ᐱᒋᐊᕈᑎᕗᑦ


ᖏᕐᕋᓂᕆᔭᐅᔪᖅ ᐋᖅᑭᒃᑕᐅᓇᓱᒃᑎᓪᓗᒍ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᑦ ᓄᓇᕘᒥ ᐅᖃᐅᓯᖃᕐᒪᑦ ᖃᔅᓯᑲᓪᓛᓗᖕᓄᑦ ᐱᔪᒃᓯᔪᓄᑦ ᓄᓇᕗᒥᐅᓄᑦ!

1999-ᖑᑎᓪᓗᒍ ᓄᓇᕘᖃᓕᓚᐅᖅᓯᒪᕗᖅ. ᓱᓕ 1999-ᖑᑎᓪᓗᒍ, ᑕᐱ ᒍᕋᐃ, ᐃᖃᓗᒃᑑᑦᑎᐊᒥ ᐃᓕᓴᐃᔨ, ᓯᕗᓪᓕᖅᐸᐅᓪᓗᓂ ᐱᓕᕆᐊᖃᖅᐸᓪᓕᐊᓕᓚᐅᖅᓯᒪᕗᖅ ᓄᓇᕘᒥ ᐊᕕᒃᑐᖅᓯᒪᔪᒥᒃ ᓄᑕᖅᑲᓄᑦ ᑭᒡᒐᖅᑐᐃᓂᕐᒥᒃ. ᐃᓱᒪᓚᐅᖅᓯᒪᖕᒪᑦ ᐃᓄᑐᐊᓄᑦ ᑭᒡᒐᖅᑐᖅᑎᑕᖃᖅᐸᑦ ᐃᑲᔪᕈᓐᓇᕋᓱᒋᓪᓗᓂᐅᒃ ᒐᕙᒪᒃᑯᓐᓄᑦ ᓈᒻᒪᒃᓯᓕᕈᑕᐅᓗᓂ ᓄᑕᖅᑲᓄᑦ ᐊᔾᔨᒋᔭᐅᙱᑦᑐᑦ ᑭᙴᒪᕙᒃᑕᖏᓐᓄᑦ.

ᑕᐃᔅᓱᒪᓂᐅᑎᓪᓗᒍ, ᒪᐃᔭᐅᓚᐅᖅᓯᒪᔪᖅ ᐃᖃᓗᒃᑑᑦᑎᐊᒧᑦ, ᑮᑦ ᐲᑕᓴᓐ, ᐊᑯᓂᐅᙱᑦᑐᖅ ᓴᖅᑭᓚᐅᖅᓯᒪᒋᓪᓗᓂᐅᒃ ᐃᓄᖕᓄᑦ. ᑭᐅᔭᐅᓚᐅᖅᓯᒪᔪᑦ, ᓄᓇᕗᑦ ᒐᕙᒪᒃᑯᑦ ᓄᑖᖑᑎᓪᓗᒋᑦ ᑕᒪᑐᒥᖓ ᐃᓱᒪᓕᐅᕆᕙᓪᓕᐊᓕᓚᐅᖅᓯᒪᕗᑦ 2000-ᖑᑎᓪᓗᒍ. ᐊᖏᓚᐅᖅᓯᒪᖕᒪᑕ ᓄᑕᖅᑲᑦ ᑲᒪᒋᔭᐅᑦᑎᐊᕆᐊᖃᕐᓂᖏᓐᓂᒃ ᐃᑲᔪᖅᑕᐅᑦᑎᐊᕆᐊᖃᕐᓂᖏᓐᓂᒡᓗ. ᑭᓯᐊᓂ ᐃᕐᖐᓐᓇᖅ ᐃᓛᒃᑰᖅᑐᒥᒃ ᑎᑎᕋᕐᕕᒃᑖᕈᓐᓇᓚᐅᖅᓯᒪᙱᒻᒪᑕ.

ᐊᕐᕌᒍᓄᑦ 9-ᓄᑦ, ᑭᖑᓂᖔᖓᒍᑦ ᒐᕙᒪᒃᑯᑦ ᑖᒃᑯᓂᖓ ᐱᔾᔪᑎᖃᖅᖢᑎᒃ ᐱᓕᕇᓐᓇᓕᓚᐅᖅᓯᒪᕗᑦ. ᓄᑕᖅᑲᓄᑦ ᐱᓕᕆᕝᕕᒃᓴᒥᒃ ᓴᖅᑭᑦᑐᖃᓚᐅᖅᓯᒪᓪᓗᓂ. ᑖᒃᑯᐊ ᒐᕙᒪᒃᑯᑦ ᐱᓕᕆᔨᐅᖃᑎᒌᑦ ᐱᕈᖅᐹᓪᓕᓚᐅᖅᓯᒪᕗᑦ ᐃᓚᓕᐅᔾᔨᓯᒪᓕᖅᖢᑎᒃ NGO-ᒃᑯᓐᓂ ᖃᐅᔨᒪᔭᐅᓕᖅᖢᑎᒡᓗ ᓄᓇᕗᒻᒥ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓴᖅᑭᑦᑐᒃᓴᒫᖑᓕᕐᓂᖓᓂᒃ.

