᖓᑕ (RCYO) ᐃᖅᑲᓇᐃᔭᖅᑎᖏᑦ ᑐᓴᕈᒪᓯᒪᔪᑦ ᒪᒃᑯᒃᑐᓂᑦ ᓄᓇᕘᑉ ᓄᓇᓕᖏᓐᓂ ᐅᖃᐅᓯᒃᓴᖏᓐᓂᒃ ᐃᓱᒪᓕᕆᓂᕐᒧᑦ ᐱᔨᑦᑎᕋᐅᑎᐅᔪᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ.

ᐅᑐᐱᕆ 2017-ᒥ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐊᒡᓚᒡᕕᖓ ᑐᓴᐅᒪᑎᑦᑎᓚᐅᖅᑐᑦ ᕿᒥᕐᕈᐊᕐᓂᐊᕐᓂᖏᓐᓂᒃ ᑖᒃᑯᓂᖓ ᐱᔨᑦᑎᕋᐅᑎᐅᔪᓂᑦ ᑕᐃᒪᐃᓐᓂᖓᓄᓪᓗ ᕿᒥᕐᕈᓂᐅᑉ ᐃᓚᒋᓪᓗᓂᐅᒃ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐊᒡᓚᒡᕕᖓᑕ ᐃᖅᑲᓇᐃᔭᖅᑎᖏᑦ ᑲᔪᓯᑎᑦᑎᓯᒪᔪᑦ ᐊᐱᖅᓱᕐᓂᐅᔪᓂᑦ ᒪᒃᑯᒃᑐᓄᑦ ᐃᓕᓐᓂᐊᕐᕕᐅᔪᓂ ᕿᑎᕐᒥᐅᓂ, ᑭᕙᓪᓕᕐᒥ, ᐊᒻᒪ ᕿᑭᖅᑖᓗᖕᒥ. ᐅᓪᓗᒥᒧᑦ ᑎᑭᓪᓗᒍ, 140 ᐅᖓᑖᓄᑦ ᐊᐱᖅᓱᕈᑏᑦ ᐱᔭᕇᖅᑕᐅᓯᒪᔪᑦ ᒪᒃᑯᒃᑐᓄᑦ ᓄᓇᕗᒻᒥᐅᓄᑦ.

ᑖᒃᑯᐊ ᐊᐱᖅᓱᕈᑏᑦ ᐱᕕᖃᖅᑎᑦᑎᔪᑦ ᒪᒃᑯᒃᑐᑦ ᓂᐱᖏᑦ ᑐᓴᖅᑕᐅᓂᐊᕐᒪᑕ ᐱᔨᑦᑎᕋᐅᑎᓄᑦ ᐊᒻᒪ ᐱᓕᕆᐊᒃᓴᓄᑦ ᒪᒃᑯᒃᑐᓂ ᐊᒃᑐᐃᓂᖃᓪᓚᕆᒃᑐᓂ. “ᒪᒃᑯᒃᑐᑦ ᖃᐅᔨᒪᑦᑎᐊᕐᒪᑕ ᑭᓱᒥ ᐱᒋᐊᖃᕐᒪᖔᑦ ᐃᓅᓯᖏᓐᓂ ᐊᒻᒪ ᓂᐱᖏᑦ ᐃᓱᒪᒋᔭᐅᓗᐊᕙᖏᒻᒪᑕ,” ᐅᖃᖅᑐᖅ ᓯᐊᕆ ᒪᒃᓂᐅᓪ-ᒧᓚᒃ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ. “ᐊᒡᓚᒡᕕᑦᑕ ᓯᕗᓪᓕᐅᔾᔩᓐᓇᓲᖑᒻᒪᒍ ᐃᓚᐅᑎᑦᑎᓂᕐᒥᑦ ᒪᒃᑯᒃᑐᑦ ᓂᐱᖏᓐᓂ ᐱᓕᕆᐊᕆᔭᑦᑎᓐᓂ ᐊᒻᒪ ᑖᓐᓇ ᕿᒥᕐᕈᐊᕐᓂᐅᔪᖅ ᒪᒃᑯᒃᑐᑦ ᓂᐱᖏᑦ ᑐᙵᕕᒋᔭᐅᓂᐊᖅᑐᑦ.”

ᓄᓇᓖᑦ ᐅᐸᑦᑕᐅᖃᑦᑕᓚᐅᖅᑐᑦ ᓂᕈᐊᖅᑕᐅᓚᐅᖅᑐᑦ ᑖᒃᑯᓄᖓ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ ᐊᒡᓚᒡᕕᖓᓄᑦ ᓲᖃᐃᒻᒪ ᐊᕝᕙᓪᓗᐊᕆᒻᒪᕆᑦ ᒪᒃᑯᒃᑐᓂᑦ ᐊᑐᓂ ᐊᕕᒃᑐᖅᓯᒪᓂᐅᔪᓂ. “ᑐᓴᐅᒪᓇᓱᐊᕐᓂᖅ ᐱᖓᓱᓂᑦ ᐊᕕᒃᑐᖅᓯᒪᔪᓂ ᐱᒻᒪᕆᐅᓘᒻᒥᔪᖅ ᕿᒥᕐᕈᐊᕐᓂᕆᔭᑦᑎᓐᓄᑦ ᐃᑲᔪᕐᓂᖃᑐᐃᓐᓇᕆᐊᖃᕐᒪᑦ ᓇᓗᓇᐃᖅᓯᓂᕐᒥᑦ ᑖᒃᑯᐊ ᐊᕕᒃᑐᖅᓯᒪᔪᑦ ᐊᔾᔨᒌᙱᓐᓂᖃᕐᒪᖔᑦ,” ᐅᖃᖅᑐᖅ ᒪᒃᓂᐅᓪ−ᒧᓚᒃ.

ᒪᒃᑯᒃᑐᑦ ᓂᐱᖏᑦ ᐃᓚᒃᑲᓐᓂᕐᓗᒋᑦ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐊᒡᓚᒡᕕᐊ ᑭᒃᑯᑐᐃᓐᓇᕐᓂ ᑐᓴᕈᒪᖕᒥᔪᑦ ᐃᓱᒪᓕᕆᓂᕐᒧᑦ ᐱᔨᑦᑎᕋᕐᓂᐅᔪᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓄᓇᕘᒥ. ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃ ᑲᔪᖏᖅᓴᐃᕗᑦ ᓄᓇᕗᒻᒥᐅᓕᒫᓂᑦ 16 ᐅᖓᑖᓄᑦ ᐅᑭᐅᓕᖕᓂ, ᐅᕗᖓᕐᓗᑎ www.rcynu.ca ᐅᕝᕙᓘᓐᓃᑦ ᐊᒡᒐᒡᕕᖕᒧᑦ ᐊᑭᖃᙱᑦᑐᒧᑦ ᐅᖄᓚᓗᑎ 1-855-449-8118 ᐊᐱᖅᓱᕈᑎᒥ ᐱᔭᕇᖅᓯᓂᕐᒧᑦ.

ᑐᑭᓯᒋᐊᒃᑲᓂᕈᒪᒍᕕᑦ:
ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᖃᑎᒌᒃᑐᓕᕆᓂᕐᒧᑦ ᑭᒃᑯᑐᐃᓐᓇᕐᓄᓪᓗ ᐅᔾᔨᕈᓱᓕᖅᑎᑦᑎᓂᖅ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ ᑎᑎᕋᕐᕕᖓ
867-975-5091
kfoster@rcynu.ca

-30-