ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐊᓪᓚᕝᕕᖓ ᓴᖅᑭᑎᑦᓯᔪᖅ ᐅᓂᒃᑳᕐᒥᑦ ᐃᓱᒪᓕᕆᓂᕐᒧᑦ ᐱᔨᑦᓯᕋᕐᓂᕐᒧᑦ ᒪᒃᑯᑦᑐᓄᑦ ᓄᓇᕗᒻᒥᐅᓄᑦ


Report Banner Image - Inuktitut

ᐱᕙᓪᓕᐊᔪᑦ ᓴᖅᑭᑕᑦ
ᒪᐃ 22, 2019

ᐃᖃᓗᐃᑦ, ᓄᓇᕗᑦ - ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᓪᓚᕝᕕᖓ (RCYO) ᐱᔭᕇᖅᓯᔪᑦ ᐅᓂᒃᑳᖓᓐᓂᑦ ᐃᓱᒪᓕᕆᓂᕐᒧᑦ ᐱᔨᑦᓯᕋᕐᓂᕐᒧᑦ ᒪᒃᑯᑦᑐᓄᑦ ᓄᓇᕗᒻᒥᐅᓄᑦ. ᐅᓪᓗᒥ, ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᓪᓚᕝᕕᖓ ᓴᖅᑭᑎᑦᓯᓂᐊᖅᑐᖅ ᐅᓂᒃᑳᖓᓐᓂᑦ, ᐃᓱᒪᕗᑦ ᐊᑑᑎᖃᓪᓚᕆᖅᑐᖅ: ᒪᒃᑯᑦᑐᓂᑦ- ᑐᓴᐅᒪᑎᑦᓯᓂᕐᒧᑦ ᕿᒥᕐᕈᓂᖅ ᐃᓱᒪᓕᕆᓂᕐᒧᑦ ᐱᔨᑦᓯᕋᕐᓂᕐᒧᑦ ᒪᒃᑯᑦᑐᓄᑦ ᓄᓇᕗᒻᒥᐅᓄᑦ.

ᐅᓂᒃᑳᒥᑦ, ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᓪᓚᕝᕕᖓ ᑐᓂᓯᔪᑦ 15-ᓂ ᐊᑐᓕᖁᔭᐅᔾᔪᑎᓂᑦ ᒐᕙᒪᒃᑯᓐᓄᑦ ᓄᓇᕗᒻᒥ. ᑖᓐᓇ ᐅᓂᒃᑳᖅ ᓇᓗᓇᐃᖅᓯᒻᒥᔪᖅ ᐊᓪᓚᕝᕕᐅᑉ ᖃᐅᔨᓴᕐᓂᕐᒧᑦ ᐱᓕᕆᔾᔪᓯᖓᓂᑦ, ᖃᐅᔨᔾᔪᑎᖏᓐᓂᑦ, ᓇᓗᓇᐃᔭᐃᓂᐊᕐᒧᓪᓗ ᓂᐱᖃᕐᓂᖏᓐᓄᑦ ᒪᒃᑯᑦᑐᑦ ᓄᓇᕗᒻᒥᐅᑦ ᐃᓱᒪᒋᔭᖏᓐᓂᓪᓗ ᖃᓄᖅ ᐱᐅᓯᕚᓪᓕᑎᑦᓯᓂᕐᒧᑦ ᐃᓱᒪᓕᕆᓂᕐᒧᑦ ᐊᑐᖅᑕᐅᖃᖅᑕᖅᑐᓂᑦ ᐊᑲᐅᓂᖅᓴᒃᑯᑦ ᐃᑲᔫᑎᒋᔪᓐᓇᖅᑕᖏᓐᓂᑦ.

