ᐃᖅᑲᓇᐃᔭᖅᑎᕗᑦ


 

ᖁᓛᓂ ᑎᑎᕋᖅᓯᒪᔪᑦ ᐅᖃᐅᓯᖃᖅᐳᑦ ᐊᑖᓂ ᑎᑎᕋᖅᓯᒪᔪᓂᒃ.

ᒪᕐᒥᑦᑎᐊᖅ ᐃᖅᑲᓇᐃᔭᖅᑎᕗᑦ ᑭᒡᒐᖅᑐᐃᔨᐅᔪᑦ ᑲᑐᔾᔨᖃᑎᒌᒡᕕᑦᑎᓐᓂ: ᑐᙵᓇᖅᑐᑦ, ᐱᓕᕆᖃᑎᖃᑦᑎᐊᓲᑦ ᐃᑲᔪᖅᓱᐃᑦᑎᐊᖅᐸᒃᖢᑎᒡᓗ. ᑖᓐᓇ ᐱᓕᕆᔾᔪᓯᖅ ᖃᐅᔨᒪᔾᔪᑎᒋᓲᕗᑦ ᖃᓄᐃᓕᐅᕐᓗᑕ ᐱᓕᕆᖃᑎᒌᒍᓐᓇᕐᒪᖓᑦᑕ ᖃᓄᐃᓕᐅᖅᖢᑕᓗ ᓄᑕᖅᑲᓂᒃ ᐱᓕᕆᖃᑎᖃᓲᖑᖕᒪᖔᑦᑕ, ᒪᒃᑯᒃᑐᓂᒡᓗ ᖃᑕᙳᑎᖏᓐᓂᒡᓗ. ᐊᐅᓚᑕᐅᔪᐃᓐᓇᐅᔪᒍᑦ ᒪᒃᑯᒃᑐᑦ ᓄᓇᕗᒥᐅᑕᑦ ᐅᒃᐱᕆᓂᑦᑎᓐᓄᑦ ᓂᕆᐅᒃᐳᒍᓪᓗ ᓯᕗᓂᒃᓴᖃᑦᑎᐊᓛᖁᓪᓗᑎᒍᑦ.  

ᐃᓱᒪᔪᒪᓲᖑᖕᒥᒐᑦᑕ ᐃᓱᒪᒋᔭᑦᑕ ᐅᖓᑎᓗᐊᒃᑲᓐᓂᖓᓄᑦ ᐱᓕᕆᑎᑦᑎᑯᓘᔭᓕᖅᐸᒃᖢᑕᓗ!  ᑕᐃᒪᐃᓐᓂᖓᓄᑦ ᐅᕙᑦᑎᑦᑕ ᒥᒃᓵᓄᑦ ᑎᑎᕋᑐᐃᓐᓇᙱᖦᖢᑕ, ᐊᓯᑦᑕ ᒥᒃᓵᓄᑦ ᑎᑎᕋᖔᑲᑕᓕᓚᐅᖅᐳᒍᑦ.  ᐊᓕᐊᓇᐃᒍᓱᑦᑎᐊᖅᖢᑕ ᓴᖅᑭᓐᓂᐊᓕᖅᑕᕗᑦ ᐃᖅᑲᓇᐃᔭᖅᑎᑦᑎᐊᕙᒻᒪᕆᐊᓗᒃᐳᑦ!

ᓯᐅᕆ ᒪᒃᓃᐅᓪ-ᒧᓚᒃ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ

ᓯᐅᕆ ᐅᖃᓪᓚᓕᕌᖓᑦ, ᐅᖃᐅᓯᖓ ᓇᑭᙶᕐᒪᖔᑦ ᐃᓕᑕᕐᓇᐅᑎᖃᕐᓂᖓᓂᒃ ᐅᔾᔨᕆᓇᔭᖅᑕᑦ. “H’-ᒥᒃ” ᐱᒋᐊᕐᓂᓖᑦ ᖃᓅᔭᑭᐊᖅ ᐅᖃᓲᕆᖕᒪᒋᑦ. ᑭᓯᐊᓂ ᓲᖃᐃᒻᒪ Cape Breton-ᒥᐅᑕᐅᓐᓂᕈᕕᑦ ᐅᔾᔨᕆᓇᔭᙱᑕᑦ. ᑕᐅᕙᓂᕐᒥᐅᑕᐅᓐᓂᕈᕕᑦ ᐅᖃᐅᓯᖓ ᐋᓪᓚᐅᖕᒪᖔᑦ ᐅᔾᔨᕆᓇᔭᙱᑦᑎᐊᕋᓗᐊᖅᑕᑦ.

ᓄᑕᕋᐅᑎᓪᓗᒍ, ᓯᐅᕆ ᐊᖅᑯᑎᐊᓗᒃᑯᑦ ᐱᓲᑎᒥᓄᑦ (ᕚᓯᑰ) ᐃᖏᕐᕋᔭᒃᐸᓚᐅᖅᓯᒪᕗᖅ ᓄᓇᒥᓂ New Waterford ᓴᓇᑦᑕᐃᓕᒃᑯᓪᓗ/ᓈᑦᑏᖑᔭᒃᑯᑦ ᐃᑦᑐᒃᑯᒥᓂ ᓂᖏᐅᒃᑯᒥᓂᓯᐅᖅᐸᓚᐅᖅᖢᓂ ᐃᓛᓗᖏᓐᓃᖃᑕᐅᓪᓗᓂ, ᑕᐃᒃᑯᓇᓃᒃᐸᒃᑎᓪᓗᒍ ᐆᓇᖅᑐᐊᐃᓐᓄᖕᒥ ᑏ-ᒥᒃ ᓂᐅᖅᑲᕈᓐᓇᖅᓯᓚᐅᖅᓯᒪᕗᖅ. ᐱᕈᖅᓴᑎᓪᓗᒍ ᐊᓈᓇᒥᓂ ᐊᑦᑕᖕᒥᓂᒡᓄ/ᐊᕐᓇᕐᕕᖕᒥᓂᒃ ᐊᔭᐅᖅᑐᐃᕙᓚᐅᖅᓯᒪᕗᖅ ᓄᑕᖅᑲᑦ ᓄᑲᖅᖡᓪᓗ ᐱᔪᓐᓇᐅᑎᖏᓐᓂᒃ ᑐᓴᖅᑕᐅᑎᓐᓇᓱᒃᐸᒃᖢᓂᒋᑦ ᓄᓇᖅᑲᑎᒥᓄᑦ ᑖᒃᑯᐊᓗ ᐃᑲᔪᖅᓱᐃᖃᑦᑕᓚᐅᕐᓂᖏᓐᓄᑦ ᐱᒃᑯᒋᑦᑎᐊᖅᖢᓂᒋᑦ ᑭᒡᒐᖅᑐᐃᔪᒪᑎᓪᓗᒍ ᐃᑲᔪᖅᑐᖅᑕᐅᑦᑎᐊᖃᑦᑕᓚᐅᖅᓯᒪᖕᒪᑦ.

ᖃᐅᔨᓴᖅᑐᓕᕆᔨᐅᓂᕐᒧᑦ ᐃᓱᒪᓕᕆᓂᕐᒥ ᑭᖑᓂᐊᒍᓪᓗ ᐊᓂᒍᐃᓚᐅᖅᓯᒪᒋᓪᓗᓂ ᐃᓕᑕᕆᔭᐅᔾᔪᑎᑖᖅᖢᓂᓗ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᐅᓚᑦᑎᔨᐅᓂᕐᒥᒃ.  2004-ᖑᑎᓪᓗᒍ, ᓯᐅᕆ ᐃᖃᓗᖕᓄᑦ ᓅᓚᐅᖅᓯᒪᕗᖅ ᓄᓇᕗᑦ ᒐᕙᒪᒃᑯᓐᓄᓪᓗ ᐃᖅᑲᓇᐃᔭᖅᑎᐅᓪᓗᓂ ᐊᕐᕌᒍᓄᑦ ᖁᓕᓄᑦ. 2014-ᒥ, ᓄᓇᕗᒻᒥ ᓯᕗᓪᓕᖅᐸᐅᓪᓗᓂ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᙳᓚᐅᖅᓯᒪᕗᖅ. ᖃᑯᒍᙳᖅᑎᓪᓗᒍᑭᐊᖅ ᐹᓪ ᐱᖃᑎᑖᕆᓚᐅᖅᓯᒪᕙᐅᒃ ᐅᐃᑖᕆᓪᓗᓂᐅᒡᓗ. ᒫᓐᓇ ᐱᖓᓱᓂᒃ ᕿᑐᕐᖓᖃᓕᖅᑑᒃ: ᓱᕖᐊ, ᐃᐊᓕᐊᑦ ᐊᒻᒪ ᐅᓘᐱ.

