ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᑦ ᐊᒡᓚᕝᕕᐊᓂ ᐱᖓᔪᖓᓐᓂ ᐊᕐᕌᒍᓕᒫᒧᑦ ᐅᓂᒃᑳᓯ, ᓂᐱᓯ ᓵᓚᒃᓴᖅᑎᑦᑎᓇᓱᓚᐅᖅᐳᑦ 2017−ᒥ ᐅᑭᐊᒃᓵᒃᑯᑦ. ᓵᓚᒃᓴᕋᓱᒍᑕᐅᖃᑦᑕᖅᑐᖅ ᐃᑲᔫᑕᐅᓲᖑᕗᖅ ᐅᔾᔨᕆᔭᐅᓕᖅᑎᖦᖢᒋᑦ ᓄᑕᖅᑲᑦ ᐱᔪᓐᓇᐅᑎᖏᑦ ᓇᓗᓇᐃᖅᓯᔾᔪᑕᐅᓪᓗᓂᓗ ᑲᓇᑕᒥ ᓄᑕᖅᑲᑦ ᐅᓪᓗᖓᓐᓂ, ᖁᕕᐊᓲᑕᐅᓲᖅ ᐊᕐᕌᒍᑕᒫᑦ ᓄᕕᐱᕆ 20−ᐅᓕᕌᖓᑦ.
ᐱᔾᔪᑕᐅᔪᖅ ᑕᒪᑐᒪᓂ ᐊᕐᕌᒍᒥ ᓵᓚᒃᓴᕋᓱᒃᑐᓂᒃ ᐅᓇᐅᓚᐅᖅᐳᖅ “ᐱᙳᐊᕈᓐᓇᕐᓂᖅ/ᐱᖃᑦᑖᕈᓐᓇᕐᓂᖅ” ᐊᒻᒪ ᐃᓕᓐᓂᐊᕐᕕᖕᒥ ᐃᓕᓐᓂᐊᕐᕕᐊᕈᓯᕐᓂ ᓄᓇᕘᒥ ᑐᙵᓱᒃᑎᑕᐅᓚᐅᖅᐳᑦ ᐃᓚᐅᔪᓐᓇᖅᑎᑕᐅᓪᓗᑎᒃ. ᐃᓕᓐᓂᐊᕐᕕᐊᕈᓯᕐᒦᑦᑐᑦ ᐊᒥᐊᖅᓯᒪᔪᒥᒃ/ᒥᖑᐊᖅᓯᒪᔪᓂᒃ ᓇᒃᓯᐅᔾᔨᖁᔭᐅᓚᐅᖅᐳᑦ ᐱᔾᔪᑎᓕᖕᓂ ᑕᒪᑐᒪᓂ ᐊᕐᕌᒍᒥ ᐱᔾᔪᑕᐅᔪᒥ.
ᑕᒪᑐᒪᓂ ᐊᕐᕌᒍᒥ ᓵᓚᒃᓴᖅᑐᑦ ᐅᑯᐊᖑᓚᐅᖅᐳᑦ:
- ᐃᓕᓐᓂᐊᓕᓵᖅᑐᓂᒃ ᐃᓕᓐᓂᐊᕈᑎᓕᖕᓄᑦ 3-ᒧᑦ: la classe de première année de l’École des Trois-Soleils ᐃᖃᓗᖕᓂ
- ᐃᓕᓐᓂᐊᕈᑎᓕᖕᓄᑦ 4−ᒥ – 7−ᒧᑦ: E7 ᐃᓕᓐᓂᐊᕈᑎᓕᑦ 6 ᐃᓕᓐᓂᐊᕐᕕᐊᕈᓯᕐᒥ ᓇᑦᑎᓕᒃ ᐃᓕᓐᓂᐊᕐᕕᒃ ᑕᓗᕐᔪᐊᓂ
- ᐃᓕᓐᓂᐊᕈᑎᓕᖕᓄᑦ 8−ᒥ – 12−ᒧᑦ: ᐃᓕᓐᓂᐊᕈᑎᓕᑦ 9 ᐃᓕᓐᓂᐊᕐᕕᐊᕈᓯᖅ ᕿᑭᖅᑕᖅ ᐃᓕᕼᐊᕐᕕᒃ ᐅᖅᓱᖅᑑᒥ
ᓵᓚᒃᓴᖅᑐᑦ ᐃᓕᓐᓂᐊᕐᕕᐊᕈᓯᑦ ᓵᓚᒃᓴᐅᓯᐊᒥᓂᒃ ᓂᕈᐊᓚᐅᖅᐳᑦ ᐅᖃᖃᑎᖄᓪᓚᓚᐅᖅᖢᑎᒃ ᐊᒡᓚᕝᕕᑦᑎᓐᓂ.
ᐃᓚᐅᓚᐅᖅᑐᓕᒫᑦ ᖁᔭᒋᔭᐃᓐᓇᕆᕙᕗᑦ! ᐊᕐᕌᒍᑦᑕᐅᖅ!
ᖁᕕᐊᓲᑎᒋᒃᑲᓐᓂᕐᓗᒍ ᑲᓇᑕᒥ ᓄᑕᖅᑲᑦ ᐅᓪᓗᖓ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᑉ ᐊᒡᓚᕝᕕᐊᓂ (RCYO) ᐃᓚᐅᑲᑕᖕᓂᐊᖅᑐᑦ ᖃᔅᓯᑲᓪᓚᖕᓂ ᓄᓇᓕᖕᓂ ᒪᒃᑯᒃᑐᓕᕆᔨᑦ ᑲᓇᑕᓕᒫᒥ ᓈᓚᐅᑎᒃᑯᑦ ᐅᖃᐅᓯᒃᓴᕆᔭᐅᓂᐊᖅᑐᑦ ᐱᒋᐊᖅᑎᑕᐅᔪᑦ CJRU 1280AM The Scope at Ryerson ᓯᓚᑦᑐᖅᓴᕐᕕᒡᔪᐊᕐᒥ. ᓈᓚᐅᑎᒃᑰᖅᑎᓪᓗᒋᑦ ᐅᖃᐅᓯᖃᕐᓂᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᐊᒻᒪ ᓄᓇᕗᒻᒥ ᐱᓕᕆᐊᖑᔪᖅ ᑲᒪᒋᔭᖃᕐᓂᐊᖅᖢᑎᒃ ᐃᓕᖅᑯᓯᖅᑎᒍᑦ ᐱᔪᓐᓇᕐᓂᕆᔭᐅᔪᓂᒃ (Nunavut-broadcast.mp3).
ᐅᑯᐊ ᐊᐱᖅᓱᖅᑕᐅᓂᐊᖅᑐᑦ ᐅᓘᑎ ᑲᕕᐅᖅ, ᐊᖓᔪᖅᑳᖅ ᑲᓇᑕᒥ ᐃᓄᖕᓄᑦ ᒪᒃᑯᒃᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐊᒻᒪ ᑕᐃᕕᑦ ᖁᐊᕋᖅ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᑉ ᐊᒡᓚᕝᕕᐊᓂ ᑭᒡᒐᖅᑐᐃᔨᒃᑯᑦ ᖃᐅᔨᒪᔨᑕᖓ, ᐊᒻᒪᓗ ᐃᙱᖅᑎᑦ/ᐃᙱᐅᓯᐅᖅᑎ ᑲᓕ ᕗᕋᐃᓱ ᐊᒻᒪ ᐃᓄᒃᓱᒃ ᕿᓚᐅᔾᔭᖅᑎᑦ.