ᑕᐃᔅᓱᒪᓂᐅᑎᓪᓗᒍ, 2009-ᒥ, ᒐᕙᒪᒃᑯᑦ, ᑕᐃᔅᓱᒪᓂ ᐄᕙ ᐋᕆᐊᒃ ᓯᕗᓕᖅᑎᐅᑎᓪᓗᒍ, ᓴᖅᑭᑦᑎᓚᐅᖅᓯᒪᕗᑦ ᑕᒪᑉᑕ ᑎᓕᓯᔾᔪᑕᐅᔪᓂᒃ (2009-ᒥ 2013-ᒧᑦ). ᑖᓐᓇ ᑎᑎᖅᑲᖅ ᓇᓗᓇᐃᖅᓯᔾᔪᑕᐅᓪᓗᓂ ᓴᖅᑭᑕᐅᓚᐅᖅᓯᒪᓂᖓᓂᒃ ᐃᓄᑐᐊᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᐱᓕᕆᐊᕆᔭᐅᓪᓗᐊᑕᓕᖅᖢᓂᓗ. ᑖᓐᓇ ᐊᓪᓗᕐᓂᕐᔪᐊᕌᓘᓚᐅᖅᓯᒪᕗᖅ ᓯᕗᒻᒧᑦ. ᓄᓇᕗᑦ ᒐᕙᒪᒃᑯᑦ ᑐᑭᓯᓇᖅᓯᑎᑦᑎᓚᐅᖅᐳᑦ ᓴᖅᑭᑦᑎᓛᓕᕐᓂᖏᓐᓂᒃ ᐃᓄᑐᐊᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᓴᒥᒃ.

ᑖᓐᓇ ᓯᕗᓪᓕᐅᖁᔭᐅᓯᒪᓪᓗᓂ ᓇᓗᓇᐃᖅᑕᐅᕌᓂᒃᓯᒪᓕᕐᒪᑦ, ᒐᕙᒪᓕᕆᔨᒃᑯᑦ ᐃᖏᕐᕋᓯᑎᑦᑎᓚᐅᖅᓯᒪᕗᑦ ᑲᑎᒪᔨᕋᓛᓂᒃ ᐊᔾᔨᒌᙱᑦᑐᓂᒃ ᒐᕙᒪᒃᑯᑦ ᐱᓕᕆᕝᕕᖏᓐᓂᙶᖅᑐᓂᒃ ᐊᓯᖏᓐᓂᒡᓗ ᐱᑖᖃᑕᐅᓯᒪᔪᓂᒃ, ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐃᓚᐅᓪᓗᓂ.

ᐅᓄᖅᑐᐃᖅᓱᒻᒪᕆᐊᓗᒃᖢᑎᒃ ᑲᑎᒪᖃᑦᑕᓚᐅᖅᓯᒪᕗᑦ ᐃᓄᖕᓂᓪᓗ ᑐᓴᕋᓱᒃᐸᒃᖢᑎᒃ. ᐱᓕᕆᖃᑎᒋᔭᐅᕙᒃᖢᑎᒃ ᑐᑦᑕᕐᕕᒃᑯᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᔾᔪᑎᖃᖅᖢᑎᒃ ᑲᑎᒪᔨᓂᒃ, ᒪᒃᑯᒃᑐᓕᕆᔨᓂᒃ, ᐊᓯᖏᓐᓂᒡᓗ ᑲᓇᑕᒥᐅᑕᓂᒃ ᒪᒃᑯᒃᑐᓂᒃ ᑭᒡᒐᖅᑐᐃᔨᓂᒃ ᑎᑎᕋᕐᕕᓕᖕᓂᒃ, UNICEF ᑲᓇᑕᒥᐅᑦ, ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐊᔾᔨᒋᙱᑦᑐᓂᒡᓗ ᐃᖅᑲᓇᐃᔭᖅᑎᓂᒃ ᐱᔨᑦᑎᕋᖅᑎᓂᒃ ᐊᒻᒪ ᐃᓄᖕᓂᒃ.