ᓯᐅᕆ ᖃᓄᑐᐃᓐᓇᖅ ᐱᒻᒪᕆᐅᔪᓂᒃ ᐱᕐᔪᐊᓂᒡᓗ ᖃᐅᔨᓯᒪᕈᓗᔭᖅᑐᖅ.  ᑭᓯᐊᓂ ᐃᓚᐃᓐᓇᖏᓐᓂᒃ ᐅᖃᐅᓯᖃᖅᓯᒪᔪᖅ. ᓄᓇᕗᑦ ᖁᕕᐊᒋᑦᑎᐊᖅᑕᖓ; ᑲᔾᔮᕐᓇᕐᓂᖓ ᐊᒻᒪ ᓄᓇᖅᑲᑎᒌᑦ ᐃᓅᖃᑎᒌᑦᑎᐊᕈᓐᓇᕐᓂᖏᑦ. ᐱᔪᒃᓯᔪᓂᒃ ᐱᓕᕆᐊᖑᔪᑦ ᓴᖅᑭᑉᐸᓪᓕᐊᑎᓪᓗᒋᑦ ᐊᓕᐊᓇᐃᒋᑦᑎᐊᓲᖓ ᐊᒃᓱᕈᖅᖢᑎᒡᓗ ᐱᓕᕆᔪᑦ. ᐅᒃᐱᕈᓱᖕᒪᑦ ᓄᑕᖅᑲᑦ ᐱᕈᑦᑎᐊᒃᑲᐅᓂᖅᐹᖑᓂᖏᓐᓂᒃ ᓇᒡᓕᒋᔭᐅᑦᑎᐊᕌᖓᑕ ᐃᑲᔪᖅᑕᐅᑦᑎᐊᕌᖓᑕᓗ ᐃᓚᖏᓐᓄᑦ. ᖃᐅᔨᒪᒋᓪᓗᓂ ᑕᒪᒃᑯᐊ ᐱᓯᑏᑦ ᐃᓄᑐᐃᓐᓇᐅᖕᒪᑕ ᐱᓕᕆᐊᒥᓂᒃ ᐱᓕᕆᑐᐃᓐᓇᖅᖢᑎᒃ, ᖃᓄᑐᐃᓐᓇᖅ ᐊᒃᓱᕈᕐᓇᖅᑐᓂᒃ ᓴᖅᑭᑦᑐᖃᕈᓘᔭᖅᐸᒃᑲᓗᐊᖅᑎᓪᓗᒍ. 

 

ᔭᕗᕆ ᑯᕋᔅ
ᑲᒪᔨᒻᒪᕆᒃ

ᔭᕗᕆ ᖃᐅᓱᐃᑦᑐᕐᒥ ᐱᕈᖅᓴᓚᐅᖅᓯᒪᔪᖅ ᐊᒻᒪ (ᐅᐱᒋᔭᖃᑦᑎᐊᖅᑐᖅ) ᑭᖑᕚᖃᕐᓂᖓᓂᒃ ᐃᓄᖕᒥᒃ ᐊᒻᒪ ᐋᕝᕆᑲᒥᐅᑕᒥᒃ. ᔭᕝᕆᐅᑉ ᐊᓈᓇᖓ ᐊᖑᓇᓱᒃᑎᓪᓚᕆᐊᓗᓚᐅᖅᓯᒪᔪᖅ. ᐊᓈᓇᒥᑎᑐᑦ, ᐊᐅᓪᓚᖅᓯᒪᔭᕆᐊᒃᓴᖅ ᖁᕕᐊᒋᑦᑎᐊᕐᒥᔭᖓ ᐊᖑᓇᓱᒋᐊᕐᓂᕐᒥᒡᓗ. ᑭᓯᐊᓂ, ᐃᖃᓗᒐᓱᖕᓂᖅ ᖁᕕᐊᒋᓗᐊᙱᑕᖓ (ᔭᕝᕆᒥ ᐊᔾᔨᓕᐅᖅᓯᒪᔪᖅ 

ᔭᕝᕆ ᖃᐅᓱᐃᑦᑐᒥ ᐊᐅᓪᓚᓚᐅᖅᓯᒪᕗᖅ 18-ᓂᒃ ᐅᑭᐅᖃᓕᖅᑎᓪᓗᒍ ᐅᐊᐃᑦᕼᐅᐊᔅ-ᒧᑦ ᐱᕋᔭᒃᑐᓕᕆᓂᕐᒥ ᐃᓕᓐᓂᐊᕆᐊᖅᖢᓂ ᔫᑳᓐᒥ ᓯᓚᑦᑐᖅᓴᕐᕕᖕᒥ. ᐃᓕᑕᕆᔭᐅᔾᔪᑎᑖᕇᖅᓯᒪᓕᕐᒪᑦ, ᔭᕝᕆ ᐃᖃᓗᖕᓄᑦ ᓅᓚᐅᖅᓯᒪᕗᖅ. ᑕᐃᒪᙵᓂ, ᐃᖅᑲᓇᐃᔮᖃᓕᓚᐅᖅᓯᒪᕗᖅ ᓄᓇᓕᖕᓂ ᐱᔨᑦᑎᕋᖅᑎᐅᓪᓗᓂ ᓄᓇᕗᑦ ᒐᕙᒪᒃᑯᑦ ᐃᓄᓕᕆᔨᒃᑯᓐᓄᑦ.

ᔭᕝᕆ ᐊᑕᐅᓯᕐᒥᒃ ᐸᓂᓕᒃ, ᐅᖃᐅᓯᕆᓲᖓ ᐃᓚᒥᓄᑦ ᐃᓱᒪᒃᑭᙳᖅᓴᔭᐅᓗᐊᕐᓂᖓᓂᒃ. ᑕᐃᒪᐃᓐᓂᖓᓄᓪᓗ ᐃᓕᓴᕋᓱᓲᖓ ᐃᓅᓯᑦᑎᐊᕙᖕᒥᒃ. ᖃᑕᙳᑎᒌᑦ ᐱᒻᒪᕆᐅᒋᖕᒪᒋᑦ ᔭᕝᕆᐅᑉ ᑕᐃᒪᐃᓐᓂᖓᓄᑦ ᓇᖕᒥᓂᖅ ᐃᓚᑯᓗᖏᑦ ᑲᒪᒋᑦᑎᐊᕋᓱᖃᑦᑕᖅᑕᖏᑦ. ᐊᖑᓇᓱᖕᓂᖅᑐᑦᑕᐅᖅ ᖁᕕᐊᒋᔭᖃᕆᓪᓗᓂ ᕚᔅᑭᑦᕚᓪ, ᕗᕆᔅᐱ-ᒥᒃ ᐃᒋᑦᑎᑲᑕᒃᑐᓂᒃ ᐊᑯᖅᓯᑲᑕᒃᑐᓂᒡᓗ, ᐅᖃᓕᒫᓕᖅᐸᒃᖢᓂᓗ Star Wars ᐱᔭᒃᓴᖃᙱᓗᐊᓕᕌᖓᑦ. 

ᔭᕝᕆ ᑭᒡᒐᖅᑐᐃᔨᐅᓕᓚᐅᖅᓯᒪᕗᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᐊᓂ 2015-ᒥ ᐅᐱᕐᖔᒃᑯᑦ. ᖃᐅᔨᒪᔭᐅᔪᒪᑦᑎᐊᖅᑐᖅ ᑕᒫᓂ ᐃᖅᑲᓇᐃᔭᕐᓂᖓᓂᒃ ᐃᑲᔪᕈᒪᓪᓗᓂᒋᑦ ᓄᑕᖅᑲᑦ ᒪᒃᑯᒃᑐᓪᓗ ᓄᓇᕗᒥᐅᑕᑦ.

 

 

ᓕᓐ ᒫᑦ
ᑐᑭᒧᐊᖅᑎᑦᑎᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᓄᑦ ᐱᔨᑦᑎᕋᖅᑎᓄᑦ -
ᒫᓐᓇᐅᔪᖅ ᓄᑕᕋᒃᓴᖃᕐᓂᕐᒧᑦ ᓄᖅᑲᖓᔪᖅ

ᓕᓐ ᓯᓚᑐᔪᒻᒪᕆᐊᓗᒃ, ᖃᐅᔨᒪᔪᒻᒪᕆᐊᓗᒃ ᐱᓕᕆᐊᒥᓂᒡᓗ ᐊᒃᓱᕉᑎᖃᑦᑎᐊᖅᖢᓂ. ᑎᑎᕋᕐᕕᑦᑎᓐᓂ ᖃᓄᑐᐃᓐᓇᑦᑎᐊᖅ ᐃᑲᔪᖅᑎᒋᓲᕗᑦ! ᓕᓐ ᐃᓅᓚᐅᖅᓯᒪᔪᖅ Azilda-ᒥ, ᐋᓐᑎᐅᕆᐆᒥ ᓄᓇᓕᕋᓛᖅ.  ᑕᐅᕙᓂ ᐱᕈᓚᐅᖅᓯᒪᔪᖅ ᐊᖓᔪᖅᑳᖏᒃ, ᐊᓂᐊᓗ ᐊᒻᒪ ᐃᑦᑐᒃᑯᖏᑦ ᓂᖏᐅᒃᑯᖏᑦ. ᐊᖓᔪᖅᑳᖏᑦ ᐅᐱᒋᑦᑎᐊᖅᑕᖏᑦ ᐃᑲᔪᖅᓱᖅᑕᐅᑦᑎᐊᖅᓯᒪᖃᑦᑕᕐᒪᑦ ᖃᓄᑐᐃᓐᓈᓗᒃ ᐱᓕᕆᐊᕆᓚᐅᖅᓯᒪᙱᑕᒥᓂᒃ ᐱᓕᕆᖃᑕᐅᓇᓱᒃᑎᓪᓗᒍ. 

