ᐃᓄᒋᐊᓂᒃ ᑭᒡᒐᖅᑐᐃᓲᖑᔪᒍᑦ


ᓛᓐᓂᒃᑯᑦ ᐊᒥᓱᑦ ᒪᒃᑯᒃᑐᑦ ᑖᔅᓱᒥᖓᔅᓴᐃᓐᓇᖅ ᐃᓱᒪᒋᔭᒃᓴᒥᒃ ᐃᓱᒫᓘᑎᒥᒡᓘᓐᓃᑦ ᐱᓕᕆᐊᖃᓲᖑᕗᑦ. ᑕᒪᒃᑯᐊ ᑕᐃᓲᕆᔭᕗᑦ “ᐊᖏᓂᖅᓴᐅᓂᕋᖅᖢᑎᒍᑦ” ᐃᓱᒪᒋᔭᒃᓴᐅᕙᒃᑐᑦ ᑭᒃᑯᓕᒫᓅᖓᔪᑦ.

ᐃᓄᒋᐊᓂᒃ ᐃᓱᒪᒋᔭᒃᓴᐅᓲᑦ:

  • ᐊᒃᑐᐃᔾᔪᑕᐅᓲᑦ ᐊᒥᓱᓄᑦ ᓄᑕᖅᑲᓄᑦ ᐅᕝᕙᓘᓐᓃᑦ ᒪᒃᑯᒃᑐᓄᑦ
  • ᓴᖅᑭᒐᔪᒃᑐᑦ ᒐᕙᒪᒃᑯᑦ ᐊᑐᐊᒐᖏᑦ ᐱᓕᕆᐊᕆᕙᒃᑕᖏᓪᓗ ᐃᖏᕐᕋᑦᑎᐊᙱᑦᑕᕌᖓᑕ
  • ᐃᒃᓯᖕᓇᖅᑕᐅᒃᐸᑦ ᓴᖅᑭᒃᑲᓐᓂᑐᐃᓐᓇᕆᐊᖃᕐᒪᑦ
  • ᐃᒪᓐᓇᐅᑎᑦᑎᑐᐃᓐᓇᕆᐊᓕᒃ ᑲᑐᔾᔨᖃᑎᒌᒡᕕᖕᒥ ᐊᑐᐊᒐᖏᑦ ᐊᓯᔾᔨᖅᓱᖅᑕᐅᓗᑎᒃ, ᐱᓕᕆᐊᖏᑦ ᐅᕝᕙᓘᓐᓃᑦ ᒪᓕᒐᓕᐊᕆᓯᒪᔭᖏᑦ

ᐃᓄᒋᐊᓂᒃ ᑭᒡᒐᖅᑐᐃᔾᔪᑎᕗᑦ ᐱᒋᐊᓲᖑᕗᖅ ᖃᐅᔨᔭᕌᖓᑦᑕ “ᖃᓄᐃᓕᐅᖅᑕᐅᓯᒪᔪᑦ ᑕᐅᑐᙳᐊᕈᓐᓇᖅᓯᔭᕌᖓᑦᑎᒍᑦ” ᐃᓱᒪᒋᔭᒃᓴᓂᒃ. ᐃᓱᒪᒋᔭᒃᓴᐅᑐᐃᓐᓇᕆᐊᖃᖅᐳᖅ ᓴᖅᑭᑕᐅᓂᑰᓗᓂ ᓄᓇᕗᒻᒥ ᒪᓕᒐᓕᐊᖑᓯᒪᔪᓂᒃ ᐅᕝᕙᓘᓐᓃᑦ ᑐᓴᐅᒪᔪᓕᕆᔾᔪᑎᑦᑎᓐᓂ. ᐃᓱᒪᒋᔭᒃᓴᐅᑐᐃᓐᓇᕆᐊᖃᖅᐳᖅ ᑕᑯᒐᔪᒡᓗᑎᒍᑦ ᐃᓄᑐᐊᓂᒃ ᑭᒡᒐᖅᑐᐃᓕᕌᖓᑦᑕ. ᐃᓱᒫᓘᑎᓖᑦ ᒪᒃᑯᒃᑐᑦ ᐊᒻᒪ ᐃᓐᓇᐃᑦ ᐃᓱᒪᒋᔭᒃᓴᓂᒃ ᖃᐅᔨᑎᑦᑎᔪᓐᓇᕐᒥᔪᑦ ᐅᕙᑦᑎᓐᓄᑦ.

ᐃᓱᒪᓕᐅᕆᔭᕌᖓᑦᑕ ᐋᖅᑭᒃᑕᐅᓯᒪᙱᑦᑐᓂᒃ ᐋᖅᑭᒃᑕᐅᓯᒪᔪᓂᒡᓗ ᐃᓄᒋᐊᓄᑦ ᑭᒡᒐᖅᑐᐃᔾᔪᓯᕐᓂᒃ. ᐋᖅᑭᒃᑕᐅᓯᒪᙱᑦᑐᑦ ᑭᒡᒐᖅᑐᐃᔾᔪᓰᑦ ᐊᑐᓪᓗᐊᑕᓲᖑᓪᓗᑎᒃ ᐅᖃᐅᓯᐅᔪᑦ ᒪᓕᒃᑕᐅᓪᓗᑎᒃ ᑲᑐᔾᔨᖃᑎᒌᒍᑕᐅᔪᓪᓗ ᖃᓄᐃᓕᐅᕐᓗᑕ ᐊᓯᔾᔨᖅᓱᕈᓐᓇᕐᒪᖔᑕ ᖃᐅᔨᓇᓱᒃᐸᒃᖢᑎᒍᑦ. ᐋᖅᑭᒃᑕᐅᓯᒪᔪᑦ ᐃᓄᒋᐊᓄᑦ ᐱᓕᕆᐊᑦ ᐱᔭᕆᑐᓂᖅᓵᓘᓪᓗᑎᒃ. ᐋᖅᑭᒃᑕᐅᓯᒪᔪᑦ ᐃᓄᒋᐊᓅᖓᔪᑦ ᕿᒥᕐᕈᔭᐅᓯᒪᔪᑦ ᐅᓂᒃᑲᐅᓯᕐᓂᒃ ᑎᑎᕋᖅᓯᒪᔪᑦ ᑐᕌᖓᑎᑕᐅᕙᒃᖢᑎᒃ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ. ᑎᑎᕋᕐᕕᑦᑎᓐᓂᓪᓕ ᓂᕈᐊᓲᖑᓪᓗᑎᒃ ᐃᓱᒪᒋᔭᐅᔪᒃᓴᓂᒃ ᕿᒥᕐᕈᔭᐅᔪᑦ ᐃᓄᖕᓅᖓᔪᑦ ᐅᓂᒃᑳᓂᒃ.