"ᐅᖃᐅᓯᐅᓯᒪᔪᖅ ᑎᑎᕋᖅᓯᒪᓂᓕᒻᒥᑦ 24 ᐊᒻᒪᓗ 39 ᓯᓚᕐᔪᐊᓕᒫᒥ ᑲᑎᒪᕕᔾᔪᐊᕐᓂᕐᒧᑦ ᐱᔪᓐᓇᐅᑎᖃᕐᓂᕐᒧᑦ ᓄᑕᖅᑲᐃᑦ, ᐃᓘᓐᓇᑎᓪᓗ ᓄᑕᖅᑲᐃᑦ ᒪᒃᑯᑦᑐᓪᓗ ᐱᔪᓐᓇᕐᓂᖃᕐᒪᑕ ᓈᒻᒪᑦᑐᓂᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᓚᒋᔭᐅᓗᑎᒃ ᐃᓱᒪᓕᕆᔭᐅᓂᕐᒧᑦ, ᒐᕙᒪᒃᑯᓪᓗ ᐃᑲᔪᖅᑐᕆᐊᖃᕐᓂᖏᓐᓂᑦ ᑖᒃᑯᓇᖓ ᐱᔪᓐᓇᐅᑎᓂᑦ" ᐅᖃᖅᑐᖅ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ, ᓯᐅᓕ ᒪᒃᓃᕈ-ᒧᓚᒃ.

ᐱᐅᔫᑎᓪᓗᒋᑦ ᐱᓕᕆᐊᖑᕙᓪᓕᐊᔪᒪᔪᑦ ᐊᖏᖅᓯᒪᓂᖃᖅᑐᓪᓗ ᑭᒃᑯᑐᐃᓐᓇᐃᑦ ᐱᓕᕆᐊᖃᖅᑐᑦ ᐊᑐᐃᓐᓇᐅᑎᑦᓯᓂᕐᒧᑦ ᐃᓱᒪᓕᕆᓂᕐᒧᑦ ᐱᔨᑦᓯᕋᕐᓂᕐᒥᑦ ᒪᒃᑯᑦᑐᓄᑦ ᓄᓇᕗᒻᒥ, ᒫᓐᓇᐅᔪᖅ ᐊᑐᖅᑕᐅᖃᑦᑕᖅᑐᖅ ᓈᒻᒪᖏᒻᒪᑦ ᑲᔪᓯᓂᖃᑦᓯᐊᕋᓂᓗ ᐱᔭᕆᐊᓕᖏᓐᓂᑦ ᓄᓇᕗᒻᒥ ᓄᑕᖅᑲᐃᑦ ᒪᒃᑯᑦᑐᐃᓪᓗ. "ᓂᕆᐅᒋᔭᖃᕈᓐᓇᖏᓐᓇᑦᑕ ᖃᓄᐃᓕᖓᓕᖅᑎᑕᐅᔪᓂᑦ ᐊᓯᔾᔨᕐᓂᐊᕐᓂᖏᓐᓄᑦ ᐊᖏᖅᓯᒪᓂᖃᕐᓂᕐᒧᑦ ᑮᓇᐅᔭᓕᐅᕋᓱᐊᕐᓂᐅᔪᓄᑦ ᐋᖅᑭᒋᐊᕆᓂᕐᒧᓪᓗ ᖃᓄᖅ ᐃᑲᔪᖅᑐᕐᓂᕐᒥᑦ ᐃᓱᒪᓕᕆᓂᕐᒧᑦ ᐱᔭᕆᐊᓕᓐᓂᑦ ᒪᒃᑯᑦᑐᓄᑦ ᓄᓇᕗᒻᒥᐅᓄᑦ," ᐅᖃᖅᑐᖅ ᒪᒃᓃᕈ-ᒧᓚᒃ. ᑖᓐᓇ ᓯᕗᓪᓕᖅᐹᖅ ᕿᒥᕐᕈᓂᐅᔪᖅ ᑲᒪᒋᔭᐅᔪᖅ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᓪᓚᕝᕕᖓᓄᑦᐱᕙᓪᓕᐊᔪᓕᕆᔨᓂᑦ ᑲᑎᖃᑎᖃᕐᓂᖅ ᐅᓂᒃᑳᒥᑦ ᓴᖅᑭᑎᑦᓯᓂᕐᒧᑦ ᑲᔪᓯᑎᑕᐅᓂᐊᖅᑐᖅ ᐅᓪᓗᒥ ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᓪᓚᕝᕕᖓᓂᑦ ᒥ 10:30-ᒧ ᐅᓪᓛᒃᑯᑦ

###

ᑐᑭᓯᒋᐊᒃᑲᓂᕈᒪᒍᕕᑦ:

ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᔪᓕᕆᓂᖕᓄᑦ ᑭᒃᑯᓕᒫᓄᓪᓗ ᐅᔾᔨᖅᓱᐃᑎᑦᑎᓂᖕᒧᑦ 
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ
867-975-5091 | kfoster@rcynu.ca