ᓯᓚᑦᑐᖅᓴᕐᕕᒡᔪᐊᕐᒥ, ᓕᓐ ᐃᓕᓐᓂᐊᓚᐅᖅᓯᒪᕗᖅ ᖃᓪᓗᓈᑐᑦ ᐊᒻᒪ ᐱᐅᓯᓕᕆᔪᓂᒃ. ᐃᓕᑕᕆᔭᐅᔾᔪᑎᑖᓚᐅᖅᓯᒪᔪᖅ Bachelor of Honours ᐊᒻᒪ ᐃᓕᑕᕆᔭᐅᔾᔪᑎᑖᕆᓪᓗᓂ ᓄᓇᕐᔪᐊᕐᒥ ᐃᓕᓐᓂᐊᖅᑕᐅᕙᒃᑐᓂᒃ (International Studies). ᓇᒧᕈᓘᔮᓗᒡᓗ ᐊᐅᓪᓚᖃᑦᑕᖅᓯᒪᓪᓗᓂ ᖃᖓᑕᓲᒃᑯᑦ.  English Castle (ᐃᒡᓗᐸᐅᔮᓗᖕᒥᐅᑕᐅᓚᐅᖅᓯᒪᒋᓪᓗᓂ) ᑭᖑᓂᐊᒍᓪᓗ Memorial ᓯᓚᑦᑐᖅᓴᕐᕕᒡᔪᐊᒧᐊᓚᐅᖅᓯᒪᒋᓪᓗᓂ ᐃᓕᑕᕆᔭᐅᔾᔪᑎᑖᕆᐊᖅᑐᖅᖢᓂ Master of Folklore. ᑖᒃᑯᐊᓗᒃᑖᖅ ᑐᑭᖃᖅᐳᑦ ᓕᓐ ᐅᓂᒃᑳᒃᓴᖃᑦᑎᐊᕐᓂᖓᓂᒃ!

2011-ᖑᑎᓪᓗᒍ ᓕᓐ ᓄᓇᕗᒧᐊᓚᐅᖅᓯᒪᕗᖅ.  ᐅᑭᐅᖅᑕᖅᑐᒥ ᓄᓇᑦᑎᐊᕙᐅᓈᖅᓯᓚᐅᖅᓯᒪᕗᖅ ᐊᒻᒪ, ᑭᐊᕙᓐᒥᒃ ᐅᐃᓱᖃᓕᖅᖢᓂ. ᓕᓐ ᒫᓐᓇ ᐅᐃᖃᓕᖅᑐᖅ ᐅᐃᖓᑕᓗ ᕿᑐᕐᖏᓐᓂᒃ ᒪᕐᕉᓪᓗᑎᒃ ᐊᓈᓇᒋᔭᐅᓕᖅᖢᓂ. ᐱᔭᒃᓴᖃᓗᐊᕈᓐᓃᕌᖓᑦ ᒥᖅᓱᑲᑕᓕᓲᖅ ᐅᕝᕙᓘᓐᓃᑦ ᐅᖃᓕᒫᑲᑕᓕᓲᖅ.

 

ᑯᕆᔅᑕ ᑯᓄᒃ (ᐃᓕᓐᓂᐊᕆᐊᖕᓂᖕᒧᑦ ᕿᑲᕐᓂᖅ)
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᑯᕆᔅᑕᐅᑉ ᐃᖅᑲᓇᐃᔮᓂ ᐃᖅᑲᓇᐃᔮᕆᓪᓗᐊᑦᑎᐊᖅᑕᖓ ᐃᖅᑲᓇᐃᔭᖃᑎᒋᔭᐃᓐᓄᒋᒐᑦᑎᒍᑦ ᐊᒃᓲᕗᖅ! ᐊᔪᕈᓐᓃᑦᑎᐊᓲᖅ ᓄᑕᖅᑲᓂᒃ ᒪᒃᑯᒃᑐᓂᒡᓗ ᐱᓕᕆᖃᑎᖃᕐᓂᐊᓕᕌᖓᑦ ᓇᓗᓇᙱᑦᑎᐊᖅᖢᓂᓗ. 

ᑯᕆᔅᑕ ᕿᑭᖅᑕᕐᔪᐊᕐᒥ ᐃᓅᓚᐅᖅᓯᒪᕗᖅ. ᕕᒃᑑᕆᐊ ᐳᕆᑎᔅ ᑲᓚᒻᐱᐊ-ᒧᑦ ᓅᓚᐅᖅᓯᒪᓪᓗᓂ ᒪᒃᑯᒃᑲᓐᓂᖅᑎᓪᓗᒍ ᑎᒍᐊᖅᓯᖏᑦ ᐊᐅᓪᓚᖃᑎᒋᓪᓗᓂᒋᑦ. ᓄᑕᕋᐅᑎᓪᓗᒍ ᐃᖅᑲᐅᒪᓂᖅᐹᕆᖃᑦᑕᕐᒥᔭᖏᑦ ᐊᓂᖏᓐᓂᒃ ᐊᓃᕋᔭᖃᑎᖃᖅᐸᒃᑎᓪᓗᒍ. ᑯᕆᔅᑕ ᖁᕕᐊᓱᑦᑎᐊᓚᐅᖅᓯᒪᕗᖅ ᐅᑭᐅᖅᑕᖅᑐᒧᑦ ᐅᑎᖅᑎᓪᓗᒍ 1994-ᒥ. ᓲᕐᓗᓕᒎᖅ ᐊᐅᓪᓚᓚᐅᖅᓯᒪᙱᖦᖢᓂ.

ᑯᕆᔅᑕᐅᑉ ᐃᖅᑲᓇᐃᔮᕆᖃᑦᑕᖅᓯᒪᔭᖏᑦ ᐃᓕᓐᓂᐊᕆᐅᖅᓴᔪᓂᒃ ᐊᒻᒪ ᐃᓱᒪᓕᕆᔨᓂᒃ. ᐃᓅᓯᓕᕆᔨᒋᔭᐅᓚᐅᖅᓯᒪᓪᓗᓂ ᓇᑲᓱᒃ ᓄᑲᖅᖡᑦ ᐃᓕᓐᓂᐊᕐᕕᖕᒥ ᐊᕐᕌᒍᓄᑦ 7-ᓄᑦ.  ᐅᖃᐅᓯᐅᕈᓘᔭᖃᑦᑕᖅᓯᒪᔪᖅ ᑭᖑᓂᑦᑎᓐᓂ ᓇᑲᓱᒃ ᐃᓕᓐᓂᐊᕐᕕᖕᒧᑦ ᐃᓕᓐᓂᐊᖅᐸᓚᐅᖅᓯᒪᔪᑦ ᓇᑲᓱᒃ ᐃᓕᓐᓂᐊᕐᕕᖕᒧᑦ ᐅᑎᒃᑲᓐᓂᕈᒪᓇᔭᕐᓂᖏᓐᓂᒃ ᑯᕆᔅᑕᒧᑦ ᐳᓛᕆᐊᑐᐃᓐᓇᑦᑎᐊᕐᓗᑎᒃ. ᐅᐊᑲᓪᓚᖔ, ᐱᕕᒡᔪᐊᕆᔭᐅᔪᑯᓘᖕᒪᑦ ᐊᓕᐊᓇᐃᑦ!

ᑯᕆᔅᑕ ᐅᒃᐱᕈᓱᒃᐳᖅ ᐃᓕᓴᕐᓇᐅᑎᑦ ᐊᒻᒪ ᐃᓕᖅᑯᓯᖅ ᐱᓪᓚᕆᐊᓗᒋᔭᐅᓂᖏᓐᓂᒃ ᒪᒃᑯᒃᑐᓄᑦ ᐃᓄᖕᓄᑦ ᖃᓄᐃᙱᑦᑎᐊᕈᓯᖏᓐᓄᑦ. ᐃᒡᓚᖅᓴᕋᐃᓐᓂᖓ ᑐᓴᖅᑕᐅᒐᔪᒃᐳᖅ ᑎᑎᕋᕐᕕᑦᑎᓐᓂᓕᒫᖅ. ᐃᖅᑲᓇᐃᔭᕈᓐᓃᕌᖓᑦ, ᑯᕆᔅᑕ ᖃᑕᙳᑎᒥᓂ ᐅᐸᒍᑎᓯᒪᓪᓗᓂ ᖁᕕᐊᒋᑦᑎᐊᓲᕆᖕᒥᔭᖓ; ᐅᐃᖓ ᑕᐃᕕᑎ ᐊᒻᒪ ᑭᑐᕐᖓᖏᑦ ᐊᓛᓇ,ᐊᒪᓕ, ᒪᓄ ᐊᒻᒪ ᐲᑕ.

