ᑭᓱ ᐃᑲᔪᖅᐸ ᐅᕙᑦᑎᓐᓂ


ᑕᐅᓯᐅᙱᑦᑐᒥᒃ ᑐᑭᒧᐊᒍᑎᖃᖅᐳᒍᑦ ᖃᓄᐃᓕᐅᖃᑦᑕᖅᑕᑦᑎᓐᓂᒃ ᖃᓅᖃᑦᑕᕐᓂᑦᑎᓐᓂᒡᓗ. ᐅᖃᐅᓯᕆᔪᒪᕙᕗᑦ ᒪᑯᐊ ᐃᑲᔪᕐᓂᖏᓐᓂᒃ ᐅᕙᑦᑎᓐᓂ.

ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐱᖁᔭᖓ

ᓄᓇᕗᒻᒥ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐱᖁᔭᖓ ᒪᓕᒐᐅᕗᖅ ᓴᖅᑭᑦᑎᔪᖅ ᐊᒡᓚᒡᕕᑦᑎᓐᓂ. ᐊᓂᒡᒎᑎᑕᐅᓚᐅᖅᑐᖅ 2013-ᒥᑦ. ᑖᓐᓇ  ᒪᓕᒐᖅ ᓇᓗᓇᐃᖅᐳᖅ ᖃᓄᐃᓕᐅᕈᓐᓇᕐᓂᑦᑎᓐᓂᒃ ᖃᓄᐃᓕᐅᕈᓐᓇᙱᓐᓂᑦᑎᓐᓂᒡᓗ. ᐅᖃᐅᓯᖃᖅᑐᖅ ᐱᓕᕆᐊᒃᓴᑦᑎᓐᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᖃᓄᐃᓕᐅᕆᐊᖃᕐᒪᖔᑦ ᐃᑲᔪᕋᓱᐊᕐᓗᑎᒃ ᖃᓄᐃᓕᐅᕈᑎᒋᔭᑦᑎᓐᓂᒃ.

ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ

ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ (1989) ᓇᓗᓇᐃᖅᐳᖅ ᐱᔪᓐᓇᐅᑎᒋᔭᐅᔪᓂᒃ ᓱᕈᓯᕐᓂᑦ ᓄᓇᕐᔪᐊᓕᒫᒥᑦ. ᓇᓗᓇᐃᕆᕗᖅ ᒐᕙᒪᐃ ᐃᓚᒌᓪᓗ ᖃᓄᐃᓕᐅᕆᐊᖃᕐᒪᖔᑦ ᐃᑲᔪᖅᓯᖁᓪᓗᒋᑦ ᓱᕈᓯᕐᓂᑦ ᐱᔪᓐᓇᐅᑎᒋᔭᐅᔪᓂᒃ. ᑲᓇᑕ ᐊᑎᓕᐅᓚᐅᖅᑐᖅ ᐱᓕᕆᐊᖑᔪᒥᑦ 1991-ᒥᑦ. ᐅᒡᕙ ᓱᕈᓯᕐᓄᑦ ᑐᕌᖓᔪᖅ ᐅᖃᓕᒫᒐᖅ ᐱᓕᕆᐊᖑᔪᒧᑦ.

ᐃᓄᐃᑦ ᐃᓕᖅᑯᓯᖏᓐᓂᒃ ᐱᒻᒪᕆᐅᒋᔭᐅᔪᑦ

ᐃᓄᐃᑦ ᐃᓕᖅᑯᓯᖏᓐᓂᒃ ᐱᒻᒪᕆᐅᒋᔭᐅᔪᑦ ᐃᑲᔪᕈᑕᐅᔪᓐᓇᖅᐳᖅ ᓄᓇᕗᒻᒥᐅᓂ ᖃᓄᖅ ᐃᓅᓯᖃᖃᑎᒌᑦᑎᐊᕈᓐᓇᕐᒪᖔᑦ ᐊᕙᑎᒥᒡᓗ. ᐊᒡᓚᒡᕕᒃᐳᑦ ᐊᑐᖅᐳᑦ ᑕᒪᒃᑯᓂᖓ ᐱᒻᒪᕆᐅᒋᔭᐅᔪᓂᒃ. ᐊᑐᖃᑦᑕᖅᑕᕗᑦ 8-ᖑᔪᑦ ᑐᙵᕖᑦ ᓇᖕᒥᓂᖅ ᐱᓕᕆᐊᕆᔭᑦᑎᓐᓄ. ᑕᒪᒃᑯᐊ ᑐᙵᕖᑦ ᐊᑐᓕᖅᑎᑕᐅᖅᑳᓚᐅᖅᑐᑦ ᓄᓇᕗᑦ ᒐᕙᒪᒃᑯᓐᓂ. 