2012-ᖑᑎᓪᓗᒍ, ᑎᑎᕋᖅᑕᐅᒋᐊᕐᖓᖅᖢᓂ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᑦ ᐱᖁᔭᖅ ᐱᐊᓂᒃᑕᐅᓚᐅᖅᓯᒪᓪᓗᓂ. ᐊᕐᕌᒍᑐᐃᓐᓇᖅᑎᓪᓗᒍ, ᓯᑎᐱᕆ 17, 2013-ᒥ, ᓄᑕᖅᑲᓄᒃ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓄᑦ ᐱᖁᔭᖅ ᐊᓂᒍᖅᑎᑕᐅᓚᐅᖅᓯᒪᓪᓗᓂ ᓄᓇᕗᒻᒥ ᒪᓕᒐᓕᐅᕐᕕᖕᒥ. ᔫᓂ 16, 2014-ᒥ, ᓄᓇᕗᒻᒥ ᓯᕗᓪᓕᖅᐹᖑᓪᓗᓂ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑖᓚᐅᖅᓯᒪᕗᑦ, ᓯᐅᕆ ᒪᒃᓃᐅᓪ-ᒧᓚᒃ, ᑎᒃᑯᐊᖅᑕᐅᓚᐅᖅᓯᒪᔪᖅ. ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᑦ ᒪᒃᐱᖅᑕᐅᓪᓚᕆᓛᖅᑐᑦ ᐹᖏᑦ ᓯᑎᐱᕆ 30, 2015-ᒥ.

1999 ᐊᒻᒪ 2015 ᐊᑯᓐᓂᖓᓂ, ᓄᓇᕗᒥᐅᑕᒐᓴᑦ - ᒐᕙᒪᒃᑯᑦ ᓯᕗᓕᖅᑎᖏᓐᓂᒃ ᐊᒻᒪ ᐃᖅᑲᓇᐃᔭᖅᑎᖏᓐᓂᒃ ᐃᓚᒋᔭᐅᔪᓪᓗ ᐃᓄᐃᑦ - ᐱᔪᒃᓯᑦᑎᐊᖅᖢᑎᒃ ᐱᓕᕆᓚᐅᖅᓯᒪᕗᑦ ᐃᑲᔪᖅᓱᐃᑦᑎᐊᓚᐅᖅᓯᒪᓪᓗᑎᒡᓗ ᑎᑎᕋᕐᕕᒃᓴᓕᐅᖅᐸᓪᓕᐊᓛᓕᖅᑎᓪᓗᒋᑦ ᑎᑎᕋᕐᕕᒃᑖᓵᑦᑎᓐᓄᑦ. ᐅᓄᓗᐊᕐᓂᑯᒧᑦ ᐊᑎᓕᒫᕌᓗᐃᑦ ᑕᕝᕗᖓ ᑎᑎᕋᕈᓐᓇᙱᓐᓇᑦᑎᒍᑦ ᑖᒃᑯᓄᖓ ᑎᑎᕋᖅᓯᒪᔪᓄᑦ. ᑭᓯᐊᓂ, ᐃᓚᖏᑦ ᐱᓕᕆᐊᒃᓴᓪᓗᐊᑕᑦ ᑲᑐᔾᔨᖃᑎᒌᕝᕖᓪᓗ ᐃᓚᐅᕝᕕᐅᓚᖅᓯᒪᓪᓗᑎᒃ ᒪᓕᒐᓕᐅᖅᑎᓂᒃ ᑮᑦ ᐲᑕᓴᓐ, ᐅᓖᐱᑲ ᕕᓕᐊᒻᔅ, ᕌᓐ ᐃᐊᓕᐊᑦ ᐊᒻᒪ ᔮᓂ ᓂᖏᐅᖓᓐ; ᐳᕆᓐᑕ ᔮᓐᑭ; ᐃᐅᓪᕗᑦ ᔮᓐᓴᓐ; ᑕᐃᕕᑎ ᔭᓄᕈᓪ, ᓄᓇᕗᒻᒥ ᑲᑎᒪᔩᑦ ᕼᐋᒻᒪᓚᒃᑯᓐᓄᑦ, ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ.

ᐱᓕᕆᖃᑎᒌᒃᑕᕗᑦ ᐱᑯᒍᓱᑦᑎᐊᐳᑦ ᑭᖑᓂᑦᑎᓐᓂ ᐱᓕᕆᓯᒪᕐᔪᖅᑐᑦ ᐆᒻᒪᐃᓯᒪᓂᖏᓐᓂ ᑕᒪᔅᓱᒥᖓ.