 

ᓈᓯ ᐱᓗᕆᓐ (
ᖃᕋᓴᐅᔭᑎᒎᖓᔪᓂᒃ ᖃᐅᔨᓴᖅᑎᒻᒪᕆᒃ

ᓈᓐᓯ ᓄᓇᓕᕋᓛᓂᒃ ᐱᕈᖅᓴᓂᑯᕕᓂᖅ Trois- Rivières, Québec ᐅᖓᓯᒋᓗᐊᙱᑕᖓᓂᒃ. ᓄᓇᐃᑦ ᐅᐸᓚᐅᖅᓯᒪᙱᑕᖏᑦ ᑕᑯᔭᕆᐅᕈᒪᖃᑦᑕᖅᑕᒻᒪᕆᐊᓗᖏᑦ ᐃᓕᖅᑯᓯᖃᖃᑎᒌᙱᑦᑐᓪᓗ ᓄᓇᕗᒧᐊᓚᐅᖅᓯᒪᕗᖅ 2006-ᖑᑎᓪᓗᒍ. ᐊᑯᓂᐅᙱᑦᑐᖅ ᐃᓅᖃᓐᓂᓈᖅᓯᒐᒥ ᐃᓄᖕᓂᒃ ᐱᐅᒃᓴᓕᓚᐅᖅᑐᖅ, ᓄᓇᖓᓐᓂᒃ ᐊᒻᒪ ᐃᓅᓯᕆᔭᖓᓐᓂᒃ. ᐊᐅᓪᓚᕋᔪᐃᓐᓇᖅᐳᖅ ᓱᓕ ᐅᑭᐅᖅᑕᖅᑐᒦᓕᕋᓗᐊᖅᖢᓂ ᐃᖏᕐᕋᔾᔪᑎᖃᖅᐸᒃᖢᓂ ᓯᑭᑑᒃᑯᑦ, ᖃᔭᒃᑯᑦ, ᐊᐅᓪᓛᖅᓯᒪᓂᒃᑯᑦ ᐊᒻᒪ ᐱᓱᔪᖕᓂᒃᑯᑦ/ᐱᓱᕋᔭᖕᓂᒃᑯᑦ.

ᓈᓐᓯ ᓄᑕᖅᑲᓂᒃ ᐱᓕᕆᖃᑎᖃᖅᖢᓂ ᖁᕕᐊᒋᑦᑎᐊᖅᑕᖓ ᓄᑕᖅᑲᑦ ᐱᓂᕐᓗᒃᑕᐅᖃᑦᑕᖁᙱᖦᖢᓂᒋᑦ ᐃᓕᓐᓂᐊᖅᑕᒥᓂᒃ ᐱᓕᕆᐊᕆᓛᕈᒪᔭᒥᓂᒡᓗ ᐊᔭᐅᖅᑐᐃᔾᔪᑎᖃᑦᑎᐊᖅᑐᖅ. ᐃᓄᓕᕆᔨᒃᑯᓐᓅᖓᔪᒥᒃ ᐃᓕᑕᕆᔭᐅᔾᔪᑎᑖᖅᓯᒪᔪᖅ.  ᐃᓕᑕᕆᔭᐅᔾᔪᑎᖃᖅᑐᖅ ᐃᓕᓐᓂᐊᖅᑎᑦᑎᔪᓐᓇᖅᖢᓂ ᒪᒃᑯᒃᑐᓂᒃ ᐊᒻᒪ ᐃᖅᑲᓇᐃᔭᖅᑎᐅᖃᑎᒥᓂᒃ. ᑕᐃᒃᑯᐊᓗ ᐃᓚᓕᐅᔾᔭᐅᖃᑕᐅᒋᓪᓗᑎᒃ ᐊᑑᑎᓖᑦ ᐃᓅᓯᕐᒥᒃ ᑭᐱᓯᑦᑕᐃᓕᒪᑎᑦᑎᓂᕐᒧᑦ ᐃᓕᓐᓂᐊᖅᓯᒪᔪᑦ (ASIST), ᖃᓄᐃᙱᑦᑎᐊᕐᓗᑎᒃ ᐱᓕᕆᔨᐅᖃᑎᒌᑦ ᐃᓕᓐᓂᐊᖅᑎᑕᐅᔪᑦ, ᐊᒻᒪ ᐱᓂᕐᓗᒃᑕᐅᓲᑦ ᖃᐅᔨᓴᖅᑕᐅᔭᕆᐊᖃᕐᓂᖏᓐᓂᒃ ᐃᓕᓐᓂᐊᖅᑎᑕᐅᔪᑦ.

ᓈᓐᓯ ᐱᙳᐊᖅᑕᐅᕙᒃᑐᓂᒃ ᐱᙳᐊᖃᑕᐅᒃᑲᒻᒪᕆᐊᓗᒃ ᖃᑕᙳᑎᒌᓪᓗ ᐅᓄᖅᓯᕙᓪᓕᐊᑐᐃᓐᓇᖅᖢᑎᒃ ᕿᒻᒥᕐᓂᒡᓗ ᐊᖏᔫᑎᓂᒃ ᐱᐅᒃᓴᖅᑐᒻᒪᕆᐊᓘᓪᓗᓂ.  ᓈᓚᑦᑎᐊᒃᑲᒻᒪᕆᐊᓗᒃ ᐃᓄᐃᓪᓗ ᓂᓪᓕᕈᓐᓇᕐᓂᖏᑦ ᖁᓱᔭᕌᖓᑕᑐᓴᖅᑕᐅᑦᑎᐊᖅᑎᑦᑎᕙᒃᖢᓂ. ᐃᓛᓐᓂᒃᑯᑦ, ᐃᓄᑑᑦᑎᐊᓕᓚᐅᑲᒃᐸᒃᖢᓂ. ᐃᓄᑑᑎᓪᓗᒍ ᓈᒻᒪᖅᑯᖕᓂᕈᖕᓂ, ᐊᒃᓱᕈᙱᐅᔭᕐᓗᓂ ᐅᖃᓕᒫᖅᑐᖅ ᑳᐱᑐᖅᑐᕐᓘᓐᓃᑦ ᑕᑯᓇᔭᖅᑕᒃᓴᕆᕙᔅᓯ.  

 

 

 

 

 

ᓗᕆ ᑲᓐᓇᒃ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒻᒪᕆᒃ

 

ᓘᕆ ᐱᕈᖅᓴᓚᐅᖅᓯᒪᕗᖅ ᑎᒡᐱ, ᓅᕙ ᓯᑯᓯᐊᒥᑦ ᐊᒻᒪ ᑲᖏᖅᖠᓂᕐᒥᑦ, ᓄᓇᕗᒻᒥ. ᓄᑕᕋᐅᑎᓪᓗᒍ, ᐅᑭᐅᖅᑕᖅᑐᒦᖏᑯᑖᓚᐅᖅᖢᓂ ᐊᕐᕌᒍᓄᑦ ᐅᓄᖅᑐᓄᑦ, ᐊᓕᐊᓇᐃᒋᑦᑎᐊᖅᐸᓚᐅᖅᑕᖓ ᐊᑖᑕᑦᑎᐊᒃᑯᒥᓄᑦ ᓂᐅᕐᕈᔭᕌᖓᒥ ᑲᖏᖅᖠᓂᕐᒧᑦ. ᐊᓕᐊᓇᐃᒋᑦᑎᐊᕐᒪᒍ ᐃᓚᔮᒥᓂᒃ ᑲᑎᙵᖃᑎᖃᖅᖢᓂ, ᐅᖃᓪᓚᑲᑕᒃᑐᑦ ᓈᓚᒃᖢᓂᒋᑦ ᐊᒻᒪ ᐅᓂᒃᑳᖅᑐᐊᖅᑐᑦ ᐃᓄᒃᑎᑑᖅᖢᑎᒃ, ᐊᒻᒪ ᖃᓄᐃᓕᐅᕈᓘᔭᖅᐸᒃᖢᑎᒃ ᐃᓚᒌᑦ ᐱᓕᕆᐊᕆᕙᒃᑕᖏᓐᓂᒃ. ᑕᐃᑲᓂ ᐃᒡᓗᒦᑦᑕᕆᐊᒃᓴᖅ ᐃᖢᐊᕆᓂᖅᐹᕆᕙᓚᐅᖅᑕᖓ ᓇᒡᓕᒋᔭᐅᑦᑎᐊᖅᐸᒃᖢᓂᓗ.

ᓘᕆ ᖃᐅᔨᒪᓚᐅᖅᑐᖅ ᐃᓄᖕᓂᒃ ᐃᑲᔪᖅᑕᐅᔭᕆᐊᖃᖅᑐᓂᒃ ᐃᑲᔪᖅᑎᐅᔭᕆᐊᖃᕐᓂᕐᒥᓂᒃ. ᑕᐃᒪᐃᒻᒪᑦ, ᐊᑎᓕᐅᖅᑕᐅᖃᑕᐅᓕᓚᐅᖅᐳᖅ ᐃᓕᑕᕆᔭᐅᔾᔪᑎᑖᖅᖢᓂᓗ ᐃᓄᓕᕆᔨᐅᓂᕐᒧᑦ ᓄᓇᕗᑦ ᓯᓚᑦᑐᖅᓴᕐᕕᖕᒥ. ᐊᕐᕌᒍᓕᒫᖅᑕᐅᖅ ᐊᓂᒍᐃᓚᐅᖅᓯᒪᔪᖅ ᑳᓪᑕᓐ ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪ ᑖᓪᕼᐆᔅ ᓯᓚᑦᑐᖅᓴᕐᕕᒡᔪᐊᕐᒥ ᓄᓇᕐᔪᐊᓕᒫᒥ ᐱᕙᓪᓕᐊᔪᓕᕆᓂᕐᒥᒃ ᐱᔾᔪᑎᖃᓪᓗᐊᑕᖅᖢᓂ.