ᓂᐲᑦ!

ᐃᑲᔪᖅᑕᐅᖕᒥᔪᒍᑦ “ᓂᐱᒋᔭᐅᔪᒥᑦ ᓱᕈᓯᕐᒥᑦ.” ᑖᓐᓇ ᑐᑭᖃᖅᐳᖅ ᐃᓕᑕᖅᓯᓯᒪᓂᑦᑎᓐᓂ ᒪᒃᑯᒃᑐᑦ ᐃᓱᒪᒋᔭᒥᖕᓂᑦ ᐅᖃᕈᓐᓇᖅᑐᓄᑦ ᐊᒻᒪᓗ ᒐᕙᒪ ᐃᓱᒪᒋᔭᖃᕆᐊᖃᖅᖢᓂ ᒪᒃᑯᒃᑐᓂᑦ ᐃᓱᒪᒋᔭᐅᔪᓂᒃ ᖃᓄᐃᔾᔪᑕᐅᕙᒃᑐᓂᑦ.
ᐊᒡᓚᒡᕕᑦᑎᓐᓂ, ᑐᑭᖃᖅᐳᖅ ᒪᒃᑯᒃᑐᑦ ᐃᑲᔪᖃᑦᑕᕐᓂᕐᓂᖏᓐᓂᒃ ᐱᓕᕆᐊᕆᔭᑦᑎᓐᓂ - ᖃᐅᔨᒋᐊᕋᓗᐊᕈᑎᒃ ᐅᕙᑦᑎᓐᓄ ᐃᑲᔪᖅᑕᐅᔪᒪᓗᑎᒃ ᐃᓛᒃᑰᖓᔭᕆᐊᖃᖅᑐᒧᑦ, ᖃᓄᐃᔾᔪᑕᐅᔪᓄᓘᓐᓃᑦ ᐊᒥᓱᓂᒃ ᒪᒃᑯᑦᑐᓄᑦ.

ᐊᒡᓚᒡᕕᒃᐳᑦ ᓈᓚᖃᑦᑕᕆᕗᑦ ᓂᐱᒋᔭᐅᔪᓂᒃ ᒪᒃᑯᒃᑐᓂᑦ ᒪᒃᑯᒃᑐᓄᑦ ᐅᖃᐅᔾᔪᐃᔨᐅᑉ ᐱᓕᕆᐊᖓᑦᑎᒍᑦ.

CCCYA ᑲᓇᑕᒥ ᑭᒡᒐᖅᑐᖅᑏᑦ ᐊᑐᐊᒐᒃᓴᑦ ᐋᖅᑭᒃᑕᐅᓯᒪᔪᑦ

ᑲᓇᑕᒥ ᑲᑎᒪᔩᑦ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓄᑦ (CCYA) ᑲᓇᑕᓕᒫᒧ ᑭᒡᒐᖅᑐᐃᔨᓄᑦ ᐊᑐᕈᓯᖏᑦ ᐃᑲᔪᖃᑦᑕᕆᕗᑦ ᐊᒡᓚᒡᕕᑦᑎᓐᓄ. ᑕᒪᒃᑯᐊ ᐊᑐᕈᓰᑦ ᓇᓗᓇᐃᖃᑦᑕᖅᐳᑦ ᐱᓕᕆᐊᖃᑦᑎᐊᖏᓐᓇᕋᓗᐊᕐᒪᖔᑦᑕ ᑭᒡᒐᖅᑐᐃᓂᑦᑎᓐᓄ.

CCYA ᐋᖅᑭᒃᓯᒪᕗᖅ ᑭᒡᒐᖅᑐᐃᔩᑦ ᑲᓇᑕᓕᒫᒥ ᓄᓇᒋᔭᐅᔪᓂᙶᖅᑐᓂᒃ. ᑕᒪᒃᑯᐊ ᑭᒡᒐᖅᑐᐃᔩᑦ ᑲᑐᔾᔨᖃᑎᒌᖃᑦᑕᖅᐳᑦ ᖃᓄᐃᔾᔪᑕᐅᒐᔪᒃᑐᓂᑦ. ᐊᒡᓚᒡᕕᒃᐳᑦ ᐃᓚᐅᖃᑕᐅᓕᓚᐅᖅᑐᑦ CCYA-ᑯᓐᓂᑦ 2014-ᖑᑎᓪᓗᒍᑦ.