ᓘᕆ ᒫᓐᓇ ᐊᐃᑉᐸᖃᖅᑐᖅ ᑕᐃᓐᒥᑦ ᕿᒻᒥᖃᖅᖢᑎᒡᓗ ᓵᓐᑎᒥᑦ. ᓵᓐᑎᒥᑦ ᐅᖃᐅᓯᖃᓕᕌᖓᑦ, ᓘᕆ ᖁᖓᔮᖏᓐᓇᐅᔭᖅᑐᖅ. ᓵᓐᑎ ᐃᓱᒪᒃᑭᐅᖅᑰᔨᒃᐸᑦ, ᓲᖃᐃᒻᒪ ᓇᒡᓕᒋᔭᐅᔪᒻᒪᕆᐊᓘᖕᒪᑦ ᓘᕆᒧᑦ ᑕᐃᓐᒧᓪᓗ. ᓘᕆ ᐃᖃᓗᖕᓂ ᐃᓪᓗᖃᕐᒥᔪᖅ, ᒪᕆᐊᒥᑦ, ᓇᔭᒋᖅᑰᔨᑐᐃᓐᓇᖅᖢᓂᐅᒃ. ᒪᕆᐊ ᓘᕆᐅᑉ ᐊᔪᒥᒋᓂᖅᐹᕆᖃᑕᐅᕙᐅᒃ.

ᑎᑎᕋᕐᕕᑦᑎᓐᓄᐊᓚᐅᙱᑎᓪᓗᒍ, ᓘᕆ ᐃᓄᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᐅᓚᐅᖅᓯᒪᔪᖅ. ᐃᒃᐱᒋᑦᑎᐊᖅᑕᖓ ᐊᓯᒥᓂᒃ ᐃᑲᔪᕆᐊᒃᓴᖅ ᐅᖃᖅᖢᓂᓗ ᐊᓯᖏᓐᓂᒃ ᖁᕕᐊᒋᔭᖃᕐᓂᖅᓴᐅᙱᒻᒪᑦ ᐃᓄᖕᓂᒃ ᐃᑲᔪᖃᑦᑕᑐᐊᕈᓂ ᐃᓅᓯᖃᑦᑎᐊᓕᒃᑲᓐᓂᖁᓪᓗᒋᑦ.   


ᑕᐃᕕᑎ ᖁᐊᕋᖅ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᐅᔪᒻᒪᕆᒃ

ᑕᐃᕕᑎ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᐃᖃᓗᐃᑦ, ᓄᓇᕗᒻᒥ ᐊᒻᒪᓗ ᓱᕈᓯᐅᓪᓗᓂ ᖁᕕᐊᒋᓂᖅᐹᕆᓯᒪᔭᖓ ᐃᓕᓐᓂᐊᕆᐊᓕᓵᖅᑐᓄᑦ ᐃᓕᓐᓂᐊᕐᕕᒻᒥ ᐃᓕᓐᓂᐊᖅᑎᐅᓪᓗᓂ ᐊᒻᒪᓗ ᕿᑎᕋᓕᖅᑐᓄᑦ ᐃᓕᓐᓂᐊᖅᑎᐅᓪᓗᓂ.  ᐊᖏᔪᑦᑎᐹᖅ 7ᓂᑦ ᓱᕈᓯᕐᓂᑦ, ᑕᐃᕕᑎ ᓄᑕᖃᓄᑦ ᒪᒃᑯᑦᑐᓄᓪᓗ ᐱᓕᕆᔭᕆᐊᑦᓴᖅ ᐊᔪᖏᑦᑎᐊᖅᑐᖅ.

ᑕᐃᕕᑎ ᖁᕕᐊᒋᔭᓕᒃ ᐊᖅᓴᓂᕐᒥᑦ ᐊᕿᓂᕐᒥᓪᓗ, ᐊᓯᖏᓐᓂᓪᓗ ᐊᓪᓕᕋᓕᓐᓂᑦ ᐱᙳᐊᕈᑎᓂᒃ (ᓵᓚᑦᓴᕋᓱᒋᐊᑦᓴᖅ ᖁᕕᐊᒋᔭᖃᒻᒪᕆᑦᑐᖅ − ᒪᑭᒋᐊᖃᑦᑕᓂᑦ ᐋᕿᑦᓱᕆᐊᓕᓐᓂᓪᓗ).  ᒪᒃᑯᑑᓪᓗᓂ, ᑕᐃᕕᑎ ᒪᕐᕈᐃᖅᓱᖅᑐᓂ ᐅᑭᐅᖅᑕᖅᑐᒥᑦ ᐱᙳᐊᕕᔾᔪᐊᖅᑐᓂᑦ ᐃᓚᒋᔭᐅᓯᒪᔪᖅ.  ᐱᙳᐊᖅᑐᓂᑦ ᐃᓚᒋᔭᖃᑦᑕᕋᒥ ᐊᐅᐴᑕᒨᓚᐅᖅᓯᒪᒻᒥᔪᖅ ᐊᒻᒪᓗ ᓂᐅ ᕙᐅᓐᓛᓐᒧᑦ. ᑕᐃᕕᑎ ᐊᐅᓪᓚᖃᑦᑕᖅᓯᒪᔪᖅ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖏᓐᓄᑦ ᐊᒻᒪᓗ ᑲᓇᑕᒥᑦ ᖃᓪᓗᓈᑦ ᓄᓇᖓᓄᑦ, ᐅᐸᓚᐅᖅᓯᒪᖏᑕᑐᐊᖏᑦ ᓂᐅ ᐳᕋᓐᓱᐃᒃ ᐊᒻᒪᓗ ᐳᕆᔅ ᐃᕗᐊᑦ ᕿᑭᖅᑕᖓᓄᑦ.  ᒫᓇᖃᑖᕈᓗᒃ, ᑕᐃᕕᑎ ᐊᐅᓚᖃᑦᑕᕆᐊᑦᓴᖅ ᖁᕕᐊᒋᔭᖃᒻᒪᕆᑦᑐᖅ ᐊᒻᒪᓗ ᓱᓇᑐᐃᓐᓇᓂᑦ ᓄᑖᓂᑦ ᐊᑐᖅᑕᐅᒐᔪᓗᐊᖏᑦᑐᓂᑦ ᖁᕕᐊᒋᔭᖃᕐᒥᔪᖅ ᐋᔅᑐᕋᓕᐊᒦᖃᑕᓚᐳᕐᒥᔪᖅ, ᐊᕐᕌᒎᓐᓂᒃ ᒪᕐᕉᓂᒃ ᓄᓇᖃᑲᐃᓐᓇᓚᐅᖅᑐᖅ.

ᑕᐃᕕᑎ ᐊᓪᓚᕕᑦᑎᓐᓂᑦ ᑎᑎᕋᕐᕕᖓᓂᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐱᓕᕆᖃᑕᐅᓂᖓ ᐃᓚᒋᔭᐅᓂᐊᕐᓂᕆᓕᖅᑕᖓ ᖁᕕᐊᒋᔭᕗᑦ ᓯᕗᓕᖅᑎᑦᓴᒃᑯᑎᒍᑦ ᐱᔭᕇᓯᒪᔪᖅ.

 

 

ᑲᐃᑎ ᑎᑦᕼᐊᒻ
ᖃᕋᓴᐅᔭᑎᒎᖓᔪᓂᒃ ᖃᐅᔨᓴᖅᑎᒻᒪᕆᒃ

ᑲᐃᑎ ᐱᕈᓚᐅᖅᑐᖅ ᑲᐃᑉ ᐳᕆᑕᓐ, ᓅᕙ ᓯᑰᓯᐊᒥᑦ ᐱᖓᓱᓂᒃ ᐊᕐᓇᓂᒃ ᖃᑕᖑᑎᓕᒃ, ᐱᖓᓱᓂᒃ ᐊᓂᖃᖅᖢᓂ ᐊᒻᒪᓗ ᐊᒥᓱᐊᓄᓐᓂᑦ ᐃᓪᓗᖃᐅᖅᑐᑦ ᐊᖑᑎᖃᑎᖏᓪᓗ.  ᐃᖃᐅᒪᓗᐊᖑᐊᑕᖓ ᐊᑖᑕᑦᓯᐊᖓᑕ ᐱᕈᓰᕕᖓᓂᒃ ᐃᑲᔪᖃᑦᑕᓚᐅᕐᓂᕐᒥᓂᒃ ᖃᑕᙳᑎᓂ ᐃᓚᓂᓗ ᐃᑲᔪᖅᑎᒋᓪᓗᓂᒋᑦ.

ᐃᓕᓐᓂᐊᕐᕕᐊᓗᒻᒥᑦ ᐱᔭᕇᕋᒥ, ᑲᐃᑎ ᐃᓕᓐᓂᐊᕆᐊᑲᓐᓂᓚᐅᖅᑐᖅ ᐆᒪᔪᓕᕆᓂᕐᒧᑦ ᖁᕝᕙᓯᓐᓂᖅᓴᒧᑦ ᓴᐃᑦ ᕗᕋᔅᓯᔅ (Saint Francis Xavier University) ᓯᓚᖅᑐᖅᓴᕐᕕᔾᔪᐊᖓᓄᑦ.  ᑲᐃᑎ ᓇᒧᑐᐃᓐᓈᖃᑦᑕᕆᐊᑦᓴᖅ ᖁᕕᐊᒋᔭᖃᕋᒥ ᓄᓇᕗᒻᒧᑦ ᑎᑭᖃᑦᑕᖅᓯᒪᔪᖅ ᐊᐅᔭᒃᑯᑦ  2001 , 2002 ᐊᒻᒪᓗ 2003ᒥ.  ᐅᑭᐅᖅᑕᖅᑐᒥᑦ ᖁᕕᐊᒋᔭᖃᕋᒥ ᐃᖃᓗᓐᓂᑦ ᐊᖏᕐᕋᖃᓕᖅᑐᖅ 2004ᒥᓂᑦ. ᑲᐃᑎ ᐃᓄᓕᕆᓂᕐᒧᑦ ᖁᕝᕙᓯᓐᓂᖅᓴᒥᑦ ᐃᓕᓐᓂᐊᕐᓂᖃᖅᓯᒪᒻᒥᔪᖅ ᑖᕼᐊᐅᓯ ᓯᓚᖅᑐᖅᓴᕐᕕᔾᔪᐊᖓᓂᑦ (Dalhousie University) ᐊᒻᒪᓗ ᐱᔭᕇᓯᓯᒪᒋᓪᓗᓂ ᑎᒥᒥᒍᑦ ᐊᔪᕈᑎᓕᓐᓂᑦ ᐊᐅᓚᑦᑎᓂᕐᒥᑦ ᐳᕆᑎᔅ ᑲᓚᒻᐱᐊ ᓯᓚᖅᑐᖅᓴᕐᕕᔾᔪᐊᖓᓂᑦ (University of Northern British Columbia),  ᑕᐃᒪᖓᓂᑦ ᐃᓅᖃᑎᒥᓂᒃ ᐃᑲᔪᕆᐊᑦᓴᖅ ᖁᕕᐊᒋᔭᓕᒃ.

ᐊᓪᓚᕕᑦᑎᓄᑦ ᐃᖅᑲᓇᐃᔭᕆᐊᓚᐅᖏᓐᓂᕐᒥᓂᑦ, ᐊᕐᕌᒍᓄᑦ 9ᓄᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᑯᒫᓂᒃ ᖃᐅᔨᓴᖅᑎᓄᑦ ᐃᖅᑲᓇᐃᔭᖅᑎᐅᓚᐅᖅᑐᖅ ᓄᓇᕗᒻᒥ, ᐃᑲᔪᖃᑦᑕᓚᐅᖅᑐᖅ ᐃᖅᑲᓇᐃᔭᖅᑎᓂᑦ ᐋᓂᐊᕐᓂᑯᓂᑦ ᐅᕝᕙᓗᓃᖅ ᐱᕐᕈᐊᕿᓂᑯᓂᑦ.

ᓇᑦᓯᐅᖑᔭᐅᑎᓪᓗᒍ ᐅᓐᓄᓴᒃᑯᑦ, ᐱᓕᕆᖃᑎᖃᓗᐊᖏᒃᑯᓂ ᐅᐃᒥᓂᒃ ᐊᒻᒪᓗ ᒪᕐᕉᓐᓂᒃ ᕿᑐᕐᖓᖏᓐᓂᒃ, ᑳᐱᑐᕐᓗᓂ ᐃᓂᓪᓚᖓᑦᑎᐊᑐᐃᓐᓇᕋᔭᖅᑐᖅ ᐅᖃᓕᒫᖓᕐᒥᑦ ᐅᖃᓕᒫᕐᓗᓂ.

 

 

 

 

ᑭᒻ ᕚᔅᑐ

ᐊᐅᓚᑦᑎᔨ ᑐᓴᐅᒪᖃᑎᒌᒃᑐᓕᕆᓂᕐᒧᑦ ᑭᒃᑯᑐᐃᓐᓇᕐᓄᓪᓗ ᐅᔾᔨᕈᓱᓕᖅᑎᑦᑎᓂᖅ

ᑭᒻ ᐃᓅᓯᒪᔪᖅᓯ ᕼᐊᒥᑦ, ᑳᓕᐴᓐᓂᐊᒥᑦ, ᑭᓯᐊᓂᓕ, ᐃᓚᖏᑦ ᑲᓇᑕᒧᑦ ᐅᑎᓚᐅᖅᑐᓯᒪᔪᑦ ᑭᒻ ᐅᑭᐅᖃᓕᖅᑎᓪᓗᒍ ᒪᕐᕉᓐᓂᒃ. ᐊᖏᔪᖓᓗ/ᓄᑲᖓᓗ ᐊᓂᐊᓗ, ᑭᒻ ᐱᕈᓚᐅᖅᑐᑦ ᓅᕙ ᓯᑰᓯᐊᒥᑦ ᐊᒻᒪ ᐃᐅᓪᐴᑕᒥᑦ. ᑭᒻ ᐃᖃᓗᓐᓄᑦ ᑎᑭᔅᓯᒪᔪᖅ ᓰᑏᑉᐱᕆ 2017ᖑᑎᓪᓗᒍ ᐊᒻᒪ ᓄᑖᖑᒐᓗᐊᖅᑎᓪᓗᒍ ᐅᑭᐅᖅᑕᖅᑐᒧᑦ, ᑭᓯᐊᓂ ᓄᑕᖅᑲᓄᑦ ᑭᒡᒐᖅᑐᐃᔨᐅᓂᕐᒥᑦ ᐋᓪᓚᒋᔭᖃᙱᑦᑐᖅ ᒪᒃᑯᑦᑐᓄᓪᓗ. ᑕᐃᒪ, ᓱᓕ ᐱᒋᐊᓚᐅᖅᑎᓐᓇᒍ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᑐᐃᔨᒃᑯᓐᓄᑦ ᐱᓕᕆᔨᒋᔭᐅᓚᐅᖅᑐᖅ ᓂᐅᕐᕈᑎᖃᕐᓂᕐᒧᑦ ᐊᒻᒪ ᑐᓴᐅᒪᖃᑎᒌᑦᑐᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ ᕌᓄᑦ ᒥᒃᑖᓄᑦ ᐃᓪᓗᖓᓐᓄᑦ ᐃᑲᔪᖅᑏᑦ ᑮᓇᐅᔭᖅᑎᒍ® ᐃᐅᓪᐴᑕᐅᑉ ᓂᒋᐊᓂ ᐊᒻᒪ ᕿᑎᖅᐸᓯᐊᓂ ᐊᕐᕌᒍᓄᑦ ᑕᓪᓕᒪᓄᑦ ᐅᖓᑖᓄᓪᓗ!

ᑭᒻ ᐃᓕᓴᕆᔭᐅᔾᔪᑎᑖᖅᓯᒪᔪᖅ ᐱᔭᕇᕈᓯᐊᕐᒥᑦ ᑐᓴᐅᒪᖃᑎᒌᑦᑐᓕᕆᓂᕐᒧᑦ ᑳᒡᒍᕆᐅᑉ ᓯᓚᑦᑐᓴᕐᕕᕐᔪᐊᖓᓂᑦ ᐊᒻᒪ ᐃᓕᓴᕆᔭᐅᔾᔪᑎᖃᕐᒥᔪᖅ ᐱᕙᓪᓕᐊᔪᓂᑦ ᐅᓂᒃᑳᓕᐅᓂᕐᒥᑦ ᐃᐅᓪᐴᑕᑉ ᓂᒋᐊᓂᑦ ᓯᓚᑦᑐᓴᕐᕕᖓᓐᓂᑦ ᑐᓴᐅᒪᔾᔪᑎᓕᕆᓂᕐᒧᑦ (S.A.I.T) ᑭᒥ ᖁᕕᐊᒋᔭᖃᖅᑐᖅ ᐃᓕᖅᑯᓯᖃᑎᒌᙱᑦᑐᓂᑦ ᐃᓕᑉᐸᓪᓕᐊᓂᕐᒥᑦ, ᐊᐅᓪᓚᖃᑦᑕᓂᕐᒥᑦ ᐱᓇᓱᐊᒐᖃᐃᓐᓇᖅᑐᖅ ᓯᕗᓪᓕᐅᑎᑕᖏᓐᓂᑦ. ᑲᓇᑕᐅᑉ ᐅᑭᐅᖅᑕᖅᑐᖓᓐᓂᑦ ᕿᒥᕐᕈᒃᑲᓐᓂᕈᒪᔪᖅ ᐊᕐᕌᒎᓂᐊᖅᑐᓂᑦ.

ᑭᒻ ᐅᖃᖅᑐᖅ ᖁᔭᓕᕆᕋᖅᑐᓂ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᒃᑯᓐᓄᑦ ᐃᖅᑲᓇᐃᔮᖅᑖᕆᐊᒥᑦ ᐃᖅᑯᒪᕋᐃᒐᒥ ᐃᖅᑲᓇᐃᔭᕆᐊᕐᓂᐊᕐᓂᒻᒥᓂᒃ ᖁᕕᐊᓱᖃᑦᑕᖅᑐᖅ ᑖᒃᑯᐊ ᐱᓕᕆᐊᕆᔭᖏᑦ ᐱᐅᔪᓪᓚᕆᐅᓂᖏᓐᓄᑦ ᐃᑲᔪᕐᓂᕆᖃᑦᑕᖅᑕᖏᑦ ᒪᒃᑯᒃᑐᓂᑦ ᓄᓇᕗᒻᒥᐅᓂᑦ ᐊᒻᒪ ᐱᔪᓐᓇᐅᑎᒋᔭᖏᓐᓂᑦ. ᑖᒃᑯᐊ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᑐᐃᔨ ᑕᐃᒫᑦᑕᐅᖅ ᖁᕕᐊᓱᑉᐳᑦ ᑭᒻ ᐱᓕᕆᖃᑎᒋᔭᐅᓐᓂᕐᒪᑦ − ᐱᐅᒋᓪᓚᕆᑦᑕᕗᑦ ᐱᔪᒪᓂᖃᑦᑎᐊᓪᓚᕆᑦᑐᓂᑦ ᐊᒻᒪ ᑲᔪᖅᓯᒪᑦᑎᐊᕐᓂᖓᓄᑦ ᐊᓪᓚᕕᑦᑎᓐᓄᑦ ᐱᔪᒥᓇᖅᑎᑦᑎᖃᑦᑕᖅᑐᖅ ᐅᐸᒐᐃᒻᒪᑦ!

 

 

ᒦᒐᓐ ᐱᓕᐅ
ᒪᒃᑯᒃᑐᓂᒃ ᖃᓄᐃᓕᐅᖅᑎᑦᑎᓗᑎᒃ ᐃᓚᐅᑎᑦᑎᔪᓐᓇᕐᒪᖔᑕ ᖃᐅᔨᓴᖅᑎ

(2015-ᒥ ᐊᐅᔭᒃᑯᑦ)

ᓅᕙ ᔅᑰᓴᒥᐅᑕᒃᓴᔭᖅ, ᒦᒐᓐᓗ ᖃᑕᙳᑎᒌᓪᓗ ᓅᓚᐅᖅᓯᒪᕗᑦ ᐃᖃᓗᖕᓄᑦ 2004-ᖑᑎᓪᓗᒍ. ᐃᖃᓗᖕᒥᐅᑕᐅᔅᓲᔭᓕᖅᑎᓪᓗᒍ, ᒦᒐᓐ ᖁᕕᐊᒋᔭᖃᑦᑎᐊᓵᖅᐳᖅ ᐱᕈᖅᓴᑎᓪᓗᒍ ᓄᓇᕘᒥ. ᐃᖃᓗᖕᓂ ᐃᓕᓐᓂᐊᕌᓂᓚᐅᖅᓯᒪᓪᓗᓂ ᖃᑯᒍᑦᑎᐊᕐᓗ ᐃᓕᑕᕆᔭᐅᔾᔪᑎᑖᓛᓕᖅᖢᓂ Bachelor of Arts ᐃᓄᐃᑦ ᐱᔪᓐᓇᐅᑎᖏᑦ ᐱᓪᓗᒋᑦ Carleton ᓯᓚᑦᑐᖅᓴᕐᕕᒡᔪᐊᕐᒥ. ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᑎᓪᓗᒍ, ᒦᒐᓐ ᓂᕆᐅᒃᐳᖅ ᓄᓇᕗᒦᖏᓐᓇᓛᕈᒪᓪᓗᓂ ᐃᓄᐃᓪᓗ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᖏᓐᓇᕐᓗᓂ ᐊᐃᓯᒪᓗᓂ. 

ᒦᒐᓐ ᓇᕈᓇᒃᑲᒻᒪᕆᐊᓗᒃ ᓇᒧᙵᕈᓘᔭᖃᑦᑕᖅᓯᒪᑎᓪᓗᒍᓗ ᐊᓕᐊᓇᐃᒋᑦᑎᐊᖅᖢᓂᐅᒃ. ᓂᕆᐅᒋᔭᖃᖅᑐᖅ ᖃᑯᒍᒃᑲᓐᓂᖅ ᓱᓕ ᐆᒪᑎᓪᓗᒍ ᓄᓇᕐᔪᐊᓕᒫᖅ ᓇᕈᓇᒡᕕᒋᓚᐅᖅᓯᒪᔪᒪᓪᓗᓂᐅᒃ ᖃᐅᔨᐅᕋᑦᑎᐊᕐᓗᓂᒋᓪᓗ ᐊᔾᔨᒌᙱᑦᑑᑎᒻᒪᕆᐊᓗᐃᑦ ᐃᓕᖅᑯᓯᕆᔭᑦ ᐊᒻᒪ ᐱᐅᓯᕆᔭᐅᖃᑦᑕᕐᓂᑯᑦ.

ᐊᐅᔭᒃᑯᑦ ᐃᖅᑲᓇᐃᔭᖅᑎᐅᖃᑕᐅᑎᓪᓗᒍ ᓄᑕᖅᑲᓂᒃ ᒪᒃᑯᒃᑐᓂᒡᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓐᓂᒃ ᑕᑯᕚᓪᓕᕐᔪᐊᖅᓯᒪᓕᖅᑐᖅ ᒦᒐᓐ ᓴᖅᑭᑦᑎᓯᒪᓕᖅᖢᓂᓗ ᐱᔪᒃᓯᓐᓇᑦᑎᐊᖅᑐᒥᒃ ᓄᑕᖅᑲᑦ ᒪᒃᑯᒃᑐᓪᓗ ᐱᔪᓐᓇᐅᑎᖏᑦ ᐱᓪᓗᒋᑦ. ᖁᕕᐊᓱᑦᑎᐊᖅᑐᖅ ᑕᑯᔭᕆᐊᒃᓴᖅ ᐃᑲᔪᕆᐊᒃᓴᕐᓗ ᐱᕙᓪᓕᐊᓂᕆᔭᐅᔪᒧᑦ ᑎᑎᕋᕐᕕᖕᒥ ᑭᒡᒐᖅᑐᐃᔨᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᓄᓇᕘᒥ.

 

 

ᑭᓕᐅᕋ ᐋᑯᓗᔪᒃ
ᑐᓴᐅᒪᑎᑦᑎᓂᕐᒧᑦ ᐱᓕᕆᔨ

(ᐊᐅᔭᖅ 2016−ᒥ)

ᑭᓕᐅᕋ ᐋᑯᓗᔪᒃ  ᐸᓐᓂᖅᑑᕐᒥᐅᑕᐅᕗᖅ, ᓄᓇᕗᒻᒥ ᑕᐃᑲᓂᓗ ᐱᕈᖅᓴᖅᑕᐅᓚᐅᖅᓯᒪᓪᓗᓂ ᐊᓈᓇᖓᓄᑦ ᐃᓚᒥᓄᓪᓗ. ᖁᑦᑎᖕᓂᖅᓴᒥ ᐃᓕᓐᓂᐊᕌᓂᐊᓪᓚᓚᐅᖅᖢᓂ, ᑭᓕᐅᕋ ᖃᔅᓯᑲᓪᓚᖕᓂ ᐊᓐᑎᐅᕆᐅᒥ ᓄᓇᖃᓚᐅᖅᓯᒪᔪᖅ ᐊᔪᕈᓐᓃᖅᓴᕈᒪᓪᓗᓂ ᐃᓕᓐᓂᐊᕐᕕᓪᓚᑦᑖᒥ ᐃᓕᓐᓂᐊᕌᓐᓚᓚᐅᖅᖢᓂ ᐃᓕᓐᓂᐊᒃᑲᓐᓂᕐᓂᕐᒥᒃ. ᐃᓕᓐᓂᐊᖃᑦᑕᓚᐅᖅᑐᖅ ᐱᓪᓗᓂᓗ ᖃᔅᓯᑲᓪᓛᕐᔪᖕᓂᒃ ᓇᓗᓇᐃᒃᑯᑕᓂᒃ ᓄᓇᕗᑦ ᓯᕗᓂᒃᓴᕗᒃᑯᓐᓂᑦ ᐅᕙᓂ, Algonquin College ᐃᓕᓐᓂᐊᕆᐅᖅᓴᓕᓵᖅᑐᓄᓪᓗ ᐃᓕᓐᓂᐊᕐᓂᕐᒧᑦ ᐱᓕᕆᐊᖑᕙᒃᑐᒥᒃ ᐅᕙᓂ, Georgian College. ᑭᓕᐅᕋ ᒫᓐᓇ ᐊᔪᕈᓐᓃᖅᓴᖅᐸᓪᓕᐊᕗᖅ ᐃᒪᐃᑦᑐᖅᑖᕆᓛᖅᑕᒥᓄᑦ, Bachelor of Education, ᐅᑯᑎᒎᓇᒃ, ᓄᓇᕗᒻᒥ ᐃᓕᓴᐃᔨᕈᖅᓴᓂᕐᒧᑦ ᐱᓕᕆᐊᖑᕙᒃᑐᒥ ᐃᖃᓗᓐᓂ. ᐱᖓᔪᖓᓂᒃ ᐊᕐᕌᒍᒥᒃ ᐃᓕᓐᓂᐊᕐᓂᐊᓕᖅᑐᖅ ᓯᑎᐱᕆ 2016-ᖑᓕᖅᐸᑦ, ᑖᓐᓇᓗ ᐊᕐᕌᒍᓄᑦ ᑎᓴᒪᓄᑦ ᐱᓕᕆᐊᖑᕙᒃᑐᓂ.

ᐊᓕᐊᓇᐃᒋᔭᖓ ᐃᓚᒥᓂᒃ ᐃᓅᖃᑎᖃᕆᐊᒃᓴᖅ ᐃᖃᓗᖕᓂ ᐸᓐᓂᖅᑑᕐᒥᓗ, ᐊᐅᓪᓚᖅᓯᒪᖃᑎᖃᖅᑐᓂ ᐃᑦᑐᕐᒥᓂᒃ ᓂᖏᐅᕐᒥᓂᓪᓗ ᐊᐅᔭᒃᑯᒃ, ᓇᒧᙵᐅᕙᓪᓕᐊᑲᑕᕈᓘᔭᖅᑐᓂ ᐊᔾᔨᓕᐅᕆᑲᑕᒃᑐᓂᓪᓗ. ᑭᓕᐅᕋ ᐊᓐᓂᕆᔭᖃᑦᑎᐊᖅᑐᖅ ᐃᓅᓂᕐᒥᓂᒃ ᐃᓕᖅᑯᓯᕆᔭᐅᕙᒃᑐᓂᒃ ᐊᒻᒪᓗ ᖃᐅᔨᒃᑲᓐᓂᕈᒪᓇᔭᑦᑎᐊᖅᑐᓂ ᓄᓇᖃᖅᑲᖅᑐᑦ ᐃᓕᖅᑯᓯᖏᓐᓂᒃ ᐅᑭᐅᖅᑕᖅᑐᒥ ᓄᓇᓕᐅᖃᑎᒌᒃᐸᒃᑐᓂᒃ.

ᑭᓕᐅᕋ ᐅᖃᖅᑐᓂ ᐃᓚᒋᔭᐅᓂᕐᒥᓄᑦ ᑭᒡᒐᖅᑐᐃᔨᐅᖃᑕᐅᓪᓗᓂ ᓄᑕᖅᑲᓪᓗ ᒪᒃᑯᒃᑐᓪᓗ ᑎᑎᕋᕐᕕᖓᓂ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᓂ ᐃᖅᑲᓇᐃᔭᕐᓂᕐᒥᓄᑦ ᐃᑲᔪᖃᑦᑕᖅᓯᒪᕗᖅ ᑐᑭᓯᐅᒪᓕᕐᓂᕐᒥᒃ ᖃᓄᖅ ᐱᒻᒪᕆᐅᑎᒋᖕᒪᖔᑕ ᓄᑕᖅᑲᑦ ᐱᔪᓐᓇᐅᑎᒋᔭᖏᑦ ᖃᓄᕐᓗ ᑕᒪᑦᑕ ᐱᕚᓪᓕᖅᓯᒪᓕᕈᓐᓇᕐᒪᖔᑦᑕ ᑕᒪᒃᑯᓂᖓ ᐅᔾᔨᕐᓇᖅᓯᑎᑦᑎᓂᐊᕈᓐᑕ ᐃᒃᐱᒋᑦᑎᐊᕐᓂᐊᕈᑦᑎᒍᓗ.

ᑭᓕᐅᕋ ᓇᒃᓴᖅᐳᖅ ᓴᙱᔪᓂᒃ ᐋᖅᑭᒃᓱᐃᔪᓐᓇᕐᓂᕐᒧᑦ ᐱᕙᒌᔭᕈᓐᓇᕐᓂᕐᒧᓪᓗ ᐊᔪᙱᓐᓂᕐᓂᒃ RCY−ᑯᑦ ᑎᑎᕋᕐᕕᖓᓄᑦ. ᐱᒃᑯᓕᔪᒻᒪᕆᐅᕗᒍᑦ ᑖᓐᓇ ᐅᕙᑦᑎᓐᓄ ᐃᓚᓕᐅᑎᓯᒪᔪᓐᓇᕐᓂᖓᓂᒃ! 

 

ᑭᐅᕈᓚᐃᓐ ᐊᖓᓕᒃ
ᐱᐅᓯᖕᓄᑦ ᖃᐅᔨᓴᖅᑎᐅᑉ ᐃᑲᔪᖅᑎᐊ
(ᐊᐅᔭᖅ 2017−ᒥ)

ᑭᐅᕈᓚᐃᓐ ᐊᖓᓕᒃ ᐊᓕᐊᓇᐃᒋᔭᖃᑦᑎᐊᖅᑐᖅ ᐃᑲᔪᖅᑐᐃᓂᖕᒥᑦ ᐊᓯᒥᓂᒃ ᑐᓂᓯᓂᖕᒥᒡᓗ. ᖁᕕᐊᒋᔭᓕᒻᒪᕆᒃ ᐱᓕᕆᖃᑎᖃᖕᓂᖕᒥᑦ ᓄᑕᖅᑲᓂᑦ ᐊᑐᓕᖅᖢᓂᐅᒡᓗ ᐱᔪᒪᓚᐅᖅᑕᓂᑦ ᐃᓕᓴᐃᔨᙳᕐᓂᖕᒥᑦ ᓯᕗᒧᐊᒃᖢᓂ ᖁᕝᕙᓯᖕᓂᖅᐹᒥᑦ ᐃᓕᓐᓂᐊᖕᓂᖕᒥᑦ ᓄᓇᕗᒻᒥᑦ ᐃᓕᓴᐃᔨᐅᓂᒃᓴᒧᑦ ᐃᓕᓐᓂᐊᒐᒃᓴᑎᒍᑦ. ᑭᐅᕈᓚᐃᓐ ᐊᐃᑉᐸᕆᓕᖅᑕᖓᓄᑦ ᐊᕐᕌᒍᖓᓄᐊᖕᓂᐊᓕᖅᑐᖅ ᐃᓕᓐᓂᐊᕐᑕᒥᓂᒃ ᓯᑎᐱᕆ 2017−ᒥᑦ.

ᐊᕐᕕᐊᓃᓐᓂᑰᓪᓗᓂ, ᖃᒪᓂ’ᑐᐊᒥᓪᓗ, ᐃᖃᓗᖕᓃᖏᓐᓇᐸᓗᒃᖢᓂ, ᑭᐅᕈᓚᐃᓐ ᓄᓇᕗᒻᒦᑦᑐᖅ ᐃᓅᓯᓕᒫᒥᓂᒃ.  ᑭᐅᕈᓚᐃᓐ ᐊᓕᐊᓇᐃᒋᔭᓕᒃ ᓄᓇᕗᒻᒦᖦᖢᓂ – ᐱᓗᐊᖅᑐᒥᑦ ᑲᔾᔮᖕᓇᖕᓂᖓ ᓄᓇᐅᑉ, ᐆᒪᔪᖃᑦᑎᐊᖕᓂᖓᓂ, ᐃᓕᖅᑯᓯᖕᒥᑦ, ᐃᓄᖏᓐᓂᒡᓗ. ᐊᓕᐊᓇᐃᒋᖕᒥᔭᖏᑦ ᒥᖅᓱᖕᓂᖅ, ᓂᖅᖠᐅᕐᓂᖅ, ᐃᓚᒥᓃᑲᑕᒃᖢᓂᓗ, ᐱᓗᐊᖅᑐᒥᑦ ᕿᑐᙵᒥᓂᒃ.

ᑭᐅᕈᓚᐃᓐ ᖃᐅᔨᓴᕈᓐᓇᖕᓂᖓ ᑐᓴᖅᑎᑦᑎᔪᓐᓇᖕᓂᖓᓗ ᐱᒻᒪᕆᐅᔪᓂᑦ ᐃᓱᒪᒋᔭᓂᑦ ᐃᖅᑲᓇᐃᔭᖃᑎᖏᓐᓂᑦ ᐃᓚᒋᔭᐅᕌᕐᔪᒃᐳᖅ ᑭᐅᕈᓚᐃᓐ ᑐᙵᓱᒃᑎᑕᐅᓪᓗᓂ ᐃᓚᑖᖑᖕᒪᑦ ᑭᒡᒐᖅᑐᐃᔨᒃᑯᑦ ᑎᑎᕋᕐᕕᐊᓄ 2017−ᒥᑦ ᐊᐅᔭᒃᑯᑦ ᐃᓕᓐᓂᐊᕐᑎᐅᓪᓗᓂ.